E Kamata i a Mati Po 17 a te Galuega Fakapito ki te ‵Kamiga o Tino ki te Fakamanatuga

1. Se a te galuega fakapito ka kamata i a Mati Po 17?

¹ E fai eiloa te Fakamanatuga i tausaga takitasi ke folafola atu ei a te mate o Iesu. (1 Koli. 11:26) Tela la, e ma‵nako tatou ke ‵kau fakatasi mo nisi tino kae ke fakalogo‵logo foki e uiga ki te meaalofa gali a Ieova ko te togiola. (Ioa. 3:16) Ka kamata eiloa a te ‵tou galuega fakapito i te tausaga tenei ki te ‵kamiga o tino ki te Fakamanatuga i te Aso Ono, i a Mati Po 17. E mata, e olioli eiloa koe ke kau katoatoa atu ki ei?

2. Ne a ‵tou pati e mafai o fai atu ke fakamatala atu ei a te ‵kamiga?

² ‵Tou Pati e Mafai o Fai Atu: A te ‵toe mea ‵lei ko te faiga fua o se tamā fakatomuaga. E mafai o fai atu tatou: “Talofa. Ko ‵mai loa māua ke tuku atu ki tou kāiga a te pepa ‵kami tenei ki se fakamanatuga tāua i tausaga katoa, telā ka fai i te lalolagi kātoa i te po 5 o Apelila. Ka fai se lauga e seai se ‵togi telā e fakamatala mai i ei a mea ne fakataunu ne te mate o Iesu mo mea kolā e fai nei ne ia. E fakaasi mai i te ‵kamiga tenei a te koga mo te taimi e fai ei a fakatasiga konei i te ‵tou fenua.” Kafai e ‵kau atu ki te tufatufaatuga o pepa ‵kami i te Aso Ono, e ‵tau o ofo atu foki a mekesini māfai e ‵lei.

3. E mafai pefea o ‵kami mai ne tatou a tino e tokouke?

³ Ke ‵Kami Atu a Tino e Tokouke ke ‵Kau Mai: A te ‵tou fakamoemoega ke ‵kami atu a tino e tokouke ke ‵kau mai. Tela la, ke fakamautinoa aka ke ‵kami mai au akoga faka-te-Tusi Tapu, toe asiga, kāiga, tino e ga‵lue tasi koulua, tamaliki i te akoga, tuakoi, mo nisi taugasoa. Ka tuku mai ne toeaina i te fakapotopotoga a takitakiga ki te auala ke fakaoti faka‵lei ei ‵tou koga talai. E maua eiloa a ikuga ‵lei mai i te ‵tou galuega fakapito i tausaga katoa ke ‵kami mai a tino ki te Fakamanatuga. I te taimi ne sasale atu ei se fafine ki te koga e fai ei te Fakamanatuga i te tausaga ko teka, ne ofo atu se taina fesoasoani ke ‵sala aka ne ia a te tino talai telā ne ‵kami ne ia tou fafine. Kae ne fai atu a te fafine me e se iloa ne ia kae ne maua fua ne ia tena pepa ‵kami mai i se tino telā ne fanatu mai fale ki fale i se taimi o te aso tenā.

4. Ne a pogai e ‵tau ei o ‵kau atu tatou mo te loto finafinau ki te galuega fakapito tenei?

⁴ Kāti ne kau atu se tino ki te otou Fakamanatuga ona ko te ‵kamiga ne tuku atu ne koe. Faitalia me e isi se tino e talia ne ia te ‵kamiga io me e seai, koi tuku atu eiloa ne koe se molimau ‵lei ona ko au taumafaiga loto finafinau. A pepa ‵kami kolā e tufa atu ne koe ka folafola atu ei me i a Iesu ko fai nei mo fai se tupu malosi ‵ki. A tou loto finafinau o kau atu ka fakaasi atu ki tino maimoa katoa—i tou koga talai, ou taina talai, kae maise eiloa a Ieova—me e fakatāua malosi ne koe a te meaalofa ko te togiola.—Kol. 3:15.