A te Fakalogo Fakavave ki Fakailoaga e Mafai o Fakasao ei Koe!

IA Tesema 26, 2004, ne tupu se mafuie telā e nofo ki te 9.1 te malosi i Simeulue, se fenua tai ‵mao mai i te feitu ki matū togala o te kogā tai o Sumatra, i Indonesia. Ne ‵kilo atu a tino katoa ki te tai. Ne ‵masa pakupaku eiloa te tai i lō te masani. Ne kamata o ‵tele fakavave atu a tino katoa ki mauga, kae ‵kalaga atu “Smong! Smong!” ko te lotou pati mō te sunami. I loto i se 30 minute, kae kamata o ‵fati mai a galu ‵lasi ki te matafaga, telā ne fakaseai ei a te ukega o fale mo fa‵kai.

A te Fenua o Simeulue ko te koga muamua ne pokotia i te sunami. Kae mai i te toko 78,000 o tino i ei, e toko 7 fua ne ‵mate. Kaia ne mu‵tana fua ei a tino ‵mate i ei?a E isi se tugapati e masani ki ei a tino o te fenua tenā, telā ko te: ‘Kafai ko pili o tupu se mafuie kae ‵masa fakavave eiloa te tai, ‵tele ki mauga, me ka toe foki fakavae mai ki uta a te tai.’ Mai i mea ne ‵tupu i aso mua, ne iloa ‵lei ne tino i te fenua o Simeulue a te taimi ka tupu ei te sunami māfai ko ‵fuli fakavave te tai. A te fakalogo fakavave ki te fakailoaga ne ‵sao ei latou.

E faipati mai eiloa te Tusi Tapu e uiga ki te fakalavelave lasi telā ko pili mai, te “‵toe fakalavelave lasi telā e seki tupu aka eiloa talu mai te kamataga o te lalolagi ke oko atu eiloa ki te aso tenei, kae ka se toe tupu eiloa se mea penā.” (Mataio 24:21) Kae ko te mea tenei e se ko te gataga o te paneta ko te Lalolagi e auala i faifaiga sē ‵lei a tino io me se isi fakalavelave masani—me i te fuafuaga a te Atua ke tumau te lalolagi ki te se-gata-mai. (Failauga 1:4) I lō te fai penā, a te oko mai o te fakalavelave se faifaiga a te Atua ke “fakaseai atu foki a latou kolā e fakama‵sei ne latou te lalolagi.” Ko te gataga o mea ma‵sei mo logo‵maega katoa. (Fakaasiga 11:18; Faataoto 2:22) Ko se faka‵tau eiloa i te ‵lei o te fakamanuiaga tenā!

I tafa i ei, e se pelā mo tsunami, mafuie, io me ko mauga ‵ka, ka se ‵mate atu a tino ‵lei i te fakaseaiga tenei. A “te Atua ko te alofa eiloa,” ko muna i te Tusi Tapu, kae ko te Atua, tena igoa ko Ieova, ne folafola mai ne ia me i “tino amio‵tonu ka fai mo latou te fenua, kae ka ‵nofo faeloa i ei ki te se gata mai.” (1 Ioane 4:8; Salamo 37:29) E mafai la pefea o sao atu koe i te ‵toe fakalavelave lasi tenei kae maua a fakamanuiaga ne folafola mai? A te kī tāua ko te: Fakalogo fakavave ki te fakailoaga!

KE MATAPULAPULA KI MAFULI‵FULIGA O MEA

E se mafai o fakaiku aka ne tatou a te taimi mautinoa o te gataga o mea ma‵sei mo logo‵maega katoa, me ne fai mai a Iesu: “E uiga ki te aso mo te itula tenā, e seai se tino e iloa ne ia, ke oko eiloa ki agelu o te lagi mo te Tama, kae na ko te Tamana fua.” E tiga eiloa te feitu tenā, ne fakamalosi mai a Iesu ki a tatou ke “tumau i te matapula‵pula.” (Mataio 24:36; 25:13) Ki te ā? E fakamatala mai ne te Tusi Tapu a fakanofonofoga i te lalolagi kolā e ‵tau o ‵tupu a koi tuai o fakaoko mai ne te Atua a te gataga. E pelā eiloa mo te iloa ne tino Simeulue a te ‵fuli fakavave o foliga o te tai me ko pili o tupu se sunami, e ‵tau o fakailoa mai ne te ‵fuliga fakavave o fakanofonofoga i te lalolagi me ko pili mai te gataga. E fakaasi mai i te pokisi o te mataupu tenei a nisi ‵fuliga fakavave kolā e faipati mai te Tusi Tapu e uiga ki ei.

