Te Masaga Telā ne ‵Kese

A TE tokolua tama tāgata konei ko oko eiloa i te ‵kese, i ne? E iloa ne koe lā igoa? A te tino atuli manu ko Esau, kae ko te tama tagata telā e tausi ki mamoe ko Iakopo.

A Esau mo Iakopo se masaga tāgata a Isaako mo Lepeka. A te lā tamana, ko Isaako, ne fiafia malosi ki a Esau, me i a ia se tino poto i te atuli manu kae e aumai ne ia a meakai mō ‵kai te kāiga. Kae ne alofa malosi atu a Lepeka ki a Iakopo, me i a ia se tamaliki filemu.

Koi ola tena tupuna ko Apelaamo, kae e mafai ne tatou o fakaataata a te fiafia o Iakopo o fakalogologo ki a ia māfai e faipati a ia e uiga ki a Ieova. Fakamuli loa ne mate atu a Apelaamo kae ko 175 ana tausaga, i te taimi ko taki 15 ei tausaga o te masaga.

I te taimi ko 40 ei tausaga o Esau ne avaga a ia ki fāfine e tokolua mai te fenua o Kanana. Ne fanoa‵noa ‵ki a Isaako mo Lepeka i ei, me ne seki tapuaki atu a fāfine konā ki a Ieova.

Kae i te aso e tasi ne tupu se mea telā ne fai ei a Esau ke kaitaua malosi ki tena taina ko Iakopo. Ne oko mai a te taimi ke tuku atu ei se fakamanuiaga ne Isaako ki tena tamaliki matua. Ona ko te mea ne matua atu a Esau i a Iakopo, ne fakamoemoe a Esau ke maua ne ia te fakamanuiaga tenā. Kae ko oti ne fakatau atu ne Esau ki a Iakopo a te aiā ke maua te fakamanuiaga. I te taimi foki ne fa‵nau mai ei a te tokolua tama‵liki tāgata konei, ne fai atu te Atua me ka maua ne Iakopo te fakamanuiaga. Kae ne tupu eiloa a te mea tenei. Ne tuku atu ne Isaako a te fakamanuiaga ki tena tama tagata ko Iakopo.

Fakamuli ifo, i te iloaga ne Esau a te mea tenei ne kaitaua a ia ki a Iakopo. Ko oko eiloa te lasi o tena kaitaua telā ne fai atu ei a Esau me ka tamate ne ia a Iakopo. I te taimi ne lagona ei ne Lepeka a te mea tenā, ne manavase tou fafine. Telā ne fai atu ei a ia ki tena avaga ko Isaako: ‘Ka matagā ‵ki eiloa māfai ko avaga foki a Iakopo ki se fafine Kanana.’

I konā ne kalaga atu ei a Isaako ki tena tama tagata ko Iakopo kae ne fai atu penei ki a ia: ‘Sa avaga koe ki se fafine mai Kanana. Fano ki te fale o tou tupuna ko Petueli i Halana. Avaga ki se tama fafine e tokotasi a tena tama ko Lapana.’

Ne fakalogo a Iakopo ki tena tamana, kae ne fanatu eiloa a ia i te taimi tenā i tena malaga loa ki te koga e ‵nofo ei ana kāiga i Halana.