Ko Oti ne Maua ne Koe “te Mafaufau o Keliso”?

“Ke tuku atu ki a koutou ne te Atua o te kufaki mo te fakamalosiga, a te olaga lototasi, e pela eiloa mo te loto o Keliso Iesu.”​—⁠LOMA 15:⁠5.

1. E pefea a foliga o Iesu kolā ne ‵lomi sāle i ata a Lotu Kelisiano ‵Se, kae kaia e se ‵lei ei a taumafaiga konā ke ‵lomi aka a foliga o Iesu?

“NE SEKI matea atu a ia ke mata katakata.” Tenā loa te fakamatalaga e uiga ki a Iesu i te tusi telā e fakaloiloi mai me ne tusi ne se ofisa mua i Loma. E fai mai a tino me ne ‵saga malosi atu a nisi tino ‵lomi ata e tokouke ki te tusi tenā, telā ne maua mai i te 11 o senitenali.a I te lasiga o ata o Iesu, e foliga mai a ia e pelā me se tagata mata fanoanoa telā e se ti kata mai. Kae e se ‵lei a taumafaiga konā ke ‵lomi aka a foliga o Iesu, me e fakaasi mai ne tusi Evagelia me e atafai kae alofa tonu a ia.

2. E mafai pefea ne tatou o fakamalosi aka “te olaga lototasi, e pela eiloa mo te loto o Keliso Iesu,” kae ne a mea ka toka tatou i ei o fai?

² E manino mai i ei, me kafai e fia iloa ne tatou a te Iesu tonu, e ‵tau o faka‵fonu ne tatou ‵tou mafaufau mo ‵tou loto ki te fakamatalaga tonu o uiga totino o Iesu a koi nofo mai a ia i te lalolagi nei. Tela la, ke na sau‵tala aka tatou ki nisi tusi Evagelia kolā e tuku mai ei se mainaga e uiga ki “te mafaufau o Keliso”​—⁠ko tena uiga ko ana lagonaga, tena malamalama, ana manatu, mo ana faka‵tauga. (1 Kolinito 2:16) Kafai e fai ne tatou te mea tenā, kāti ka mafau‵fau foki tatou me e mafai pefea ne tatou o fakamalosi aka “te olaga lototasi, e pela eiloa mo te loto o Keliso Iesu.” (Loma 15:⁠5) Tela la, kāti ka tai toka i ei ‵tou olaga mo ‵tou faifaiga ki nisi tino ke tau‵tali atu ki te ata telā ne tuku mai ne ia.​—⁠Ioane 13:⁠15.

E Faigofie ke Olo Atu ki a Ia

3, 4. (a) Ko te taimi fea ne tupu ei te tala telā e tusi ki lalo i te Maleko 10:​13-16? (e) Ne a mea ne fai ne Iesu i te taimi ne taumafai ei ana soko o taofi aka a tamā tama‵liki ke se olo atu ki a ia?

³ Ne tosina atu a loto o tino ki a Iesu. I taimi kese‵kese, ne olo atu fua a tino valevale mai telega kese‵kese ki a ia. Ke na mafaufau ki te tala i te Maleko 10:​13-16. Ne tupu te mea tenā i te fakaotiga o tena galuega, i te taimi ne fanatu eiloa a ia ki Ielusalema mō te ‵toe taimi, kae ne fakatoka ei a ia ki se mate fakalogo‵mae.​—⁠Maleko 10:​32-34.

⁴ Fakaataata i tou mafaufau te mea ne tupu. Ne kamata o aumai ne tino olotou tama‵liki, e aofia i ei ko olotou pepe, ki a Iesu ke fakamanuia ne ia latou.b Kae ne taumafai te kau soko o taofi aka a tama‵liki konā ke mo a ma olo atu ki a Iesu. Kāti ne ma‵natu aka a soko me e se fia saga atu a Iesu ki tama‵liki i vaiaso tāua konā. Kae ne ‵se latou. I te iloaga ne Iesu a mea ne fai ne ana soko, ne seki fiafia eiloa a ia. Ne kalaga atu a Iesu ki tama‵liki konā ke na olo atu ki a ia. Ana muna: “Tuku tama‵liki ke o‵mai ki a au! Sa taofigina latou.” (Maleko 10:14) I konā loa ne fai ne ia se mea telā e fakaasi mai i ei i a ia e atafai kae alofa tonu. E fai mai te tala: “Ne kopi ne ia a tama‵liki, kae puke atu ona lima ki a latou takitokotasi o fakamanuia atu latou.” (Maleko 10:16) Ne seki manava‵se eiloa a tama‵liki i te taimi ne kopi ei ne ia mo te alofa latou i ana lima.

