Kafai ko Masaki se Tino i te Kāiga

1, 2. Ne fakaaogā pefea ne Satani a fakalavelave mo masaki i tena taumafai ke fakamasei atu ki te fakamaoni o Iopu?

E ‵TAU eiloa o aofia a Iopu i tino kolā ne maua ne latou se kāiga fiafia. E taku ne te Tusi Tapu tou tagata ki “te ‵toe tino maumea eiloa i te Saegālā.” E tokofitu ana tama tāgata kae tokotolu ana tama fāfine, telā e tokosefulu katoa ei ana tama‵liki. Ne mafai foki o tausi faka‵lei atu a ia ki tena kāiga. Ako te ‵toe mea tāua, ne fai eiloa ne ia te takitakiga i olotou faifaiga faka-te-agaga kae ne manavase faeloa tou tagata e uiga ki te tulaga o ana tama‵liki i mua o Ieova. Ne iku atu a mea katoa konei ki te mauaga o se vā ‵pili kae fakafiafia i te lotou kāiga.​—Iopu 1:1-5.

² Ne seki faka‵kivi a Satani, te fili o Ieova te Atua, ki te tulaga ‵lei o Iopu. A Satani, telā e lamalama faeloa ki auala ke fakamasei ei ne ia te fakamaoni o tavini a te Atua, ne taua atu eiloa ki a Iopu mai te fakaseaiga o tena kāiga fiafia. Mai tua ifo i ei, ne “fai ei ne ia a Iopu ke ‵fonu tena foitino i mea ‵pala.” Tela la, ne fakamoemoe eiloa a Satani ke fakaseai ne ia te fakamaoni o Iopu mai te fakaaogāga o fakalavelave mo masaki.​—Iopu 2:6, 7.

3. Ne a fakailoga o te masaki o Iopu?

³ E seai ne fakamatalaga fakatokita e tuku mai i te Tusi Tapu e uiga ki te masaki o Iopu. Kae e tuku mai fua i ei a fakailoga o tena masaki. Ne ‵fonu tena foitino i ilo, mo matāpaku kae ko ‵pala valevale. Ne manogi masei tena manava mo tena foitino. Ne logo‵mae ‵ki tou tagata. (Iopu 7:5; 19:17; 30:17, 30) I tena logo‵mae, ne sagasaga ei a Iopu i luga i ‵pefu, kae soisoi tena foitino ki se matifiga o te ipu kele. (Iopu 2:8) Ko se faka‵tau eiloa i te fakaalofa o tou tagata!

4. Ne a fakalavelave e fe‵paki mo kāiga katoa i nisi taimi?

⁴ E mata, ne a au mea ka fai māfai e maua ne koe se masaki matagā penā? I aso nei, e se mafai ne Satani o fai ke pokotia a tavini a te Atua i se masaki e pelā mo te mea ne fai ne ia ki a Iopu. E ui i ei, ona ko te tulaga sē ‵lei katoatoa o tino, te faigata o te olaga i aso takitasi, mo te fakamaseiga ki te natula o te lalolagi telā e ola ei tatou, e faigata o ‵sao tatou mo ‵tou kāiga mai masaki i nisi taimi. Faitalia a puipuiga e mafai o fai ne tatou mai masaki, e tuku faka‵sau atu eiloa tatou katoa ki masaki, faitalia eiloa te logo‵mae o nāi tino fua e pelā mo Iopu. Kafai ko pokotia se tino o te kāiga i se masaki, e mafai eiloa o fai mo fai se mea faigata. Tela la, ke na onoono aka tatou ki te auala e mafai ei o fesoasoani mai te Tusi Tapu ke fakafesagai atu tatou ki te fili matagā o tino telā e se mafai o galo.​—Failauga 9:11; 2 Timoteo 3:16.

E PEFEA OU LAGONAGA E UIGA KI EI?

