Te Malo o te Atua Te Tāua ki a Iesu

E pelā mo te mea ne lavea atu i te mataupu mai mua, ne fakavae ne Iesu tena olaga ki te “talai mo te folafola atu o te tala ‵lei e uiga ki te Malo o te Atua.” (Luka 8:1) Ne tuku katoatoa atu a ia mai te sasale i te fia selau maila i Isalaelu ko te mea ke talai atu ki tino a te Malo o te Atua. Ne fakamau ki lalo i tusi Evagelia e fa a te faiga ne Iesu o tena galuega talai, kae maua atu ei a fakamatalaga e 100 tupu e uiga ki te Malo. A te ukega o fakamatalaga konā e maua i pati a Iesu, e fakaasi mai ei se vaega foliki o ana fakamatalaga katoa e uiga ki te Malo o te Atua!—Ioane 21:25.

Kaia ne fakatāua malosi ne Iesu a te Malo i te taimi ne nofo ei a ia i te lalolagi nei? A te pogai e tasi, ne iloa ne Iesu me ko oti ne filifili aka a ia ne te Atua ke fai mo fai te Pule i ei. (Isaia 9:6; Luka 22:28-30) Ne seki saga malosi atu a Iesu ke maua ne ia te tulaga pule io me ko vikiga. (Mataio 11:29; Maleko 10:17, 18) Ne fakamaluga aka ne ia te Malo ona ko pogai kolā e sili atu i te tāua i lō ana manakoga totino. A te mea muamua, ne saga tonu atu a Iesu ki te Malo o te Atua ona ko mea ka fai ne te Malo ki tinoa kolā e alofa a ia ki ei—tena tamana faka-te-lagi mo ana tino fakamaoni.

MEA KA FAI NE TE MALO MŌ TE TAMANA O IESU

Ne alofa malosi a Iesu ki tena Tamana faka-te-lagi. (Faataoto 8:30; Ioane 14:31) Ne fiafia a ia ki uiga ‵gali o tena tamana, e pelā mo Tena alofa, alofa atafai mo te amiotonu. (Teutelonome 32:4; Isaia 49:15; 1 Ioane 4:8) E mautinoa eiloa, me e se manako a Iesu o fakalogologo ki loi konei e fakasalalau e uiga ki tena Tamana—loi e uiga ki te sē fia saga mai o te Atua ki logo‵maega o tino kae e manako foki te Atua ke logo‵mae tatou. Tenei eiloa te pogai e tasi e manako ei a Iesu o “talai atu te tala ‵lei o te Malo”—e iloa ne ia me isi se taimi tonu ka fakaseai ei ne te Malo a fakamaseiga e uiga ki tena Tamana. (Mataio 4:23; 6:9, 10) Ka fai pefea ne te Malo a te mea tenā?

E auala i te Malo, ka fai ne Ieova a ‵fuliga ‵lasi kolā ka aoga ki te kāiga o tino. “Ka ‵solo keatea ne ia a loimata katoa” mai mata o ana tino fakamaoni. Ka ave kea‵tea ne Ieova a te pogai o loimata konā, telā se fakamaoniga me “ka se toe ai se mate, kae ka se toe ai foki se fanoanoa, se tagi io me se ‵mae.” (Fakaasiga 21:3, 4) E auala i te Malo, ka ave kea‵tea ei ne te Atua a logo‵maega katoa o tino.b

E se tioa eiloa o manako malosi a Iesu o fakamatala atu a mea e uiga ki te Malo! E iloa ne ia me ka fakaasi faka‵lei atu ei a te malosi mo te alofa atafai o tena Tamana. (Iakopo 5:11) E iloa foki ne Iesu me ka maua ne tino kolā e alofa a ia ki ei a mea aoga mai te Malo—ko tino fakamaoni.

MEA KA FAI NE TE MALO MŌ TINO FAKAMAONI

A koi tuai o vau a Iesu ki te lalolagi, ne ‵nofo fakatasi a ia mo tena Tamana i te lagi. Ne fakaaoga ne te Tamana a te Tama i te faitega o mea katoa—mai mea fakaofoofogia i te lagi e aofia i ei a fetu se lausia mo fakaputugā fetu, ke oko mai ki te ‵tou paneta gali telā e ‵nofo i ei a mea ola katoa. (Kolose 1:15, 16) Mai mea katoa ne faite, ne “fiafia” malosi a Iesu ki tino.—Faataoto 8:31.

A te alofa ki tino se vaega tāua o te galuega talai a Iesu. Ne fakamatala faka‵lei atu ne Iesu i te kamataga me i te pogai ne vau ei a ia ki te lalolagi, ke “folafola atu te tala ‵lei” ki tino kolā e ma‵nako ki ei. (Luka 4:18) E uke atu a mea ne fai ne Iesu ke fesoasoani atu ki tino i lō te faipati atu fua e uiga ki ei. Ne fakaasi atu faeloa ne ia i ana faiga me alofa a ia ki tino. E pelā mo te taimi ne ualolo atu a te vaitino o fakalogologo ki tena faipatiga, ne “alofa malosi a ia ki a latou, faka‵lei ei ne ia olotou tino ma‵saki.” (Mataio 14:14) Ne fai ne te alofa ke faka‵lei aka ne Iesu se tagata masaki telā ne fakaasi atu tena fakatuanaki me mafai ne Iesu o faka‵lei a ia. Ne faka‵lei ne ia tou tagata, kae fai atu penei mo te alofa: “Au e manako ke ‵ma koe.” (Luka 5:12, 13) I te taimi ne lavea ei ne Iesu a te tagi fanoanoa o tena taugasoa ko Malia ki tena tuagane ko Lasalo, ne lagona ne ia te “mafatia”, “otia malosi tena loto” kae “tagi.” (Ioane 11:32-36) I konā, fai ei ne ia se mea fakaofoofogia—ne toe fakatu mai ne ia Lasalo telā ne mate i aso e fa!—Ioane 11:38-44.

