E Mua Koe o Fakaasi Atu te Āva?

“Ke [“fakaasi atu muamua,” NW] te āva o te suā tino ki te suā tino.”​​—LOMA 12:10.

1. Se a te mea ko se masani o lavea atu nei i koga e uke o te lalolagi?

I NISI koga i te lalolagi, se mea masani mo tama‵liki ke fakaasi atu te āva ki tino ma‵tua mai te to‵tuli ifo mo te fakaaloalo i olotou mua. I te faiga penei, e ma‵lalo ifo latou i tino kolā e ma‵tua atu i a latou. I koga konei, se faifaiga sē āva foki māfai e ‵fuli atu te tua o se tamaliki ki se tino matua. E tiga eiloa te ‵kese o auala e fakaasi atu ei te āva i tuu mo aganuu kese‵kese, a te faiga penā e fakamasaua mai ei ki a tatou e uiga ki te Tulafono ne tuku ki a Mose. Ne aofia i ei te fakatonuga: “Āva kae faka‵malu ki tino ma‵tua.” (Levitiko 19:32) Se mea fakafanoanoa me e se se mea masani nei ke fakaasi atu te āva ki nisi tino i koga e uke. A te ‵tonuga loa, ko lauiloa a te sē āva i aso nei.

2. Ko oi a tino e fai mai te Muna a te Atua ke fakaasi atu ne tatou ki ei te āva?

² E fakatāua malosi ne te Muna a te Atua a te fakaasiatuga o te āva. E fai mai i ei ke āva tatou ki a Ieova mo Iesu. (Ioane 5:23) E fakatonu mai foki ki a tatou ke fakaasi atu te āva ki ‵tou kāiga mo taina tali‵tonu e pelā foki ki nisi tino i tua o te fakapotopotoga. (Loma 12:10; Efeso 6:​1, 2; 1 Petelu 2:​17) Ne a nisi auala kolā e fakaasi atu ei me e āva tatou ki a Ieova? E fakaasi atu pefea ne tatou te āva, io me ko te fakaaloalo tonu, ki ‵tou taina mo tuagane Kelisiano? Ke na sau‵tala tatou ki mea konei mo nisi fesili aka.

Ke Āva ki a Ieova mo Tena Igoa

3. Se a te auala tāua e tasi ke fakaasi atu ei te āva ki a Ieova?

³ A te auala tāua e tasi ke āva ki a Ieova ko te fakaasi atu o te fakaaloalo tonu ki tena igoa. E se gata i ei, a tatou ko ana tino kolā ne ‘fakaigoa ki tena igoa.’ (Galuega 15:​14, 17) Se tulaga fakaaloalogina eiloa ke fakaigoa tatou ki te igoa o te Atua malosi katoatoa, ko Ieova. Ne fai mai te pelofeta ko Mika: “A malo katoa e tapuaki kae faka‵logo ki olotou atua, ka ko matou e [“sa‵sale i te igoa o Ieova,” NW] te motou Atua ki te se gata mai.” (Mika 4:5) A tatou e “sa‵sale i te igoa o Ieova” mai te taumafai o ola i aso takitasi i se auala telā e faka‵malu ei te igoa telā e tauave ne tatou. E pelā mo te fakamasauaga a Paulo ki Kelisiano i Loma, kafai e se ola tatou e ‵tusa mo te tala ‵lei telā e talai atu ne tatou, ko “takumaseigina” ei te igoa o te Atua.​​—Loma 2:​21-​24.

4. E kilo atu pefea koe ki te tauliaga ke molimau atu e uiga ki a Ieova?

⁴ E āva foki tatou ki a Ieova e auala i ‵tou galuega talai. I aso mua, ne ‵kami ne Ieova a tino Isalaelu ke fai pelā me ko ana molimau, kae ne fakata‵mala latou o fakataunu te tiute tenā. (Isaia 43:​1-​12) Ne fulitua sāle atu latou ki a Ieova kae “faka‵mae ne latou te Atua Tapu o Isalaelu.” (Salamo 78:​40, 41) Fakamuli ifo, ne seki toe talia eiloa ne Ieova te fenua tenā. I aso nei, e loto fakafetai eiloa tatou mō te tauliaga ke molimau atu e uiga ki a Ieova kae fakasalalau atu tena igoa. E fai tatou penā me e a‵lofa tatou ki a ia kae ma‵nako foki o faka‵malu tena igoa. E se mafai o taofi aka te ‵tou talai atu māfai ko iloa ne tatou te mea tonu e uiga ki te ‵tou Tamana i te lagi mo ana fuafuaga, i ne? E ‵pau eiloa ‵tou lagonaga mo te apositolo ko Paulo telā ne fai mai penei: “Au e pulea ne fakatonuga ke fai ne au. Kae ka pefea eiloa i te masei a mea ka ‵tupu ki a au, manafai e se folafola ne au a te tala ‵lei!”​​—1 Kolinito 9:​16.

