Ke Tufatufa Atu a Pepa ‵Kami o te Fakamanatuga i te Lalolagi Kātoa!

1. Se a te galuega fakapito i te lalolagi kātoa telā ka fai mai mua o te Fakamanatuga?

¹ “Ke fai mo fakamanatuga ki a au.” (Luka 22:19) Mai te faka‵logo ki te fakatonuga tenei mai i a Iesu, ka maopoopo fakatasi a tino tapuaki o Ieova mo tino fia‵fia i a Mati 30, 2010, ke fakamanatu ei te mate o Iesu. Ka tufatufa atu eiloa se pepa ‵kami fakapito i te lalolagi kātoa mai i a Mati 13 ki a Mati 30.

2. E mafai pefea o ofo atu ne tatou a te pepa ‵kami?

² Te Auala ke Fai ei te Mea Tenei: E mafai o tuku atu ne koe te pepa ‵kami ki te tino i te fale ko te mea ke lavea ne ia a te fakatomuaga i te fakavaka, ko fai atu ei: “I te afiafi-po o Mati 30, ka ‵kau fakatasi ei a te fia miliona o tino i te lalolagi kātoa ke fakamanatu a te mate o Iesu. Au e vau o tuku atu tou pepa ‵kami ke ‵kau atu koe fakatasi mo tou kāiga. E mafai foki o ‵kami mai ne koe ou taugasoa. Ke fakamasaua atu ne koe a te taimi mo te koga ka fai ei te fakatasiga tenei.” E ‵tusa mo ‵tou fakanofonofoga, e mafai o filifili ke faitau ne koe te Luka 22:19 mai te Tusi Tapu, ke faka‵mafa atu ei ne koe te fakatonuga tenā mai te Tusi Tapu. Kae ke masaua me e tiga eiloa e se lava te taimi ke ga‵lue i te ‵tou koga talai, se mea ‵lei ke fakatoe‵toe fua au fakamatalaga.

3. Ko oi a tino e mafai o ‵kami ne tatou?

³ Kafai e lasi te koga talai o tou fakapotopotoga, e mafai o fai atu a toeaina ke tuku atu fua ne koe a pepa ‵kami i fale kolā e seai ne tino i ei i te āsiga muamua. Kafai e ‵lei te mea tenei, ke ofo atu a mekesini fakatasi mo te pepa ‵kami. Masaua o ‵kami mai au toe asiga, akoga faka-te-Tusi Tapu, tino kolā e ga‵lue tasi mo koe, tama‵liki a‵koga, kāiga, tuakoi mo nisi taugasoa.

4. Se a te mea ka fai ne tatou ona ko te ‵tou loto fakafetai mō te fakatokaga alofa a Ieova e auala i te togiola?

⁴ Fakatoka ke Kau Katoatoa Atu Koe ki ei: A te vaitaimi o te Fakamanatuga se taimi gali ke momea aka ei te uke o ‵tou galuega e fai. E mata, e mafai ne koe o fai a ‵fuliga ke paenia lagolago? E mata, e isi ne au tama‵liki io me ne a‵koga faka-te-Tusi Tapu kolā e ga‵solo ki mua i te feitu faka-te-agaga? Kafai e penā loa, fai atu ki toeaina me e fetaui ‵lei te tino tenā ke kau mai ki te galuega fakapito tenei e pelā me se tino talai seki papatiso. A te fakaasi atu o te loto fakafetai mō te fakatokaga alofa a Ieova e auala i te togiola ka fai ne ia ke gasue‵sue tatou, ke se ‵kau atu fua tatou ki te Fakamanatuga kae ke ‵kami foki ne tatou a tino e tokouke ke ‵kau fakatasi mo tatou.​—Ioane 3:16.