5. Ne a mea e fakaasi mai i te Maleko 10:​13-16 e uiga ki uiga totino o Iesu?

⁵ E uke a mea e maua ne tatou mai te tala toetoe tenā e uiga ki uiga totino o Iesu. Onoono aka, me ne faigofie ke olo atu a tino ki a ia. E tiga eiloa ne nofo muamua a ia i se tulaga maluga ‵ki i te lagi, ne seki fakamanavase io me ne seki fakamavale atu a ia ki tino sē ‵lei katoatoa. (Ioane 17:⁠5) E tāua foki te manatu, me ne seki manava‵se a tama‵liki ma ‵nofo i ana tafa, i ne? A te tonuga loa, ka se fia olo atu latou ki se tino mata fanoanoa kae sē alofa telā e se ti kata sāle! Ne olo atu a vaegā tino kolā e kese‵kese olotou tausaga ki a Iesu me ne iloa ne latou i a ia se tagata alofa kae atafai, kae ne tali‵tonu eiloa me ka se ‵tuli keatea ne ia latou.

6. Ne a mea e mafai ne toeaina o fai ke momea aka te faigofie o olo atu a tino ki a latou?

⁶ Kafai e mafau‵fau malie aka tatou ki te tala tenā, kāti ke fesili ifo tatou penei, ‘E mata, ko maua ne au te mafaufau o Keliso?’ E faigofie ki tino ke o‵mai ki a au? I aso faiga‵ta konei, e ma‵nako a mamoe a te Atua ki tausi mamoe kolā e faigofie te olo atu ki ei, kolā e fai pelā “me ne koga e lafi ei a tino mai i se afā.” (Isaia 32:​1, 2; 2 Timoteo 3:⁠1) Toeaina, kafai e fakamalosi aka ne koutou a te alofa ‵nau ki otou taina kae e loto ma‵lie koutou ke ga‵lue malosi mō latou, ka iloa ei ne latou te otou a‵lofa. Ka matea atu ne latou te alofa tenā i otou mata, i otou leo, kae ka matea atu foki ne latou i otou faifaiga a‵lofa. A te vaegā alofa mo te atafai tenā ka fai ei ke tali‵tonu mai a tino ki a koe, kae ka faigofie ki a latou ke olo atu ki a koe. Ne fakamatala mai ne se fafine Kelisiano e tokotasi a te pogai ne mafai ei ne ia o fakaasi atu tena tala ki se toeaina e tokotasi: “Ne ata faipati mai a ia ki a au i te alofa. Moi se penā, penei kāti ko se faipati lele atu au. Ne fai ne ia ke tokagamalie toku loto.”

Te Āva ki Nisi Tino

7. (a) Ne fakaasi atu pefea ne Iesu me ne fakatāua ne ia a nisi tino? (e) Se a te pogai kāti ne gasolo malielie fua o faka‵pula aka ne Iesu a mata o te tino ‵kivi e tokotasi?

⁷ Ne fakatāua ne Iesu a nisi tino. Ne āva atu a ia ki olotou lagonaga. Ne otia tena loto i te kilo atu ki tino fakaa‵lofa, telā ne faka‵lei aka ei ne ia olotou logo‵maega. (Mataio 14:14) Ne fakatāua foki ne ia a tapulā mo manakoga o nisi tino. (Ioane 16:12) E tasi te taimi, ne aumai ne tino se tagata ‵kivi ki a ia kae ne akai atu ki a Iesu ke faka‵pula aka ana mata. Ne toe faka‵pula aka ne Iesu a mata o te tagata tenā, kae ne faifai malie fua ne ia tena faiga. Muamua la, ne seki manino ‵lei tena kilo atu ki tino​—⁠“e pela eiloa me ne lakau e sasale sale.” Oti aka, ne faka‵lei katoatoa aka ne Iesu ana mata. Kaia ne faifai malie ei ne Iesu a te faka‵leiga o mata o te tagata tenā? Kāti ne fai penā ko te mea ke fakamasani malie aka te tino telā ne nofo muamua i te matugā pouliga tagataga ke mo a ma poi malosi i tena kilo atu ki te mainaga mo te lalolagi telā e uke a mea i ei.​—⁠Maleko 8:​22-26.