Ne iloa ne Iesu me i te fesoasoani telā ne tuku atu ne ia e se tumau. E iloa ne ia me fakamuli loa, a latou kolā ne faka‵lei ne ia olotou ma‵saki ka toe masaki kae penā foki a latou kolā ne faka‵tu ne ia ka toe ‵mate. E se gata i ei, e iloa foki ne Iesu me ka aumai ne te Malo o te Atua a faka‵leiga tumau ki fakalavelave. Kae tena foki eiloa te pogai ne seki fai fua ne Iesu a vavega; kae ne loto finafinau foki a ia o “talai atu te tala ‵lei o te Malo.” (Mataio 9:35) A vavega ne fakaasi mai ne ia se ata foliki fua o mea kolā ko pili o fai ne te Malo o te Atua ki te lalolagi kātoa. Ke mafaufau ki folafolaga kolā ne fai mai ne te Tusi Tapu e uiga ki te taimi tenā.

• 

  Ka seai ne masaki.

  “A tino ‵kivi ka lavea ne latou a mea, mo tino taliga ‵tuli ka lagona ne latou a mea. A tino vae ma‵sei ka eva ki luga kae ‵saka, ka ko tino gūgū ka ka‵laga mo te fia‵fia.” E se gata i ei, “ka seai eiloa se tino i luga i te ‵tou fenua e tagi i a ia e masaki.”​—Isaia 33:24; 35:5, 6.

• 

  Ka se toe ai se mate.

  “A tino amio‵tonu ka fai mo latou te fenua, kae ka ‵nofo faeloa i ei ki te se gata mai.”—Salamo 37:29.

  “A te Aliki Sili ka fakagata ne ia te mate ke se toe ai eiloa! Ka ‵solo ne ia a loimata mai i mata o tino katoa.”—Isaia 25:8.

• Ka toe faka‵tu mai ki te ola a tino ‵mate.

  Ka “lagona ei ne tino katoa kolā e i loto i tanuga a tena leo ko ulu mai ei ki tua.”—Ioane 5:28, 29.

  “Ka toe‵tu mai a tino.”—Galuega 24:15.

• 

  Ka tofu a tino mo fale mo galuega.

  “Ka faite olotou fale ko ‵nofo ei i ei ka se toe fakaaoga eiloa ne nisi tino fakaa‵tea. Ka ‵toki olotou togāvine kae inu fia‵fia i te uaina mai i olotou togāvine konā, kae se toe inu ne nisi tino fakaa‵tea. . . . Ka fakaaoga faka‵lei eiloa ne latou mo te fia‵fia a fua o olotou galuega.”—Isaia 65:21, 22.

• 

  Ka se toe ai ne taua.

  “E fakagata ne ia a taua i te lalolagi kātoa.”—Salamo 46:9.

  “Ka se toe taua eiloa a malo, se toe fakatoka eiloa mō se taua.”—Isaia 2:4.

• 

  Ka se toe oge mea‵kai.

  “E fua mai eiloa ne te laukele ona taukai; ko te Atua eiloa te motou Atua e fakamanuia ki a matou.”—Salamo 67:6.

  “Ke fakamaumea te fenua i saito; ko mauga foki ke‵fonu i fuagalakau.”—Salamo 72:16.

• Ka se toe ai se mativa.

  “A tino ma‵tiva e se mafai o fakapuligina.”—Salamo 9:18.

  “E faka‵sao ne ia a tino ma‵tiva kolā e ka‵laga ki a ia, mo latou foki kolā e puapuagatia kae se amanaia ne tino. E alofa a ia ki tino vāi‵vai mo tino ma‵tiva; e faka‵sao foki ne ia a olotou ola.”—Salamo 72:12, 13.

Kafai e mafaufau koe ki folafolaga konā e uiga ki te Malo o te Atua, e mata, e lavea ne koe te pogai ne fakatāua ei ne Iesu a te Malo? I tena nofoga i te lalolagi nei, ne manako malosi a ia o faipati ki so se tino e fia fakalogologo e uiga ki te Malo o te Atua, me e iloa ne ia me ko te Malo fua ka fakagata ne ia a fakalavelave kolā e lavea nei ne tatou.

E mata, e foliga ‵tonu mai ki a koe a folafolaga a te Tusi Tapu e uiga ki te Malo? Kafai e penā loa, e mafai pefea o iloa ne koe a mea e uke atu e uiga ki te Malo? Kae ne a foki au mea e ‵tau o fai ke maua ne koe a fakamanuiaga mai i ei? A te mataupu fakaoti i te fakasologa tenei ka tali mai ne ia a fesili konei.