“I te Mea ma Oko Mai Fakaosoosoga”

“Sa ‵moe kae ‵talo, i te mea ma oko mai fakaosoosoga ki a koutou.”​—MATAIO 26:41.

NE ‵KESE malosi te tofotofoga telā ne fepaki mo ia i lō logo‵maega katoa mai mua atu i ei. Ko pili o oko atu a Iesu Keliso, te Tama a te Atua ki te gataga o tena olaga i te lalolagi. Ne iloa ne Iesu me ko pili o puke fakapagota a ia, fakasala ki te mate, kae fakasataulo. Ne iloa foki ne ia me ka faka‵malugina te igoa o tena Tamana i ana fakaikuga mo ana faifaiga katoa e fai. Ne iloa foki ne Iesu me e fakavae loa te fakamoemoega o tino ke ola i aso mai mua ki ana mea e fai. Ne a ana mea ne fai i te fakafesagai atu ki tofotofoga katoa konei?

² Ne olo atu a Iesu mo ana soko ki te fatoaga ko Ketesemane. Se koga gali eiloa tenā ki a Iesu. Kae mai konā, ne fanatu ei a ia tokotasi ki se koga tai ‵mao. I te taimi ne nofo tokotasi i ei, ne ‵talo atu a ia ki tena Tamana faka-te-lagi ke maua se malosi, mai te fakaasi atu o mea katoa i tena loto—e se fakatasi fua kae fakatolu taimi. E ui eiloa ne ‵lei katoatoa a ia, ne iloa ne Iesu me e se mafai o ‵teke atu ne ia a fakalavelave i tena malosi eiloa.—Mataio 26:36-44.

³ I aso nei, e fe‵paki foki tatou mo tofotofoga. I te kamataga o te polosiua tenei, ne sautala loa tatou e uiga ki fakamaoniga me ko ‵nofo atu tatou i aso fakaotioti o te olaga masei tenei. E gasolo aka faeloa o uke a tofotofoga mo fakalavelave i te lalolagi a Satani. E faka‵malu ne tatou kolā e tapuaki atu ki te Atua tonu a tena igoa i ‵tou filifiliga mo faifaiga kae ka aogā malosi foki ki ‵tou fakamoemoega taki tokotasi ke ola i tena lalolagi fou. E a‵lofa tatou ki a Ieova. E ma‵nako tatou o ‘kufaki ke oko ki te gataga’—ko te gataga o te ‵tou olaga io me ko te gataga o te olaga tenei, faitalia me tefea te mea e oko muamua mai. (Mataio 24:13) Kae e tumau pefea tatou i te matapula‵pula?

⁴ Me e iloa ne ia me ka fe‵paki ana soko—i aso nei e pelā eiloa mo aso mua—mo tofotofoga, ne fakamalosi mai a Iesu: “Sa ‵moe kae ‵talo, i te mea ma oko mai fakaosoosoga.” (Mataio 26:41) Se a te uiga o pati konei mō tatou i aso nei? Ne a tofotofoga e fepaki mo koe? Kae e mafai pefea koe o “tumau i te matapulapula”?

Fakaosoosoga ke Fai te a?

⁵ E fe‵paki a tatou katoa mo tofotofoga ke ‵tō atu ki “te malei a te tiapolo.” (2 Timoteo 2:26) E fakaasi mai i te Tusi Tapu me e saga tonu atu eiloa a Satani ki tino tapuaki ki a Ieova. (1 Petelu 5:8; Fakaasiga 12:12, 17) Kaia? E se ko te tamatega fua o tatou. Ka sē manumalo Satani māfai e ‵mate tatou i te fakamaoni ki te Atua. E iloa ‵lei ne Satani me ka fakaseai ne Ieova a te mate i tena taimi tonu e auala i te toetuga.—Luka 20:37, 38.

⁶ E manako a Satani o fakamasei ne ia te mea telā e tāua atu i lō ‵tou olaga nei—ko ‵tou fakamaoni ki te Atua. E manako malosi a Satani o fakatalitonu atu me e mafai o ‵fuli ne ia tatou mai te tapuakiga ki a Ieova. Tela la, kafai e mafai o fakalesi ne ia tatou ke sē fakamaoni—ke tiaki te talaiatuga o te tala ‵lei io me tiaki a tulaga faka-Kelisiano—ko manumalo i ei a Satani! (Efeso 6:11-13) Tela la, e tofotofo tatou ne “te Tiapolo.”—Mataio 4:3.