8, 9. (a) Ne a mea ne ‵tupu i te taimi ne fatoā olo atu ei a Iesu mo ana soko ki te fenua ko Tekapoli? (e) Ke fakamatala mai te faka‵leiga ne Iesu o te tagata ‵tuli.

⁸ Ke mafaufau foki ki te mea telā ne tupu mai tua ifo o te Paseka i te 32 T.A. Ko te taimi ne ulu atu ei a Iesu mo ana soko ki te koga ko Tekapoli, i te feitu ki saegāla o te Namo o Kalilaia. I konā loa, ne olo atu a te vaitino e tokouke ki a latou kae ne aumai ne latou a tino ma‵saki mo tino pa‵kia e tokouke, kae ne faka‵lei aka ne ia latou katoa konā. (Mataio 15:​29, 30) Se manatu tāua, me ne saga atu a Iesu i se auala fakapitoa ki se tagata e tokotasi. Ko te tino tusi Evagelia fua e tokotasi, ko Maleko, telā ne lipoti mai ne ia te mea telā ne tupu.​—⁠Maleko 7:​31-35.

⁹ Ne ‵tuli a taliga o te tagata tenā kae ne gūgū foki. Kāti ne maina Iesu i te manavase mo te ma o te tagata tenā. Kae ne fai ne Iesu se mea fakaa‵tea. Ne ave keatea ne ia te tagata mai te vaitino, ki se koga e seai ne tino i ei. Kae ne fakaaogā ne Iesu a tāga ke fakailoa atu ki te tagata a te mea telā ka fai ne ia. Ne “tuku ei ona matikao ki loto i taliga o te tagata, savale atu ki ei kae puke ki te alelo.” (Maleko 7:33) E ‵soko atu ki ei, ne kilo atu Iesu ki te lagi kae ne manava fi‵ta i te faiga o se ‵talo. A faifaiga matea konā ne fai pelā me e fakamatala atu penei ki te tagata tenā, ‘A mea kolā ka fai ne au mō koe ne mea mai te ‵mana o te Atua.’ Ne fakaoti ne Iesu ana pati penei: “Ko ‵logo ou taliga!” (Maleko 7:34) Ne toe ‵logo a taliga o te tagata tenā kae ne mafai foki o faipati a ia e pelā mo te masani.

10, 11. E mafai pefea ne tatou o mafaufau ‵mafa ki lagonaga o nisi tino i te fakapotopotoga? i te kāiga?

¹⁰ Ko oko eiloa i te mafaufau ‵mafa o Iesu ki nisi tino! Ne āva a ia ki olotou lagonaga, kae ona ko te atafai tenā, ne fakaosofia ei a ia ke gasuesue i se auala telā e fakaāva atu ei ki olotou lagonaga konā. E pelā me ne Kelisiano, se mea ‵lei ke fakamalosi aka kae fakaasi atu foki ne tatou te mafaufau o Keliso i te feitu tenā. E fakamalosi mai te Tusi Tapu, penei: “E ‵tau o tasi katoa otou mafaufauga pela foki mo otou lagona; ke fakatau a‵lofa koutou e pela mo ne tautaina, ke fakatau atafai kae loto ma‵lalo foki koutou.” (1 Petelu 3:⁠8) Ke fai penā e ‵tau mo tatou o mafaufau ‵mafa ki lagonaga o nisi tino i te faiga o ‵tou pati mo ‵tou amioga.

