Te Tupu Poto ko Solomona

KOI talavou a Solomona i te taimi ne fai ei a ia mo fai te tupu. Ne alofa a ia ki a Ieova, kae ne tautali atu a ia ki fakatakitakiga ‵lei kolā ne tuku atu ne tena tamana ko Tavita ki a ia. Ne fiafia a Ieova ki a Solomona kae i te po e tasi ne fai atu a ia ki tou tagata i se moemiti: ‘Solomona, se a te mea e manako koe ke avatu ne au ki a koe?’

Ne tali atu a Solomona: ‘Ieova toku Atua, au koi foliki ‵ki kae e se iloa ne au o pule. Tela la, tuku mai ki a au a te poto ke pule atu ki ou tino i se auala tonu.’

Ne fiafia a Ieova ki te mea ne fakamolemole atu ki ei a Solomona. Ne fai atu a ia: ‘Ona ko te mea ne fakamolemole mai koe mō te poto kae e se ko te ola leva io me ko te maumea, ka tuku atu ne au ki a koe a poto e uke atu i lō so se isi tino telā ko oti ne ola. Kae ka tuku atu foki ne au ki a koe a mea kolā ne seki fakamolemole mai ei koe, ko te maumea mo te ‵malu.’

I se taimi toetoe fakamuli ifo ne o‵mai se avā fāfine ki a Solomona mo se fakalavelave faigata. ‘E ‵nofo tasi maua mo te fafine tenei i te fale e tasi,’ ne fakamatala atu se fafine e tokotasi i a laua. ‘Ne fanau ne au se tamaliki tagata, kae i te lua o aso mai tua ifo, ne fanau mai foki ne tou fafine se pepe tagata. Kae i te po e tasi, ne mate te pepe a tou fafine. Kae koi moe au, ne tuku mai ne tou fafine a tena tama ko mate i oku tafa kae ne puke ne ia taku pepe. I te taimi ne ala aka ei au kae ne kilo atu ki te pepe ko mate, ne lavea ne au me e se i a aku a te pepe.’

I konei ne fai atu a te suā fafine: ‘Ikai! A te tamaliki ola i a aku, kae i a koe a te pepe mate!’ Ne kinau eiloa penei a fāfine. Ne a mea ka fai ne Solomona?

Ne fakatonu atu tou tagata ke aumai se pelu, kae i konā eiloa, ne fai atu a ia: ‘‵Kati vaelua a te pepe, kae tuku atu ke tofu te fafine mo te āfa.’

‘Ikai!’ ne tagi atu a te mātua tonu. ‘Fakamolemole sa tamate te pepe. Tuku atu ki a ia! Kae ne fai atu a te suā fāfine: ‘Sa tuku mai ki se tino i a maua; puke o na ‵kati ki vaega e lua.’

Ne faipati atu a Solomona: ‘Sa tamate a te tamaliki! Tuku atu ki te fafine muamua. A ia ko te mātua tonu.’ Ne iloa ne Solomona a te mea tenei ona ko te mea ne alofa malosi a te mātua tonu ki te pepe kae ne talia eiloa ne ia ke tuku atu ki te suā fafine ko te mea ke se tamate. I te taimi ne lagona ei ne tino a te auala ne faka‵lei aka ei ne Solomona te fakalavelave, ne fia‵fia latou me ko maua ne latou se tupu telā e poto ‵ki.

I te taimi o te pulega a Solomona, ne fakamanuia ne te Atua a tino mai te faiga o te laukele ke ola i ei a saito mo kalite, vine mo mati mo nisi mea‵kai aka. Ne ‵pei a tino ki gatu ‵gali kae ne ‵nofo i fale ‵lei. Ne lava kae toe a mea ‵lei mō tino katoa.