E Mafai ne Koe o Fai a Mea e Uke Atu o Fakailoa ki Nisi Tino?

Ne fia‵fia malosi a tino kolā ne kilo‵kilo ki te ata gali e seai se leo telā e fakaulutala penei, A Trip Down Market Street i te fakaasimaiga o te olaga i aso takitasi e pelā mo te olaga i San Francisco, U.S.A., i te kamataga o te 20 senitenali. Ne faka‵piki ne tino faite ata se mea pei-ata e vili ki lima mai mua o se ka e tele i luga i uaea kae fakasaga ki te auala. Ne lavea i loto i te ata a ka e toso ne solofanua mo vaegā ka i aso taumua, e pelā foki mo tino e ‵togi mea i sitoa mo tamaliki tāgata ‵togi nusipepa e fai a mea masani i olotou olaga i aso takitasi.

A te mea telā e fakafanoanoa malosi ei te ata me ne puke i a Apelila 1906, mai mua malie o te mafuie fakamataku mo te afi i a Apelila 18 telā ne ‵mate i ei te fia afe o tino kae toeitiiti kae fakamasei i ei a te koga tenā o te fa‵kai. E se taumate, a nisi tino kolā ne lavea atu i te ata e fia fua aso ne ola i ei. “E lavea fua ne au a tino i ei,” ko pati a Scott Miles, se fanau a se tino fai ata e tokotasi, “kae e se iloa eiloa ne latou a te mea telā ka tupu ki a latou. Kae seai se mea e mafai o fai ne koe kae na ko te alofa atu fua ki a latou.”

E mafai foki o isi ne mea tai ‵pau e ‵tupu i ‵tou aso nei. E se mafai foki o fesoasoani atu tatou ki ei kae na ko te a‵lofa i ‵tou tuakoi. I aso takitasi, e ‵saga eiloa latou o fai olotou mea masani e aunoa mo te iloa o mea kolā ka ‵tupu ki a latou​—te fakaseaiga o te olaga tenei mo te auala e ola ei latou. E ‵kese mo se mafuie telā e se mafai o lavea, koi isi eiloa se avanoaga foliki koi ‵toe ke fakailoa atu ki ‵tou tuakoi e uiga ki te aso o te fakamasinoga a Ieova. E se taumate ne fakaavanoa ne koe ou taimi ke kau ki te galuega talai mai fale ki fale i vaiaso takitasi, kae mata, e mafai o uke atu au mea e fai ke fakailoa atu ki nisi tino?

NE LOTO FIAFIA KAE TOKA FAELOA A IESU O TALAI

E tāua te fakaakoakoga a Iesu me e loto fiafia kae toka faeloa a ia o talai. Ne talai a ia ki so se tino e fetaui mo ia, pelā mo te tino ao lafoga ne fakaseke ne ia i te auala io me ko te fafine ne fetaui mo ia i te vaikeli i te taimi ne manava ei a ia i se fakatutonu. (Luka 19:1-5; Ioa. 4:5-10, 21-24) Kafai foki ne manako a ia o malōlō malie, ne loto fiafia eiloa a Iesu o sē malōlō ko te mea ke akoako atu a ia ki nisi tino. Ne fai ne te alofa ki ana tuakoi ke uke atu a taimi e molimau atu ei a ia i lō te molimau atu i ne mō taimi fua. (Male. 6:30-34) Se a te auala ne fakaakoako atu ei ki te loto fiafia mo te toka faeloa o Iesu i aso nei?

NE KAUSAKI ATU LATOU I SO SE AVANOAGA

E nofo a Melika i se fale e lasi te puipuiga ki ei. A te tokoukega o ana tuakoi ne tamaliki a‵koga mai fenua fakaa‵tea kolā e se tusi olotou igoa mo napa o olotou selefoni i te tusi telefoni i te talāluma. E loto fakafetai tou fafine ki te avanoaga ko maua ne ia ke kamata a sau‵talaga faka-te-agaga mo tino i te talāluma mo te elevator. Muna a tou fafine, “Ne kilo atu au ki ei e pelā me ko toku koga talai.” E aveave ne Melika a tusi i ‵gana kese‵kese, kae ne talia ne tino e tokouke a tamā pepa mo mekesini. Ne fai foki ne ia ke ‵saga atu a tino ki ‵tou Web site, ko te jw.org. Ko oti ne kamata ne tou fafine a nāi akoga faka-te-Tusi Tapu.

Ne matapulapula foki a Sonia o talai ki so se tino e mafai o talai a ia ki ei. E galue tou fafine i se fale āsi tino ma‵saki a se tokitā, kae ne fai ne ia se fakamoemoega ke tuku atu se molimau māea ki tino taki tokotasi kolā e ga‵lue tasi mo ia. Te mea muamua, ne fakamāumāu ne ia ne taimi o tauloto ki manakoga mo mea kolā e fia‵fia ki ei a tino taki tokotasi. Oti aka, fakaaoga ei ne ia tena taimi ‵kai i te tutonu o ‵sala atu ki a latou taki tokotasi ke fai se sau‵talaga faka-te-agaga. Kae ne mafai ne Sonia o kamata akoga faka-te-Tusi Tapu e lua. E palani foki tou fafine o fakaaoga a nisi taimi manava o ia o faipati ki tino kolā e fakatalitali ki olotou taimi āsi.

FAKAAOGA FAKA‵LEI OU AVANOAGA

Ne taku ne se tino e tokotasi telā ne sao mai i te mafuie telā ne poko i te 1906 me “ko te ‵toe fakalavelave matagā eiloa ne tupu ki kogā koga io me se fa‵kai.” E ui i ei, ko pili o sē tāua a fakalavelave katoa māfai e faka‵tusa ki te aso o te taui ma sui telā ka oko mai ki luga i a latou katoa “kolā e se iloa ne latou te Atua.” (2 Tesa. 1:8) E manako malosi a Ieova ko tino ke ‵fuli olotou mafaufau mo loto kae ‵saga mai ki te fekau telā ne fakailoa atu ne ana Molimau.​—2 Pe. 3:9; Faka. 14:6, 7.

E maua ne koe te tauliaga o faka‵pula a mata o tino ke lavea ne latou a te fakamataku o ‵tou taimi nei kae fesoasoani atu ki a latou ke ‵fuli kea‵tea mai manakoga kaima‵nako kolā e fia‵fia ki ei ko te mea ke ‵sala atu latou ki a Ieova. (Sefa. 2:2, 3) E mata, e mafai ne koe o fakaaoga so se avanoaga ke talai atu ki tino e ga‵lue mo koe, ki ou tuakoi, mo tino kolā e fetaui mo koe i au fanofanoga o fai au mea i aso takitasi? E mata, ka fai ne koe a mea e uke atu o fakailoa atu ki nisi tino?