Ko Faka‵muni ne Lahapa a Sipai

KO TUPU se fakalavelave ki tāgata konei. E ‵tau mo latou o ‵tele kea‵tea, i te mea ma tamate latou. A latou ko sipai Isalaelu, kae ko te fafine telā e fesoasoani atu ki a latou ko Lahapa. E nofo a Lahapa i konei i se fale i te ‵pui o te fa‵kai o Ieliko. Ke ‵sala aka ne tatou a te pogai ne tupu ei se fakalavelave ki tāgata konei.

Ne toka a te kau Isalaelu o olo atu ki te suā feitu o te vaitafe ko te Iolitana ke ulu atu ki te fenua o Kanana. Kae koi tuai o olo atu latou, ne uga atu ne Iosua a sipai e tokolua. Ana muna ki a laua: ‘Olo o onoono faka‵lei ki te laukele mo te fa‵kai o Ieliko.’

I te taimi ne oko atu ei a sipai konā ki Ieliko, ne olo atu laua ki te fale o Lahapa. Kae ne fai atu se tino ki te tupu o Ieliko: ‘Ne o‵mai a tino Isalaelu e tokolua i te po nei o onoono ki te fenua.’ I te taimi ne lagona ei ne ia a te mea tenei, ne uga atu ne te tupu a tāgata ki a Lahapa, kae ne fakatonu atu ki tou fafine: ‘A tāgata kolā i loto i tou fale, aumai laua ki tua!’ Kae ko oti ne faka‵muni ne Lahapa a sipai konā i tena tuāfale. Telā ne fai atu ei a ia penei: ‘E isi ne tāgata ne o‵mai ki toku fale, kae e se iloa ne au me ne o‵mai mai fea laua. Ko oti ne olo laua i te taimi ko pili ei o pouli, a koi tuai o ‵pono a mataloa o te fa‵kai. Kafai e fakavave koutou, e mafai eiloa o maua ne koutou a laua!’ Telā ne olo atu ei a tāgata o afuli laua.

I te lotou ologa, ne tele fakavave atu a Lahapa ki te tuāfale. ‘E iloa ne au me i a Ieova ka tuku atu ne ia ki a koutou a te fenua tenei,’ ko ana muna ki te avā sipai. ‘Ko oti ne lagona ne matou a tala me ne faka‵masa ne ia te Tai ‵Kula i te taimi ne tiakina ei ne koutou a Aikupito, mo te auala ne tamate ei ne ia a te avā tupu ko Sekono mo Oko. Ko oti ne fakaasi atu ne au te alofa ki a koulua, tela la, tauto mai ki a au, fakamolemole, me ka a‵lofa mai koulua ki a au. Ke fakasao toku tamana mo toku mātua, mo oku tuagane mo taina.’

Ne tauto atu a sipai me ka fai eiloa laua penā, kae ne ‵tau mo Lahapa o fai se mea. ‘Puke a te uka fili ‵kula tenei kae ‵sai ki tou fāmalama,’ ne fai atu a sipai, ‘kae fakamaopoopo mai ou kāiga katoa ki loto i tou fale fakatasi mo koe. Kae kafai e ‵foki mai matou katoa o puke a Ieliko, ka lavea ne matou a te uka tenei i tou fāmalama kae ka se tamate ne matou so se tino i tou fale.’ I te taimi ne ‵foki atu ei a sipai ki a Iosua, ne taku atu katoa ne laua ki a ia a mea katoa kolā ne ‵tupu.