Puipui Tou Tofi Mai Te Faiga O Filifiliga ‵Poto

1, 2. (a) Ne fai pefea ne koe a tau fakaikuga ke tavini atu ki te Atua? (e) Ne a fesili e mafai o ‵sili ne tatou e uiga ki ‵tou tofi faka-te-agaga?

KO OTI ne fai ne te fia miliona o tatou a te filifiliga poto ke tavini atu ki a Ieova te Atua kae tau‵tali fakapili‵pili i kalafaga o Iesu Keliso. (Mata. 16:24; 1 Pe. 2:21) E se ‵tau o manatu ma‵ma tatou ki ‵tou tukuatuga ki te Atua. Ne seki fakavae a ‵tou filifiliga ki luga i te iloaga fua o nāi tusi siki, kae ki luga i se sukesukega māea ne fai ki te Muna a te Atua. Kae ko te ikuga, ne tauloto ne tatou a fakamatalaga likiliki e uke e fakamalosi aka ei a ‵tou fakatuanaki ki te ‵tofi telā ne tuku ne Ieova ki tino kolā e ma‵nako o ‘tauloto ki te iloaga e uiga ki a ia mo te tino telā ne uga mai ne ia, ko Iesu Keliso.’​—Ioa. 17:3; Lo. 12:2.

² Ke fakatumau a ‵tou tulaga e pelā me ne Kelisiano, e ‵tau mo tatou o fai a filifiliga kolā e fakafiafia atu ki ‵tou Tamana faka-te-lagi. Ka mafau‵fau tatou i te mataupu tenei ki fesili tāua konei: Se a ‵tou tofi? E ‵tau o pefea ‵tou kilokiloga ki ei? E ‵tau o fakamautinoa aka pefea ne tatou me e maua eiloa ne tatou a ‵tou tofi? Se a te mea ka fesoasoani mai ke fai ne tatou a filifiliga ‵poto?

‵TOU TOFI​—SE A TE MEA TENĀ?

3. Se a te tofi e maua ne (a) te kau fakaekegina kae ko te (e) “nisi mamoe”?

³ Se aofaki foliki fua o Kelisiano e fakamoemoe ke maua “se tofi telā e se mafai o pala io me lailai kae se mafai foki o galo”​—te tauliaga sē ‵togi ke pule fakatasi mo Keliso i te lagi. (1 Pe. 1:3, 4) Ke maua a te tofi tenā, e ‵tau mo tino taki tokotasi konei o “toe fanau mai.” (Ioa. 3:1-3) Se a la te tofi o te fia miliona o “nisi mamoe” a Iesu kolā e ‵kau fakatasi mo ana soko fakaekegina i te folafolaga o te tala ‵lei o te Malo o te Atua? (Ioa. 10:16) Ka maua ne nisi mamoe a te tofi telā ne seki maua ne Atamu mo Eva​—ko te ola se-gata-mai i se lalolagi palataiso e aunoa mo logo‵maega, te mate, io ko fanoanoaga. (Faka. 21:1-4) Tela la, ne tauto atu a Iesu ki te pagota telā ne ‵mate fakatasi mo ia: “Au e fai ‵tonu atu ki a koe i te aso nei, Ka ‵nofo fakatasi eiloa tāua i te Palataiso.”​—Luka 23:43.

4. Ne a fakamanuiaga e maua nei ne tatou?

⁴ E fia‵fia foki nei tatou ki nisi vaega o ‵tou tofi. Ona ko te fakatuanaki o tatou ki ‘te togiola ne ‵togi ne Keliso Iesu,’ ko maua ne tatou a te filemu mo se fesokotakiga ‵pili mo te Atua. (Lo. 3:23-25) Ko malamalama faka‵lei tatou i tautoga tāua i loto i te Muna a te Atua. E se gata i ei, a te fai mo vaega o te kautaina a‵lofa i te lalolagi se pogai e tasi o te fiafia sē fuafuagina. Kae se tauliaga manuia a te fai mo fai se Molimau a Ieova. E se tioa eiloa o fakatāua ne tatou a ‵tou tofi!

5. Se a te mea a Satani ne taumafai o fai ki tino o te Atua, kae se a te mea e mafai o fesoasoani mai ki a tatou ke tu ‵mautakitaki o ‵teke atu ki ana togafiti?

