Mataupu e Sefuluiva
Ke Taku Atu Faeloa te Muna a te Atua mo te Loto Toa
1. (a) Se a te tala ‵lei ne folafola atu ne soko o Iesu, kae ne a mea ne fai ne nisi tino Iutaia i ei? (e) Ne a fesili kāti e mafai o fai ne tatou?
TOEITIITI ko kātoa nei te 2,000 tausaga talu mai te taimi ne ‵tofi aka ei te Tama a te Atua, ko Iesu Keliso, ke fai fakamuli mo fai te Tupu o te lalolagi kātoa. Ne tamate Iesu ona ko aofaga a ana fili fakalotu, kae ne toe fakatu aka a ia ne Ieova mai te mate. Ko mafai nei o maua ne tatou te ola se-gata-mai, e alatu i a Iesu. Kae i te taimi ne folafola atu ei ne soko o Iesu te tala ‵lei tenei, ne oko atu fua i ei a fakasauāga ki a latou. Ne ‵pei atu a nisi tino o latou ki te falepuipui. Ne faimālō kae fakatonu atu foki ki a latou ke fakagata te lotou fai‵pati e uiga ki a Iesu. (Galuega 4:1-3, 17; 5:17, 18, 40) Ne a mea ne fai ne latou? Ne a au mea ka fai moi ne nofo atu koe i konā? E mata, ka tumau eiloa koe i te talai atu mo te loto toa?
2. (a) Se a te ‵toe tala gali telā e ‵tau o folafola atu ne tatou i ‵tou aso nei? (e) Ko oi e ‵tau o talai atu ne latou te tala ‵lei tenā?
2 I te 1914, ne fakasopo aka ei i te lagi a te Tupu o te Malo o te Atua, ko Iesu Keliso, ke pule atu ki ‘ana fili.’ (Salamo 110:2) E ‵soko atu ki ei, ne ‵pei ifo a Satani mo ana temoni ki te lalolagi nei. (Fakaasiga 12:1-5, 7-12) Ne kamata mai i ei a aso fakaoti o te olaga masei tenei. Kafai ko palele atu te vaitaimi tenei, ka fakaseai atu ne te Atua a faifaiga fakasatani katoa. (Tanielu 2:44; Mataio 24:21) Ka maua ne tino kolā e ‵sao atu i ei a te fakamoemoega ke ola latou ki te se-gata-mai i te lalolagi palataiso. Kafai ko oti ne talia ne koe te tala ‵lei tenei, kāti ka fia fakaasi atu foki ne koe te mea tenā ki nisi tino. (Mataio 24:14) Kae se a te mea e mafai o fakamoemoe koe ki ei ke fai ne nisi tino?
3. (a) E pefea a kilokiloga a tino ki te fekau o te Malo? (e) Se a te fesili e ‵tau o tali faka‵lei aka ne tatou?
3 Kafai e folafola atu ne koe te tala ‵lei o te Malo, kāti ka talia ne nisi tino, kae ka se fia‵fia ki ei a te tokoukega o tino. (Mataio 24:37-39) Kāti ka fakatauemu io me ‵teke atu a nisi tino ki a koe. Ne fakailoa mai ne Iesu me kāti ka ‵teke mai eiloa ‵tou kāiga ‵tonu. (Luka 21:16-19) E mafai o oko mai a ‵tekemaiga i ‵tou koga ga‵lue io me ko ‵tou akoga. E fakatapu foki ne malo te galuega a Molimau a Ieova i nisi vaega o te lalolagi. Kafai ko fe‵paki tatou mo vaegā fakanofonofoga penā, e mata, ka tumau eiloa koe i te taku atu o te muna a te Atua mo te loto toa kae “‵tu mautakitaki i te fakatuanaki”?—1 Kolinito 16:13.
Ke se Fakalago‵lago Eiloa Tatou ki ‵Tou Malosi
4. (a) Se a te mea e ‵tau o fai ne tatou ko te mea ke fakaasi atu ei me i a tatou ne tavini fakamaoni a te Atua? (e) Kaia e tāua ei a fakatasiga Kelisiano?