5. E ‵saga sāle atu pefea a tino o te kāiga māfai ko pokotia se tino i se masaki sē tumau?

⁵ Faitalia me se a te mea e fakamakosu ne ia te olaga masani, mo tena māfuaga, se mea faigata eiloa, kae maise eiloa māfai e māfua mai te mea tenā i se masaki tumau. Ke oko ki masaki toe‵toe fua, e manakogina ke fai ne fakamafulifuliga tai faiga‵ta eiloa ki te kāiga. Kāti e ‵tau mo nisi tino ma‵losi o te kāiga o tausi te filemu ko te mea ke mafai o malōlō faka‵lei te tino masaki. Kāti e ‵tau foki o taofi aka a nisi galuega. Kae i te ukega o kāiga, e pokotia malosi eiloa a lagonaga o tino i ei ke oko eiloa ki tamā tama‵liki māfai e masaki se isi tamaliki io me se mātua, faitalia te fakamasaua atu i nisi taimi ke mafaufau faka‵lei latou. (Kolose 3:12) Kafai ko oko atu se masaki sē tumau, e masani eiloa o toka te kāiga o fai a mea kolā e ‵tau o fai. I tafa i ei, e fakamoe‵moe eiloa a tino taki tokotasi i te kāiga ke penā foki a faiga e fai ki a latou māfai ko ma‵saki latou.​—Mataio 7:12.

6. Ne a kilokiloga e lavea atu i nisi taimi māfai ko maua ne se tino i te kāiga se masaki masei kae tumau?

⁶ Kae e a māfai e masei ‵ki te masaki kae ko makosu valevale te kāiga i se taimi leva? E pelā mo te ‵mate o te foitino o se tino, io me ko te valevale matua, io me se isi masaki aka foki? Io me kafai ko fakavaleagina se tino i te kāiga ne se masaki faka-te-mafaufau? A te lagonaga masani muamua e oko mai ko te alofa​—ko te fanoanoa i te logo‵mae malosi o se tino pele. Kae e mafai eiloa o ‵soko atu ki te alofa a nisi lagonaga. I te taimi e lagona ei ne tino o te kāiga te lasi o te lotou pokotia mo te foliki o te lotou saolotoga ona ko te masaki o se tino e tokotasi, e mafai eiloa o maua ne latou se lagonaga fakafanoanoa. Kāti ko mafau‵fau latou: “Kaia ne tupu ei se mea penei ki a au?”

7. Ne saga atu pefea te avaga o Iopu ki te masaki o tou tagata, kae se a te mea telā ne puli i tou fafine?

⁷ Ne tai penā eiloa te mea ne oko atu ki te mafaufau o te avaga o Iopu. Masaua la me ko oti ne lagona ne ia te logo‵mae i te ‵matega o ana tama‵liki katoa. I te fakasoloatuga o mea kolā ne ‵tupu, e seai se fakalotolotolua me ne gasolo aka eiloa o māfatia tou fafine. Fakamuli loa, i te taimi ne lavea ei ne tou fafine tena avaga telā ne malosi kae galue malosi ko logo‵mae i se masaki fakatakalialia, e foliga mai me ne puli i tou fafine a te manatu tāua mai tua o fakalavelave katoa kolā ne ‵tupu​—ko te fesokotakiga telā ne maua ne laua mo tena avaga mo te Atua. E fai mai te Tusi Tapu: “Muna a te avaga a Iopu penei, ‘A koe e tumau eiloa tou fakatuanaki ki te Aliki, ne? Ai a se na muna masei ei ne koe te Atua ko mate ei koe?’”​—Iopu 2:9.

8. Kafai ko masaki malosi se tino i te kāiga, se a te tusi siki telā ka fesoasoani atu ki nisi tino i te kāiga ke tumau i se kilokiloga ‵lei?

⁸ E fanoa‵noa kae kaitaua foki a tino e tokouke māfai ko ‵fuli malosi olotou olaga ona ko te masaki o se isi tino. Kae, ko te Kelisiano telā e mafaufau faka‵lei ki te tulaga tenā, e oko mai te taimi ka iloa ei ne ia me ko maua ne ia se avanoaga ke fakaasi atu ei tena alofa tonu. A te alofa tonu “e kufaki kae kaimalie . . . [kae] e se ‵sala ana mea i a ia eiloa . . . A te alofa e fakamalosi ne ia mea katoa, e talitonu ki mea katoa, e fakamoemoe ki mea katoa, e kufaki ki mea katoa.” (1 Kolinito 13:4-7) Tela la, i lō te taliaga o lagonaga sē ‵lei ke pule mai ki a tatou, se mea tāua ke fai ne tatou te ‵toe mea e mafai o fai ke pule faka‵lei atu ki ei.​—Faataoto 3:21.

