“Olo . . . Fai a Soko”

1-2. (a) E ‵tusa mo te fakatonuga a Iesu telā ne fakamau i te Mataio 28:18-20, se a te galuega tāua ne tuku atu ki te fakapotopotoga Kelisiano? (e) Ne a fesili ka tali aka ne tatou i te mataupu tenei?

NE MAUTINOA eiloa me ne fia‵fia malosi a te kau apositolo i te taimi ne maopoopo ei latou i tafa o te mauga. Mai tua o tena toetuga, ne fakatoka eiloa ne Iesu te koga tenā ke fetaui ei latou mo ana soko. (Mata. 28:16) Kāti tenā eiloa te taimi ne “fakasae atu a ia ki taina e silia atu i te toko 500 i te taimi e tasi.” (1 Koli. 15:6) Kaia ne fakamolemole atu a Iesu ki ana soko ke fetaui mo ia i konā? Ke tuku atu ki a latou se galuega fakafiafia: “Tela la, olo atu koutou ki fenua katoa o fai a tino i ei mo fai a soko.”—Faitau te Mataio 28:18-20.

² A soko kolā ne lagona ne latou a pati a Iesu ne fai mo vaega o te fakapotopotoga Kelisiano i te senitenali muamua. A te galuega tāua a te fakapotopotoga tenā ko te faiga o soko e tokouke o Keliso.b I aso nei, ko lau i sefulu afe o fakapotopotoga Kelisiano ‵tonu i te lalolagi kātoa, kae e ‵pau eiloa a te tāua o te galuega e fai ne fakapotopotoga konā. I te mataupu tenei, ka sau‵tala eiloa tatou ki fesili konei e fa: “Kaia e tāua malosi i ei a te faiga o soko? Ne a mea e aofia i ei? E mata, e isi ne tusaga o Kelisiano i te faiga o soko? Kae kaia e manakogina ei ne tatou a te kufaki i te galuega tenei?

KAIA E TĀUA MALOSI EI A TE FAIGA O SOKO?

3. E ‵tusa mo te Ioane 14:6 mo te 17:3, kaia e tāua malosi ei te galuega ko te faiga o soko?

³ Kaia e tāua malosi te faiga o soko? Me ko soko fua o Keliso e mafai o fai mo taugasoa o te Atua. E se gata i ei, a latou kolā e tau‵tali i a Keliso e momea aka te ‵lei o olotou olaga i te taimi nei kae maua te fakamoemoega e uiga ki te ola se-gata-mai i aso mai mua. (Faitau te Ioane 14:6; 17:3.) E tonu, ne tuku mai ne Iesu se tiute tāua ki a tatou, kae e se fai fua ne tatou a te galuega tenei i a tatou eiloa. Ne tusi mai te apositolo ko Paulo e uiga ki a ia eiloa mo nisi o ana taugasoa: “A māua ko tino ga‵lue a te Atua.” (1 Koli. 3:9) Māfaga o tauliaga ne tuku mai ne Ieova mo Keliso ki tino sē ‵lei katoatoa!

4. Se a te mea e mafai o tauloto ne tatou mai te tala o Ivan mo Matilde?

⁴ A te galuega ko te faiga o soko e mafai o aumai ne ia te fiafia lasi. Mafaufau aka la ki a Ivan mo tena avaga ko Matilde i Colombia. Ne talai atu lāua ki se tamataene e igoa ki a Davier, telā ne fai atu ki a lāua: “E manako au o fai a ‵fuliga ki toku olaga, kae e se mafai ne au.” A Davier se tino faipelea telā ne fakaaoga ne ia a vailakau tapu, inu meainu ma‵losi, kae ‵nofo fakatasi mo tena famau ko Erika. E fai mai a Ivan: “Ne kamata o asi atu māua ki a ia i tena fakai, ko tena uiga, ne ‵tau o ‵tele atu māua i mā pasika ta ki vae mō se fia o itula i auala pela‵pela. I te taimi ne kamata o fai a ‵fuliga e uiga ki amioga a Davier, ne kau mai a Erika ki te akoga faka-te-Tusi Tapu.” Fakamuli loa, ne tiakina ne Davier a vailakau tapu, tena inu mo tena faipelea. Ne avaga foki ki a Erika. Ne fai mai a Matilde: “I te taimi ne papatiso ei a Davier mo Erika i te 2016, ne masaua faeloa ne māua a pati ne fai sāle ne Davier, ‘Au e manako o ‵fuli, kae sē mafai.’ Ne seki mafai o taofi ne māua a mā loimata.” E mautinoa eiloa me e fia‵fia malosi tatou māfai e fesoasoani atu ki tino ke fai mo soko o Keliso.

NE A MEA E AOFIA I TE FAIGA O SOKO?

