E ‵Fua Mai a Pulalakau i te Tokotoko o Alona

KILO atu ki pulalakau mo alamoni ko ‵pala ‵lei e ‵fua mai i te tokotoko tenei, io me ko te lakau. A te mea tenei ko te tokotoko o Alona. A pulalakau mo fuagalakau ‵pala konei ne ‵fua mai i te tokotoko o Alona i te po fua e tasi! Ke onoono aka tatou ki te pogai ne fai ei penā.

Ne takase‵se atu a te kau Isalaelu i te togāvao mō se vaitaimi. Ne seki mafau‵fau a nisi tino me koi ‵tau o fai a Mose mo fai a te takitaki, io me ko Alona mo fai a te faitaulaga pule. A Kola se tino e tokotasi telā ne mafaufau penā, kae penā foki a Tatano, Apilamo mo te toko 250 takitaki o tino. Ne o‵mai katoa latou konei kae ne fai atu ki a Mose: ‘Kaia e fakamaluga ei ne koe a koe eiloa i luga i a matou katoa?’

Ne fai atu a Mose ki a Kola mo tino kolā ne tau‵tali i a ia: ‘I te taeao ma taeao ke puke mai a mea e faka‵ka ei a te afi mo mea ma‵nogi i luga i ei. Ko o‵mai ei koutou ki te faleie o Ieova. Ka lavea ne tatou me ko oi ne filifili ne Ieova.’

I te suā aso ne olo atu ei a Kola mo tena kau e toko 250 ki te faleie tapu. E tokouke a nisi tino ne o‵mai o ‵lago atu ki tāgata konei. Ko se faka‵tau eiloa a te kaitaua o Ieova. ‘Olo kea‵tea mai faleie o tāgata ma‵sei konei,’ ne fai atu a Mose. ‘Sa fakapa‵tele atu ki so se mea a latou.’ Ne faka‵logo a tino, kae ne olo atu kea‵tea mai faleie o Kola, Tatano mo Apilamo.

Telā ne fai atu ei a Mose: ‘E auala i te mea tenei ka iloa ei ne koutou me ko oi ne filifili ne Ieova. Ka mavaelua te laukele kae ka faka‵galo ifo a tāgata ma‵sei konei i ei.’

I te taimi eiloa ne gata ei a te faipatiga a Mose, ne mavaelua te laukele. A te faleie o Kola mo ana mea katoa mo Tatano mo Apilamo mo tino katoa kolā ne ‵nofo tasi mo latou ne ‵to katoa ki lalo. I te taimi ne lagona ei ne tino a ‵tagi a latou kolā ne ‵to ifo ki loto i te laukele, ne ka‵laga atu latou: ‘Tele keatea! Kāti ka galo ifo tatou i te laukele!’

Koi ‵nofo pili atu eiloa a Kola mo tena kau e toko 250 ki te faleie tapu. Telā ne aumai ei ne Ieova a te afi, kae ne ‵sunu katoa ei latou. Telā ne fai atu ei a Ieova ki te tama tagata a Alona ko Eliesa ke puke a mea faka‵ka afi a tāgata ‵mate mo fai se ‵pui manifi mō te fatafaitaulaga. A te ‵pui manifinifi tenei o te fatafaitaulaga e ‵tau o fakaaogā pelā me se fakailoaga ki te kau Isalaelu me e seai eiloa se tino i tafa o Alona mo ana tama tāgata e ‵tau o fai pelā me ne faitaulaga mō Ieova.

Kae ne manako a Ieova ke fakamaina faka‵lei atu me ko Alona mo ana tama tāgata kolā ne filifili ne ia mo fai ne faitaulaga. Telā ne fai atu ei a ia ki a Mose: ‘Fai ki takitaki o matakāiga takitasi ke aumai ne olotou tokotoko. Fai ki a Alona ke aumai tena tokotoko mō te matakāiga o Levi. Ko tuku i ei a tokotoko takitasi konei i te faleie tapu i mua o te pusa o te feagaiga. A te tokotoko o te tagata telā ne filifili ne au mo fai te faitaulaga ka ‵fua mai i ei a pulalakau.’

I te taimi ne kilo atu ei a Mose i te taeaoakaga, ne ‵fua mai i te tokotoko o Alona a pulalakau mo alamoni ‵pala ‵lei konei! E a ko iloa ne koe me kaia ne fai ei ne Ieova ke ‵fua mai a pulalakau i te tokotoko o Alona?