TOE ĀSI ATU
MATAUPU 8
Kufaki
Fakatakitakiga: “Te alofa e kufaki.”—1 Koli. 13:4.
Mea ne Fai ne Iesu
1. Onoono ki te VITIO, io me faitau te Ioane 7:3-5 mo te 1 Kolinito 15:3, 4, 7. Kae mafaufau ki fesili konei mai lalo:
a. Ne ‵saga atu pefea a taina o Iesu i te taimi muamua ki tena talaiga?
e. Se a te mea ne lavea atu me ne seki ‵fiu a Iesu i tena taina ko Iakopo?
Se a te Mea e Tauloto ne Tatou Mai i a Iesu?
2. E ‵tau mo tatou o kufaki me e kese‵kese te leva o taimi e ‵saga mai ei a tino ki te tala ‵lei.
Fakaakoako ki a Iesu
3. Tofotofo auala kese‵kese. Kafai e se manako fakavave te tino ke fai se na akoga faka-te-Tusi Tapu, ke mo a ma faimalō atu. Kafai e ‵lei, ke fakaaoga vitio mo mataupu mai tusi kolā e mafai o fesoasoani atu ke malamalama a ia i mea e fai i se akoga faka-te-Tusi Tapu pela foki mo mea aoga e maua mai ei.
4. Ke mo a e fakapau‵pau ne koe a tino. E ‵kese a tino taki tokotasi. Kafai se tino i te kāiga io me se toe asiga e se fia tauloto ki te Tusi Tapu io me se fia fai tena akoga faka-te-Tusi Tapu, ke onoono ki te pogai e fai ei penā. E mata e isi se akoakoga i tena lotu telā e fakatāua malosi ne ia? E mata e fakafesagai atu a ia ki ‵tekemaiga mai i kaiga mo ana tuakoi? Fakaavanoa se taimi ke mafaufau a ia ki au pati ne fai ki ei kae ke lavea foki ne ia te aoga o muna mai i te Tusi Tapu.
5. Ke ‵talo e uiga mo te tino fiafia. Akai ki a Ieova ke fesoasoani atu ki a koe ke fakatumau se kilokiloga tonu kae ke apo foki koe. Talo ke maua ne koe te atamai ke iloa te taimi tonu ko ‵tau ei o fakagata te āsi atu ki te tino telā e se fakaasi mai ne ia te fiafia tonu.—1 Koli. 9:26.