5. Ke fai a soko, se a te mea muamua e ‵tau o fai ne tatou?

⁵ Ke fai a soko, e ‵tau muamua mo tatou o “‵sala atu” ki tino loto ‵lei. (Mata. 10:11) E fakamaoni atu ne tatou i a tatou ne Molimau a Ieova mai te talai ki tino katoa kolā e fetaui mo tatou. E fakatalitonu atu ne tatou i a tatou ne Kelisiano ‵tonu mai te tau‵tali i te fakatonuga a Keliso ke talai.

6. Se a te mea e mafai o fesoasoani mai ke manuia ‵tou galuega talai?

⁶ Nisi tino e loto finafinau o tauloto ki muna‵tonu mai te Tusi Tapu, kae ko te tokoukega kolā e fetaui mo tatou kāti e se fia ‵saga mai i te taimi muamua. Kāti e ‵tau o fakamalosi aka ne tatou a te lotou loto fia‵fia. Ke manuia ‵tou galuega talai, e ‵tau mo tatou o fakatoka faka‵lei. Filifili a mataupu kolā e iloa ne tatou me ka fia‵fia ki ei a tino e fetaui mo tatou. Ko palani ei ki te auala ke kamata ei te sau‵talaga.

7. E mafai pefea o kamata ne koe se sau‵talaga mo se tino, kae kaia e tāua ei ke fakalogologo kae fakaasi atu te āva?

⁷ E pelā me se fakaakoakoga, e mafai o ‵sili atu koe ki te tino i te fale: “E mata, e ‵lei ke ‵sili atu au me se a tau faka‵tau ki te mea tenei? A te ukega o fakalavelave kolā e fe‵paki mo tatou i aso nei e pokotia i ei a tino i te lalolagi kātoa. E mata, e mafaufau koe me e manakogina ne tatou se malo ke pule i te lalolagi nei ko te mea ke faka‵lei aka a fakalavelave konā? Ko mafai ei o sau‵tala koulua ki te Tanielu 2:44. Io me e mafai o fai atu koe ki se tuakoi, penei: “Se a tau faka‵tau, se a loa te kī ki te putiakaga o tama‵liki ke ‵lei olotou uiga? E fia iloa ne au tou manatu e uiga ki ei. Ko fakamatala atu ei a te Teutelonome 6:6, 7. Faitalia me se a te mataupu e filifili ne koe, mafaufau ki tino kolā ka lagona ne latou te fekau. Mafaufau ki te auala ka aoga ki a latou a te tauloto ki mea kolā e akoako ‵tonu mai i te Tusi Tapu. Kafai e sau‵tala mo latou, se mea tāua ke fakalogologo koe mo te āva i te taimi e fai mai ei olotou manatu. I te auala tenā, ka malamalama faka‵lei koe i a latou, kae ka ma‵nako latou o fakalogo‵logo atu ki a koe.

8. Kaia e ‵tau ei mo tatou o taumafai o fai faeloa a toe asiga?

⁸ Mai mua o fakaiku aka ne se tino ke sukesuke ki te Tusi Tapu, kāti e manakogina ke fakamāumāu ne koe ou taimi mo taumafaiga i te faiga o toe asiga. Kaia? Me e mafai o se avanoa a tino māfai e asi atu faeloa koe ki a latou. E se gata i ei, kāti e manakogina ke asi atu faeloa ki te tino i te fale, ke fakafaigofie ke talia ne ia se akoga faka-te-Tusi Tapu. Masaua, a te lakau e ola ‵lei atu māfai e fakasiusiu faeloa. I se auala tai ‵pau, a te alofa o se tino fiafia ki a Ieova mo Keliso e mafai o gasolo ki mua māfai e sau‵tala faeloa koulua ki te Muna a te Atua.

E MATA, E ISI NE TUSAGA O KELISIANO KATOA I TE FAIGA O SOKO?

9-10. Kaia e mafai ei o fai atu tatou me e aofia eiloa a tavini Kelisiano katoa i te ‵salaga o tino loto ‵lei?

⁹ A tavini Kelisiano katoa e aofia i te fesoasoani atu ki te ‵salaga o tino loto ‵lei. E mafai o fakatusa ne tatou te galuega tenei ki se ‵salaga o se tamaliki telā ne galo. I te auala fea? Mafaufau aka la ki te tala o se tamaliki tagata ko tolu ana tausaga kae ne galo mai te fale. Kāti e nofo ki se 500 tino ne aofia i te ‵salaga o ia. Fakamuli loa, kāti i se 20 itula mai tua o te galoatuga o te tamaliki, ne toe maua ne se volenitia a te tamaliki i se fatoaga corn. Ne seki manako te tino tenā ke tavae a ia ona ko te mea ne maua ne ia te tamaliki. Ne fai mai a ia: “E toko fia selau tino ne maua ne latou a ia.”