¹¹ I te fakapotopotoga, e mafai o fakatāua ne tatou a lagonaga o nisi tino mai i te fakaāva atu ki a latou, ke pau ‵tou faifaiga ki a latou mo mea kolā e ma‵nako tatou ke fai ne latou ki a tatou. (Mataio 7:12) E aofia i ei te fakaeteete i ‵tou pati mo te auala e fai atu ei ‵tou pati. (Kolose 4:⁠6) Masaua la, “a muna kola e sona fai fua e mafai o fakapakia ne ia te tino e pela mo te pelu.” (Faataoto 12:18) Kae e a i loto i te kāiga? A te tauavaga telā e fealofani tonu, e fakatāua ne laua a lagonaga o te suā tino. (Efeso 5:33) E ‵kalo keatea laua mai pati ‵toko, te mataonoono faeloa, mo pati fakamavale kolā e fakalogo‵mae atu​—⁠ko mea katoa kolā e mafai o fakapa‵kia atu ki lagonaga o nisi tino kae e fui faka‵lei aka. E isi foki ne lagonaga o tama‵liki, kae e mafaufau ‵mafa foki a mātua a‵lofa ki lagonaga konā. Kafai e ‵tau o polopoloki se tamaliki, e avatu ne vaegā mātua penā a polopolokiga i se auala e se fakamavale atu ei ki olotou tama‵liki kae e se sōna fakamasiasi atu ki a latou.c (Kolose 3:21) Kafai e fakaasi atu penā ne tatou a te āva ki nisi tino, ko fakaasi atu ei ne tatou me ko maua ne tatou te mafaufau o Keliso.

Te Fia Talitonu Atu ki Nisi Tino

12. Se a te kilokiloga ‵lei kae tonu a Iesu e uiga ki ana soko?

¹² Ne ‵lei kae tonu te kilokiloga a Iesu ki ana soko. Ne iloa ‵lei ne ia me i a latou e se ne tino ‵lei katoatoa. Me ne iloa ne ia a mea i loto o tino. (Ioane 2:​24, 25) Kae ne seki mafaufau fua a ia ki olotou uiga vāivāi, kae ne masaua foki ne ia olotou uiga ‵lei. Ne maina a ia i mea kolā kāti e mafai o fai fakamuli ne tāgata kolā ne aumai ne Ieova. (Ioane 6:44) E matea atu te kilokiloga fiafia tenā a Iesu ki ana soko i ana faifaiga ki a latou. E tasi te mea, ne fia talitonu atu a ia ki a latou.

13. Ne fakaasi atu pefea ne Iesu me ne talitonu a ia ki ana soko?

¹³ Ne fakaasi atu pefea ne Iesu tena talitonu ki a latou? I te taimi ne tiakina ei ne ia te lalolagi, ne avatu ne ia a tiute ‵mafa ke fai ne ana soko fakaekegina. Ne avatu ne ia te tiute ke tausi ki mea katoa o tena Malo i te lalolagi kātoa. (Mataio 25:​14, 15; Luka 12:​42-44) I te faiga o tena galuega, ne fakaasi atu ei ne ia i nisi auala e se matea vave me ne talitonu a ia ki a latou. I te taimi ne fakauke fakavavega ei ne ia a meakai ke fagai te vaitino, ne avatu ne ia te tiute ki ana soko ke fakasoa atu ne latou a mea‵kai konā.​—⁠Mataio 14:​15-21; 15:​32-37.

14. Ka fakatoetoe mai pefea ne koe te tala i te Maleko 4:​35-41?

¹⁴ Ke na mafaufau malie aka foki ki te tala i te Maleko 4:​35-41. I te taimi tenā ne ‵sopo atu ei a Iesu mo ana soko ki te vaka kae ne fo‵lau atu ki te feitu ki saegāla i te Namo o Kalilaia. Ne fatoā kamata te lotou malaga, ne takato ki lalo Iesu i te taumuli, kae ne to tena moe i ei. Ne seki leva, “ne agi te afā kae ‵fati mo galu.” E agi sāle mai a afā i te Namo o Kalilaia. Me e tu te namo tenā i se koga malalo (i te 200 mita mai lalo i te maluga masani o te tai), e sili atu te ‵vela o te ea i konā i lō koga i tafa i ei, kae e maua mai i ei a matagi ‵lasi. E atea mo te mea tenā, e agi sāle mai a matagi ma‵losi i te Vanu o te Iolitana mai i te mauga ko Helemoni, telā e tu i te feitu ki mātū. Kāti i nisi taimi e seai se matagi, kae se mea vave o agi fakapoi mai se afā. Ke mafaufau malie aka ki te mea tenei: ne ‵tau o iloa ne Iesu me e agi sāle mai a afā i konā, me ne tupu aka a ia i Kalilaia. Kae e ui i ei, ne ‵to tena moe, me ne talitonu a ia ki te ata‵mai o ana soko, me i nisi tino i a latou ne tino faiika.​—⁠Mataio 4:​18, 19.

