Fakamatalaga mō Tino e ‵Kau Atu ki te Fono

TAINA FESOASOANI A taina fesoasoani ne ‵tofi aka ke fesoasoani ki a koe. Fakamolemole ke ga‵lue fakatasi mo latou mai i te faka‵logo ki fakatonuga e tuku atu ne latou e uiga ki te fakatuga o mea fakatele‵tele, te auala e olo atu ei a tino, tausiga o nofoga, mo nisi mea aka.

PAPATISOGA Ka tausi a nofoga kolā e pili ki mua i te tulaga mō tino ka papatiso. E ‵tau mo tino ka papatiso o saga‵saga i konā a koi tuai o kamata te lāuga o te papatisoga i te taeao o te Aso Ono. E ‵tau o puke mai ne tino taki tokotasi se solo mo se gatu koukou telā e mata ‵tau.

MEAALOFA Ne fakamāumāu eiloa a tupe e uke i te fakatokaga o nofoga, mea faka‵lasi leo, vitio, mo nisi mea aka ko te mea ke gali te fono kae fesoasoani mai foki ki a tatou ke momea aka te ‵tou fakapili‵pili ki a Ieova. E fesoasoani eiloa otou meaalofa ke mafai o ‵togi a mea konei kae ke ‵lago atu foki ki te galuega i te lalolagi kātoa. E isi ne pokisi o meaalofa ko oti ne fakamailoga kae faka‵tu i koga katoa o te fale tenei ke mafai o pili ki a koutou. Kafai e mafai, tuku atu tau meaalofa e auala i te neti mai i te fano ki te donate.jw.org. E loto fakafetai eiloa matou ki meaalofa katoa konā. E fia fakafetai atu foki te Potukau Pule ki te otou kaima‵lie o ‵lago atu ki manakoga o te Malo.

FESOASOANI MUAMUA Fakamolemole masaua i te fakatokaga tenei mō mea ‵tupu fakafuasei fua.

KOPE GALO MO KOPE MAUA A kope katoa e maua kae sē iloa me i a ai, e ‵tau o ave ki te matagaluega o Kope ‵Galo mo Kope Maua. Kafai e galo sau mea, fano ki te matagaluega tenei kae fai sau fakamatalaga e uiga ki au kope. Tama‵liki kolā ko ‵galo mai i olotou mātua, ke ave foki ki te matagaluega tenei. Kae ke mo a e fakauke ne tatou a galuega a tino kolā e aofia i galuega penei, fakamolemole onoono kae tausi faka‵lei otou tama‵liki.

NOFOAGA Fakamolemole ke amanaia ki nisi tino. Masaua me mafai fua o taofi ne koe a nofoga mō tino o te otou kāiga mo latou kolā ne olo tasi atu mo koutou i otou mea fakatele‵tele, tino o te otou kaufale, io me ko tino kolā e suke‵suke mo koe ki te Tusi Tapu. Fakamolemole sa tuku se mea ki luga i nofoga kolā e se fakaaoga ne koutou.

TE TAVINIGA FAKAVOLENITIA Kafai e fia fesoasoani koe ki galuega kolā e aofia i te fakatokaga mō te fono, fakamolemole ke fakailoa atu ne koe ki te Matagaluega o Fakamatalaga mo te Taviniga Fakavolenitia.