⁷ E uke a “auala faitogafiti” a Satani. (Efeso 6:11, Jewish New Testament) E mafai o tofotofo ne ia tatou ki te fia maumea, te mataku, te fakalotolotolua io me ko te ‵sala atu ki fakafiafiaga. Kae tasi te auala magoi e fakaaogā ne ia ko faka‵tukāga. E pelā me se tino poto i te fakaloiloi tino, e iloa ne ia me e mafai o fakavāivāi mai a te loto fanoanoa ki a tatou, kae faigofie ei ke ‵to atu tatou ki tofotofoga. (Faataoto 24:10) Tela la, maise eiloa māfai ko loto “vāivāi” tatou ko tofotofo ei ne ia ke taka‵vale tatou.—Salamo 38:8.

⁸ E foliga mai me e gasolo o pili mai te gataga kae e gasolo aka foki o uke atu a mea e faka‵tuka mai ki a tatou kae e pokotia foki tatou i ei. (Ke onoono ki te pokisi “Nisi Mea Kolā e Māfua Mai i ei a Faka‵tukāga.”) Faitalia te mea e māfua mai i ei, e mafai o fakavāivāi mai a faka‵tukāga ki ‵tou malosi. A te “fakaaogā faka‵lei so se avanoa” mō mea faka-te-agaga—e aofia i ei te sukesuke ki te Tusi Tapu, te kau atu ki fakatasiga faka-Kelisiano mo te kau atu ki te galuega talai—e mafai o faigata māfai ko fi‵ta koe i te feitu faka-te-foitino, faka-te-mafaufau mo te loto māfatia. (Efeso 5:15, 16) Ke masaua me manako te Tiapolo ke tiakina ne koe a mea konā. Kae e se tenei te taimi ke fakatamala i ei io me ke sē matapula‵pula e uiga ki te taimi ko ola ei tatou! (Luka 21:34-36) E ‵teke atu pefea koe ki tofotofoga kae tumau i te matapulapula? Ke mafaufau ki auala e fa kolā e mafai o fesoasoani mai.

“Ke ‵Talo Faeloa”

⁹ Fakalagolago ki a Ieova e auala i te faiga o ‵talo. Ke masaua te fakaakoakoga a Iesu i te fatoaga o Ketesemane. Ne a ana mea ne fai i te taimi ne māfatia malosi ei a ia? Ne ‵talo malosi atu a ia ki a Ieova mō se fesoasoani, “ka ko tona tauta e pelā mo te motimotiga toto, e salisali ifo ki te laukele.” (Luka 22:44) Ke mafaufau la ki ei. Ne iloa ‵lei ne Iesu a Satani. Ne lavea ne Iesu mai te lagi a tofotofoga katoa kolā e fakaaogā ne Satani ke malei aka ei a tavini a te Atua. Kae ne iloa ne Iesu me e se faigofie ki a ia ke manumalo i tofotofoga a te Tiapolo. Kafai ne manako te Tama ‵lei katoatoa a te Atua ke ‵talo atu mō se fesoasoani mo se malosi, e pefea te lasi atu o te ‵tou manakoga ke fai foki penā!—1 Petelu 2:21.

¹⁰ Ke masaua foki la, me mai tua o ana fakamalosiga ki ana soko ke “‵talo” faeloa, ne fai atu a Iesu: “E manako ki ei te loto, ka ko te foitino e vāivāi.” (Mataio 26:41) I o oi te foitino ne fakauiga ki ei a Iesu? E mautinoa eiloa me e se ko tena foitino, me ne ‵lei katoatoa a ia. (1 Petelu 2:22) Kae ne ‵kese te tulaga o ana soko. Ona ko te tulaga se ‵lei katoatoa mo te fia fai agasala telā ne togi mai ne Atamu, e ma‵nako malosi eiloa latou ki se fesoasoani ke ‵teke atu ki fakaosoosoga. (Loma 7:21-24) Tenā te pogai ne fakamalosi atu ei a ia ki a latou—e pelā foki mo Kelisiano ‵tonu katoa kolā e o‵mai i olotou tua—ke ‵talo atu mō se fesoasoani māfai e fe‵paki latou mo tofotofoga. (Mataio 6:13) E tali atu eiloa a Ieova ki vaegā ‵talo konā. (Salamo 65:2) E pefea la? I auala e lua.