4 Kafai e manako se tino ke fai mo fai se tavini a Ieova, e ‵tau eiloa o fakalagolago atu a ia ki fakatokaga faka-te-agaga a Ieova. E tasi mai i ei ko fakatasiga a te fakapotopotoga. E fakamalosi mai te Tusi Tapu ke mo a ma fakata‵mala tatou ki ei. (Epelu 10:23-25) Ko oti ne taumafai malosi a tino kolā ne tumau i te fakamaoni e pelā me ne Molimau a Ieova ke ‵kau atu faeloa mo olotou taina tapuaki ki fakatasiga. E momea aka a mea e iloa ne tatou e uiga ki te Tusi Tapu i fakatasiga konā. E gasolo aka ki luga ‵tou amanaia ki te munatonu, kae e momea aka foki te ‵tou malamalama i te fakaaogāga o mea konā. E fakapili‵pili atu tatou ki ‵tou taina Kelisiano i te ‵kau fakatasi i te tapuakiga kae fakamalosi aka foki ei tatou ke fai te loto o te Atua. E tuku mai ne te agaga o Ieova a takitakiga e auala i te fakapotopotoga, kae e fakatasi mai foki a Iesu ki a tatou, e alatu i te agaga tenā.—Mataio 18:20; Fakaasiga 3:6.
5. Kafai e fakatapu te galuega a Molimau a Ieova, e fai sāle pefea olotou fakatasiga?
5 E mata, e kau atu faeloa koe ki fakatasiga katoa, kae fai foki ne koe a mea kolā e lagona ne koe i ei? I nisi taimi, kafai ko fakatapu te galuega a Molimau a Ieova, e ‵tau eiloa o fai a fakatasiga konā i tamā potukau i fale o tino. Kāti e kese‵kese a taimi mo koga e fai ei a fakatasiga konā kae kāti e se ‵lei faeloa ki tino katoa a taimi konā, me e ‵tau o fai a nisi fakatasiga i te valuapō. Kae faitalia te faigata mo te fakamataku, ne taumafai malosi faeloa a taina mo tuagane fakamaoni konā ke ‵kau atu ki fakatasiga katoa.
6. E fakaasi atu pefea ne tatou te ‵tou fakalago‵lago ki a Ieova, kae e mafai pefea o fesoasoani mai te faiga tenei ke tumau tatou i te talai atu mo te loto toa?
6 E momea aka te ‵tou fakalagolago ki a Ieova māfai e ‵talo atu faeloa tatou ki a ia, ona ko te mea e iloa ‵lei ne tatou me e ‵tau o maua ne tatou te fesoasoani o te Atua. E mata, e fai ne koe te mea tenā? Ne ‵talo atu faeloa a Iesu i te taimi ne fai ei tena galuega i te lalolagi nei. (Luka 3:21; 6:12, 13; 22:39-44) Kae i te po mai mua o tena fakasatauloga, ne fakamalosi atu ei a ia ki ana soko, penei: “Ke matapula‵pula koutou kae ‵talo, ke mo a e pa‵kū atu koutou ki te fakaosoosoga.” (Maleko 14:38) Kafai e fetaui tatou mo tino kolā e se fia‵fia ki te fekau o te Malo, e mafai foki o faka‵tuka mai ki a tatou ke se ga‵lue malosi tatou i te galuega talai. Kafai e fakatauemu io me fakasauā mai a tino ki a tatou, kāti ka fakaosoosogina ei tatou ke fakagata te ‵tou talai atu ko te mea ke faka‵seke keatea ei tatou mai fakalavelave. Kae kafai e ‵talo atu tatou mo te loto finafinau ke fesoasoani mai te agaga o te Atua ke talai atu faeloa tatou mo te loto toa, ka puipui ei tatou ke mo a ma sōna ma‵taku ki fakaosoosoga konā.—Luka 11:13; Efeso 6:18-20.
Tala e Uiga ki te Talai Atu mo te Loto Toa
7. (a) Kaia e tāua ei ki a tatou a tala i te Galuega? (e) Ke tali mai a fesili i te fakaotiga o te palakalafa tenei, kae ke faka‵mafa mai i ei te aogā o fakamatalaga konā ki a tatou.
7 E ‵tau o fia ‵saga malosi atu tatou katoa ki tala i te Galuega. E fakaasi mai i ei te auala ne manumalo ei te kau apositolo mo nisi soko mua i fakalavelave—ko tino kolā e ‵pau olotou lagonaga mo tatou—kae ne fai latou mo fai ne molimau loto ‵toa kae fakamaoni a Ieova. Ke na iloilo aka ne tatou se vaega o te tusi tenā, fakatasi mo te fesoasoani o fesili mo tusi siki konei mai lalo. Kafai e fai tatou penā, mafaufau la ki auala e aogā ei ki a koe a mea kolā e faitau ne koe.