15. E mafai pefea ne tatou o fakaakoako atu ki te loto malie o Iesu ke talitonu ki ana soko?

¹⁵ E mata, e mafai ne tatou o fakaakoako atu ki te loto malie o Iesu ke talitonu ki ana soko? Kāti e faigata ki nisi tino ke tuku atu a tiute ke fai ne nisi tino. E fai pelā me e ma‵nako latou ke pule ki mea katoa. Kāti e ma‵natu aka latou penei, ‘E se mafai o ‵lei se mea, seiloga ke fai ne au.’ Kae kafai e ‵tau o fai ne tatou a mea katoa, kāti ka ‵pafu valevale tatou i ei kae ka fakata‵mala i ei tatou ki ‵tou kāiga. E se gata fua i konā, kafai e se avatu ne tatou a galuega ‵lei mo tiute ki nisi tino, kāti ka se maua ne latou te masani mo te atamai telā e ‵tau o maua ne latou. E ‵lei atu ke na fakamasani ki te talitonu atu ki nisi tino ko te mea ke tuku atu a nisi galuega ki a latou. Kāti e ‵lei ke fesili ifo faka‵lei tatou penei, ‘E mata, ko maua ne au te mafaufau o Keliso i te feitu tenei? E loto malie au o tuku atu a galuega ke fai ne nisi tino, kae talitonu au me ka taumafai latou mo te fakamaoni ki ei?’

Ne Talitonu a Ia ki Ana Soko

16, 17. I te ‵toe po o tena olaga i te lalolagi nei, se a te mea ne fakatalitonu atu ne Iesu ki ana apositolo, faitalia me ne iloa ne ia me ka tiakina ne latou a ia?

¹⁶ Ne fakaasi atu ne Iesu tena kilokiloga fiafia ki ana soko i se isi auala tāua. Ne fakailoa atu ne ia me e fakatuaga a ia ki a latou. E manino ‵lei te mea tenā i ana pati fakamafanafana kolā ne fai atu ne ia i te ‵toe po ne ola ei a ia e pelā me se tagata i te lalolagi nei. Onoono aka me ne a mea ne ‵tupu.

¹⁷ E uke a mea ne ‵tau o fai ne Iesu i te po tenā. Ne fai ne ia se fakaakoakoga mō ana apositolo e uiga ki te loto maulalo me ne ‵mulu ne ia olotou vae. E ‵soko atu ki ei, ne kamata ne ia te ‵kaiga telā ne fai fakamuli mo fai te fakamanatuga o tena mate. Kae ne toe kamata o fakakinau te kau apositolo me ko oi te tino e sili i a latou. Ne loto kufaki faeloa a Iesu, ne seki ‵liko atu a ia ki a latou, kae ne fesoasoani atu a ia ki a latou. I konā loa, ne taku atu ne ia a mea kolā ko pili o ‵tupu: “I te po eiloa tenei, a koutou katoa e ‵tele keatea kae tiaki au, me ne fai mai te Tusi, ‘E tamate ne te Atua te tausi mamoe, ko mafuta valevale ei te lafu mamoe.’ ” (Mataio 26:31; Sakalia 13:⁠7) Ne iloa ne ia me ka tiaki a ia ne ana taugasoa pele i te taimi ne ‵tau ei o maua ne ia se fesoasoani. Kae ne seki taku fakamasei ne ia latou. E ‵kese ‵ki tena faiga. Ana muna ki a latou: “Kafai ko toetu au, e mua atu au i a koutou ki Kalilaia.” (Mataio 26:32) E tonu, ne fakatalitonu atu a ia ki a latou, me faitalia me ka tiakina ne latou a ia, e se mafai o tiakina ne ia latou. Kafai ko oti te tofotofoga faigata tenā, ka toe fetaui latou.

18. I Kalilaia, se a te galuega tāua ne avatu ne Iesu ki ana soko, kae ne a mea ne fai ne ana apositolo?

¹⁸ Ne fakataunu ne Iesu tena muna. Fakamuli ifo, ko oti ne toetu aka Iesu kae ne fakasae aka a ia ki ana apositolo e toko 11, kolā ne maopoopo fakatasi mo nisi tino. (Mataio 28:​16, 17; 1 Kolinito 15:⁠6) I konā loa, ne avatu ne ia te galuega tāua tenei ki a latou: “Tela la, olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu. Akoako atu foki latou ke faka‵logo ki mea katoa kola ne fakatonu atu ne au ki a koutou.” (Mataio 28:​19, 20) E fakamaoni tonu mai i te tusi ko Galuega me ne fai eiloa ne te kau apositolo a te galuega tenā. Ne takitaki ne latou mo te fakamaoni a te talaiga o te tala ‵lei i te senitenali muamua.​—⁠Galuega 2:​41, 42; 4:33; 5:​27-32.