5. E ‵soko tasi pefea a te talitonu ki a Ieova mo te āva ki a ia?

⁵ Ne fai mai te faisalamo ko Tavita: “Te Aliki, a tino kolā e iloa ne latou a koe, e fakatuanaki ki a koe; e se tiakina foki ne koe so se tino telā e vau ki a koe.” (Salamo 9:​10) Kafai e iloa tonu ne tatou a Ieova kae ‵kilo atu mo te āva ki tena igoa mo tena uiga tāua, ka tali‵tonu eiloa tatou ki a ia e pelā eiloa mo ana tavini fakamaoni i aso mua. A te mauaga o te loto talitonu mo te fakatuanaki penei ki a Ieova ko te suā auala e tasi ke fakaasi atu te āva ki a ia. Ke mafaufau ki te auala e ‵soko fakatasi ei ne te Muna a te Atua a te talitonu ki a Ieova mo te āva ki a ia. I te taimi ne fakata‵mala ei a tino Isalaelu i aso mua o tali‵tonu ki a Ia, ne fesili atu Ieova ki a Mose: “Ka pefea a te leva ka se talia i ei a au ne tino konei? Ka pefea a te leva ka se talia i ei ne latou o tali‵tonu ki a au, e ui eiloa ko oti ne fai ne au ne vavega e uke i a latou?” (Numela 14:​11, Tusitapu Tauloto) E ‵kese mo te mea tenā, a te talitonu ki a Ieova ke puipui kae tausi ne ia tatou ke oko eiloa ki taimi o tofotofoga, se fakaasiga o te ‵tou āva ki a ia.

6. Se a te mea e fakamalosi aka ei tatou ke fakaasi atu te fakaaloalo tonu ki a Ieova?

⁶ Ne fai mai Iesu me i te āva ki a Ieova e ‵tau o māfua mai i te loto. I tena faipati atu ki tino kolā e tapuaki fakaloiloi atu fua, ne siki mai ne Iesu a pati a Ieova: “A tino konei e āva mai fua ki a au i olotou gutu ka ko olotou loto e ‵mao mai i a au.” (Mataio 15:8) A te fakaaloalo tonu ki a Ieova e māfua mai i te alofa tonu ki a ia. (1 Ioane 5:3) Kae e masaua faeloa foki ne tatou a te folafolaga a Ieova: “Ka fai faka‵lei ne au a tino kolā e āva mai ki a au.”​​—1 Samuelu 2:​30.

E Fakaasi Atu ne Ovasia te Āva ki Nisi Tino

7. (a) Kaia e ‵tau ei o fakaasi atu ne taina kolā e isi ne olotou tauliaga fakapito a te āva ki tino kolā e tausi ne latou? (e) Ne fakaasi atu pefea ne Paulo te āva ki taina tali‵tonu?

⁷ Ne fakamalosi atu te apositolo ko Paulo ki taina tali‵tonu: “Ke [“fakaasi atu muamua,” NW], te āva o te suā tino ki te suā tino.” (Loma 12:10) A taina kolā e isi ne olotou tauliaga fakapito i te fakapotopotoga e ‵tau o fai pelā me ne fakaakoakoga ‵lei i te​​—“fakaasi atu muamua”—o te āva ki tino kolā e tausi ne latou. I te feitu tenā, e ‵tau o tau‵tali atu a tino kolā e isi ne olotou tiute ‵mafa ki te fakaakoakoga a Paulo. (Faitau te 1 Tesalonia 2:​7, 8.) Ne iloa ne taina i fakapotopotoga kolā ne āsi atu Paulo ki ei, me e seki fai atu eiloa a ia ki a latou ke fai a mea kolā e se manako a ia o fai. Ne āva eiloa a Paulo ki ana taina tali‵tonu, kae ne āva foki latou ki a ia. I te fai atu o Paulo penei: “Tela la, au e fakamolemole atu ki a koutou, ke tau‵tali mai koutou i oku ala,” e mafai o mautinoa i a tatou me e tokouke a tino ne tau‵tali atu ki a ia ona ko tena fakaakoakoga ‵lei.​​—1 Kolinito 4:​16.

