Mataupu e 21

I te Sunako i te Fa‵kai o Iesu

KĀTI e se taumate ne gasue‵sue a tino katoa i Nasaleta i te taimi ne foki atu ei a Iesu ki tena fa‵kai. A koi tuai o fanatu a Iesu ke papatiso a ia ne Ioane i te tausaga tupu ko teka atu, ne lauiloa a ia e pelā me se ka­muta. Kae fakamuli ifo, ne lauiloa valevale foki a ia i konā e pelā me se tino fai vavega. Ko oko eiloa i te fia ‵kilo atu o tino i te fa‵kai tenā ke fai ne ia a nisi galuega fakaofoofogia i a latou.

Ne tai momea aka te ‵nofo fakatali‵tali o latou me ne fanatu a Iesu e pelā mo tena masani ki te sunako tenā. I te faiga o te sauniga, ne tu aka ei a ia ki luga o faitau atu, kae ne tuku atu ki a ia a te pelugā tusi a te pelofeta ko Isaia. Ne maua aka ne ia te vaega telā e faipati e uiga ki te Tino telā e fakaekegina ne te agaga o Ieova. A te vaega tenā i ‵tou Tusi Tapu i aso nei ko te mataupu e 61.

I te otiga ne faitau atu ne ia me ka talai pefea ne te Tino tenā a te fakasaolotoga ki tino kolā e ‵nofo pologa, te faka‵pulaga o mata o tino ‵kivi, mo te tausaga o te loto ‵lei o Ieova, kae ne toe fakafoki atu ne Iesu te pelugā tusi ki te tino tausi, kae ne nofo ei a ia ki lalo. Ne pula ‵toka atu a mata o tino katoa ki a ia. Kāti ne faka‵tali malie aka a ia, kae i te otiga ne faipati atu a ia, ana muna: “Ko fakataunu i te aso nei a te vaega o te tusi tenei, telā ko oti ne fakalogo‵logo koutou ki ei.”

Ne ofo masei a tino i ana “pati ‵lei” konā kae ne fai aka latou penei i a latou eiloa: “E se ko ia tenā te tama a Iosefa?” Ona ko te mea e iloa ne Iesu me ne ma‵nako latou ke fai ne ia a vavega, ne toe fai atu a ia penei: “E iloa tonu ne au me ka fai mai ne koutou te muna fakatusa tenei ki a au, ‘Te tokitā, fai eiloa ne koe tou masaki ke ‵lei. Fai aka ne koe i konei i ‵tou fakai tonu a mea kolā ne ‵logo matou me ne fai ne koe i Kapanaumi.’” Kāti ne ma‵natu aka a tuakoi mua o Iesu me ne ‵tau o kamata te faka‵leiga o masaki i tena fa‵kai ko te mea ke aogā muamua ki ana tino. Tela la, ne ma‵natu aka latou me i a Iesu seki amanaia atu ki a latou.

Ona ko te mea ne iloa ne Iesu olotou manatu, ne taku atu ne ia a nisi tala mua kolā e ‵tau o fai atu. Ana muna, e tokouke a ­fāfine kolā ne ‵mate olotou avaga i Isalaelu ne ola i aso o Elia, kae ne seki fanatu a Elia ki se tino i a latou konā. Kae ne fa­natu a ia ki te fafine telā e se se tino Isalaelu i Saitonu, kae ne fai ne ia i ei se vavega fakaola tino. I aso foki o Elisaia, ne ola mai a lepela e tokouke, kae ne faka‵lei fua ne Elisaia a Naamanu mai Sulia.

Ona ko te kaitaūa o latou ki tala mua sē ‵lei kolā ne fakatusa‵tusa atu ki a latou kae ne fakaasi faka‵sau mai foki i ei te lotou kaiū mo te sē lava o te lotou fakatuanaki, ne ta‵fuke aka a tino i te sunako kae ne ave mālō ne latou a Iesu ki tua mo te fa‵kai. I konā loa, i te kaugutu o te mauga telā ne tu ei a Nasa­leta, ne taumafai latou o ‵pei a ia ki lalo. Kae ne sola keatea a Iesu mai i a latou, kae ne sao eiloa a ia. Luka 4:16-30; 1 Tupu 17:8-16; 2 Tupu 5:8-14.

▪ Kaia ne gasue‵sue ei a tino i Nasaleta?

▪ Ne a manatu o tino e uiga ki te lauga a Iesu, kae ne a mea ne kaitaūa malosi latou i ei?

▪ Ne a mea ne taumafai o fai ne tino konā ki a Iesu?