MATAUPU I TE ‵KAVA | TE MALO O TE ATUA—E PEFEA TE TĀUA KI A KOE?

Te Malo o te Atua e Tāua Pefea ki a Koe?

Kāti ko oti ne iloa ne koe mai mataupu mai mua me e fakatāua malosi ne Molimau a Ieova a te Malo o te Atua. Kae kāti ne fiafia koe ki nisi fakamanuiaga mai te Malo o te Atua kolā ne sau‵tala ki ei muamua. E se gata foki i ei ne mafaufau koe me i folafolaga konā ko tō ‵gali ke talitonu koe ki ei.

Se mea poto ke iloilo muamua ne koe a mea i lō te talitonu ki mea katoa e lagona ne koe. (Faataoto 14:15) I te feitu tena, e mafai ei o fai koe pelā mo tino Pelea.a I te taimi muamua ne lagona ei ne tino Pelea a te tala ‵lei o te Malo, ne talia ne latou a mea ne lagona ne latou, kae ne seki talia ne latou ona ko te mea ne ma‵nako fua latou ke ‵tonu a fakamatalaga konā. I lō te fai penā, ne sukesuke faka‵lei latou ki te Tusi Tapu, ke fakatalitonu aka me e “‵tonu a mea konei.” (Galuega 17:11) I nisi tugāpati, ne faka‵tusatusa ne te kau Pelea a te tala ‵lei ne lagona ne latou mo te mea e fakaasi mai i te Tusi Tapu. Fakamuli ifo, ne iloa aka ei ne latou me i te ‵tala lei ne fakavae ‵mautakitaki eiloa ki te Muna a te Atua.

E fia‵fia eiloa a Molimau a Ieova o ‵kami atu koe ke fai foki penā. E auala i akoga faka-te-Tusi Tapu sē ‵togi kolā e fai ne matou, e maua eiloa ne koe a te avanoaga ke iloilo aka a mea e akoako mai i te Tusi Tapu, mo mea e tali‵tonu ki ei a Molimau a Ieova e uiga ki te Malo o te Atua.

Mai tafa o tau taulotoga e uiga ki te Malo o te Atua, ka fesoasoani atu foki a tau sukesukega ki te Tusi Tapu ke maua ne koe a tali ki toe fesili tāua i te olaga.

Ne māfua mai fea tatou?
Se a te pogai o te olaga?
Kaia ne talia ei ne te Atua a logo‵maega?
Ne a mea e ‵tupu māfai ko ‵mate tatou?
E mata, ka fakaseai atu a te lalolagi?
E maua pefea ne tatou se olaga fiafia i te kāiga?

E sili i mea katoa, a te sukesuke ki te Tusi Tapu e fai ne ia koe ke “fakapilipili atu ki te Atua.” (Iakopo 4:8) A te momea aka o te pili atu o koe ki te Atua, ko te lasi foki o tou talitonu ki mea ‵lei ka fai ne te Malo o te Atua mō koe—e se mo te taimi fua nei kae ki te se-gata-mai eiloa. Ne ‵talo atu a Iesu penei ki tena tamana: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, penā foki loa mo te tino telā ne uga mai ne koe, ko Iesu Keliso.”—Ioane 17:3.

E mafai o fakaaoga ne Molimau a Ieova a te tusi tenei ke suke‵suke fakatasi koutou ki te Tusi Tapu.

Ke fakamolemole atu mō se akoga faka-te-Tusi Tapu sē ‵togi, fesili atu ki se tokotasi o Molimau a Ieova io me faka‵fonu a te pepa i te www.jw.org. (Fano ki te FAKAMOLEMOLE MŌ SE AKOGA FAKA-TE-TUSI TAPU i te itulau kamata)

a A Pelea se fa‵kai e tasi i Maketonia mua.

Te Tāua o te Malo o te Atua ki tou Fafine

Fakamuli fua nei, ne tuku atu ki a Folake, se tamaliki fafine ko sefulu ana tausaga ke tusi ne ia se tala i te akoga telā e fakaulutala penei: “Te ‵Toe Mea e Fiafia Au ki ei i te Lalolagi Nei.” Ne filifili ne Folake ke tusi ne ia te pogai e fiafia ei a ia o fakamatala atu ki nisi tino a te Malo o te Atua.

“A te Malo o te Atua se pulega tonu,” ko fakamatalaga a Folake. “E se mafai o lavea ki mata—ke oko foki eiloa māfai e pei ne koe a mata fai‵tau!”

Ne tusi mai ne Folake a fakamanuiaga o te Malo kolā e olioli malosi a ia ki ei. Ne aofia foki ne tou fafine a nisi fakalavelave kolā ka faka‵lei aka ne te Malo: “Ko oko eiloa i toku fanoanoa māfai e lavea atu a tino e ‵nofo i auala ona ko te seai ne fale, e penā foki a tama‵liki i feitu kese‵kese o te lalolagi kolā ka ‵mate i te fia‵kai.” Ne toe fai mai a ia: “E fiafia foki au ma faitau ki te Isaia 65:21.” E tauto mai ei e uiga ki a latou kolā ka ola mai lalo i te pulega a te Malo o te Atua: “Ka faite olotou fale ko ‵nofo ei i ei, ka se toe fakaaoga eiloa ne nisi tino fakaa‵tea. Ka ‵toki olotou togāvine kae inu fia‵fia i te uaina mai i olotou togāvine konā.”

Ne fakaasi atu foki ne Folake i tena tala me olioli eiloa a ia ki te taimi telā ka ave kea‵tea ne te Malo o te Atua a ma‵saki. Ne siki mai ne ia a pati a te Atua i te Fakaasiga 21:4, penei: “Ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae.” I te fakaotiga o tena tala ne toe taku mai ne ia me i te faipati atu e uiga ki a Ieova mo tena Malo ko te ‵toe mea gali ki a ia i te lalolagi nei. E seai se fakalotolotolua, me ne tāua malosi eiloa ki te loto o te tamaliki fafine tenei a te Malo o te Atua!