¹¹ Muamua la, e fesoasoani mai a te Atua ke lavea faka‵lei ne tatou a tofotofoga. E fai a tofotofoga a Satani e pelā me ne malei kolā e tuku tatela fua i se auala pouli. Kafai e se lavea ne koe, ko maleigina ei koe. E auala i te Tusi Tapu mo tusi faka-te-Tusi Tapu, e fakaasi faka‵sau mai ne Ieova a malei a Satani, kae fai i ei ke ‵kalo keatea tatou mai tofotofoga. I tausaga takitasi, e fakamasaua mai faeloa i tusi, fono ‵lasi mo tamā fono ke matapula‵pula tatou i vaegā mea fakama‵taku pelā mo te mataku ki tino, te finalalolagi, te fia maumea mo nisi tofotofoga a Satani. (Faataoto 29:25; 1 Kolinito 10:8-11; 1 Timoteo 6:9, 10) E mata, e se maua ne koe te loto fakafetai ki a Ieova mō te faiga ke matapula‵pula tatou ki togafiti a Satani? (2 Kolinito 2:11) A faka‵pulaga katoa konā ko tali eiloa ki au ‵talo ke maua se fesoasoani o ‵teke atu ki tofotofoga.

¹² Te lua o mea, e tali mai a Ieova ki ‵tou ‵talo mai te tukumaiga o te malosi ke kufaki tatou i tofotofoga. E fai mai tena Muna: “Me i te Atua e . . . se mafai foki o talia ne ia ke fakaosoosogina koutou ke sili atu i te otou malosi o ‵teke te fakaosoosoga; kae i te taimi e fakaosoosogina ei koutou, ka tuku atu ne ia a te malosi e kufaki ei ne koutou, kae fai foki ne ia se ala e ‵sao ei koutou.” (1 Kolinito 10:13) E se talia lele eiloa ne te Atua ke fe‵paki tatou mo se tofotofoga telā e se mafai ne te ‵tou malosi faka-te-agaga o ‵teke atu ki ei­—māfai e tumau tatou i te fakalago‵lago atu ki a ia. E fai pefea ne ia “se ala e ‵sao ei” tatou? E ‘tuku atu ne ia te agaga tapu ki tino kolā e fakamolemole atu ki ei.’ (Luka 11:13) E mafai o fesoasoani mai te agaga tenā ke masaua ne tatou a fakatakitakiga faka-te-Tusi Tapu kolā e fakamalosi mai i ei ke fai ne tatou te mea tonu kae fai foki ei a filifiliga ‵lei. (Ioane 14:26; Iakopo 1:5, 6) E mafai o fesoasoani mai i ei ke fakaasi atu ne tatou a uiga kolā e ‵tau o maua ke manumalo ei i manakoga ma‵sei. (Kalatia 5:22, 23) E mafai foki o fakamalosi atu te agaga o te Atua ki taina tali‵tonu ke ‘fai pelā me ne mea fakamalosi loto ki a tatou.’ (Kolose 4:11, NW) E a, e se loto fakafetai koe me e tali mai a Ieova i se auala alofa ki au ‵talo mō se fesoasoani?

Ke mo a e tō ‵Lasi ou Fakamoemoega

¹³ Ke tumau i te matapula‵pula, e se ‵tau o tō ‵lasi a mea e fakamoe‵moe tatou ki ei. Ona ko fakalavelave o te olaga, e fi‵ta eiloa tatou katoa i nisi taimi. Kae e ‵tau o masaua ne tatou me e seki folafola mai ne te Atua me ka maua ne tatou se olaga saogalemū i te olaga masei tenei. Ke oko eiloa ki aso o te Tusi Tapu, ne fe‵paki foki a tavini a Ieova mo fakalavelave, e aofia i ei ko fakasauāga, te mativa, te mafatia mo masaki.—Galuega 8:1; 2 Kolinito 8:1, 2; 1 Tesalonia 5:14; 1 Timoteo 5:23.

¹⁴ I aso nei e fe‵paki foki tatou mo fakalavelave penā. Kāti ka fe‵paki tatou mo fakasauāga, fakalavelave i mea tau tupe, te loto māfatia, masaki mo te logo‵mae i nisi feitu. Moi ne puipui fakavavega tatou ne Ieova mai fakalavelave, e mata, ka sē tuku atu i ei se avanoaga ki a Satani ke fakaitaita atu ki a Ieova? (Faataoto 27:11) E talia ne Ieova ke fakaosooso kae tofotofogina ana tavini, ke oko ki te mate i nisi taimi i lima o olotou fili.—Ioane 16:2.

