Ne Seki Mataku a Tavita

Ne a au mea e fai māfai koe ko mataku?— Kāti e fanatu koe ki tou mātua mo tou tamana mō se fesoasoani. Kae e isi aka foki se tino telā e mafai o fesoasoani atu ki a koe. E malosi fakafia atu a ia i lō so se isi tino. E iloa ne koe me ko oi?— Ao, ko Ieova te Atua. Ke na sau‵tala nei tatou e uiga ki se talavou tagata i te Tusi Tapu e igoa ki a Tavita. Ne iloa ne ia me ka fesoasoani atu faeloa a Ieova ki a ia, tela la, ne seki mataku tou tagata.

Talu mai te taimi koi pepe ei a Tavita, ne akoako tou tagata ne ana mātua ke alofa ki a Ieova. Ne fesoasoani atu te mea tenei ki a Tavita ke se mataku māfai ko fe‵paki a ia mo nisi mea fakama‵taku. Ne iloa ne ia me i a Ieova ko tena Taugasoa kae ka fesoasoani atu eiloa a Ieova ki a ia. I te taimi e tasi, ne tausi ne Tavita a nisi mamoe, ne fanatu se leona lasi kae ū ne ia se mamoe ki tena gutu! E iloa ne koe me ne a mea ne fai ne Tavita? Ne ­afuli ne ia te leona kae ne tamate fua ne ia ki ana lima! Kae mai tua ifo, ne oso atu se pea ki te mamoe, kae ne tamate foki ne Tavita! Se a tau faka‵tau me ko oi ne fesoasoani atu ki a Tavita?— Ao, ko Ieova.

E isi foki se taimi ne fakaasi atu ei a te malosi fakaatea o Tavita. Ne taua atu te kau Isalaelu ki tino Filisitia. E tokotasi te sotia a te kau Filisitia se tagata maluga ‵ki, se toa! Tena igoa ko Koliata. Ne fakatauemu atu te mafi tenei ki sotia Isalaelu penā foki ki a Ieova. Ne toa atu a Koliata ki sotia Isalaelu ke taua latou. Kae ko sotia Isalaelu ko tō ma‵taku katoa ke taua mo ia. I te taimi ne lagona ei ne Tavita, ne fai atu a ia ki a Koliata: ‘Ko au ka taua mo koe! Ka fesoasoani mai a Ieova ki a au, kae ka fakatakavale ne au koe!’ Se a tau faka‵tau, a Tavita se tagata mafi?— Ao, ne mafi ‵ki eiloa. E iloa ne koe me se a te mea ne tupu mai tua ifo?

Ne puke ne Tavita tena pana mo fatu mole‵mole e lima, kae ne fanatu a ia o taua mo te mafi. I te taimi ne lavea ei ne Koliata a te foliki o Tavita, ne fakatauemu atu a ia ki a Tavita! Kae ne fai atu a Tavita ki a ia: ‘A koe e vau ki a au mo te pelu, kae ko au e fanatu ki a koe mo te igoa o Ieova!’ Ne tuku ne ia se fatu ki loto i tena pana, tele atu ki a Koliata, kae pana tonu atu eiloa ne ia ki tou tagata. Ne poko te fatu i te va o mata o Koliata! Ne siga te mafi ki lalo i te laukele, mate atu eiloa! Ne ma‵taku malosi a te kau Filisitia ko te mea loa ko ‵tele keatea a latou katoa. Ne mafai pefea o fakatakavale ne se tamā tamaliki e pelā mo Tavita a te tino mafi?— Ne fesoasoani atu a Ieova ki a ia, kae ne sili fakafia atu foki te malosi o Ieova i lō te toa tenā!

Se a te mea e mafai o tauloto ne koe mai i te tala o Tavita?— E sili atu te malosi o Ieova i lō so se isi tino. Kae e fai eiloa a ia mo fai tou Taugasoa. Tela la, i te suā taimi e mataku ei koe, masaua, e mafai ne Ieova o fesoasoani atu ki a koe!