Fakamoemoega E Mata, e Mafai Eiloa o Fesoasoani Tonu Mai?

KO SEFULU fua ana tausaga kae ne logo‵mae a Daniel i te kenisa mō se tausaga. Ko seai se fakamoemoega o ana tokita kae penā foki ana taugasoa ‵pili. Kae ne isi se fakamoemoega o Daniel. Ne talitonu a ia me kafai ko matua a ia, ka fai ana sukesukega kae ‵sala ki te auala ke faka‵lei aka te masaki ko te kenisa. Ne maua ne ia se kilokiloga ‵lei maise ki se asiga a se tokita apo i te faka‵leiga o te vaegā kenisa ne maua ne ia. Kae i te aso ne ‵tau o oko mai ei, ne ‵tau o taofi aka ne te tokita tenei tena asiga ona ko te ma‵sei o aso. Ne kamata o loto vāivāi a Daniel. Kae mō te taimi muamua ne ‵galo atu ei ana fakamoemoega katoa. Ne mate a ia i nai aso mai tua ifo.

Ne fakaasi mai te tala o Daniel ne se tino galue i te fa‵kaimasaki telā ne sukesuke ki te auala ne pokotia ei a te malosi ‵lei o tino māfai e isi se fakamoemoega kae penā foki māfai e seai se fakamoemoega. Kāti ko oti foki ne lagona ne koe a vaegā tala penā. E pelā mo se tino matua telā ko pili o mate, ne olioli a ia ki nisi mea tāua i tena olaga—kāti ko te asi atu o se tino pele io me ko te fakamanatuga o se aso o te fakaipoipoga. I te otiatuga o te mea tāua tenā, ne mate fakavave atu ei a ia. Se a te mea ne fakamalosi atu i vaegā tulaga penā? E mata, a te fakamoemoega e mafai o fakamalosi ne ia se tino e pelā mo te mea e tali‵tonu ki ei a nisi tino?

E tokouke a tino fai sukesukega i mea tau tokita ne fai mai me i te mauaga o se kilokiloga ‵lei, fakamoemoega, mo nisi lagonaga ‵lei, e lasi ‵ki te lotou fakamalosiga ki te ola mo te malosi ‵lei o te tino. Kae e se lauiloa malosi sāle a vaegā kilokiloga penā. E fakaseaoga ne nisi tino fai sukesukega a vaegā fakamatalaga katoa penā, e pelā me e se ne fakamatalaga fakasaienitisi. E mafau‵fau latou me e isi loa ne pogai faka-te-foitino mō masaki.

E tonu, e sē se mea fou a te fakalotolotolua o tino ki te tāua māfai e isi se fakamoemoega. I te fia afe tausaga ko ‵teka, ne fesili atu ki se tagata poto i te ‵gana Eleni ko Aristotle ke fakamatala mai a te uiga o te fakamoemoega kae tali mai penei: “A te mea tenā se moemiti fua.” Kae i aso fakamuli nei, ne fai ‵tonu atu se tagata Amelika ko Benjamin Franklin, penei: “A te tino telā e ola mo te fakamoemoega ka mate eiloa.”

Se a la te munatonu e uiga ki te fakamoemoega? E mata, ne fai sāle fua pelā me ne mafaufauga sē mautinoa, se auala fua ke ‵sala atu a tino ki fakamafanafanaga mai moemiti sē aoga? Io me e mata, e isi se pogai ‵lei ke ‵kilo atu ki te fakamoemoega e pelā me e uke atu a mea e aofia i ei—se mea telā e ‵tau o maua ne tatou katoa ko te mea ke mafai o ola ‵lei kae fia‵fia tatou, se mea telā e isi ne mea aoga ‵tonu e maua mai i ei?