¹⁰ E tokouke a tino e ‵pau mo te tamaliki tenā. E se iloa ne latou olotou ka fai, me e seai ne olotou fakamoemoega, kae e ma‵nako ki se fesoasoani. (Efe. 2:12) E silia atu mo te valu miliona o tatou e aofia i te ‵salaga o tino loto ‵lei konei. Kāti e se mafai o maua ne koe se tino telā ka suke‵suke fakatasi mo koe ki te Tusi Tapu. Kae e mafai o maua ne nisi tino talai kolā e ga‵lue i te koga talai tenā se tino telā e manako o tauloto ki te munatonu i te Muna a te Atua. Kafai e fetaui se taina io me se tuagane mo se tino telā ka fai mo soko o Keliso, e mautinoa eiloa me ka fia‵fia a tino katoa kolā ne aofia i te galuega tenā.

11. Kafai foki e seai sau akoga faka-te-Tusi Tapu, ne a nisi auala e mafai o fesoasoani atu ki a koe ke fai a soko?

¹¹ Kafai foki loa e seai sau akoga faka-te-Tusi Tapu, e mafai eiloa o fesoasoani atu koe i te faiga o soko i nisi auala aka. E pelā mo te tali fiafia ne koe a tino ‵fou kae fakamasani atu ki a latou māfai ko ‵mai ki te Fale Tapuaki. I te auala tenā, e mafai o fesoasoani atu koe i te faiga ke tali‵tonu latou me i te alofa ko te iloga o tatou e pelā me ne Kelisiano ‵tonu. (Ioa. 13:34, 35) A tali e fai ne koe i fakatasiga, faitalia me e toe‵toe, kae e mafai o akoako ei a taugasoa ‵fou konā ke fakaasi atu olotou fakatuanaki i se auala fakamaoni kae āva. E mafai foki o ga‵lue fakatasi koe mo se tino talai fou i te galuega talai kae fesoasoani atu ke fakaaoga te Tusi Tapu ke fakasako‵sako atu mo tino. Mai te faiga tenā, ka akoako ne koe a ia ke fakaakoako ki a Keliso.—Luka 10:25-28.

12. E mata, e manakogina ne tatou ne ata‵mai fakapito ke fai a soko? Fakamatala mai.

¹² E se ‵tau mo tatou o mafau‵fau me e manakogina ke maua ne ata‵mai fakapito ke mafai o akoako a nisi tino ke fai mo soko o Iesu. Kaia e se ‵tau o fai penā? Mafaufau aka la ki a Faustina telā e nofo i Bolivia. Ne seki iloa ‵lei ne ia o faitau i te taimi ne kamata o fesokotaki a ia mo Molimau a Ieova. Talu mai te taimi tenā, ne tauloto a ia ke iloa o faitau malielie. Ko oti nei a ia ne papatiso, kae fiafia o akoako a nisi tino. Ne fai ne ia a akoga faka-te-Tusi Tapu e lima i vaiaso takitasi. E tiga eiloa e se iloa ne Faustina o faitau faka‵lei e pelā mo te tokoukega o ana tino a‵koga, ne fesoasoani atu a ia ki tino e tokoono ke mafai o papatiso.—Luka 10:21.

13. Faitalia me e fakalave‵lave malosi tatou, ne a nisi fakamanuiaga e mafai o maua ne tatou mai te galuega ko te faiga o soko?

¹³ E tokouke a Kelisiano e fakalave‵lave malosi i te tausi atu ki tiute tāua e uke. Kae ui i ei, e fakaavanoa olotou taimi ke fai a akoga faka-te-Tusi Tapu, kae e maua ne latou te fiafia mai i ei. E pelā loa mo Melanie. A ia se mātua taka, telā e puti aka ne ia tena tamaliki fafine ko valu ana tausaga i Alaska. Ne galue tumau foki a ia kae ne fesoasoani atu ke tausi tena mātua telā e kenisa. A Melanie ko te Molimau fua e tokotasi i tena fakai. Ne ‵talo faeloa tou fafine ke maua te malosi ke talai faitalia te ‵moko, me ne manako ‵ki tou fafine o ‵sala atu ki se tino ke suke‵suke mo ia ki te Tusi Tapu. Fakamuli loa, ne fetaui a ia mo Sara, telā ne fiafia ke tauloto ne ia me i te Atua e isi sena igoa totino. Fakamuli loa, ne talia ne Sara se akoga faka-te-Tusi Tapu. Ne fai mai a Melanie: “I afiafi o Aso Lima, ne fi‵ta ‵ki eiloa au, kae ne maua eiloa ne au mo taku tama fafine a mea aoga mai te olo atu o fai te akoga tenā. Ne fia‵fia māua o sukesuke ki tali o fesili a Sara, kae se mea fakafiafia ke lavea atu tou fafine ko fai mo taugasoa o Ieova.” Ne loto malosi eiloa a Sara o fakafesagai atu ki ‵tekemaiga, tiakina tena lotu kae papatiso.