9. Ne a fakatalitonuga e mafai o fesoasoani atu ki se kāiga i te feitu faka-te-agaga mo te feitu tau lagonaga māfai ko masaki malosi se tino i te kāiga?

⁹ Ne a mea e mafai o fai ke puipui ei te tulaga faka-te-agaga mo lagonaga o se kāiga māfai ko masaki malosi se tino i ei? E tonu, e tofu eiloa a masaki katoa mo te vaegā tausiga mo vailakau e ‵tau o fai ki ei, kae e se se mea ‵lei ke taku atu i te tusi tenei a mea takitasi e ‵tau o fai ki vailakau io me ko te auala e tausi atu ei ki te tino masaki i te fale. E tiga te feitu tenā, i te feitu faka-te-agaga, “e faka‵tu ake ne [Ieova] latou katoa kolā ne pakū.” (Salamo 145:14) Ne tusi mai te Tupu ko Tavita: “Amutia a latou kolā e ‵saga ki tino ma‵tiva; me ka fesoasoani ki a latou a [Ieova] i taimi e maua ei latou ne puapuagā. Ka puipui kae tausi faka‵lei ne [Ieova] olotou ola; . . . A [Ieova] ka fesoasoani ki a latou manafai e ma‵saki a latou, kae toe fakafoki ne ia te malosi ki a latou.” (Salamo 41:1-3) E tausi faka‵lei eiloa ne Ieova ana tavini ke tumau i te ola i te feitu faka-te-agaga, maise foki eiloa i taimi ko tofotofogina ei olotou lagonaga ke silia atu i te lotou malosi o kufaki. (2 Kolinito 4:7) Ko oti ne fai mai ne tino o kāiga e tokouke kolā e isi se tino masaki malosi i ei, a pati konei a te faisalamo: “[Ieova], ko oko eiloa i te uke o oku puapuagā, tausi au ke ola pelā eiloa mo tau feagaiga ko oti ne fai.”​—Salamo 119:107.

TE AGAGA FAKAOLA

10, 11. (a) Se a te mea tāua e ‵tau o fai māfai ko fakafesagai atu se kāiga mo te manuia ki se masaki? (e) Ne fakafesagai atu pefea se fafine e tokotasi ki te masaki o tena avaga?

¹⁰ E fai mai se faataoto i te Tusi Tapu: “A tou loto fia ola e fai ne ia koe ke ola faeloa, i te taimi e masaki ei koe. Kafai ko galo tou loto fia ola, ko tena uiga ko galo atu tou toe fakamoemoega.” (Faataoto 18:14) E mafai o pokotia a lagonaga o se kāiga i se pakiaga e penā foki mo te “loto fia ola” o se tino masaki. Kae, “kafai e tokagamalie tou mafaufau io me ko tou loto kae ka malosi foki tou foitino.” (Faataoto 14:30) E fakalagolago eiloa a te mafai io me ko te sē mafai o fakafesagai atu mo te manuia o se kāiga ki se masaki lasi ki te kilokiloga io me ko uiga o tino o te kāiga.​—Fakatusa ki te Faataoto 17:22.

¹¹ Ne kufaki eiloa se fafine Kelisiano e tokotasi i te fakamaseiga o tena avaga ne te masaki ko te faka‵mate mai tua fua o tausaga e ono ne avaga ei laua. “Ne masei ‵ki te faipati a taku avaga, kae toeitiiti eiloa ko se mafai o sau‵tala maua,” ko muna a tou fafine. “Ko oko eiloa i te fakafi‵ta ki te mafaufau a te taumafai ke malamalama koe i ana pati kolā e taumafai o fai mai.” Mafaufau foki la ki te māfatia mo te fanoanoa o tena avaga. Ne a mea ne fai ne te tauavaga tenei? E tiga eiloa ne ‵nofo ‵mao laua mai i te fakapotopotoga Kelisiano, ne taumafai eiloa te tuagane ke fakatumau tena malosi faka-te-agaga mai i te fai ke iloa faeloa ne ia a fakatokaga ‵fou i te fakapotopotoga e penā foki loa mo mea‵kai faka-te-agaga kolā e aumai sāle i mekesini ko te Faleleoleo Maluga mo te Awake! Ne tuku atu eiloa ne mea konei a te malosi i te feitu faka-te-agaga ke tausi atu a ia ki tena avaga ke oko eiloa ki te taimi ne mate ei tou tagata i te fa tausaga mai tua ifo i ei.