¹⁵ Se a la te folafolaga ko oti ne fai mai ne Ieova? E pelā mo te mea ko oti ne iloa muamua ne tatou, ne folafola mai a ia me ka mafai ne tatou o ‵teke atu so se tofotofoga e fe‵paki mo tatou māfai e tali‵tonu katoatoa tatou ki a ia. (Faataoto 3:5, 6) E auala i tena Muna, tena agaga mo tena fakapotopotoga e puipui ne ia tatou i te feitu faka-te-agaga, i te fesoasoani mai ke mafai ei o puipui te ‵tou va ‵lei mo ia. Kafai e ‵lei faeloa te va tenā, faitalia me ‵mate tatou, e manumalo eiloa tatou. E seai eiloa se mea—ke oko foki eiloa ki te mate—e mafai o taofi ne ia a Ieova ke sē tuku mai te taui ki ana tavini fakamaoni. (Epelu 11:6) Kae i te lalolagi fou telā ko pili mai, ka fakataunu eiloa ne Ieova ana folafolaga e uiga ki fakamanuiaga fakaofoofogia katoa ki tino kolā e a‵lofa ki a ia.—Salamo 145:16.

Ke Masaua a Kinauga

¹⁶ Ko te mea ke kufaki ke oko ki te gataga, e ‵tau o masaua ne tatou a kinauga tāua kolā e aofia i ei te taliaga ne te Atua a amioga ma‵sei. Kafai ko tō uke a ‵tou fakalavelave i nisi taimi kae ko fakaosoosogina tatou ke tiaki te munatonu, se mea ‵lei ke masaua ne tatou me ne fakamakosu ne Satani te ‵tonu o te pulega a Ieova. Ko oti foki ne fakafesili ne te Tino Fakaloiloi tenā a te alofa fakamaoni o tino tapuaki ki te Atua. (Iopu 1:8-11; 2:3, 4) E sili atu te tāua o kinauga konā mo auala e faka‵lei aka ei ne Ieova a latou i lō ‵tou ola. E pefea la?

¹⁷ A te taliaga ne te Atua ke fe‵paki tatou mo fakalavelave e se se mea tumau kae se avanoaga ‵lei ke maua foki ne nisi tino a te munatonu. Ke mafaufau ki te mea tenei: Ne logo‵mae a Iesu ko te mea ke maua ne tatou te ola. (Ioane 3:16) E mata, e se loto fakafetai tatou ki te mea tenā? Kae, e mata, e loto fia‵fia tatou o kufaki i fakalavelave i se taimi tai mata leva ko te mea ke maua foki ne nisi tino te ola? Ko te mea ke kufaki tatou ke oko ki te ikuga, e ‵tau o lavea faka‵lei ne tatou me e sili atu te poto o Ieova i lō tatou. (Isaia 55:9) Ka fakagata ne ia a amioga ma‵sei i ‵toe taimi ‵lei ke faka‵lei aka ei a kinauga katoa konā kae ke maua foki ne tatou a mea aogā ki te se-gata-mai. E mafai pefea o tupu se mea penei? E ‵tonu katoatoa a fakamasinoga a te Atua!—Loma 9:14-24.

“Fakapili‵pili Atu ki te Atua”

¹⁸ Ke tumau tatou i te matapula‵pula, e ‵tau o fakapili‵pili atu tatou ki a Ieova. Ke sē puli eiloa i a tatou me ko fakaoti ne Satani tena malosi ke fakamasei ne ia te ‵tou va ‵lei mo Ieova. E taumafai a Satani o fai ke tali‵tonu tatou me ka sē oko mai eiloa te gataga, kae e seai se aogā ke folafola atu ei te tala ‵lei io me ola e ‵tusa mo tulaga o te Tusi Tapu. Kae ko ia “se tino loi, ka ko te tamana foki eiloa o tino ‵loi.” (Ioane 8:44) E ‵tau o fakaiku aka ne tatou ke “‵teke atu ki te Tiapolo.” E se ‵tau eiloa o manatu ma‵ma tatou ki te ‵tou va fealofani mo Ieova. E fakamalosi mai te Tusi Tapu mo te alofa ki a tatou: “Fakapili‵pili atu koutou ki te Atua, ko fakapilipili mai ei a ia ki a koutou.” (Iakopo 4:7, 8) E fakapilipili atu koe pefea ki a Ieova?

