Fakamatalaga mō Tino Kolā ka ‵Kau ki te Fono

TAINA FESOASOANI Ne fakatoka a taina fesoasoani ke fesoasoani atu ki a koe. Fakamolemole, ke ga‵lue fakatasi katoatoa mo latou mai te tau‵tali ki te lotou takitakiga e uiga ki te faka‵tuga o mea fakatele‵tele, te auala ke olo atu ei a tino, te tausiga o nofoga, mo nisi mea aka.

TE PAPATISOGA Ka tausi a nofoga tafa ki mua mō tino ka papatiso seiloga ke fakaasi atu me e se penā. Ka saga‵saga a tino ka papatiso i konā a koi tuai o kamata te lāuga mō te papatisoga i te taeao o te Aso Ono. E ‵tau o puke mai ne tino taki tokotasi se solo mo se gatu koukou mata ‵lei.

MEAALOFA Ne fakamāumāu eiloa a tupe e uke i te fakatokaga o nofoga, mea faka‵lasi leo, vitio, mo nisi mea aka ko te mea ke gali te fono kae fesoasoani mai foki ki a tatou ke momea aka te ‵tou fakapili‵pili atu ki a Ieova. E fesoasoani eiloa otou meaalofa ke ‵kava te ‵togi o mea konei kae ke ‵lago atu foki ki te galuega i te lalolagi kātoa. Ko oti eiloa ne fakamailoga a pokisi o meaalofa kae faka‵tu i koga katoa o te fale tenei ke pili atu ki a koutou. E mafai foki o fai sau meaalofa mai te āsi atu ki te donate.jw.org. E fakafetai eiloa matou mō meaalofa kolā ko oti ne tuku mai. E fia fakafetai atu foki a te Potukau Pule mō te otou ‵lago atu mo te kaimalie ki manakoga o te Malo.

FESOASOANI MUAMUA Masaua me i te fakatokaga tenei ne fai fua mō fakalavelave ‵tupu fakafuasei.

MEA ‵GALO MO MEA NE MAUA E ‵tau o avatu a mea katoa kolā e se i a koutou ki te Matagaluega telā e tausi ne ia a Mea ‵Galo mo Mea ne Maua. Kafai ne galo sau mea, ke fanatu ki te matagaluega tenei o onoono ki ei. Ko tama‵liki kolā ko ‵galo mai i olotou mātua e ‵tau o avatu ki te koga tenei. Kae e se ‵tau eiloa o fakaaoga a te koga tenei mo fai se koga tausi tamaliki. Fakamolemole, tausi faka‵lei otou tama‵liki, kae ke ‵nofo faeloa i ou tafa.

NOFOGA Fakamolemole ke mafau‵fau ki nisi tino. Masaua me e mafai fua o tausi ne koe a nofoga mō tino kolā e faima‵laga fakatasi koutou i te motoka, e ‵nofo tasi koutou i te fale, io me e suke‵suke fakatasi koutou ki te Tusi Tapu. Fakamolemole, sa tuku a mea i luga i nofoga kolā e se fakaaoga ne koe.

TE TAVINIGA FAKAVOLENITIA Kafai e fia fesoasoani atu koe ki galuega kolā e aofia i te fakatokaga mō te fono, fakamolemole, ke fanatu ki te Matagaluega o Fakamatalaga mo te Taviniga Fakavolenitia.

ONO FAKAPITO

Akoga mō Tino Talai o te Malo A paenia kolā ko nofo olotou tausaga i te va o te 23 mo te 65 kae fia fakalauefa atu te lotou taviniga, e ‵kami atu ke ‵mai ki te fono mō tino e fia ‵kau ki te Akoga mō Tino Talai o te Malo i te fakatutonu o te Aso Sa. Ka faka‵pula atu a te taimi mo te koga tonu ka fai ei te fono tenei.