12. E pelā mo te mea e lavea atu i te tala o Iopu, se a te fesoasoani e tuku sāle atu ne se tino masaki i nisi taimi?

¹² E pelā mo te mea ne tupu ki a Iopu, ko ia ko te tino masaki telā ne tumau tena malosi. Ne fesili atu tou tagata ki tena avaga: “Kafai e aumai ne te [Atua] ne mea ‵lei ki a tatou, e talia ne tatou mo te fiafia. Ai a la e muimui ei tatou manafai e aumai ne ia a puapuagā?” (Iopu 2:10) E se tioa eiloa o taku fakamuli mai ne te soko ko Iakopo a Iopu e pelā me se fakaakoakoga fakaofoofogia o te kufaki mo te loto pulea! E fai‵tau tatou penei i te Iakopo 5:11: “Ko oti ne lagona ne koutou te kufaki o Iopu, ka ko iloa foki ne koutou i te Aliki ne fesoasoani atu ki a ia i te fakaotiga. Me i [a Ieova] e ‵fonu i te alofa ‵nau mo te alofa fesoasoani.” E penā foki i te ukega o taimi i aso nei, a te loto malosi o te tino masaki i te kāiga ko oti ne fesoasoani atu ki nisi tino i te kāiga ke fakatumau ne latou se kilokiloga aogā.

13. Se a te fakatusatusaga telā e se ‵tau o fai ne se kāiga telā e fepaki mo se tino masaki malosi i te kāiga?

¹³ E lotoma‵lie a te ukega o kāiga kolā ko oti ne fe‵paki mo se tino masaki i ei me se mea masani ke fe‵paki a tino o te kāiga mo mea faiga‵ta i te taimi muamua. E fai mai foki latou me e tāua ‵ki eiloa te auala e ‵kilo atu ei a tino ki te tulaga tenā. E mafai eiloa o faigata a fakamafulifuliga ki te olaga masani o te kāiga i te kamataga. Kae kafai e taumafai malosi eiloa se tino, e mafai eiloa o fakamasani a ia ki se tulaga fou. I te faiga penā, se mea tāua ke mo a ma fakatusatusa ‵tou fakanofonofoga ki nisi tino kolā e seai se tino masaki i ei, mai te mafau‵fau me e faigofie te lotou olaga kae ‘ko sē ‵lei ki a koe!’ A te ‵tonuga loa, e seai eiloa se tino e iloa ne ia a fakalavelave kolā e kufaki i ei a nisi kāiga. E maua eiloa ne Kelisiano katoa a te fakamafanafanaga i pati konei a Iesu: “O‵mai ki a au a koutou katoa kolā e fi‵ta i te ‵mafa otou amoga, me ka avatu ne au ki a koutou a te malōlōga.”​—Mataio 11:28.

MEA KOLĀ E ‵TAU O FAKAMUAMUA

14. E mafai pefea o fakatoka faka‵lei a mea kolā e ‵tau o fakamuamua?

¹⁴ Kafai ko maua se tino i te kāiga ne se masaki masei, se mea ‵lei ke masaua ne te kāiga a pati konei mai te Atua: “Taumafai ke maua ne koe ne manatu fakatonutonu e uke, kae ka manuia koe.” (Faataoto 15:22) E mata, e mafai o maopoopo kae sau‵tala fakatasi a tino o te kāiga ki te tulaga ko oko latou ki ei ona ko te tino masaki tenā? E mautinoa eiloa me se mea ‵lei ke fai penā fakatasi mo te faiga o ‵talo kae ke ‵kilo atu ki te Muna a te Atua mō fakatakitakiga. (Salamo 25:4) Ne a mataupu e ‵tau o sau‵tala ki ei? Ia, e aofia i ei a togafiti fakatokitā, mea tau tupe, mo fakaikuga e ‵tau o fai ne te kāiga. Ko oi te tino ka pānaki tonu mo tena tausiga? E mafai pefea o fakatau fesoasoani te kāiga ke tausi ki te tino tenā? Ka pokotia pefea a tino taki tokotasi o te kāiga i fakatokaga kolā ka fai? Ka tausi atu pefea ki manakoga faka-te-agaga mo nisi manakoga o te tino tausi?