A te ‵tonuga loa, kafai e onoono ki mea takitasi, ne ‵tupu eiloa a nisi mea io me ko fakanofonofoga i mea kolā e fakasolo mai i te pokisi i taimi mua i nai koga. Kae ne fai mai a Iesu me kafai ko lavea ne tatou a “mea katoa konei,” ko iloa ei ne tatou me ko pili mai te gataga. (Mataio 24:33) Fesili ifo, ‘Ko te taimi fea i tala mua ne lavea atu a mea katoa konei (1) e ‵tupu i te lalolagi kātoa, (2) e ‵tupu i te taimi e tasi, kae ko te (3) e gasolo aka mai te masei ki te masei atu?’ E manino ‵lei, me ko ola eiloa tatou i se vaegā taimi penā.

SE FAKAASIGA O TE ALOFA O TE ATUA

“A polokalame kolā e mafai ei o fakailoa fakavave mai . . . ne faka‵sao ei a tino,” ko muna a te pelesitene mua e tokotasi o Amelika. Mai tua o te sunami i te 2004, ne fakaaoga i ei a polokalame penā i koga kolā ne pokotia malosi i se taumafaiga ke puipui a te ‵mate o tino i aso mai mua nei. E penā foki loa, ko leva ne fai ne te Atua a fakatokaga ke fakailoa fakavave atu a koi tuai o oko mai te gataga. Ne ‵valo mai te Tusi Tapu: “A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa; ko oko mai ei te gataga.”—Mataio 24:14.

I te tausaga fua tenei ko teka, ne fakamāumāu ne Molimau a Ieova a itula e silia atu i te 1.9 piliona i te talaiatuga o te tala ‵lei ki fenua e 240 i ‵gana e silia atu i te 700. E tuku mai ne te galuega tenei i aso nei a te fakamaoniga sili me ko pili mai te gataga. Ona ko te a‵lofa ki olotou tuakoi, e fakaaoga ne Molimau a Ieova so se avanoaga ke fakailoa atu ki tino e uiga ki te aso o te fakamasinoga a te Atua telā ko pili ‵ki mai eiloa. (Mataio 22:39) A te manatu tonu me e mafai o aoga ki a koe a te fakamatalaga tenei se fakamaoniga o te alofa o Ieova ki a koe. Masaua “me e se manako a ia ke fakaseai atu se tino e tokotasi kae e manako ke sala‵mo a tino katoa.” (2 Petelu 3:9) E a, ka saga atu koe ki te alofa o te Atua kae fakalogo fakavave ki te fakailoaga?

TELE ATU KI SE KOGA E SAO EI KOE!

Masaua a tino i fa‵kai o Simeulue i tafa o te tai kolā ne ‵tele atu ki koga ma‵luga ke ‵sao atu i te taimi eiloa ne lavea ne latou a te ‵masa fakavavega o te tai; ne seki faka‵tali latou ke oko ki te taimi ne foki mai ei te tai. A te lotou gasue‵sue fakavave ne ‵sao ei latou. Ke ‵sao atu i te fakalavelave telā ko pili mai, e ‵tau foki o tele atu ki koga ma‵luga, i se auala fakatusa, a koi tuai o to talimuli. E pefea la? Ne fakaosofia a te pelofeta ko Isaia ke tusi mai e uiga ki se ‵kamiga fakamalosi telā ko oti ne fakailoa atu i “aso mai mua nei,” telā ko te taimi tenei e ola tatou i ei. E fai mai: “Tatou ka olo ake ki te mauga o te Aliki [Ieova], . . . Ka akoako mai ne ia tatou ki mea e manako a ia ke fai ne tatou; ka sa‵sale tatou i auala me ne filifili ne ia.”—Isaia 2:2, 3.

A te fanatu ki te taulu o se mauga e mafai ei o lavea ne koe a mea katoa i lalo kae se koga foki ke sao koe i ei. I se auala tai ‵pau, a te iloa ‵lei o auala o te Atua e alatu i itulau o te Tusi Tapu, ne fesoasoani atu ki te fia miliona o tino i te lalolagi kātoa i aso nei ke fai a ‵fuliga aoga i olotou olaga. (2 Timoteo 3:16, 17) Mai te faiga penā, e kamata ei latou o ‘sa‵sale atu i auala o te [Atua]’ kae maua tena taliaga mo tena puipuiga atafai.

E mata, ka talia ne koe te ‵kamiga tenā kae tuku atu koe ki te puipuiga alofa a te Atua i taimi faiga‵ta konei? E fakamalosi atu matou ki a koe ke iloilo faka‵lei a fakamaoniga i te Tusi Tapu e uiga ki aso fakaoti kolā e tuku mai i te pokisi o te mataupu tenei. E fia‵fia eiloa a Molimau a Ieova i tou fa‵kai ke fesoasoani atu i so se taimi ke malamalama faka‵lei koe i te Tusi Tapu mo te auala ke fakagalue aka ei. Io me e mafai o maua ne koe a tali ki au fesili mai te fanatu ki te fakatuatusi o matou i te itaneti, ko te www.pr2711.com. E mafai o faitau ki ei mai lalo o te BIBLE TEACHINGS > BIBLE QUESTIONS ANSWERED.