“Ka Lasi te Filemu” e Maua Mai Lalo i te Pulega a te Malo o te Atua

I se taimi pili mai mua nei ka maua eiloa ne te lalolagi a te filemu mo te ‵kau fakatasi o tino i ei—mai lalo i te malo telā ko leva ne fakatali‵tali tatou ki ei—telā ne fakatu ne te Atua. “Ka lasi te filemu,” ko te folafolaga mai i te Salamo 72:7. Kae ka pule mai māfea te Malo tenā ki te lalolagi nei? Ka pule mai pefea? Kae ne a mea aoga ka maua ne koe mai lalo i te pulega o te Malo tenā?

KA OKO MAI MĀFEA TE MALO O TE ATUA?

Ko oti eiloa ne ‵valo mai i te Tusi Tapu a fakailoga o mea ‵tupu kolā e fakaasi mai i ei me ko pili o oko mai te Malo o te Atua. A mea ‵tupu konei se “fakailoga” e tasi telā e aofia i ei a taua i te lalolagi, oge mea‵kai, masaki ‵pisi, ko mafuie e uke, mo te gasoloakaga o amioga solitulafono.—Mataio 24:3, 7, 12; Luka 21:11; Fakaasiga 6:2-8.

E fai mai suā valoaga, penei: “Me ka oko mai eiloa a toe taimi faiga‵ta i aso fakaoti. Me i tino ka a‵lofa fua ki a latou eiloa, fia‵fai tupe, . . . e se faka‵logo ki mātua, e se loto fakafetai, e se fakamaoni, seai se alofa masani, e se lotoma‵lie ki so se feagaiga, e gutu fatu‵fatu, e seai se loto pulea, e amio fakasaua, e se fia‵fia ki te aga‵lei, . . . e ‵fonu i te fakamatamata, e va‵lea ki fakafiafiaga i lō te a‵lofa ki te Atua.” (2 Timoteo 3:1-4) E isi eiloa ne tino ne fai ne latou a amioga konei. Kae nei la, ko fai eiloa e pelā me ne uiga masani o te tokoukega.

Ne fakataunu eiloa a valoaga konei talu mai te tausaga 1914. E tonu, ne fai mai i mau a tino tusitala a te uke o fakama‵fuliga ne ‵tupu i te lalolagi talu mai i te tausaga tenā. E pelā me se fakaakoakoga, ne tusi mai a te tino tusitala mai i Denmark ko Peter Munch, penei : “A te ‵tupuga o te taua muamua i te 1914 ne lasi ‵ki ana fakama‵fuliga ne fai i tala fakasolopito o tino. I tausaga mai mua atu i ei, ne mafau‵fau a tino me ko gasolo o ‵lei a tulaga o mea i te lalolagi, . . . Kae i te tausaga eiloa tenā, ne ‵tupu ei a fakalavelave, mea fakama‵taku, mo uiga fakasaua, kae seai foki se tokagamalie i koga katoa.”

Kae e pelā mo te manatu fakafiafia tenei, ka oti ne ‵tupu a fakalavelave konei, ka maua eiloa te filemu. E fakaasi mai ne fakailoga konā me ko pili o pule mai te Malo o te Atua ki te lalolagi. A te ‵tonuga loa, ne fakaopoopo mai ne Iesu se manatu ‵lei mai tafa o fakailoga o te gataga o te olaga tenei, i ana pati konei: “Te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa, ko oko mai ei te gataga.”—Mataio 24:14.

A te tala ‵lei tenei ko te fakavae o te matua o te fekau a Molimau a Ieova. A te ‵tonuga loa, a te tusi tāua a latou telā ko oti ne lomi ko Te Faleleoleo Maluga e Folafola Atu ei te Malo o Ieova. E fakamatala mai faeloa i ei a mea ‵gali ka fai ne te Malo o te Atua mō ana tino.

KAE KA PULE MAI PEFEA TE MALO O TE ATUA?

A te tali ki ei e aofia eiloa i ei a muna‵tonu tāua e fa konei:

1. Ka se fakateletele a te malo tenei ne takitaki o malo fakapolitiki i aso nei.

2. Ka kaima‵nako a takitaki i mea fakapolitiki i te lalolagi nei ke maua te malosi pule, kae ka taua atu eiloa latou ki te Malo o te Atua.—Salamo 2:2-9.

3. Ka fakaseai ne te Malo o te Atua a malo fakapolitiki kolā koi ma‵nako o pule mālō atu ki tino. (Tanielu 2:44; Fakaasiga 19:17-21) A te taua fakaoti tenei i te lalolagi kātoa ka taku ki te taua o Amaketo.—Fakaasiga 16:14, 16.

4. A latou kolā ne fia‵fia o ‵lago atu ki te Malo o te Atua ka ‵sao atu i Amaketo kae ka ulu atu ki loto i te lalolagi fou. Ka fai eiloa latou e pelā mo pati i te Tusi Tapu “se vaitino e tokouke,” kāti e nofo ki se fia miliona o tino.—Fakaasiga 7:9, 10, 13, 14.

NE A MEA AOGA KA MAUA NE KOE MAI LALO I TE PULEGA A TE MALO TENĀ?

Ko te mea ke nofo koe mai lalo i te pulega a te Malo o te Atua, ko te faiga o sau akoga faka-te-Tusi Tapu. E tonu, ne fai mai a Iesu i tena ‵talo ki te Atua, penei: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, e penā foki loa mo te tino telā ne uga mai ne koe, ko Iesu Keliso.”—Ioane 17:3.

Kafai e iloa ne se tino me i a Ieova te Atua se tino tonu, e aoga eiloa te mea tenā ki a latou i auala e uke. Ke mafau‵fau ki manatu konei e lua: Muamua la, e ati aka ne latou te fakatuanaki ki a ia. A te fakatuanaki tenā e fakavae ki fakamaoniga ‵tonu, e fakatalitonu atu ki a latou me i te Malo o te Atua se malo tonu kae ko pili fua o oko mai. (Epelu 11:1) A te lua, a te olotou a‵lofa ki te Atua mo tuakoi ka gasolo aka loa o malosi. A te alofa ki te Atua e fakamalosi atu ki a latou ke faka‵logo ki a ia mo te loto kātoa. A te alofa ki olotou tuakoi ka fakamalosi atu ki a latou ke fakagalue a te Tulafono Fakaaulo. E fai mai penei: “E pelā foki mo mea kolā e ma‵nako koutou ke fai atu ne tino ki a koutou, ke fai foki ne koutou ki a latou.”—Luka 6:31.

E pelā me se tamana alofa, e manako eiloa te ‵tou Mafuaga ke maua ne tatou a toe mea ‵lei. E manako a ia ke maua ne tatou a “te ola tonu” telā e taku mai i te Tusi Tapu. (1 Timoteo 6:19) A te olaga nei e sē ko “te ola tonu.” A olaga o te fia miliona o tino i aso nei ko oko aka eiloa i te faigata kae taumafai eiloa latou ke maua se olaga ‵lei. Ke tuku atu se ata foliki o “te ola tonu,” ke onoono ki mea ‵gali ka fai ne te Malo o te Atua mō ana tino.