15. Se a te fesoasoani telā e tuku atu ne Ieova ki kāiga kolā e isi se tino masaki malosi i ei?

¹⁵ A te ‵talo malosi atu mō te takitakiga a Ieova, te mafaufau ‵loto ki tena Muna, mo te tau‵tali atu i te auala telā e fakaasi mai i te Tusi Tapu e masani eiloa o maua mai i ei a fakamanuiaga kolā e seki fakamoe‵moe tatou ki ei. Kāti e se gasolo aka o ‵lei te masaki o te tino masaki i te kāiga. Kae ko te fakalagolago ki a Ieova e iku atu faeloa ki te mauaga o toe ikuga ‵lei mai lalo i so se fakanofonofoga. (Salamo 55:22) Ne tusi mai te faisalamo: “Ka ko tou alofa tumau ne taofi ake ne ia au ki luga. I te taimi e manavase kae se toka ei au, ko koe e fakamafanafana kae fakafiafia mai ki a au.”​—Salamo 94:​18, 19; ke onoono foki ki te Salamo 63:​6-8.

TE FESOASOANI ATU KI TAMA‵LIKI

16, 17. Ne a manatu e mafai o sau‵tala ki ei mo tamā tama‵liki māfai ko masaki se isi tamaliki?

¹⁶ E mafai foki o ‵tupu a fakalavelave ‵lasi ki tama‵liki i te kāiga māfai ko masaki malosi se tino. Se mea tāua ke fesoasoani atu a mātua ke malamalama a tama‵liki i te tulaga ko oko atu ki te kāiga mo mea e mafai o fai ne latou ke fesoasoani atu ei. Kafai te tino masaki se tamaliki, e ‵tau o fesoasoani atu ki ana taina mo tuagane ke malamalama me i te saga fakapito atu ki te tamaliki masaki e se fakauiga i ei me ko foliki ifo te a‵lofa o mātua ki nisi tama‵liki. I lō te taliaga o te ita io me ko te fakatau‵fai ke tupu aka i vā o latou, e mafai o fesoasoani atu a mātua ki nisi tama‵liki ke momea aka te ‵pili o te lotou fesokotakiga kae ke fakatau a‵lofa tonu i te taimi e fesoasoani atu ei latou ki te tulaga faigata telā ne māfua mai ona ko te tino masaki.

¹⁷ E masani eiloa o ‵saga mai a tama‵liki māfai e ‵saga tonu atu olotou mātua ki olotou lagonaga i lō te fakaukeuke o fakamatalaga faka‵numi e uiga ki togafiti fakatokitā. Tela la, e mafai eiloa o fakaasi atu ke iloa ne latou a nāi mea e uiga ki te masaki telā e pokotia ei te tino o te kāiga. Kafai e lavea ne tama‵liki kolā e ma‵losi a te auala e taofi aka ei a te tino masaki ne se masaki mai te faiga o mea masani e uke, kāti ka momea aka te lotou ‘a‵lofa fakataina mo te lotou atafai.’​—1 Petelu 3:8.

18. E mafai pefea o fesoasoani atu ki tama‵liki ma‵tua ke malamalama i fakalavelave kolā e māfua mai i te masaki o se tino, kae e mafai pefea o aogā te mea tenei ki a latou?