19. Ne a mea e iloa ne tatou e uiga ki te mafaufau o Keliso ona ko faifaiga a Iesu mai tua ifo o tena toetuga?

¹⁹ Ne a mea e fakaasi mai i te tala manino tenā e uiga ki te mafaufau o Keliso? Ne matea atu ne Iesu a toe uiga ma‵sei o ana apositolo, kae ne “alofa foki eiloa a ia ki a latou ke oko ki te fakaotiga.” (Ioane 13:⁠1) Faitalia olotou vāivāiga, ne fakailoa atu ne ia me e talitonu a ia ki a latou. Onoono la, me ne seki mavale Iesu i tena talitonu atu ki a latou. Kāti e se taumate ona ko tena talitonu mo tena fakatuaga ki a latou ne fakamalosigina ei latou ke fatuaki olotou loto ke fai te galuega telā ne fakatonu atu ne ia ke fai ne latou.

20, 21. E mafai pefea ne tatou o fakaasi atu se kilokiloga fiafia e uiga ki ‵tou taina tali‵tonu?

²⁰ E mafai pefea ne tatou o fakaasi atu te mafaufau o Keliso i te feitu tenā? Ke mo a ma manatu māmā tatou ki ‵tou taina tali‵tonu. Kafai e mataonoono koe ki a latou, kāti ka matea atu te mea tenā i au pati mo au faiga. (Luka 6:45) Kae e fai mai te Tusi Tapu me i te alofa “e talitonu ki mea katoa.” (1 Kolinito 13:⁠7) E fakamalosi atu te alofa, kae e se fakavāivāi atu. E ati aka ne te alofa a mea, kae e se fakamaofa a mea. E vave atu te gasue‵sue o tino māfai e alofa kae fakamalosi atu ki a latou i lō te fakamatakutaku atu. E mafai ne tatou o fakamalosi aka a nisi tino māfai e fakaasi atu me e tali‵tonu tatou ki a latou. (1 Tesalonia 5:11) Kafai e maua ne tatou se kilokiloga fiafia ki ‵tou taina, e pelā mo te kilokiloga a Keliso, ka fakama‵losi atu tatou ki a latou i ‵tou faifaiga kae ka fesoasoani atu i ei ke ‵lei olotou uiga.

²¹ A te fakaakoako atu ki te mafaufau o Keliso mo te fakaasi atu o te mea tenā e se ko te fakaakoako fua ki nāi faifaiga a Iesu. E pelā mo te mea telā ne fakamatala mai i te suā mataupu, kafai e ma‵nako tonu tatou ke amio pelā mo Iesu, e ‵tau o maua muamua ne tatou tena kilokiloga ki mea. E fesoasoani mai a tusi Evagelia ke maina tatou i te suā vaega o ana uiga, ko ana manatu mo lagonaga e uiga ki te galuega telā ne tofi aka a ia ke fai, e pelā mo te mea telā ka faipati ki ei te suā mataupu tenei e ‵soko mai.

[Fakamatalaga fakaopoopo]

E Mafai ne Koe o Fakamatala Mai?

• Ne a mea ne fai ne Iesu i te taimi ne taumafai ei ana soko o taofi aka a tama‵liki ke se olo atu ki a ia?

• I auala fea ne mafaufau ‵mafa ei a Iesu ki nisi tino?

• E mafai pefea ne tatou o fakaakoako atu ki te loto malie o Iesu ke talitonu ki ana soko?

• E mafai pefea ne tatou o fakaakoako atu ki te fakatuaga o Iesu ki ana apositolo?

[Ata i te itulau e 12]

Ne seki manava‵se a tama‵liki mā ‵nofo fakatasi mo Iesu

[Ata i te itulau e 13]

Ne atafai atu Iesu i ana faifaiga ki nisi tino

[Ata i te itulau e 14]

A toeaina kolā e faigofie ke olo atu ki ei e fai mo fai se fakamanuiaga