E mata, ne a‵koga ‵lei te kau apositolo? E mata, ne loto ‵toa faeloa latou, faitalia a mea kolā ne ‵tupu? (Ioane 18:17, 25-27; 20:19; Galuega 4:13)
Se a te mea ne fesoasoani atu ki a Petelu ke faipati atu mo te loto toa i mua o te fono fakamasino a te kau Iutaia telā ne fakasala ne latou te Tama a te Atua? (Mataio 10:19, 20; Galuega 4:8)
Ne a mea ne fai ne te kau apositolo a koi tuai o ‵tu atu latou i mua o te fono a te kau Sanetulini? (Galuega 1:14; 2:1, 42)
I te taimi ne fakatonu atu ei a tino pule ki te kau apositolo ke fakagata te lotou talai atu i te igoa o Iesu, se a te tali ne fai atu ne Petelu mo Ioane? (Galuega 4:19, 20)
I te otiga o te fakamasinoga tenā, ko oi ne fakalago‵lago atu ki ei te kau apositolo ke maua mai ei se fesoasoani? E mata, ne ‵talo atu latou ke fakagata a fakasauāga, io me se a te mea ne ‵talo atu latou ki ei? (Galuega 4:24-31)
Ne fesoasoani atu pefea a Ieova i te taimi ne taumafai ei a tino ‵teke o taofi aka te galuega talai? (Galuega 5:17-20)
Ne fakaasi atu pefea ne te kau apositolo me ne malama‵lama latou i te pogai ne fakasaoloto ei latou? (Galuega 5:21, 41, 42)
Se a te mea ne fai faeloa ne soko e tokouke kolā ne mafuta valevale ki koga kese‵kese ona ko fakasauāga? (Galuega 8:3, 4; 11:19-21)
8. Ne a mea fakafia‵fia ne ‵tupu ona ko te galuega a soko mua, kae e mafai foki pefea o ‵tupu a vaegā mea penā ki a tatou?
8 Ne aogā eiloa te talaiatuga tenā o te tala ‵lei. E nofo pelā ki te toko 3,000 o soko ne papatiso i te Penitekoso i te 33 T.A. “Ka ko gasolo eiloa o tokouke a tino e fakaopoopo atu ki a latou, ne tāgata mo fāfine kolā ko tali‵tonu ki te Aliki.” (Galuega 2:41; 4:4; 5:14) Ne fai fakamuli se tino fakasauā ki tino o te Atua, ko Saulo mai i Taso, mo fai se Kelisiano kae ne kamata o talai atu ne ia te munatonu mo te loto toa. Ne lauiloa fakamuli a ia e pelā me ko te apositolo ko Paulo. (Kalatia 1:22-24) Ne seki gata atu eiloa te galuega telā ne kamata i aso o te kau apositolo. Ko oti ne fakamaopoopo mai a tino e tokouke i aso fakaoti konei kae ko oko atu foki te galuega tenei ki koga katoa o te lalolagi. Ko taulia nei tatou ke ‵kau atu ki ei. Kae kafai e fai penā, e mafai o fakaakoako atu tatou ki molimau fakamaoni kolā ko leva ne tavini atu.
9. (a) Ne a avanoaga ne fakaaogā ne Paulo ke talai atu? (e) Ne a auala e talai atu ei ne koe te fekau o te Malo ki nisi tino?
9 I te taimi ne iloa ei ne Paulo te munatonu e uiga ki a Iesu Keliso, ne a ana mea ne fai? “Ne . . . kamata eiloa o lauga atu ki tino e uiga ki a Iesu, ana muna, ‘A Iesu ko te Tama a te Atua.’ ” (Galuega 9:20) Ne fakatāua ne ia te alofa tauanoa o te Atua ki a ia, kae ne iloa ne ia me e ‵tau o maua foki ne tino katoa a te tala ‵lei telā ko oti ne maua ne ia. A Paulo se Iutaia, kae e ‵tusa eiloa mo tū i aso konā, ne fanatu sāle a ia ke talai atu i fale tapuaki ko sunako. Ne talai atu eiloa a ia mai fale ki fale kae ne sau‵tala foki mo tino i te maketi. Kae ne loto fiafia foki a ia ke fanatu o talai atu te tala ‵lei i koga ‵fou.—Galuega 17:17; 20:20; Loma 15:23, 24.
10. (a) Ne fakaasi mai pefea ne Paulo me e se gata fua i tena loto toa, kae ne atamai foki a ia i te auala telā e talai atu ei a ia? (e) E mafai pefea o fakaasi atu ne tatou a uiga o Paulo māfai ko talai atu tatou ki ‵tou kāiga, tino kolā e ga‵lue tasi mo tatou, io me ko tama‵liki i te akoga?
