Mataupu e 47
Ne ‵Fuli a Loimata ki te Fiafia Lasi
I TE taimi ne matea atu ei ne Iailo me ko ‵lei te fafine telā ne tafe tena sua, e se taumate me ne momea aka i ei tena talitonu ki te malosi o Iesu ke fai a vavega. I te aso eiloa tenā, ko oti ne fakamolemole atu a Iailo ki a Iesu ke fanatu kae fesoasoani atu ki tena tamaliki fafine pele telā ko 12 ana tausaga, me ko pili o mate. Kae i konā loa, ne tupu te mea telā ne manavase ki ei a Iailo. A koi faipati atu Iesu ki te fafine tenā, ne oko mai a nisi tāgata kae ne fai malie atu te fekau tenei ki a Iailo: “Tau tama fafine ko mate. Sa toe fakalavelave koe ki te Faiakoga.”
E pefea te fakafanoanoa mai o te tala tenei! Mafaufau la: E seai lele eiloa se mea e mafai o fai ne te tagata telā ne fakaaloalo malosi ki ei te fenua i te taimi ko iloa ei ne ia me ko mate tena tamaliki fafine. Kae ne lagona ne Iesu te sautalaga tenā. Telā ne fuli atu ei a ia ki a Iailo, kae ne fakamalosi atu ki a ia penei: “Sa mataku, talitonu fua mai.”
Ne olo fakatasi atu a Iesu mo te tagata fanoanoa ‵ki tenā ki tena fale. I te okoatuga ki konā, ne lagona ei ne latou me ko ‵tagi kae pa‵kalaga valevale a tino. Ko oti ne maopoopo mai se vaitino kae ko ‵tagi mautuutu latou ona ko te fanoanoa. Ne ulu atu a Iesu ki loto i te fale kae ne fesili atu penei: “Se a te mea ko tupu? Kae ‵tagi kaia koutou? E seki mate te tamaliki. E moe fua!”
I te lagonaga o pati konā, ne ‵kata fakatauemu ei a tino ki a Iesu me ne iloa ne latou me ko mate tonu te tamaliki fafine tenā. Kae ne fai atu a Iesu me ko moe fua a ia. Mai i te fakaaogāga o tena malosi mai te Atua, ne fakaasi atu ei ne ia me e ‵pau eiloa te faigofie ke toe fakaola mai se tino mai te mate mo te faigofie ke ‵fagu mai se tino mai i te moe palapala.
Ne uga keatea ne Iesu a tino katoa, kae na ko Petelu, Iakopo, Ioane, mo te mātua mo te tamana o te tamaliki telā ko mate. I konā loa ne ave ei ne ia a tino e tokolima konā ki te koga telā ne takato mai ei te tamāfine. Ne puke ne Iesu te lima o te tamāfine, ana muna: “Talita kumi,” ko tena uiga: “Au e fai atu ki a koe, e taku tamaliki fafine, Tu ki luga!” Kae se mea vave o tu mai tou fafine kae ko kamata o sasale! Ko fai valevale te fia‵fia o ana mātua i te ‵kiloatuga ki te mea tenā.
Ko oti ne fakatonu atu a Iesu ke avatu ne meakai ki te tamaliki, kae ne fakatonu atu foki a ia ki a Iailo mo tena avaga ke mo a ma taku atu ki se tino te mea telā ne tupu. Kae e tiga eiloa a pati konā a Iesu, ne ‵pa atu te tala tenā i kogā koga katoa i konā. Tenā loa te lua o toetuga ne fai ne Iesu. Mataio 9:18-26; Maleko 5:35-43; Luka 8:41-56.
▪ Se a te tala telā ne maua ne Iailo kae ne fakamalosi atu pefea a Iesu ki a ia?
▪ Ne a mea ne ‵tupu i te lotou okoatuga ki te fale o Iailo?
▪ Kaia ne fai atu ei a Iesu me e moe fua te tamaliki telā ne mate?
▪ Ko oi a tino e tokolima kolā ne ‵nofo fakatasi mo Iesu kae ne matea atu ne latou te toetuga tenā?