Te Vaitaimi o te Fakamanatuga​—Se Avanoaga ke Momea Aka ei a Mea e Fai i te Galuega Talai!

1. Ne a pogai e maua ne tatou ke mafau‵fau ki te momea aka o ‵tou mea e fai i te galuega talai i te vaitaimi o te Fakamanatuga?

¹ E mata, e mafai o momea aka au mea e fai i te galuega talai i te vaitaimi o te Fakamanatuga telā ko pili mai? Ka malō‵lo a nisi tino talai mai i olotou galuega ‵togi io me ko akoga kolā e mafai o fakaaoga ne latou a taimi konā ki te galuega talai. E kamata mai i a Apelila po 2, ka fai ne tatou se galuega fakapito ke ‵kami mai ei a tino fia‵fia ke ‵kau fakatasi mo tatou i te Fakamanatuga i te po 17 o Apelila. Mai tua ifo i ei, ka taumafai tatou ke ati aka a te fia‵fia o tino kolā ne ‵kau mai kae ‵kami atu foki latou ke ‵kau mai ki te lauga fakapito telā ka fai i te vaiaso o Apelila po 25. A te ‵tonuga loa, e uke eiloa a pogai e ‵tau ei o mafau‵fau tatou ke momea aka ‵tou mea e fai i te galuega talai i te vaitaimi tenei o te Fakamanatuga.

2. Se a te ‵toe auala ‵lei e tasi e mafai ei o uke atu ‵tou mea e fai i te galuega talai?

² Paenia Lagolago: A ‵toe auala ‵lei e tasi ke momea aka ‵tou mea e fai ko te paenia lagolago. Ona ko te mea e fakalave‵lave katoa tatou, e manakogina malosi eiloa i te mea tenei a fakatokaga ‵lei mo fakama‵fuliga i te fakasologa o ‵tou mea e fai. (Faata. 21:5) Kāti e mafai o taofi aka a nisi mea sē aoga i mea masani e fai ne koe. (Fili. 1:​9-​11) Kaia e se fakaasi atu ei tou manakoga ke paenia ki nisi tino i te fakapotopotoga ke onoono aka me e mafai o ga‵lue fakatasi koutou e pelā me ne paenia lagolago?

3. E mafai pefea o fakatoka a kāiga ke momea aka olotou mea e fai i te galuega talai?

³ I te suā Tapuakiga a Kāiga a koutou, se mea ‵lei ke sau‵tala ki ou fakamoemoega e pelā me se kāiga. (Faata. 15:22) Kafai e ga‵lue fakatasi a tino katoa i te kāiga, kāti e mafai o paenia lagolago a nisi tino o te kāiga i se masina e tasi io me e uke atu. Kae e a māfai ko fakaiku aka me e se mafai eiloa o fai ne koe a te mea tenei? Koi mafai eiloa o fakatoka a te kāiga ke momea olotou mea e fai i te galuega talai mai i te ‵kau atu ki te galuega talai i nisi fakaafiafi io me mai i te ga‵lue i te galuega talai i se taimi tai leva atu i fakaotiga o vaiaso.

4. Ne a fakamanuiaga ka maua mai i te momea aka o ‵tou mea e fai i te galuega talai i te vaitaimi tenei o te Fakamanatuga?

⁴ E lavea eiloa ne Ieova a mea katoa e fai ne tatou ke tavini atu ki a ia kae fakatāua ne ia a mea kolā e tuku atu ne tatou mo te loto fia‵fia. (Epe. 6:​10) E maua eiloa a te fiafia mai i te tuku atu o mea ki a Ieova mo nisi tino. (1 Nofo. 29:9; Galu. 20:35) E mata, e mafai o momea aka au mea e fai i te vaitaimi tenei o te Fakamanatuga kae ke momea aka foki tou fiafia mo fakamanuiaga kolā e maua mai i ei?