Fakamatalaga mō Tino e ‵Kau Atu ki te Fono

TAINA FESOASOANI A taina fesoasoani ne ‵tofi aka ke fesoasoani ki a koutou. Fakamolemole ga‵lue fakatasi mo latou mai te tau‵tali ki fakatonuga e tuku atu ne latou e uiga ki te fakatuga o mea fakatele‵tele, te auala e olo atu ei a tino, tausiga o nofoaga, mo nisi mea aka.

PAPATISOGA Ka tausi a nofoga tafa ki mua mō tino ka papatiso seiloga ke fakaasi atu me e se penā. Ka saga‵saga a tino ka papatiso i konā a koi tuai o kamata te lāuga mō te papatisoga i te taeao o te Aso Ono. E ‵tau o puke mai ne tino taki tokotasi se solo mo se gatu koukou telā e mata ‵tau.

MEAALOFA Ne fakamāumāu eiloa a tupe e uke i te fakatokaga o nofoga, mea faka‵lasi leo, vitio, mo nisi mea aka ko te mea ke gali te fono kae fesoasoani mai foki ki a tatou ke momea aka te ‵tou fakapili‵pili atu ki a Ieova. E fesoasoani eiloa otou meaalofa ke ‵kava te ‵togi o mea konei kae ke ‵lago atu foki ki te galuega i te lalolagi kātoa. Ko oti eiloa ne fakamailoga a pokisi o meaalofa kae faka‵tu i koga katoa o te fale tenei ke pili atu ki a koutou. E mafai o tuku atu otou meaalofa e auala i te neti mai te fano ki te donate.jw.org. E fakafetai eiloa matou mō meaalofa kolā ko oti ne tuku mai. E fia fakafetai atu foki a te Potukau Pule mō te otou ‵lago atu mo te kaimalie ki manakoga o te Malo.

FESOASOANI MUAMUA Fakamolemole masaua i te fakatokaga tenei mō mea ‵tupu fakafuasei fua.

KOPE GALO MO KOPE MAUA A kope katoa e maua kae sē iloa me i a ai, e ‵tau o ave ki te matagaluega o Kope ‵Galo mo Kope Maua. Kafai e galo sau mea, fano ki te matagaluega tenei kae fai sau fakamatalaga e uiga ki au kope. Ko tama‵liki kolā ko ‵galo mai i olotou mātua, ke ave foki ki te matagaluega tenei. Kae ke mo a e fakauke ne tatou a galuega a tino kola e aofia i vaegā penei, fakamolemole onoono kae tausi faka‵lei otou tamaliki.

NOFOAGA Fakamolemole ke amanaia ki nisi tino. Masaua me mafai fua o taofi ne koe a nofoaga mō tino o te otou kāiga mo latou kola ne olo tasi atu mo koutou i otou mea fakatele‵tele, tino o te otou kaufale, io me ko tino kolā e suke‵suke mo koe ki te Tusi Tapu. Fakamolemole sa tuku ne mea ki luga i nofoaga kolā e se fakaaoga ne koutou.

TE TAVINIGA FAKAVOLENITIA Kafai e fia fesoasoani koe ki galuega kolā e aofia i te fakatokaga mō te fono, fakamolemole ke fakailoa atu ne koe ki te Matagaluega o Fakamatalaga mo te Taviniga Fakavolenitia