Ke Fakaaoga se Fakatomuaga Telā e Magoi
1. Se a te mea e mafai o tauloto ne tatou mai i fakatomuaga kese‵kese kolā ne fakaaoga ne Kelisiano mua?
1 Ne talai atu ne Kelisiano mua a te tala ‵lei ki tino mai tuu mo lotu kese‵kese. (Kol. 1:23) E tiga eiloa e ‵pau te fekau—ko te Malo o te Atua—e kese‵kese a fakatomuaga e fakaaoga e ‵tusa mo tino kolā e talai ki ei. E pelā mo te taimi ne faipati atu a Petelu ki tino Iutaia kolā e lasi te lotou āva ki te Tusi Tapu, ne kamata tena faipatiga mai te siki atu o pati a te pelofeta ko Ioelu. (Galu. 2:14-17) I te suā feitu la, mafaufau ki te auala ne faipati atu ei a Paulo ki tino Eleni e pelā mo te mea e fakamau i te Galuega 17:22-31. I aso nei, e āva a tino i nisi koga talai ki te Tusi Tapu, tela la, e mafai ne tatou o fakasino atu faeloa ki te Tusi Tapu i te taimi e olo atu ei mai fale ki fale. Kae e ‵tau o ata‵mai tatou māfai ko fai‵pati atu ki tino kolā e seai lele eiloa se lotou fia‵fia ki te Tusi Tapu io me ko lotu io me e kau atu ki se lotu sē Kelisiano.
2. E mafai pefea o fakaaoga ne tatou a te ofoatuga o tusi ke fesoasoani atu ki tino kolā e amanaia ki te Tusi Tapu e pelā foki mo latou kolā e se amanaia ki ei?
2 Ke Fakaaoga a te Ofoatuga o Tusi i se Auala Magoi: A te ofoatuga o tusi mō te tausaga faka-te-taviniga tenei ka ‵fuli faeloa i takilua masina kae ka fakaaoga i ei a mekesini, tamā pepa, mo polosiua. Kafai foki loa e se fia‵fia a te tokoukega o tino i ‵tou koga talai ki te Tusi Tapu, koi mafai eiloa ne tatou o fakaaoga se mea telā ka fakamalosi aka ei te lotou fia‵fia. Kāti e se faitau atu ne tatou se tusi faitau i te āsiga muamua io me e fakasino tonu atu ki te Tusi Tapu, kae kafai ko fakaasi mai te fiafia o te tino, e mafai o toe ‵foki atu tatou mo te fakamoemoega ke fesoasoani atu i te atiakaga o tena fakatuanaki ki te Mafuaga mo tena Muna fakaosofia. I te suā feitu, kafai e talai atu tatou ki tino kolā e amanaia ki te Tusi Tapu, e mafai o fakaaoga ne tatou a tusi io me se fakatomuaga telā e aofia i ei te mea tenei. A te ‵tonuga loa, e mafai o ofo atu ne tatou a te tusi ko te Akoakoga a te Tusi Tapu io me ko polosiua ko te Fakalogo ki te Atua io me ko te Fakalogo ki te Atua ke Ola ei Koe ki te Se-Gata-Mai i so se taimi, faitalia me se a te mea e fakaaoga mō te masina. A te mea tāua ke fakaaoga se fakatomuaga telā e magoi.
3. Se a te auala e fai ei a loto o tino i ‵tou koga talai e pelā mo te laukele?
3 Fakatoka Faka‵lei te Laukele: A te loto o te tino e fai eiloa e pelā mo te laukele. (Luka 8:15) E manakogina a fakatokatokaga e uke mō nisi laukele a koi tuai o ‵mau a aka o fuataga o te munatonu i te Tusi Tapu kae ola aka i ei. Ne ‵toki eiloa mo te manuia ne tino talai i te senitenali muamua a fuaga i vaegā laukele kese‵kese katoa, kae ne maua ei ne latou mai i te mea tenei a te lotomalie mo te fiafia. (Galu. 13:48, 52) E mafai foki o manuia tatou māfai e ‵saga tonu atu tatou ki ‵tou fakatomuaga.