⁵ Ko te mea ke ‵mautakitaki tatou i ‵tou tofi fakaofoofogina, e ‵tau mo tatou o matapula‵pula faeloa ki togafiti a Satani. Ne taumafai faeloa a Satani o fakamalosi a tino o te Atua ke fai a filifiliga kolā e mafai o galo i ei te lotou tofi. (Nume. 25:1-3, 9) Me iloa ne ia me ko pili mai a tena fakaseaiga, ne fakamalosi aka ne Satani ana taumafaiga ke takitaki ‵se tatou. (Faitau te Fakaasiga 12:12, 17.) Kafai e ma‵nako tatou o ‘tu ‵mautakitaki o ‵teke atu a togafiti ma‵sei a te Tiapolo,’ e ‵tau mo tatou o fakatāua malosi faeloa a ‵tou tofi. (Efe. 6:11) I te feitu tenei, se mea ‵lei ke faka‵goto ifo ki ‵tou loto a akoakoga tāua e maua ne tatou mai i te fakaakoakoga a te tama tagata a Isaako ko Esau.

SA FAI PELĀ MO ESAU

6, 7. Ko oi a Esau, kae se a te ‵tofi ne ‵tau o maua ne ia?

⁶ Ko tai kātoa te 4,000 tausaga ko ‵teka, kae fa‵nau mai a te masaga a Isaako mo Lepeka, ko Esau mo Iakopo. I te taimi ne ‵tupu aka ei a te masaga, ne ‵kese ‵ki eiloa a lā uiga mo te filifiliga o lā galuega. “A Esau se tagata poto i te atuli manu, kae fiafia foki ki te olaga i fafo, kae ko Iakopo se tino filemu kae e nofo sāle eiloa i te fale.” (Kene. 25:27) E fai mai a te tino ‵fuli Tusi Tapu ko Robert Alter, me i te pati Epelu telā ne fakauiga ki te “tino filemu,” “e faka‵mafa mai i ei a te fakamaoni io me ko te sē fai agasala.”

⁷ I te taimi ko 15 ei tausaga o Esau mo Iakopo te ma‵tua, ne mate te lā tupuna ko Apelaamo, kae ko te tautoga a Ieova ki a Apelaamo ne tumau eiloa. Fakamuli ifo, ne toe fakafoki atu ne Ieova ki a Isaako, me ka fakamanuia ne atufenua katoa o te lalolagi a latou eiloa e auala i te fanau a Apelaamo. (Faitau te Kenese 26:3-5.) Ne fakaasi mai i te folafolaga tenā me i te Mesia—te “fanau” fakamaoni i te Kenese 3:15​—ka vau i te fanau a Apelaamo. E pelā me ko te tama toekimua a Isaako, ne ‵tau eiloa o maua ne Esau a te tautoga tenā mai lalo i te tulafono. Mafaga o tofi fakaofoofogia ne ‵tau o maua ne Esau! E mata, ne amanaia a ia ki ei?

8, 9. (a) Se a te filifiliga ne fai ne Esau e uiga ki tena tofi? (e) Se a te mea ne iloa ne Esau i tausaga fakamuli ifo e uiga ki tena filifiliga, kae ne ana mea ne fai?

⁸ I te aso e tasi ne foki mai ei a Esau mai te vao, ne matea ne tou tagata a Iakopo “e ‵tunu te supu.” Muna a Esau, “au ko likiliki faka eiloa, asu mai aka ne aku mea mai tau supu ‵kula tenā.” I tena tali, ne fai atu a Iakopo ki a Esau: “Ke tuku mai muamua ne koe tou tofi toekimua ki a au ko fatoa avatu ei ne au ne mu mea ma koe.” Se a te filifiliga ne fai ne Esau? Muna a tou tagata: “Au se ola i toku tulaga ko te toekimua.” Ao, ne filifili ne Esau a te pōla supu i lō te tofi toekimua! Ko te mea ke mautinoa a te fakatauga o te tofi toekimua, ne fai atu faeloa a Iakopo: “Tauto muamua me ka tuku mai tou tofi toekimua ki a au.” E aunoa mo te fakatalave, ne fakatau ei ne Esau a tena tofi toekimua. Mai tua i konā, “Tuku atu ei ne Iakopo ki a ia ne falaoa mo ne supu mo ona kai. I tena otiga ne kai kae inu, te mea eiloa ko fano. E penā eiloa te manatu māmā o Esau ki tena tofi toekimua.”​—Kene. 25:29-34.

⁹ I tausaga fakamuli ifo, i te taimi ko pili ei a Isaako o mate, ne fai ne Lepeka a fakatokaga ko te mea ke mautinoa me e maua eiloa ne Iakopo a te tofi toekimua o Esau me sē fakatāua ne ia. I te iloaga fakamuli ne Esau a te valea o tena filifiliga ne fai, ne fakamolemole atu ei tou tagata ki a Isaako: “Toku tamana, tuku mai aka foki la tau fakamanuiaga ki a au! . . . E a, ko seai eiloa se fakamanuiaga koi toe mo oku?” I te faiatuga a Isaako me ko sē mafai ne ia o ‵fuli a te fakamanuiaga ko oti ne tuku atu ne ia ki a Iakopo, “tenā ne tagi ei a ia.”​—Kene. 27:30-38.