8. (a) Se a te auala tāua e tasi ne fakaasi atu ei ne Iesu te āva ki ana soko? (e) E mafai pefea o tau‵tali atu a ovasia i aso nei ki te fakaakoakoga a Iesu?

⁸ A te isi auala e fakaasi atu ei ne se taina te āva ki tino kolā e tausi atu a ia ki ei, ko te fakamatala atu ki a latou te pogai e manako ei a ia ke fai ne latou se mea io me ko pati fakatonutonu kolā e fai atu ne ia. I te faiga penā, ko fakaakoako atu eiloa a ia ki a Iesu. E pelā mo te taimi ne fai atu ei ki ana soko ke ‵talo ke maua a tino ‵kati saito e tokouke, ne fai atu ne Iesu te pogai ke fai penā. Ne fai atu a ia: “Ko oko eiloa i te lasi o te saito e fia ‵kati, ka ko tino ga‵lue i te saito e se tokouke! [“Tela la,” NW] fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.” (Mataio 9:​37, 38) I se auala penā, i te taimi ne fai atu ei ki ana soko “ke matapula‵pula,” ne fai atu foki ne ia te pogai. Ana muna: “Me se iloa ne koutou me tefea te aso e vau ei te otou Aliki.” (Mataio 24:42) E se gata fua i te fai atu faeloa ne Iesu a mea kolā e ‵tau o fai ne ana soko kae ne fai atu foki ne ia a pogai e ‵tau ei o fai a mea konā. I te faiga tenā, e fakaasi atu ne ia te āva mo te amanaia ki a latou. Se fakaakoakoga gali eiloa tenā mō ovasia Kelisiano!

Āva ki te Fakapotopotoga a Ieova mo Ana Fakatakitakiga

9. Ko oi e fakaasi atu ne tatou te āva ki ei māfai e āva foki tatou ki te fakapotopotoga Kelisiano mo ana sui? Fakamatala mai.

⁹ Ke āva ki a Ieova, e ‵tau foki o fakaasi atu te āva ki te fakapotopotoga Kelisiano i te lalolagi kātoa, fakatasi mo ana sui. Kafai e faka‵logo tatou ki fakatakitakiga mai te Tusi Tapu kolā e tuku mai ne te tavini fakamaoni, e fakaasi atu ei ne tatou te āva ki te fakatokaga a Ieova. I te fakapotopotoga Kelisiano i te senitenali muamua, ne lavea ne te apositolo ko Ioane te tāua ke fakaasi atu tena sē fiafia ki tino kolā e se āva ki a latou kolā ko oti ne filifili aka ke fai te takitakiga. (Faitau te 3 Ioane 9-​11.) E fakaasi mai i pati a Ioane me ne seki āva atu a nisi tino ki ovasia taki tokotasi e pelā foki ki olotou akoakoga mo fakatakitakiga. Se mea fakafiafia me ne seki fai penā te tokoukega o Kelisiano. I te taimi koi ola ei te kau apositolo, ne fakaasi atu ne te kautaina kātoa e pelā me se potukau a te fakaaloalo tonu ki a latou kolā e fai te takitakiga.​​—Filipi 2:​12.

10, 11. Fakamatala mai e ‵tusa mo te Tusi Tapu a te pogai e ‵lei ei ke isi ne tino e fai ne latou te takitakiga i loto i te fakapotopotoga Kelisiano.

¹⁰ E fakasakosako mai a nisi tino me ona ko pati konei ne fai atu ne Iesu ki ana soko “me i a koutou [katoa] ne taina,” ko tena uiga e se ‵tau o isi ne pule i te fakapotopotoga Kelisiano. (Mataio 23:8) Kae e fakaasi mai i Tusitusiga i te ‵gana Epelu mo te ‵gana Eleni a fakaakoakoga e uke o tino kolā ne tuku atu ne te Atua ki a latou se tulaga pule. E fakamaoni mai i tala o toeaina mua, famasino, mo tupu o te kau Epelu i aso mua me ne tuku atu ne Ieova a fakatonutonuga e auala i ana sui i te lalolagi. Kafai ne seki fakaasi atu ne tino a te āva tonu ki tino filifilia konei, e fakasala eiloa latou ne Ieova.​​—2 Tupu 1:​2-​17; 2:​19, 23, 24.

