Fakapotopotoga Kolā e Ati Aka ei te Alofa mo te ‵Kaufakatasi

Kāti ko oti ne kau atu koe ki nisi fakatasitasiga a Molimau a Ieova i te koga telā e pili atu ki tou fale. A tino mai telega valevale​—⁠ko kaukāiga, ko tino ‵taka, tino ma‵tua mo talavou​—⁠ne ‵nofo katoa i konā. Ne ‵kau fakatasi latou katoa i te lotou tapuakiga kae e fia fesoasoani atu foki latou ki nisi tino.

I so se fakatokaga telā e fia ga‵lue fakatasi ei a tino e tokouke, e ‵tau o isi ne tausiga. Te Atua ko te Atua o te tokagamalie; tela la, e ‵tau o matea atu te tokagamalie tenā i te fakapotopotoga o ana tino. E pelā mo te senetenali muamua, e penā foki loa i aso nei, e faitofigina a tāgata Kelisiano kolā ko ma‵tua, ko masani kae ko ata‵mai foki ke fai mo fai ne toeaina, io me ne ovasia. E tausi ne latou te fakapotopotoga mo ana manakoga faka-te-agaga. E maua foki ne latou se fesoasoani mai i nisi tāgata fakamaoni kolā e taku pelā me ne tavini fakafaifeau. E se maua ne tāgata konā se ‵togi io me se fesoasoani i mea tautupe me e tavini atu fua latou e aunoa mo se ‵togi, kae e maua sāle ne latou olotou tupe mai i galuega faka-te-lalolagi.​—⁠1 Kolinito 14:​33, 40; Filipi 1:1; 1 Timoteo 3:​8, 9.

E filifiligina pefea a latou konā? E ‵tau o fai latou mo fai ne tavini fakamaoni a te Atua kolā e fakaasi atu ne latou a nisi ata‵mai kolā e manakomia i te Tusi Tapu. Nisi mea ko fai penei: ke ‘amio ‵tau, ke ‵lei olotou mafaufau, ke tokagamalie, ke talimālō a nisi tino, ke ata‵mai i te akoako atu, kae ke uiga faigofie; e se ne tino e fia‵fai malosi ki tupe; e tausi faka‵lei ne latou olotou kāiga; e se ne tāgata ne fatoā ‵fuli mai; e ‵tau o isi se molimau ‵lei e uiga ki a latou mai tino i tua’; ‘ke puke mautakitaki latou ki te muna mo te fakamaoni e uiga ki te atamai i te akoako atu.’​—⁠1 Timoteo 3:​1-15; Tito 1:​7-9.

E se palota te fakapotopotoga ki tāgata konā ke maua ne latou olotou tofi, me kāti te taulasiga o tino i ei ne Kelisiano ‵fou. Kae ko fakaasi atu ne tāgata ma‵tua kae ata‵mai kolā e fai mo fai ne toeaina a olotou manatu e uiga ki tino konā, me e maina latou me e fetaui pefea a tino konā mo mea kolā e manakomia i te Tusi Tapu. Oti aka loa ko fai ei a tofiga o toeaina mo tavini fakafaifeau mai lalo i te takitakiga a te Potukau Pule o Molimau a Ieova, e pelā eiloa mo te ata telā ne fai ne te fakapotopotoga Kelisiano i te senetenali muamua.

A toeaina, io me ko ovasia konā, e se fai pelā me se potukau o faifeau ma‵luga; kae e se fai foki latou mo fai ne matai ki nisi tino. E pelā mo muna a Iesu, so se tino telā e fai ne ia te takitakiga e ‵tau o pologa atu ki tino katoa. I te fakapotopotoga o Molimau a Ieova, e fai tonu te kau toeaina mo fai ne taina ga‵lue mō te Malo o te Atua.​—⁠Mataio 20:​26, 27; 23:​8-11; Loma 12:8; 1 Kolinito 3:5; 4:​1, 2; Kolose 4:11; 1 Tesalonia 5:​12-14.

E pelā me ne ovasia, e tausi ne latou te faiga o akoakoga i fakatasitasiga kae e takitaki foki ne latou te faiga o te galuega talai. A te talaiga o te tala ‵lei o te Malo i olotou fa‵kai kolā ne faitofigina latou i ei ko te fakamoemoega sili o te fakapotopotoga. E tavini atu foki a ovasia pelā me ne tausi mamoe, kolā e āsi sāle atu ki tino o te fakapotopotoga ke fakama‵losi atu ki a latou māfai e ‵tau o fai penā.​—⁠Mataio 24:14; Galuega 1:8; 1 Tesalonia 2:​11, 12; 5:​14, 15; 2 Timoteo 2:​24-26; Epelu 13:17; Iakopo 5:​13-16; 1 Petelu 5:​1-4.

E isi foki se tiute o toeaina ke polopoloki kae fakasala ne latou so se tino telā e ‵se ana amioga kae e fai a ia mo fai se mea fakamataku ki te tulaga ‵mā o te fakapotopotoga i amioga, penā foki loa mo te feitu faka-te-agaga mo te loto tasi.​—⁠1 Kolinito 5:​4, 5, 7, 11-13; Tito 1:9; 2:15; 3:​10, 11.

Kafai e kau sāle atu koe ki te fakapotopotoga ka maua ne koe i ei a taugasoa ‵lei mo te ukega o mea aogā i te feitu faka-te-agaga.​—⁠Salamo 35:18; 84:10.

• Ko oi e tausi ne latou a faifaiga i fakapotopotoga takitasi?

• Se a te fakavae e filifili ei a ovasia?

• Ne a olotou tiute?

[Ata i te itulau e 13]

E akoako atu a ovasia ki te fakapotopotoga, e takitaki ne latou te talaiga mai fale ki nisi fale, e fakama‵losi atu latou i olotou āsiga pelā me ne tausi mamoe, kae e avatu foki ne latou a fakatonutonuga mo polopolokiga māfai e manakomia