10. Ne kilo atu pefea a Ieova ki a Esau mo Iakopo, kae kaia?

¹⁰ Ne a uiga masani o Esau ne fakaasi faka‵lei mai i Tusitusiga Tapu? Ne fakaasi mai ne tou tagata me i te fakamaliega o ana manakoga faka-te-foitino ne tāua atu ki a ia i lō te mauaga o fakamanuiaga i te taimi mai mua kolā ne ‵tau o maua mai i tena tofi. Ne seki fakatāua ne Esau a tena tofi toekimua kae mautinoa me ne seki alofa tonu a ia ki te Atua. E se gata i ei, ne seki mafaufau a Esau me ka pokotia ana tamaliki i tena filifiliga. Kae ‵kese a Iakopo, me ne fakatāua malosi ne ia a tena tofi. Pelā me se fakaakoakoga, ne fai ne Iakopo a mea e ‵tusa mo fakatonuga a mātua i te filifiliga o se avaga. (Kene. 27:46–28:3) Ona ko Iakopo ne fai ne ia a te filifiliga tenei telā e manakogina i ei a te kufaki mo te fakalogo katoatoa, ne fai tou tagata mo tupuga o te Mesia. Ne kilo atu pefea te Atua ki a Esau mo Iakopo? Ne fai mai a Ieova e auala i te pelofeta ko Malaki: “Au ne alofa ki a Iakopo mo tena gafa, kae seki fiafia ki a Esau mo tena gafa.”​—Mala. 1:2, 3.

11. (a) Kaia e aoga ei a te fakaakoakoga a Esau ki a tatou e pelā me ne Kelisiano? (e) Kaia ne faipati ei a Paulo ki te fina ki amioga fakatauavaga i tena fakamatalaga e uiga ki te mea ne fai ne Esau?

¹¹ E mata, e aoga ki Kelisiano i aso nei a pati a te Tusi Tapu e uiga ki a Esau? Ao, e aoga. Ne fakailoa atu ne te apositolo ko Paulo ki taina mo tuagane ke fakaeteete “ke seai se tino i a koutou e fina ki amioga fakatauavaga sē ‵tau io me se tino telā e se fakatāua ne ia a mea tapu, e pelā mo Esau, telā ne fesuiaki ne ia tena tulaga toekimua mo se ‵kaiga fua e tasi.” (Epe. 12:16) Koi aoga eiloa te faka‵pulaga tenā ki Kelisiano. E ‵tau mo tatou o fakatumau a ‵tou loto fakafetai mō mea tapu ko te mea ke sē fakatakavale tatou ne manakoga faka-te-foitino kae galo atu i ei a ‵tou tofi faka-te-agaga. Kaia ne faipati ei a Paulo ki te fina ki amioga fakatauavaga i tena fakamatalaga e uiga ki te mea ne fai ne Esau? Me i te mauaga o se manakoga faka-te-foitino pelā mo Esau e fakamalosi aka ei se tino ke sē fakatāua a mea tapu ona ko fiafiaga sē ‵tau e pelā mo te fina ki amioga fakatauavaga.

FAKATOKA TOU LOTO I TE TAIMI NEI

12. (a) E tofotofo aka pefea ne Satani a ‵tou manakoga sē ‵lei katoatoa? (e) Tuku mai ne fakaakoakoga i Tusitusiga Tapu kolā e mafai o fesoasoani mai ki a tatou māfai ko fai a filifiliga faiga‵ta.

