Te ‵Toe Fanau Mai Ko te Auala ki te Fakaolataga?

KA TALI mai pefea ne koe te fesili tenei, “E mata, a koe ko oti ne toe fanau mai?” E lau i miliona o tino tali‵tonu i te lalolagi kātoa ka tali mai mo te mautinoa, “Ao!” E tali‵tonu latou me i te ‵toe fanau mai ko te fakailoga o Kelisiano ‵tonu katoa kae ko te auala fua e tasi ki te fakaolataga? E lotoma‵lie latou ki te kilokiloga a vaegā takitaki lotu e pelā mo te faifeau ko Robert C. Sproul, telā ne tusi mai: “Kafai e se toe fanau mai se tino, . . . ko se taku ei a ia ki se Kelisiano.”

E mata, e aofia koe i tino kolā e tali‵tonu me i te toe fanau mai se fakamaoniga me ko fanatu koe i te auala ki te fakaolataga? Kafai e penā loa, e seai se fakalotolotolua me e fia fesoasoani atu koe ki ou kāiga mo taugasoa ke maua ne latou a te auala tenā kae ke kamata o sa‵sale atu i ei. Kae ke fai latou penā, e ‵tau mo latou o malamalama i te ‵kese o te tino telā e toe fanau mai mo te tino telā e se fai penā. E fakamatala atu pefea ne koe ki a latou a te uiga o te ‵toe fanau mai?

E tali‵tonu a tino e tokouke me i te tugapati ko te “toe fanau mai” e fakasino atu ki se tino telā e fai tena tautoga mo te loto fakamaoni ke tavini atu ki te Atua mo Keliso telā ne iku atu i ei ki tena ‵fuli mai te mate ki te ola i te feitu faka-te-agaga. E tonu, e fakamatala mai i se tikisionale fou a te pati ko te ‵toe fanau mai telā e fakauiga ki “se Kelisiano telā ko oti ne fakafou io me e fakamautinoa aka a te feagaiga o tena fakatuanaki, maise eiloa māfai ko oti ne pokotia ana lagonaga i mea fakalotu.”​—Merriam-Webster’s Collegiate Dictionary​—Eleventh Edition.

E mata, e ofo koe me e se ‵lago atu a te Tusi Tapu ki te fakamatalaga tenā? E mata, e fia iloa ne koe me se a te akoakoga tonu mai i te Muna a te Atua e uiga ki te ‵toe fanau mai? Ka maua eiloa ne koe a mea aoga mai te sukesuke faka‵lei ki te mataupu tenei. Kaia? Me ka pokotia tou olaga mo ou fakamoemoega i aso mai mua i te malamalama tonu i te uiga o te ‵toe fanau mai.

Se a te Mea e Akoako Mai i te Tusi Tapu?

A te koga fua e tasi i te Tusi Tapu kātoa e maua i ei a te tugapati ko te “toe fanau mai” ko te Ioane 3:​1-​12, telā e fakamatala mai i ei se sau‵talaga gali i te va o Iesu mo se takitaki lotu i Ielusalema. Ka lavea atu ne koe me e siki mai eiloa te tala kātoa tenā i te Tusi Tapu i te pokisi telā e ‵soko tasi mo te mataupu tenei. E ‵kami ne matou koe ke faitau faka‵lei ki ei.

I te tala tenā, e fakamatala mai ei ne Iesu a nāi feitu o te “toe fanau fou.”a A te ‵tonuga loa, e fesoasoani mai a fakamatalaga a Iesu ke tali aka ei ne tatou a fesili tāua konei e lima:

◼ E pefea te tāua o te toe fanau fou?

◼ E mata, e mafai o fakaiku aka ne tatou ke toe fa‵nau mai tatou?

◼ Se a te pogai o te mea tenā?

◼ E toe fanau mai pefea se tino?

◼ Se a te ‵fuliga o fesokotakiga ka maua mai i ei?

Ke onoono kae mafau‵fau faka‵lei tatou ki fesili takitasi i fesili konei.

[Fakamatalaga]

[Pokisi/​Ata i te itulau e 4]

“E ‵Tau mo Koutou ke Toe Fa‵nau Mai”

“E isi se Falesaio e igoa ki a Nikotemo, se takitaki foki o tino Iutaia. Ne vau a ia ki a Iesu i te po, kae ne fai mai ki a ia, ‘Te Faiakoga, e iloa ne matou i a koe ko te faiakoga ne vau mai i te Atua, i te mea e seai se tino e mafai ne ia o fai fakailoga konei ne fai ne koe, seiloga ko i a ia te Atua.’ Ne tali atu a Iesu ki a ia penei, ‘Au e fai tonu atu ki a koe: kafai e se toe fanau mai se tino, e se mafai eiloa o matea ne ia a te Malo o te Atua.’ Ne fai mai Nikotemo ki a ia, ‘E mafai pefea ne se tino ke toe fanau mai, manafai ko matua? E mafai o toe ulu ki te tinae o tona matua, ke toe fanau mai?’ Ne tali atu a Iesu penei: ‘Au e muna ‵tonu atu ki a koe, kafai e se fanau mai se tino i te vai mo te Agaga, e se mafai eiloa o ulu atu ki te Malo o te Atua. Ko te mea e fanau mai ne te foitino, se foitino eiloa; ka ko te mea e fanau mai ne te Agaga, ko te agaga ‵lei eiloa tenā. Sa ofo i taku muna ne fai atu ki a koe, “E ‵tau mo koutou ke toe fa‵nau mai.” E agi te matagi ki te koga e loto ki ei, e lagona ne koe tona agi, kae e se iloa ne koe me ne vau mai i fea, kae fano foki ki fea; e penā eiloa latou kolā e fa‵nau mai i te agaga.’ Ne tali mai Nikotemo ki a ia penei: ‘E mafai pefea o tupu se mea penei?’ Ne tali atu a Iesu ki a ia, ‘A koe ko te faiakoga o Isalaelu, kae e seki iloa eiloa ne koe a te mea tenei? Au e muna tonu atu ki a koe: a matou e fai‵pati ki mea e iloa ne matou, kae molimau foki ki mea e matea ne matou, kae e seai eiloa se tino e talia ne ia te motou molimau. E se tali‵tonu koutou manafai e taku atu ne au mea faka te lalolagi; ka tali‵tonu la pefea koutou manafai e taku atu ne au a mea faka te lagi?’”​—Ioane 3:​1-​12.