Mataupu e 65
Se Malaga ne Fai Lēmū ki Ielusalema
KO TE tau e ‵to ei a lau o lakau i te 32 T.A., kae ko pili o fai te ‵Kaiga o Fale Fakamalumalu. Ne fai fua ne Iesu a te lasiga o tena galuega i Kalilaia talu mai te Paseka i te 31 T.A., i te taimi ne taumafai ei te kau Iutaia o tamate a ia. Kāti ne āsi atu fua a Iesu ki Ielusalema ki ‵kaiga faka-te-tausaga e tolu a te kau Iutaia, talu mai te taimi tenā.
I konā loa, ne fakamalosi atu penei a taina o Iesu ki a ia: “Tuku te koga nei kae fano ki Iutaia.” A Ielusalema ko te ‵toe fakai tāua i Iutaia, kae ko te laumua foki o te lotu mō te fenua kātoa. Ne ma‵natu aka penei ana taina: “Me e seai se tino e mafai o ‵funa sena mea, manafai e manako a ia ke iloa ne tino.”
E tiga eiloa e se tali‵tonu a Iakopo, Simona, Iosefa mo Iuta me i te lotou taina matua, ko Iesu, ko te Mesia, ne ma‵nako latou ke na fakaasi atu ne ia ana ‵mana fakavavega ki tino katoa kolā ka maopoopo mai i te ‵kaiga tenā. Kae ne iloa foki ne Iesu te fakamataku o te mea tenā. Ana muna: “E se mafai ne tino o te lalolagi o takalia‵lia ki a koutou, kae e takalia‵lia mai latou ki a au, i te mea e molimau atu au i te lalolagi e masei ana amio.” Telā ne fai atu penei a Iesu ki ana taina: “Olo koutou ki te ‵kaiga tenā, me koi tuai o fanatu au ki te ‵kaiga.”
A te ‵Kaiga o Fale Fakamalumalu se fakafiafiaga telā ne fai i aso e fitu. I te valu o aso ne fakapalele sāle ei te ‵kaiga tenā ki se sauniga tāua. Ne fakaoti sāle ne te ‵kaiga tenā a te tausaga o tino ‵tokilakau, kae se taimi foki ne fia‵fia kae loto fakafetai malosi i ei a tino. I ne nāi aso mai tua ifo o te taimi ne olo atu ei a taina o Iesu fakatasi mo te kaumalaga o tino e tokouke, ne olo lēmū atu a Iesu mo ana soko, ko te mea ke se matea latou ne tino. Ne ui atu latou i Samalia, kae ne seki olo atu i te auala telā ne ui atu i ei te tokoukega o tino i tafa o te Vaitafe o Iolitana.
Me ne ‵tau o maua ne Iesu mo tena kaumalaga se koga ke afe ki ei i se fakai o Samalia, ne uga atu ei ne ia a avefekau ke ‵mua atu o fakatoka te feitu tenā. Kae ne ita a tino i konā ma fesoasoani atu ki a Iesu i te taimi ko iloa ei ne latou me i a ia e fanatu ki Ielusalema. Ne kaitaūa i ei a Iakopo mo Ioane, kae ne fesili atu penei: “Te Aliki, e manako koe ke ka‵laga maua ki te afi mai te lagi, ke ‵sunu latou ke palele?” Ne polopoloki ne Iesu a laua ona ko te lā manatu tenā, kae ne olo atu latou ki te suā fakai.
A koi sa‵sale atu latou i te auala, kae ne fai atu penei se faiakoga o te Tulafono ki a Iesu: “Te Faiakoga, au e toka o tautali ki a koe ki so se koga e fano koe ki ei.”
Ne tali atu a Iesu: “E isi ne lua o alope, mo manu eva e isi ne olotou ofaga, kae ko te Tama a te Tagata, e seai se koga mo ona fakatapū.” Ne fakamatala atu i ei ne Iesu me ka fepaki te faiakoga tenā mo mea faiga‵ta māfai ko fai a ia mo fai Sena soko. Kāti ne fakauiga i ei me ko tō fakamatamata te faiakoga tenā ke talia ne ia se vaegā olaga penā.
Ne fai atu a Iesu ki te suā tagata: “Tautali mai ki a au.”
“Tuku mua mai au ke fano o tanu toku tamana,” ko te tali a te tagata tenā.
Muna a Iesu: “Tuku i ei a tino ‵mate ke tanu olotou tino ‵mate. Fano koe o takutaku atu te tala o te Malo o te Atua.” E foliga mai me ne seki mate te tamana o te tagata tenā, me moi ne fai pelā me ko oti ne mate, penei ko se fakalogologo ei tena tama ki a Iesu i konā. Kāti ne fanoi atu te tama tenā ke fakatali malie a ia ke mate muamua tena tamana. E se loto malie a ia ke fakamuamua te Malo o te Atua i tena olaga.
A koi olo atu latou i te auala ki Ielusalema, kae ne fai atu penei te suā tagata ki a Iesu: “Ka tautali au ki a koe, kae ke tuku mua mai au ke fano ki toku kāiga.”
Ne tali atu penei a Iesu: “So se tino e kamata o fakamalū te laukele, kae e kilokilo ‵soko ki ana tua e se aogā mō te Malo o te Atua.” E ‵tau o ‵kilo atu faeloa a tino kolā e fai pelā me ne soko o Iesu ki te galuega o te Malo o te Atua. E pelā me kafai e se kilo tonu faeloa ki mua te tino fakamalū te laukele, ka piko valevale i ei te auala telā e fanatu a ia i ei, e penā foki loa so se tino telā e toe kilo ki tua ki te lalolagi nei kāti ka teka atu keatea a ia mai i te auala telā e tau atu ei ki te ola se-gata-mai. Ioane 7:2-10; Luka 9:51-62; Mataio 8:19-22.
▪ Ko oi a taina o Iesu, kae e pefea olotou manatu e uiga ki a ia?
▪ Kaia e se ‵lei ei a amioga a tino Samalia, kae ne a mea ne ma‵nako Iakopo mo Ioane ke fai ne laua?
▪ Ne a sautalaga e tolu ne fai ne Iesu i te auala tenā, kae ne faka‵mafa mai pefea ne ia te tāua ke tuku atu ne se tino a ia eiloa pelā me se taulaga?