¹⁸ E ‵tau o fesoasoani atu ki tama‵liki ma‵tua ke iloa ne latou me ko fepaki te kāiga mo se tulaga faigata kae e manakogina ei ke talia ne tino katoa i te kāiga te faiga o mea faiga‵ta. Ona ko te uke o tupe e fakamāumāu ki te ‵togiga o āsiga ki tokitā mo vailakau, kāti e se mafai ne mātua o tausi atu ki nisi tama‵liki i te auala telā e ma‵nako latou ki ei. E mata, ka ita a tama‵liki i te mea tenei kae mafau‵fau me ko fakaa‵lofa latou? Io me ka malamalama latou i te tulaga tenā kae loto fia‵fia o talia a nisi mea faiga‵ta? Ka maua eiloa a ikuga ‵lei e uke mai te auala e sau‵tala ei te kāiga ki te mataupu tenā, penā foki loa mo te kilokiloga ‵lei a te kāiga. E tonu, i te ukega o kāiga, ko oti ne fesoasoani atu eiloa a te masaki o se tino i te kāiga ki te fakaakoakoga o tama‵liki ke tau‵tali atu ki pati polopoloki konei a Paulo: “Sa fai ne koutou ne mea e fakavae i luga i te manatu fakapito mō te ‵lei o te tino, io me i luga i te fakamatamata; kae ke fakatau loto ma‵lalo koutou, ke mo a foki e manatu ake koutou me ‵lei atu koutou i nisi tino. Kilokilo ki mea e ‵lei ei nisi tino, kae se ko mea fua e ‵lei ei koutou.”​—Filipi 2:3, 4.

TE KILOKILOGA ‵TAU KI TOGAFITI FAKATOKITĀ

19, 20. (a) Ne a tiute e ‵tau o amo ne ulu o kāiga māfai ko masaki se tino i te kāiga? (e) E tiga eiloa e se se tusi fakatokitā, se a te auala e tuku mai ei ne te Tusi Tapu a fakatakitakiga māfai ko fakafesagai atu ki se masaki?

¹⁹ E se ‵teke atu a Kelisiano paleni ‵lei ki togafiti fakatokitā māfai e se ‵teke atu latou ki te tulafono a te Atua. Kafai ko masaki se tino i te lotou kāiga, e taumafai malosi latou ke ‵sala atu ki se fesoasoani ke fakafeoloolo aka ei te logo‵mae o te tino masaki. Kae e kese‵kese a kilokiloga a tokitā e uiga ki togafiti fakatokitā kolā e ‵tau o mafau‵fau faka‵lei ki ei. E se gata i ei, e uke a masaki mo famai ‵fou ko ‵sae fakapoi aka i tausaga fakamuli nei, kae e seai eiloa se faka‵leiga masani ko oti ne maua e uiga ki te ukega o mea konei. Ke oko foki ki te ‵salaga o te masaki tonu e tai faigata eiloa i nisi taimi. Ne a la mea e ‵tau o fai ne se Kelisiano?

²⁰ E tiga eiloa ne fai se tino tusitala o te Tusi Tapu e tokotasi mo fai se tokitā kae ne tuku atu foki ne te apositolo ko Paulo a manatu fesoasoani fakatokitā ki tena taugasoa, ko Timoteo, e maua eiloa i te Tusi Tapu a fakatakitakiga i mea tau amioga mo fakatakitakiga faka-te-agaga, kae e se se tusi o togafiti fakatokitā. (Kolose 4:14; 1 Timoteo 5:23) Tela la, e ‵tau eiloa o fai ne ulu o kāiga Kelisiano olotou fakaikuga paleni e uiga ki togafiti fakatokitā. Kāti e mafai o ma‵nako latou ki fakamatalaga a tokitā kese‵kese. (Fakatusa ki te Faataoto 18:17.) E ma‵nako eiloa latou ki toe fesoasoani ‵lei e mafai o maua mō te tino masaki i te kāiga, kae e ‵sala atu te tokoukega o latou ki se fesoasoani mai i tokitā masani. E sili atu te ‵lei ki nisi tino a te olo atu ki nisi matagaluega kolā e pānaki mo te ola ‵lei o tino. A te mea tenei se filifiliga totino foki e ‵tau o fai. Kae kafai e sau‵tala ki te faka‵leiga o se masaki, e se ‵tau o fakasēaogā ne Kelisiano a ‘te muna a te Atua i tena fai pelā me se moli ki olotou vae, mo se mainaga foki ki te lotou auala.’ (Salamo 119:105) E tumau eiloa i te tau‵tali atu o latou ki fakatakitakiga kolā e tuku mai i te Tusi Tapu. (Isaia 55:8, 9) Tela la, e ‵kalo keatea latou mai togafiti kolā e aofia i ei a faifaiga faivailakau, kae e ‵kalo keatea foki latou mai togafiti kolā e ‵teke atu ki akoakoga fakavae i te Tusi Tapu.​—Salamo 36:9; Galuega 15:28, 29; Fakaasiga 21:8.

