Ke Akoako Atu Mai te Fakaaogaga o te Polosiua ko te Tala ‵Lei
1. Ne fakatoka pefea a te polosiua ko te Tala ‵Lei?
1 E pelā mo te mea ne sau‵tala tatou ki ei i Te ‵Tou Galuega Talai i a Iulai, e tasi o mea tāua ke aofia i ‵tou mea faigaluega ko te polosiua ko te Tala ‵Lei Mai te Atua! Ona ko te mea e se siki mai a tusi fai‵tau i te polosiua, e manakogina ke faitau kae tauloto ‵tonu mai eiloa te tino akoga mai i tena Tusi Tapu. A te ukega o ‵tou tusi ne ‵lomi aka i se auala telā e mafai ei ne te tino faitau o tauloto i a ia eiloa, kae ko te polosiua tenei ne fakatoka ke sau‵tala fakatasi mo se faiakoga. Tela la, kafai e ofo atu ne tatou te polosiua, ke taumafai o fai se akoga ko te mea ke lavea ne te tino i te fale a te gali ke tauloto ne ia te tala ‵lei mai i te Tusi Tapu.—Mata. 13:44.
2. E mafai pefea o fakaaoga ne tatou a te polosiua ko te Tala ‵Lei i te galuega talai?
2 I te Galuega Talai: E mafai o fai atu koe penei: “E asi mai au penei ona ko te mea e manava‵se a tino e tokouke ki te mea ka tupu ki olaga o tino i aso mai mua. Se a tau faka‵tau e mata, ka mafai o faka‵lei aka a fakalavelave o tino? [Faka‵tali ki se tali.] E fakaasi mai eiloa i te Tusi Tapu te tala ‵lei telā e tuku mai ei se fakamoemoega mō tatou. Konei la a nāi fesili e tali mai ne te Tusi Tapu.” Tuku atu te polosiua ki te tino i te fale kae ‵kami atu ke fili mai ne ia se fesili i te ‵kava mai tua o te polosiua. Ke kamata te akoga mai te sau‵tala ki te palakalafa muamua o te mataupu tenā. A te suā auala ko te ‵sili atu ki te tino i te fale se fesili telā e fiafia ki ei a ia kae fakavae ki te mataupu telā ne filifili ne koe, ko fakaasi atu ei te auala e mafai o fesoasoani atu ei te polosiua tenā ke maua ne ia a tali mai te Tusi Tapu. Kafai e isi se ata vitio i luga i te jw.org e fetaui ‵lei mo te mataupu tenā, e pei ne nisi tino talai a te vitio tenā i te taimi e talai ei.
3. Fakamatala mai te auala ke fai i ei se akoga mai te fakaaogaga o te polosiua ko te Tala ‵Lei.
3 Te Auala e Fai ei te Akoga: (1) Ke faitau te fesili i mataimanu uli ke fesoasoani atu ki te tino akoga ke maua ne ia te manatu tāua. (2) Ke faitau te palakalafa telā e ‵soko atu ki ei. (3) Ke faitau a tusi fai‵tau kolā e tusi i mataimanu ‵kese, kae fakaaoga a fesili i se auala atamai ke fesoasoani atu ki te tino ke lavea ne ia te auala e tali aka ne te Tusi Tapu a te fesili. (4) Kafai e isi se suā palakalafa mai lalo o te fesili, ke toe fakaaoga te auala napa 2 mo te 3. Kafai e isi se vitio e fetaui ‵lei mo te fesili tenā, ke taumafai o pei i te taimi e fai ei te sau‵talaga. (5) I te fakaotiga, fesili atu ki te tino me se a tena tali ki te fesili, ke fakamautinoa aka me malamalama ‵lei a ia i ei.
4. Se a te mea ka fesoasoani mai ke fakaaoga ne tatou a te mea faigaluega tāua tenei mo te atamai?
4 Ke fakamasani o fakaaoga te mea faigaluega tāua tenei. Ke fakaaoga i so se taimi. Mai mua o fai te akoga, ke mafaufau ki te tino akoga mo te ‵toe auala ‵lei ke fakasakosako atu mo ia mai te fakaaogaga o tusi fai‵tau i te mataupu. (Faata. 15:28; Galu. 17:2, 3) Kafai ko apo kae atamai koe i te fakaaogaga o te polosiua tenei, ka fai eiloa ne koe pelā me se mea faigaluega gali ke akoako atu ei a tino ki te munatonu!