¹¹ I se auala tai ‵pau, e talia ne Kelisiano i te senitenali muamua a te takitakiga a te kau apositolo. (Galuega 2:​42) Ne tuku atu foki ne Paulo a fakatakitakiga ki ana taina. (1 Kolinito 16:1; 1 Tesalonia 4:2) E se gata i ei, ne fakalogo foki a ia mo te loto fiafia ki nisi tino kolā ne fai ne latou te takitakiga. (Galuega 15:22; Kalatia 2:​9, 10) E tonu, ne maua eiloa ne Paulo se kilokiloga ‵lei e uiga ki te faiga o pulepulega i loto i te fakapotopotoga Kelisiano.

12. Ne a akoakoga e lua e uiga ki te faiga o takitakiga e tauloto ne tatou mai i fakaakoakoga i te Tusi Tapu?

¹² E lua akoakoga tāua e maua ne tatou. Muamua la, e fakaasi mai i te Tusi Tapu me e ‵tau o filifili aka ne “te tavini fakamaoni kae poto” e auala i tena Potukau Pule a tāgata ke fai a tiute taulia, kae ne fili aka a nisi o latou ke fai te takitakiga ki luga i nisi tāgata filifilia. (Mataio 24:​45-​47; 1 Petelu 5:​1-3) Kae ko te lua, e ‵tau mo tatou katoa, e aofia i ei a tāgata filifilia, o āva ki tino kolā e fai ne latou te takitakiga. Ne a la nisi auala aogā, e mafai ei o fakaasi atu ne tatou te āva ki tino kolā e fai ne latou te takitakiga i loto i te fakapotopotoga Kelisiano i te lalolagi kātoa?

Fakaasi Atu te Āva ki Ovasia Faima‵laga

13. E fakaasi atu pefea ne tatou te āva ki sui o te fakapotopotoga Kelisiano i aso nei?

¹³ Ne fai mai Paulo: “Taina, a matou e fakamolemole atu ki a koutou, ke āva koutou ki te kau faigaluega a te ekalesia, ko latou konā ne filifilia ne te Aliki o takitaki kae fakatonu ki a koutou. Atafai ki ei i te agaga o te āva lasi mo te alofa, ona ko te galuega e fai ne latou. Ke ‵nofo filemu koutou.” (1 Tesalonia 5:​12, 13) E aofia eiloa a ovasia faima‵laga i “te kau faigaluega.” Tela la, ke fakaasi atu ne tatou ki a latou “te āva lasi.” A te auala e tasi ke fai ei penā ko te faka‵logo mo te loto kātoa ki olotou fakatakitakiga mo fakamalosiga. Kafai e tuku mai ne se ovasia penā a fakatonutonuga mai te tavini fakamaoni, ka fai eiloa tatou ne te “poto mai te lagi” ke “maliegofie” o faka‵logo.​​—Iakopo 3:17.

14. E fakamaoni mai pefea ne te fakapotopotoga a te lotou āva tonu ki ovasia faima‵laga, kae se a te mea ne iku mai i ei?

¹⁴ Kae e a māfai ko fakatonu mai ke fai a mea kolā e ‵kese mo te auala e masani o fai ne tatou? I nisi taimi, a te fakaasiatuga o te āva e manakogina i ei ke ‵teke atu ki te manakoga ke fai atu penei, “E se fai ne matou a mea penā i konei” io me, “Kāti e aogā te mea tenā i nisi koga, kae e se aogā i ‵tou fakapotopotoga.” I lō te fai penā, e taumafai tatou o tau‵tali ki ei. A te masaua faeloa ne tatou me i te fakapotopotoga i a Ieova kae ko Iesu ko te Ulu i ei ka fesoasoani mai ki a tatou ke fai eiloa penā. Kafai e talia mo te fiafia ne te fakapotopotoga a fakatakitakiga mai se ovasia faimalaga kae fakagalue aka ne latou, se fakamaoniga eiloa tenā o te āva tonu. Ne fakamālō atu te apositolo ko Paulo ki taina i Kolinito mō te lotou faka‵logo mo te āva ki fakatakitakiga ne tuku atu ne te toeaina asiasi, ko Tito. (2 Kolinito 7:​13-​16) E penā foki i aso nei, e mafai o mautinoa i a tatou me i te loto fiafia o fakagalue aka a fakatakitakiga mai ovasia faima‵laga e aogā malosi eiloa ki te fiafia telā e maua ne tatou i te faiga o te galuega talai.​​—Faitau te 2 Kolinito 13:11.