¹⁹ E tāua ‵ki te ‵talo mo te mafaufau ‵loto ki te munatonu. Kafai e foliga mai me ko taotaomaki tatou ne fakalavelave o te olaga, ke fakaasi atu a mea katoa i tou loto ki a Ieova. Kafai e fakaasi atu ne koe a mea likiliki katoa, ka faigofie foki o lavea ne koe a tali ki au ‵talo. Kāti ka sē maua ne koe te tali telā ne mafaufau koe ki ei, kae kafai e manako malosi eiloa koe o fakaaloalo kae tumau i te fakamaoni ki a ia, ka tuku mai eiloa ne ia te fesoasoani e manako koe ki ei ko te mea ke mafai o kufaki koe mo te manuia. (1 Ioane 5:14) Kafai e lavea ne koe tena takitakiga i tou olaga, ko sinā fakapilipili atu ei koe ki a ia. E tāua foki a te faitau mo te mafaufau ‵loto ki uiga mo auala o Ieova kolā e fakaasi mai i te Tusi Tapu. Ka fesoasoani atu a te faiga tenā ke iloa ‵lei ne koe a ia; e fakamalosi aka i ei tou loto kae fai foki ke ‵poko tou alofa mō ia. (Salamo 19:14) Kae ko te alofa eiloa tenā, telā e sili atu i mea katoa, ka fesoasoani atu ki a koe ke ‵teke atu ki tofotofoga kae ke tumau i te matapulapula.—1 Ioane 5:3.

²⁰ Ke fakapili‵pili atu ki a Ieova, se mea tāua foki ke fakapili‵pili atu tatou ki ‵tou taina tali‵tonu. Ka sau‵tala tatou ki te mea tenei i te vaega fakaoti o te polosiua tenei.

FESILI MO TE SUKESUKEGA

• Ne a mea ne fai ne Iesu i toe taimi faiga‵ta o tena olaga i te lalolagi, kae se a te mea ne fakamalosi atu ne ia ke fai ne ana soko? (Pala. 1-4)

• Kaia e saga malosi atu ei a Satani ki tino tapuaki a Ieova, kae i auala fea e fakaosooso ei ne ia tatou? (Pala. 5-8)

• Ke ‵teke atu ki tofotofoga, kaia e ‵tau ei o tumau tatou i te ‵talo (Pala. 9-12), ke mo a ma tō silia a mea e fakamoe‵moe tatou ki ei (Pala. 13-15), ke masaua a kinauga (Pala. 16-17), kae ‘fakapili‵pili atu ki te Atua’ (Pala. 18-20)?

[Pokisi i te itulau e 25]

Nisi Mea Kolā e Māfua Mai i ei a Faka‵tukāga

Te Tulaga o te Malosi io me ko te Matua. Kafai e fe‵paki tatou mo se masaki aveave ‵loa io me ko sē mafai ne tatou o fai a mea e uke ona ko te matua, e mafai o loto vāi‵vāi tatou me ko sē uke ‵tou mea e mafai o fai i te taviniga ki te Atua.—Epelu 6:⁠10.

Te Loto Fanoanoa. E mafai o ‵tuka ‵tou loto māfai e se ‵saga mai a tino e tokouke ki ‵tou taumafaiga ke talai atu te Muna a te Atua.—Faataoto 13:⁠12.

Lagonaga me seai sou aogā. Ona ko faifaiga sē ‵lei ne fai ki ei i tausaga e uke, e mafai o fakaiku aka ne se tino me e seai se tino e alofa ki a ia, ke oko foki eiloa ki a Ieova.—1 Ioane 3:19, 20.

Lagonaga faka‵mae loto. Kafai ko fakalogo‵mae malosi se tino ne sena taina talitonu, e mafai o loto vāivāi malosi kae fakaosoosogina ke sē kau atu ki fakatasiga a Kelisiano io me ko te galuega talai.—Luka 17:⁠1.

Fakasauāga. E mafai o ‵teke mai, fakasauā io me fakatauemu atu ki a koe a nisi tino kolā e se ‵lotu fakatasi mo koe.—2 Timoteo 3:12; 2 Petelu 3:3, 4.

[Ata i te itulau e 26]

Ne fakamalosi mai a Iesu “ke ‵talo faeloa” mō se fesoasoani ke ‵teke atu ki tofotofoga