10 Ne loto toa kae atamai foki a Paulo, e pelā mo te mea e ‵tau o fai ne tatou. Kafai ne talai atu a ia ki te kau Iutaia, ne faipati a ia ki folafolaga ne fai ne te Atua ki olotou tupuga. Kae ne faipati a ia ki mea kolā ne masani ki ei te kau Eleni māfai ne talai atu a ia ki a latou. I nisi taimi, ne fakaaogā eiloa ne ia a mea kolā ne ‵tupu ki a ia e pelā me se auala ke talai atu ei. Ne fai mai tou tagata, penei: “E fai katoa ne au a mea konei mō te tala ‵lei, ko te mea ke [“na folafola atu ne au te mea tenā ki nisi tino,” NW].”—1 Kolinito 9:20-23; Galuega 22:3-21.
11. (a) Ne a mea ne fai ne Paulo ko te mea ke mo a ma tumau a ia i te kinau atu ki tino ‵teke? (e) Ko taimi fea e ‵tau ei o fakaakoako atu tatou ki a Paulo, kae e pefea la? (i) E maua mai i fea te malosi ke tumau tatou i te talai atu mo te loto toa?
11 Kafai ne foliga mai me e ‵lei atu ke fanatu Paulo o talai atu i te suā koga ona ko ‵tekemaiga, ne fai eiloa a ia penā i lō te tumau i te kinau atu ki tino ‵teke. (Galuega 14:5-7; 18:5-7; Loma 12:18) Kae ne seki mā eiloa a ia i te tala ‵lei. (Loma 1:16) E tiga eiloa ne fakasauā malosi atu a tino ‵teke ki a Paulo, ne “aumai ne [te Atua] te loto malosi,” ke tumau tou tagata i te talai atu. Ana muna: “Ka ko te Aliki ne tu eiloa i oku tafa, kae ne tuku mai ne ia ki a au a te malosi o folafola atu katoatoa te muna, ko te mea ke lagona katoa ne tino.” (1 Tesalonia 2:2; 2 Timoteo 4:17) Ne tuku mai faeloa ne te Ulu o te fakapotopotoga Kelisiano, ko Iesu, a te malosi e ‵tau o maua ne tatou ke fai ei te galuega telā ne ‵valo mai ne ia ke fai ne tatou i ‵tou aso nei.—Maleko 13:10.
12. E fakaasi atu pefea ne Kelisiano te loto toa, kae se a te mea e fakavae ki ei te lotou loto ‵toa?
12 E maua ne tatou a pogai ‵lei ke tumau i te talai atu te muna a te Atua mo te loto toa, e pelā mo mea ne fai ne Iesu mo nisi tavini fakamaoni i aso o te kau apositolo. E se fakauiga i ei me e se āva tatou ki tino io me e faimālō ne tatou a latou ke faka‵logo mai ki te fekau. Kae e se ‵fiu vave tatou ona ko te sē fia‵fia mai o tino; io me e se ‵nofo ‵mu tatou ona ko ‵tekemaiga. E pelā mo Iesu, e folafola atu ne tatou me ko te Malo fua o te Atua e ‵tau o pule mai ki te lalolagi kātoa. E se ‵mā tatou ke talai atu me e fai tatou mo fai ne sui o Ieova, te Pule Sili, kae e māfua mai i a Ia te fekau telā e folafola atu ne tatou, kae e se māfua mai i a tatou. Kae e ‵tau eiloa o fai te ‵tou a‵lofa ki a Ieova mo fai te ‵toe pogai sili ke tavae atu ei tatou ki a ia.—Filipi 1:27, 28; 1 Tesalonia 2:13.
Ke Toe Sau‵tala ki Manatu Konei
• Kaia e tāua ei ke fakaasi atu te fekau o te Malo ki tino katoa kolā e mafai o fakailoa atu ki ei, kae ne a mea e mafai o fakamoe‵moe tatou ki ei ke fai ne tino?
• E mafai pefea o fakaasi atu ne tatou me e se fakalago‵lago atu fua tatou ki ‵tou malosi ke tavini atu ei ki a Ieova?
• Ne a akoakoga tāua e maua ne tatou i te tusi ko Galuega?
[Fakamatalaga o te Ata i te itulau e 173]
E talai atu ne tavini a Ieova i aso nei a te muna a te Atua mo te loto toa, e pelā mo tavini i aso mua