¹² E pelā me ne tavini a Ieova, e se ‵sala atu tatou ki tulaga kolā e mafai o tofotofo aka i ei tatou ke fai a amioga fakatauavaga sē ‵tau. I lō te fai penā, e ‵talo atu tatou ke mo a ma talia ne Ieova te Atua ke taka‵vale tatou māfai e fakaosoosogina ne se tino ke sē faka‵logo ki a ia. (Mata. 6:13) Kae ko Satani e taumafai faeloa o fakavāivāi a ‵tou tulaga faka-te-agaga faitalia a te taumafai o tatou o fakatumau a ‵tou fakamaoni i te lalolagi masei tenei. (Efe. 6:12) E pelā me ko te atua o te olaga masei tenei, e iloa ne te Tiapolo o tofotofo a ‵tou manakoga sē ‵lei katoatoa mai te fakaaogaga o fakaosoosoga kolā e fia‵fia ki ei a tino sē ‵lei katoatoa. (1 Koli. 10:8, 13) Pelā me se fakaakoakoga, mafaufau me ko maua ne tatou se avanoaga ke fakamalie aka ‵tou manakoga i se auala sē ‵tau. Se a te filifiliga ka fai ne koe? E mata, ka fai koe pelā mo Esau kae fai atu: ‘Ke vave! Tuku mai ki a au!’ Io me ‵teke atu koe ki te fakaosoosoga kae tele kea‵tea mai i ei e pelā mo te tama a Iakopo ko Iosefa, telā ne fakaosooso ne te avaga a Potifala?​—Faitau te Kenese 39:10-12.

13. (a) Ne fai pefea a te tokoukega o tino i aso nei e pelā mo Iosefa, kae ko nisi tino e pelā mo Esau? (e) Se a te mea tāua e manakogina ke iloa ne tatou mai i fakaakoakoga a tino pelā mo Esau?

¹³ E tokouke a ‵tou taina mo tuagane ne ‵tu i tulaga kolā e ‵tau ei o filifili latou ke fai pelā mo Esau io me pelā mo Iosefa. Ne ‵poto a te tokoukega i olotou faifaiga ne fai kae ne fakafiafia atu ki te loto o Ieova. (Faata. 27:11) I te taimi ne fe‵paki ei mo tofotofoga, ne fai a nisi taina mo tuagane o tatou e pelā mo Esau, kae ne oko atu olotou tofi faka-te-agaga ki se tulaga fakamataku. A te uke o fakamasinoga mo te faka‵teaga o tino e fai i tausaga takitasi ko ikuga o amioga fakatauavaga sē ‵tau. Ko oko eiloa i te tāua ke fakatoka ‵tou loto i te taimi nei​—koi tuai o oko atu tatou ki tulaga kolā e tofotofo aka i ei a ‵tou fakamaoni! (Sala. 78:8) E mafai o fai ne tatou auala e lua kolā ka fai pelā me se ‵pui e puipui ei tatou mai tofotofoga kae fesoasoani mai ke fai ne tatou a filifiliga ‵poto.

MAFAUFAU KAE TOE FAKAMALOSI AKA

14. Ne a fesili e mafai o mafau‵fau ki ei ke fesoasoani mai ki a tatou ke “takalia‵lia ki mea ma‵sei” kae “puke ‵mau ki mea ‵lei”?

¹⁴ A te auala muamua e aofia i ei a te mafaufau ki ikuga o ‵tou mea e fai. A te ‵poko o ‵tou loto fakafetai ki ‵tou tofi faka-te-agaga e fakalagolago malosi ki te ‵poko o ‵tou a‵lofa ki a Ieova, te Tino telā ne tuku mai ne ia te tofi tenā. I te fakaotiga loa, kafai e a‵lofa tatou ki se tino, e se ma‵nako tatou o faka‵mae a te tino tenā. E taumafai tatou o fakatāua a tena taliaga. Ona ko te mea tenā, se mea ‵lei ke mafau‵fau tatou i nisi taimi ki ikuga o tatou mo nisi tino māfai e taka‵vale tatou i manakoga faka-te-foitino sē ‵ma. E ‵tau mo tatou o fesili ifo ki a tatou eiloa: ‘Ka pokotia pefea a toku fesokotakiga mo Ieova i aku faifaiga kaimanako? Ka pokotia pefea a toku kāiga i te mea ‵se ne fai ne au? Ka pokotia pefea a oku taina mo tuagane i te fakapotopotoga i ei? E mata, e mafai o faka‵siga ne au a nisi tino?’ (Fili. 1:10) E mafai foki o fesili ifo tatou: ‘E mata, a te fiafia o fai amioga sē ‵tau i se taimi toetoe e fetaui mo te logo‵mae telā e māfua mai i taku filifiliga? E manako tonu eiloa au ke fai pelā mo Esau, ke tagi pakalaga māfai ko iloa aka ne au a te ikuga o taku mea ne fai?’ (Epe. 12:17) A te mafaufau ki fesili penā e fesoasoani mai ki a tatou ke “takalia‵lia ki mea ma‵sei” kae “puke ‵mau ki mea ‵lei.” (Lo. 12:9) Kae maise eiloa te fakama‵losi o tatou ne ‵tou a‵lofa ki a Ieova ke puke ‵mau ki ‵tou tofi.​—Sala. 73:28.

