Te Fakasaolotoga Mai Aikupito ke Oko ki te Tupu Muamua o Isalaelu

Ne takitaki ne Mose a te kau Isalaelu mai te ‵nofo fakapagotaga i Aikupito ki te Mauga o Sinai, telā ne tuku atu ei ne te Atua ki a latou ana tulafono. Fakamuli ifo, ne uga atu ne Mose a tāgata e toko 12 ke olo atu o onoono faka‵lei ki te fenua o Kanana. Kae ne ‵foki mai a te toko 10 o latou mo se lipoti masei. Ne fai ne latou a tino ke ma‵nako o toe ‵foki atu ki Aikupito. Ona ko te sē lava o te lotou fakatuanaki, ne fakasala ne te Atua a te kau Isalaelu ke takase‵se i te vao mō tausaga e 40.

Fakamuli loa, ne filifili a Iosua ke ‵taki atu ne ia a te kau Isalaelu ki loto i te fenua o Kanana. Ke fesoasoani atu ki a latou i te pukega o te fenua, ne fai ne Ieova ke ‵tupu a vavega. Ne taofi ne ia a te ‵tafe o te vaitafe ko te Iolitana, ne fai ne ia a ‵pui o Ieliko ke siga ki lalo, kae ne fai ne ia te la ke tu kae se gasue i se aso kātoa. Mai tua ifo o tausaga e ono, ne puke mai ei a te fenua mai tino Kanana.

E kamata mai i a Iosua, ne pule ne fāmasino a te kau Isalaelu i tausaga e 356. E tau‵loto tatou e uiga ki te tokoukega o latou, e aofia i ei a Palako, Kitiona, Iefata, Samasoni, mo Samuelu. E fai‵tau foki tatou e uiga ki vaegā fāfine pelā mo Lahapa, Tepola, Iaeli, Luta, Naomi, mo Talila. I mea katoa konei, e tusa mo te 396 tausaga o tala fakasolopito e aofia i te Vaega e TOLU.