A Ieova “e se Fakailoga Tino”

Kai pokotia aka eiloa koe i te fakakese‵kesega o tino? Kai isi aka eiloa se taimi ne seki talia ei sau fakamolemole, se talia ke fai se galuega, io me ‵kilo fatauvā atu ki a koe ona ko te ‵lanu o tou pa‵kili, matakāiga mo te koga ne tupu aka ei koe, io me ko tou tulaga i mua o tino? Kafai ne pokotia koe i ei, ne tupu foki a te mea tenei ki nisi tino e tokouke. Kae tenei eiloa a te tala ‵lei: A vaegā faifaiga fakamasiasi penā e se maua i te lagi, faitalia te lauiloa i te lalolagi nei. A te “Atua e se fakailoga tino,” ko pati a te apositolo ko Petelu kolā ne fai mo te loto talitonu.—Faitau te Galuega 10:34, 35.

Ne fai atu ne Petelu a pati konā i te fale o se tino mai Fenua Fakaa‵tea e igoa ki a Konelio. A Petelu, se tino Iutaia, ne ola i te taimi telā ne ‵kilo atu ei a tino Iutaia ki tino mai Fenua Fakaa‵tea e pelā me ne tino lai‵lai, tela la, e se talia eiloa so se fesokotakiga e fai mo latou. Kaia la ne nofo a Petelu i te fale o Konelio? Ona ko Ieova ne fakatoka ne ia a te fai‵patiga tenā! Ne maua ne Petelu se fakaasiga mai te Atua telā ne fai atu ki tou tagata: “Sa toe taku ne koe me e lai‵lai a mea kolā ko oti ne faka‵ma ne te Atua.” E se iloa ne Petelu me i te aso mai mua atu, ne maua foki ne Konelio se fakaasiga, telā ne fakatonu atu te agelu ki tou tagata ke uga atu se fekau ki a Petelu ke vau. (Galuega 10:1-15) I te iloaga ne Petelu me ne aofia a Ieova i te mea tenei, ne seki mafai ei o taofi aka a tena faipati atu.

Muna a Petelu: “Nei la, ko malamalama faka‵lei au me i te Atua e se fakailoga tino.” (Galuega 10:34) A te pati Eleni telā ne ‵fuli ki te “fakailoga tino” e fakauiga tonu loa ki te “fiafia ki nisi tino i lō nisi tino.” (The Kingdom Interlinear Translation of the Greek Scriptures) E uiga ki te tugāpati tenei, e fakamatala mai se tino akoga e tokotasi: “E fakasino atu a te mea tenei ki se famasino telā e kilo atu ki mata o se tagata kae fai se ikuga, e se fakavae ki te tulaga o te fakamasinoga, kae ki luga i tena fiafia io me ko te sē fiafia ki te tagata.” E se fakasilisili ne te Atua a te suā tino i luga i te suā tino ona ko te telega, fenua, tulaga i mua o tino, io me ko so se pogai aka.

I lō te fai penā, e lavea ne Ieova a mea i ‵tou loto. (1 Samuelu 16:7; Faataoto 21:2) Ne toe fai mai a Petelu: “Kae ko te tino mai so so fenua telā e mataku ki a ia kae fai mea tonu e talia eiloa ne ia.” (Galuega 10:35) A te uiga o te mataku ki te Atua ko te āva, fakaaloalo, mo te talitonu ki a ia, kae ‵teke atu ki so se mea telā e fakafanoanoa atu ki a ia. A te fai o te mea tonu e aofia i ei a te loto fiafia o fai a te mea telā e tonu i mua o te Atua. E fiafia a Ieova ki te tagata telā e ‵fonu tena loto i te mataku fakaaloalo telā e fakamalosi aka ei a ia ke fai a te mea tonu.—Teutelonome 10:12, 13.

Kafai ne pokotia koe i te fakakese‵kesega o tino io me ko te fakailoga tino, se mea ‵lei ke fakamalosi aka tou loto ne pati a Petelu e uiga ki te Atua. E ‵futi mai ne Ieova a tino i atufenua katoa ki te tapuakiga tonu. (Ioane 6:44; Galuega 17:26, 27) E fakalogologo kae tali mai a ia ki ‵talo o ana tino tapuaki faitalia olotou telega, fenua, io me ko olotou tulaga. (1 Tupu 8:41-43) E tali‵tonu tatou me kafai e kilo mai a Ieova mai te lagi, e lavea fua ne ia te kaukāiga e tasi—te kaukāiga o tino. E mata, e fia tauloto koe ki mea e uke atu e uiga ki te Atua sē fakailoga tino tenei?