15. Se a te mea ka fakamalosi aka ei a te puipuiga o tatou mai i mea kolā e fakama‵taku ki ‵tou tulaga faka-te-agaga?

¹⁵ A te lua o auala e aofia i ei a te fakamalosiga o mea kolā e puipui ei tatou. Ko oti ne fai ne Ieova a fakatokaga e uke ke fakamalosi aka ei a mea kolā e puipui ei tatou ke ‵teke atu ki tofotofoga mai te lalolagi kolā e fakamataku ki ‵tou tulaga faka-te-agaga. E aofia i ana fakatokaga a te sukesuke ki te Tusi Tapu, fakatasiga, te galuega talai, mo te ‵talo. (1 Koli. 15:58) I taimi takitasi e fakaasi atu ei ‵tou lagonaga i te ‵talo ki a Ieova mo taimi katoa e ‵kau ei tatou ki te galuega talai, e fakamalosi aka ne tatou a mea kolā e puipui ei tatou ke ‵teke atu ki tofotofoga. (Faitau te 1 Timoteo 6:12, 19.) Ke oko ki se taimi leva ‵ki, e fakalagolago eiloa te ma‵losi o ‵tou puipuiga ki ‵tou taumafaiga totino. (Kala. 6:7) E faka‵mafa mai a te mea tenei i te Faataoto mataupu e lua.

“‵SALA MALOSI KI TE POTO”

16, 17. E mafai pefea o maua ne tatou a te poto i te faiga o filifiliga ‵poto?

¹⁶ E fakamalosi mai te Faataoto mataupu e 2 ke taumafai tatou ke maua a te poto mo te mafaufau ‵lei. E fai ne mea konei ke mafai ne tatou o filifili i te va o te mea tonu mo te mea ‵se, te va o te loto pulea mo te fakamaliega o manakoga totino. Kae ko te manumalo o tatou e fakalagolago ki ‵tou loto fia‵fia o fai a taumafaiga. I te faka‵mafamaiga o muna‵tonu fakavae konā, e fai mai te Tusi Tapu: “Taku tama, tauloto fakalei a mea konei e akoako atu ne au ki a koe, kae sa puli a mea e fai atu ne au ke fai ne koe. Fakalogo ki muna o te poto, kae taumafai ke malamalama koe i ei. E tonu, akai atu ke maua ne koe te poto; fakamolemole atu ke maua ne koe te atamai. ‵Sala malosi ki te poto, e pelā manafai e ‵sala koe ki siliva io me ko se koloa tāua. Kafai e fai ne koe te mea tenā, kae ka iloa foki ei ne koe te uiga o te mataku ki te Aliki [Ieova], kae ka manuia eiloa koe i tau taulotoga e uiga ki te Atua. Ko te Aliki [Ieova] e aumai ne ia te poto; a te atamai mo te malamalama e o‵mai katoa mai i a ia.”​—Faata. 2:1-6.

¹⁷ E manino ‵lei, me i te mafai ne tatou o fai a filifiliga ‵poto, e fakalagolago ki te fetaui ‵lei o ‵tou tulaga mo mea kolā ne taku mai i te Faataoto. E mafai o manumalo tatou i te ‵teke atu faeloa ki tofotofoga māfai e talia ne tatou ke ‵fuli ne te muna a Ieova a ‵tou loto, māfai e ‵talo faeloa tatou mō te takitakiga a te Atua, kae māfai foki e ‵sala faeloa tatou ki te iloaga e uiga ki te Atua e pelā mo te salasala ki koloa ‵funa.

18. Se a te mea e fakaiku aka ne koe ke fai faeloa, kae kaia?

¹⁸ E tuku mai ne Ieova a te iloaga, malamalama, te loto malamalama, mo te poto ki a latou kolā e taumafai o ‵sala ki meaalofa konei. Ko te ‵sala malosi o tatou ki ei kae fakaaoga, ko te ‵pili malosi o tatou ki te Tino telā ne tuku mai ne ia, ko Ieova. I te suā feitu, a te ‵tou fesokotakiga ‵pili mo Ieova te Atua ka fai pelā me se puipuiga māfai ko fe‵paki tatou mo se tofotofoga. A te fakapili‵pili atu ki a Ieova kae maua te mataku tonu ki a ia ka puipui ei tatou mai te faiga o te mea ‵se. (Sala. 25:14; Iako. 4:8) Ke na fakamalosi aka a tatou katoa ne te fia‵fia o fai taugasoa mo Ieova kae fakagalue a te poto mai i te Atua ke fai faeloa ne tatou a vaegā filifiliga kolā e fakafiafia atu ki te loto o Ieova kae puipui i ei a ‵tou tofi.