21, 22. Ne a fakamatalaga a se fafine Asia e tokotasi e uiga ki se akoakoga fakavae i te Tusi Tapu, kae ne ‵lei pefea te fakaikuga ne fai ne ia e ‵tusa mo tena tulaga?

²¹ Mafaufau ki te mea ne tupu ki se fafine mai Asia. Mai tua malie o te lā sukesukega ki te Tusi Tapu fakatasi mo se Molimau a Ieova, ne fanau mai ne ia se tamaliki fafine mai mua o te taimi tonu, telā e tolu mo te kuata pauna fua te ‵mafa. Ne māfatia eiloa tou fafine i te taimi ne fai atu ei te tokitā me ka fakaalofa ‵ki tena pepe kae ka se mafai foki o sasale. Ne fai atu te tokitā ki tou fafine ke tuku atu tena pepe ke tausi i se fale tausi pepe penā. Ne seki iloa ne te avaga a tou fafine a te mea e ‵tau o fai. Ne ‵fuli atu tou fafine ki fea mō se fesoasoani?

²² Ana muna: “E masaua ne au se mea ne tauloto ne au mai te Tusi Tapu me i ‘tama‵liki ne meaalofa mai i a Ieova; ko te tinā fakamanuiaga tonu eiloa tenā.’” (Salamo 127:3) Ne fakaiku aka ne tou fafine ke ave ne ia te “meaalofa” tenei ki te fale kae tausi atu ki ei. Ne faigata eiloa i te kamataga, kae mai te fesoasoani o taugasoa Kelisiano i te fakapotopotoga o Molimau a Ieova, ne mafai ei ne te fafine tenei o tausi atu ki tena tamaliki telā ne manakogina se tausiga fakapito ki ei. I te sefululua tausaga mai tua ifo i ei, ne fanatu ei te tamaliki tenā ki fakatasiga i te Kingdom Hall kae ne fia‵fia fakatasi mo nisi tama‵liki i konā. E fai mai tena mātua: “Ko oko eiloa i toku fiafia me ne fakamalosi aka au ne akoakoga fakavae i te Tusi Tapu ke fai te mea tonu. Ne fesoasoani mai te Tusi Tapu ke fakatumau ne au se loto lagona ‵mā i mua o Ieova te Atua kae ke mo a ma salamō au i toku olaga kātoa.”

23. Se a te fakamafanafanaga e tuku mai ne te Tusi Tapu mō tino ma‵saki mo tino kolā e tausi atu ki a latou?

²³ Ka se tumau eiloa a ma‵saki mo tatou ki te se-gata-mai. Ne fakasino atu te pelofeta ko Isaia ki te taimi telā “ka seai eiloa se tino e tagi i a ia e masaki.” (Isaia 33:24) Ka fakataunu eiloa te folafolaga tenā i te lalolagi fou telā ko pili ‵ki mai. Kae ke oko ki te taimi tenā, e ma‵saki kae ‵mate eiloa tatou. Se mea fakafiafia me e tuku mai ne te Muna a te Atua ki a tatou a fakatakitakiga mo te fesoasoani. A tulafono fakavae e uiga ki amioga kolā e tuku mai i te Tusi Tapu e tumau te lotou aogā, kae e sili fakafia atu i manatu o tino sē ‵lei katoatoa kolā e mafuli‵fuli faeloa. Tela la, e lotomalie eiloa te tino poto ki pati a te faisalamo kolā ne tusi mai: “E tonu katoatoa te tulafono a [Ieova], e maua mai i ei te malosi fou. A fakatonuga foki a te Aliki e fakatuagagina, e aumai ne ia te poto ki a latou kolā e va‵lea. . . . E ‵tonu foki ana fakamasinoga; kae se fakapito. . . . E maua ne au te taui ‵lei i a au ne tausi ki ei.”​—Salamo 19:7, 9, 11.