“Āva ki Tino Katoa”

15. Ne a nisi auala e fakaasi atu ei ne tatou te āva ki taina tali‵tonu?

¹⁵ Ne tusi mai Paulo: “Sa ‵teke ki se toeaina, kae fakatagi atu ki a ia e pelā eiloa a ia mo sou tamana. Fai faka‵lei ki tamatane e pelā eiloa mo ne ou taina, kae ki loma‵tua e pelā mo ne ou mātua, ka ko tamafine e pelā mo ne ou tuagane, i te loto ‵ma katoatoa. Āva ki fāfine kolā ko ‵mate tonu olotou avaga, kolā e seai ne tino e tausi ki a latou.” (1 Timoteo 5:​1-3) E tonu, e fakamalosi mai te Muna a te Atua ki a tatou ke āva ki tino katoa i loto i te fakapotopotoga Kelisiano. Kae pefea la māfai e sae aka se fakalavelave i te va o koe mo sou taina io me se tuagane talitonu? E mata, ka fai ei ke se fai ne koe tou tiute ke fakaasi atu te āva ki tou taina Kelisiano? Io me ka ‵fuli tau kilokiloga mai te kilo atu ki uiga ‵lei i te feitu faka-te-agaga o te tavini tenā a te Atua? Kae sili atu i ei, e ‵tau mo tino kolā e fai ne latou te takitakiga, o fakatumau se kilokiloga āva ki olotou taina​​—kae ke se “pule fakasauā . . . ki te lafu mamoe.” (1 Petelu 5:3) E tonu, e maua ne tatou i loto i te fakapotopotoga Kelisiano, telā e fakamailoga fua ki te alofa tonu telā e maua i ana tino, a avanoaga e uke ke fakatau fakaasi atu te āva.​​—Faitau te Ioane 13:​34, 35.

16, 17. (a) Kaia e tāua ei ke se fakaasi atu fua te āva ki tino kolā e talai ki ei kae penā foki ki tino ‵teke? (e) E fakaasi atu pefea ne tatou te “āva ki tino katoa”?

¹⁶ E tonu, e se fakaasi atu fua ne tatou te āva ki tino i te fakapotopotoga Kelisiano. Ne tusi atu Paulo ki Kelisiano i ana aso: “E ‵tau mo tatou o fai te mea ‵lei ki tino katoa.” (Kalatia 6:​10) E tonu, e se se mea faigofie ke fakagalue aka te fakatakitakiga tenā māfai e se alofa mai se tino telā e ga‵lue io me a‵koga tasi tatou. I vaegā taimi penā, e ‵tau o masaua ne tatou a pati konei: “Sa manava‵se ki faiga a tino amio ma‵sei.” (Salamo 37:1) A te fakagaluegāga o te fakatakitakiga tenei ka fesoasoani mai ki a tatou ke fakaasi atu te āva, ke oko foki eiloa ki tino ‵teke. I se auala penā, kafai e olo atu tatou i te galuega talai, a te mauaga o se kilokiloga loto maulalo e mafai eiloa o fesoasoani mai ke fai‵pati atu ki tino katoa “i te loto maulalo mo te āva.” (1 Petelu 3:​16) E mafai foki o fakaasi atu i ‵tou teuga mo ‵tou gatu me e āva tatou ki tino kolā e talai atu tatou ki ei.

¹⁷ E tonu, faitalia me e fesokotaki atu tatou ki ‵tou taina tali‵tonu io me ko tino mai tua o te fakapotopotoga, e ‵tau o kausaki malosi tatou ke fakagalue aka te fakamalosiga tenei: “Āva ki tino katoa, a‵lofa ki otou taina tali‵tonu, ma‵taku ki te Atua, kae āva ki te Tupu.”​​—1 Petelu 2:​17.

Ka Tali Mai Pefea ne Koe?

E mafai pefea o fakaasi atu ne koe te āva tonu ki:

• A Ieova?

• Toeaina i te fakapotopotoga mo ovasia faima‵laga?

• Tino taki tokotasi i te fakapotopotoga?

• Tino kolā e talai atu koe ki ei?

[Fakamatalaga o te Ata i te itulau e 26]

Ne āva a Kelisiano i te senitenali muamua ki te takitakiga a te potukau pule

[Fakamatalaga o te Ata i te itulau e 27]

E āva a toeaina i fenua katoa ki ovasia faima‵laga, kolā e filifili aka ne te Potukau Pule