TALI KI FESILI MAI TE TUSI TAPU

Ko oi ka olo ki te lagi, kae kaia?

E ma‵nako eiloa a te fia miliona o tino ke ōla latou i te lagi. Ne fai atu a Iesu me ka olo atu ki ei ana apositolo fakamaoni. A koi tuai o mate a ia, ne folafola mai ne ia me ka fakatoka ne ia se koga mō latou fakatasi mo tena Tamana faka-te-lagi.​—Faitau te Ioane 14:2.

Kaia ka toe faka‵tu aka ei a tino mai te lalolagi ke ola i te lagi? Ne a mea ka fai ne latou i konā? Ne fai atu a Iesu ki ana apositolo me ka fai latou mo tupu. Ka pule atu latou ki luga i te lalolagi.​—Faitau te Luka 22:28-30; Fakaasiga 5:10.

E mata e olo atu a tino ‵lei katoa ki te lagi?

I te ukega o fenua, ne nai tino fua e fai mo fai ne tino pule. Ona ko te mea e toe faka‵tu aka ne Iesu a tino ki te ola i te lagi ko te mea ke mafai o pule ifo latou ki luga i te lalolagi, e fakamoe‵moe eiloa tatou me ne nai tino fua e filifili aka. (Luka 12:32) E fai mai i te Tusi Tapu a te aofaki mautinoa telā ka pule fakatasi mo Iesu.​—Faitau te Fakaasiga 14:1.

E se ko tino fua kolā e olo ki te lagi ka maua ne latou se taui ‵lei. Ka maua foki ne tino fakamaoni mai lalo i te Malo o Iesu a te ola se-gata-mai i luga i te lalolagi telā ka fakafou ke fai mo fai te palataiso. (Ioane 3:16) Ka ūlu atu a nisi tino ki loto i te Palataiso me ka ‵sao atu latou i te fakaseaiatuga o te olaga masei tenei. Ka oko atu ki ei a nisi tino e auala i te toetuga.​—Faitau te Salamo 37:29; Ioane 5:28, 29.