TE POGAI E MANAKOGINA EI TE KUFAKI I TE FAIGA O SOKO

14. (a) I te auala fea e ‵pau ei a te faiga o soko mo te faiika? (e) E aoga pefea ki a koe a pati a Paulo kolā ne fakamau i te 2 Timoteo 4:1, 2?

¹⁴ Kafai foki loa e foliga mai me e se ‵fua ‵lei tau galuega talai, ke sa ‵fiu vave i te ‵sala atu ki a latou kolā e ma‵nako ke fai mo soko. Masaua me ne fakatusa ne Iesu a te faiga o soko ki te faiika. Kāti e fakamāumāu ne tāgata faiika a itula e uke a koi tuai o maua ne latou ne ika. E masani o ga‵lue latou i te valuapo io me ko te vaveao, kae i nisi taimi e ‵tau o faima‵laga atu latou ki koga ‵mao. (Luka 5:5) I se auala tai ‵pau, e fakamāumāu ne nisi tino talai a itula e uke ke “faiika” i se auala fakatusa i taimi kese‵kese mo koga kese‵kese. Kaia? Ko te mea ke fetaui latou mo tino e tokouke. A latou kolā e ga‵lue malosi e fakamanuiagina eiloa me e maua ne latou a tino kolā e fia‵fia ki te ‵tou fekau. E mata, e mafai o taumafai koe o talai i se taimi o te aso māfai ko fetaui koe mo tino e tokouke io me i se koga telā e mafai o maua ne koe a tino i ei?—Faitau te 2 Timoteo 4:1, 2.

15. Kaia e manakogina ei te kufaki i te faiga o akoga faka-te-Tusi Tapu?

¹⁵ Kaia e manakogina ei te kufaki i te faiga o akoga faka-te-Tusi Tapu? A te pogai e tasi me e manakogina ke fai ne tatou a mea e uke atu ke fesoasoani ki te tino akoga ke iloa kae ke fiafia ki akoakoga i te Tusi Tapu. E ‵tau o fesoasoani atu tatou ki te tino akoga ke iloa kae ke alofa foki ki te Tino telā ne aumai ne ia te Tusi Tapu, ko Ieova. Kae i tafa o te akoako atu o se tino akoga ki mea e manakogina ke fai mo soko o Iesu, e ‵tau o fesoasoani atu tatou ke iloa ne ia te auala ke ola e pelā me se Kelisiano tonu. E ‵tau o fesoasoani atu tatou ki a ia mo te kufaki i te taimi e taumafai ei a ia o fakagalue a fakatakitakiga mai te Tusi Tapu. Nisi e mafai o ‵fuli olotou mafaufauga mo amioga i ne nāi masina fua; nisi tino e manakogina ne latou se taimi leva.

16. Ne a mea ne tauloto ne koe mai te tala o Raúl?

¹⁶ Ne maua ne se misionale i Peru a ikuga ‵lei ona ko tena kufaki. “E lua a tusi ne suke‵suke ki ei māua mo taku akoga faka-te-Tusi Tapu ko Raul,” ne fai mai te misionale. “Kae ne tumau eiloa a ia i te fakafesagai mo fakalavelave i tena olaga. Ne uke fakalavelave i tena olaga avaga, ne fakaaoga ne ia pati ma‵sei, kae ko ana tama‵liki e se āva atu ki a ia. Ne vau faeloa ki fakatasiga, tela la ne asi faeloa au o fesoasoani ki a ia mo tena kāiga. I tausaga e silia atu mo te tolu talu mai te taimi ne fetaui ei māua, ne fetaui ‵lei eiloa tou tagata mō te papatisoga.”

17. Se a te mea ka sau‵tala tatou ki ei i te suā mataupu?

¹⁷ Ne fai mai a Iesu ki a tatou ke “olo . . . ki fenua katoa o fai a tino i ei mo fai a soko.” Ke fakataunu te fakatonuga tenā, e ‵tau o fai‵pati atu faeloa tatou ki tino kolā e ‵kese te auala e mafau‵fau ei latou mai i a tatou, e aofia ei a latou kolā e seai ne olotou talitonuga io me e se tali‵tonu foki ki te Atua. Ka fakamatala mai eiloa i te suā mataupu a te auala e mafai ei o talai atu ne tatou te tala ‵lei ki tino mai telega kese‵kese.