Tavita mo Koliata

NE TOE o‵mai a te kau Filisitia o taua atu ki te kau Isalaelu. A taina ma‵tua e tokotolu o Tavita ne aofia i te taimi tenā i te kautau a Saulo. Tela la, i te aso e tasi ne fai atu a Iese ki a Tavita: ‘Avatu ne saito mo falaoa ki ou taina. Onoono atu me e a latou.’

I te taimi ne oko atu ei a Tavita ki te koga e ‵nofo ei a te kautau, ne tele atu a ia ki te koga e fai ei a te taua ke onoono ki ana taina. Ne vau a te tino mafi ko Koliata o fakatauemu atu ki te kau Isalaelu. Ko oti ne fai sāle ne ia a te mea tenei i taeao mo afiafi katoa i aso e 40. Ne kalaga atu a ia: ‘Filifili aka se tagata e tokotasi i a koutou ke taua maua. Kafai e manumalo a ia kae tamate ne ia au, ka fai matou mo otou pologa. Kae kafai e manumalo au kae tamate ne au a ia, ka fai koutou mo omotou pologa. Ko toa atu au ki a koutou ke filifili mai se tino ke taua maua.’

Ne fesili atu a Tavita ki nisi sotia: ‘Se a te mea ka maua ne te tagata telā ka tamate ne ia a te tino Filisitia tenei kae fakasaoloto a te kau Isalaelu mai te masiasi tenei?’

‘Ka tuku atu ne Saulo ki te tagata tenei a maumea e uke,’ ne fai atu a sotia. ‘Kae ka tuku atu foki ne ia tena tama fafine eiloa mo fai tena avaga.’

Kae ne ma‵taku a tino Isalaelu katoa i a Koliata me ne lasi ‵ki a ia. E sili atu i te 9 futu (3 mita) tena maluga, kae ne isi sena sotia e ave ne ia te talita mō ia.

Ne olo atu a nisi sotia kae ne fai atu ki te Tupu ko Saulo me i a Tavita e manako ke taua laua mo Koliata. Kae ne fai atu penei a Saulo ki a Tavita: ‘E se mafai ne koe o taua atu ki te tino Filisitia tenei. A koe koi tamaliki faeloa, kae ko oti ne fai a ia mo fai se sotia i tena olaga kātoa.’ Ne tali atu a Tavita: ‘Ne tamate ne au se pea mo se leona kolā ne ave kea‵tea ne laua a mamoe a toku tamana. Kae ko te tino Filisitia—tenei ka fai pelā mo manu konā. Ka fesoasoani mai a Ieova ki a au.’ Telā ne fai atu ei a Saulo: ‘Fano, kae ke fakatasi atu a Ieova ki a koe.’

Ne fanaifo a Tavita ki se vaitafe kae ne puke ne ia a fatu mole‵mole e lima, kae tuku ne ia ki loto i tena taga. Ne puke aka ne ia tena sana fatu kae fanatu o fepaki mo te tino mafi. I te taimi ne lavea ei ne Koliata a ia, ne ofo malosi a ia. Ne mafaufau a ia me ka faigofie ‵ki ke tamate a Tavita.

‘Vau fua ki a au,’ ne fai atu a Koliata, ‘kae ka tuku atu ne au tou foitino ki manu eva mo manu vaefa ke kai ne latou.’ Ko fai atu a Tavita: ‘E vau koe ki a au mo se pelu mo se tao, kae ko au e fanatu ki a koe i te igoa o Ieova. I te aso tenei ka tuku mai ne Ieova a koe ki oku lima kae ka tamate ne au a koe.’

I konā ne tele atu ei a Tavita ki a Koliata. Ne puke aka ne ia se fatu mai tena taga, tuku ki loto i tena sana fatu, kae ne sana atu mo tena malosi kātoa. Ne lele atu te fatu, poko eiloa i te lae o Koliata, ne siga ki lalo kae ne mate ei a ia! I te taimi ne lavea ei ne te kau Filisitia me ko mate te lotou tino mafi, ne ‵fuli katoa keatea kae ‵tele. Ne ‵tele atu a te kau Isalaelu i olotou tua kae ne manumalo latou i te taua.