Mataupu e 103
Ne Toe Āsi Atu a Ia ki te Faletapu
E TOLU a po ne ‵nofo ei a Iesu mo ana soko i Petania talu mai te taimi ne oko atu ei latou ki konā mai Ieliko. Kae i te tafataeao o te Aso Gafua, i te po 10 o Nisani, ne olo atu ei latou i te auala ki Ielusalema. Ne fiakai a Iesu. Tela la, i te taimi ne kilo atu ei a ia ki te mati telā e isi ne ana lau, ne fanatu a ia ki ei ke onoono aka me e isi ne nāi fuagā mati i ei io me ikai.
Ne vave te ‵somoakaga o lau o te lakau tenā; me i te taimi o te ‵taukai mati e fai sāle loa i a Iuni, kae ko te taimi tenā ko te fakaotiga fua o Mati. Kae e tiga eiloa te feitu tenā, kāti ne manatu aka a Iesu me ona ko te vave o te ‵somoakaga o lau konā, kāti ka vave mai foki a fuagā mati. Kae ne fanoanoa a ia i ei. Ona ko lau konā ne maua i ei a foliga fakaloiloi o te lakau tenā. I konā loa ne fetū ei ne Iesu te lakau, ana muna: “Ke se toe fua mai eiloa koe!” A mea ne iku mai ona ko pati fetū konā a Iesu ki te lakau mo te fakauigaga tonu o te mea tenā ne iloa atu i te suā taeao.
I te fakasokoatuga o te lotou malaga, se mea vave eiloa o oko atu a Iesu mo ana soko ki Ielusalema. Ne fanatu eiloa a ia ki te faletapu, telā ne āsi atu a ia ki ei i te afiafi o te suā aso. I te aso tenā, ne gasuesue ei a ia, e pelā mo tena faiga i te tolu tausaga mai mua atu i ei i te taimi ne fanatu ei a ia ki te Paseka i te 30 T.A. Ne ‵tuli keatea ne Iesu a tino kolā ne fakatau atu kae ne fakatau mai a mea i te faletapu kae ne ‵fuli ne ia ki lalo a taipola a tino ‵fuli tupe mo nofoga a tino fakatau lupe. Kae ne seki talia foki ne ia so se tino ke fano mo se amoga i loto i te faletapu.
Ne taku fakamasei ne ia a latou kolā ne ‵fuli tupe kae ne ‵togi atu a manu i te faletapu, ana muna: “Muna a te Tusi, ‘Ka fakaigoa a toku fale se fale ‵talo mō tino o fenua katoa.’ Kae nei ko oti ne ‵fuli ne koutou ke fai mo ana o tino ‵faomea!” Ne fai latou mo fai ne tino kai‵soa me ko tō ‵lasi a ‵togi ne fai ne latou ki tino kolā ne ‵tau o ‵togi ne latou olotou manu mo fai olotou taulaga. Tela la, ne manatu aka a Iesu me i faifaiga fakapisinisi konā ne fai pelā mo te kaisoa io me ko te faomea.
I te taimi ne ‵logo ei a faitaulaga pule, faiakoga o te Tulafono, mo tino takutakua e uiga ki mea kolā ne fai ne Iesu, ne toe salasala aka foki ne latou se auala ke tamate ei a ia. Tela la, ne fakamaoni aka ne latou i ei me e se mafai lele eiloa o ‵fuli olotou uiga. Kae e se iloa ne latou me ka tamate pefea ne latou a Iesu, me ne ua‵lolo atu a tino katoa o fakalogo‵logo ki a ia.
E se gata fua i tino Iutaia ne olo atu ki te Paseka, kae e isi foki ne tino o fenua fakaa‵tea ne olo atu ki ei. Konā eiloa a tino ne ‵fuli ki te lotu Iutaia. A nisi tino Eleni, ko tino kolā ne ‵fuli ki te lotu Iutaia, ne olo atu ki a Filipo kae ne fakamole‵mole atu ke faipati ki a Iesu. Ne fanatu a Filipo ki a Anitelea, kāti ne fesili atu me e ‵tau o fai se fai‵patiga penā me ikai. Kae ne nofo atu a Iesu i te faletapu, i te koga telā ne mafai o olo atu a tino Eleni ki ei.
E iloa ne Iesu me ko se uke ana aso koi ‵toe, telā ne fai faka‵lei ei ne ia se tala fakatusa e uiga ki tena tulaga, penei: “Ko oko mai te taimi e tuku ei te ‵malu lasi ki te Tama a te Tagata. Au e muna tonu atu ki a koutou, A te fuataga saito e se mafai o uke a saito e maua mai i ei, seiloga ke to ki te laukele kae pala i ei. Kafai e pala, ko ‵tupu mai ei a saito e uke.”
E se tāua malosi se fuagā saito e tasi. Kae e a māfai e ‵toki te mea tenā i te laukele kae e “pala” i ei, ko se toe fai mo fai se fuaga? Kafai e tupu aka te mea tenā ke fai mo fai se kausaito ka maua mai i ei te fia o fuagā saito. Kae ko Iesu se tagata ‵lei katoatoa e tokotasi. Kae kafai e mate a ia i te fakamaoni ki te Atua, ka fai a ia mo fai se auala ke tuku atu ei te ola se-gata-mai ki tino fakamaoni kolā e maua foki i ei te uiga fia fai taulaga telā ne maua ne ia, tela la, muna a Iesu: “Ko te tino e atafai ki tena ola, ka maumau tena ola; kae ko te tino e se fakapelepele ki tena ola i te lalolagi nei, e maua ne ia te ola se gata mai.”
Ne seki mafaufau fua a Iesu ki a ia eiloa, me ne toe fai atu a ia penei: “Kafai e fia tavini mai se tino ki a au, e ‵tau o tautali mai ki a au, ko te koga e nofo au i ei, e nofo foki i ei taku tavini. Ka vikia ne toku Tamana a ia telā e tavini mai ki a au.” Ko tafaga la te gali o te taui tenā ona ko te tau‵tali atu ki a Iesu mo te tavini atu ki a ia! A te taui tenā se fakaaloaloga mai te Tamana ke ‵kau atu ki a Keliso i tena Malo.
I te mafaufau atu ki te uke o logo‵maega mo te mate fi‵ta telā ka oko atu ki a ia, ne toe fai atu a Iesu penei: “Nei, a toku loto ko se toka; kae ne a nei aku muna ka fai atu? Ka fai ake au pelā, ‘Te Tamana, fakaola mai au i te itula tenei’?” Moi ne mafai o fakaseke a ia ki mea kolā e faka‵tali mai mō ia! Kae ne seki fai penā, e pelā mo ana muna konei: “Kae ko te mea tonu eiloa tenā ne vau ei au.” Ne lotomalie a Iesu ki te fakatokaga kātoa mai te Atua, e aofia i ei tena mate e pelā me se taulaga. Mataio 21:12, 13, 18, 19; Maleko 11:12-18; Luka 19:45-48; Ioane 12:20-27.
▪ Kaia ne fakamoemoe ei a Iesu ke maua ne fuagā mati kae ne seki oko ki te taimi o te ‵taukai mati?
▪ Kaia ne fakaigoa ei ne Iesu a tino kolā ne fakatau atu a mea i te faletapu pelā me ne “tino ‵faomea”?
▪ Ne fai pefea a Iesu e pelā me se fuagā saito telā e pala?
▪ Ne pefea a lagonaga o Iesu e uiga ki logo‵maega mo te mate kolā ne faka‵tali mai ki a ia?