E Mafai o Maua ne Koe a Fakamanuiaga Mai i te Malo
NE APO eiloa te apositolo ko Paulo i te faipati atu ki nisi ‵gana kolā ne lauiloa i ana aso. Ne akoga foki a ia i se akoga telā e tai ‵pau mo akoga maluga i aso nei. Ne maua ne ia te fia o mea aogā mo saolotoga ona ko te mea i a ia se tino Loma. (Galuega 21:37-40; 22:3, 28) Ne mafai o maumea kae takutakua tou tagata ona ko mea konā. Kae ne fai mai a ia penei: “Me ne a mea aoga ne maua ne au i aso ko teka, nei ko lau ne au me ne mea se aoga katoa ona ko au ko talitonu ki a Keliso. . . ko taku ne au a mea katoa kona ne kaiga ko se atafaia te elo, ko te mea ke maua ne au a Keliso.” (Filipi 3:7, 8) Kaia ne fai ei penā a pati a Paulo?
Ne lauiloa muamua a Paulo e pelā me ko Saulo mai i Taso kae ne fakasauā atu a ia ki tino “kola e tautali i Ala Tonu.” Kae ne fatoā fai a ia mo fai se tino talitonu i te avatuga o se fakaasiga o Iesu ki a ia i te taimi ko oti ei ne toetu aka kae faka‵malugina Iesu. (Galuega 9:1-19) Ona ko te mea telā ne tupu ki a Paulo i te auala ki Tamaseko, ne fakamaoni katoatoa atu i ei ki a ia me i a Iesu ko te Mesia, io me ko te Keliso, telā ne folafola mai. Ko te tino telā ka pule fakamuli i te Malo telā ne folafola mai. Ne ‵fuli malosi foki i ei te olaga o Paulo, e pelā mo te mea telā e fakaasi mai i ana muna manino mai luga nei. Ko tena uiga, ona ko te loto fakamaoni o Paulo ne salamō eiloa a ia.—Kalatia 1:13-16.
E ‵fuli sāle te veape “salamō” i te Tusi Tapu mai i te pati Eleni telā e fakauiga eiloa ki te “fatoā iloa,” telā e ‵kese mai i “te iloa a koi tuai o tupu se mea.” Tela la, e aofia i te salamō a te ‵fuliga o manatu, mafaufauga, io me ko fuafuaga a te tino, mo te ‵teke atu foki ki amioga mua kolā e se ‵lei. (Galuega 3:19; Fakaasiga 2:5) E pelā mo Paulo, a te mea tāua telā ne tupu i te auala ki Tamaseko ne seki fai fua mo fai se mea fakaotia loto io me se mea faka-te-lotu. Ne ‵fagu aka i ei ana mafaufauga ke iloa ne ia me e se aogā tena olaga mua telā ne seki iloa ei ne ia Keliso. Ne iloa foki ne ia me e ‵tau o fakatonutonu aka tena olaga māfai e manako a ia ke maua ne mea aogā mai i te mea fou telā ne fatoā iloa ne ia e uiga ki a Keliso.—Loma 2:4; Efeso 4:24.
Te ‵Fuliga Telā ne Aumai ei a Fakamanuiaga
Ne maua muamua ne Paulo a te lasiga o mea kolā ne iloa ne ia e uiga ki te Atua mai i te lotu a te kau Falesaio, telā ne kau atu a ia ki ei. Ne aofia i olotou talitonuga a manatu o tino mo tuu mo aganuu. Ona ko ana talitonuga ‵se, ne sē aogā foki te toaga mo taumafaiga a Paulo. E tiga eiloa ne leake tou tagata me e tavini atu a ia ki te Atua, kae ne teke tonu atu a ia ki te Atua.—Filipi 3:5, 6.
Ko oti ne maua ne Paulo te iloaga tonu e uiga ki te Keliso, penā foki loa mo tena tulaga tonu i fuafuaga a te Atua, kae ne ‵tau eiloa o fai ne ia se filifiliga i ei: E mata, e ‵tau o tumau a ia e pelā me se Falesaio kae tumau i se tulaga tai mata ‵malu, io me e ‵tau o ‵fuli ne ia tena olaga kae kamata o fai ne ia so se mea e ‵tau o fai ke fiafia mai te Atua ki a ia? E manuia eiloa a Paulo me ne fai ne ia te filifiliga tonu, ana muna: “I a au e se ma i te tala ‵lei: i te mea ko te mana o te Atua e fakaola i ei a latou katoa kola e fakatuanaki, e muamua te Iutaia, kae tafa atu te Eleni.” (Loma 1:16) Ne fai a Paulo mo fai se tino talai telā ne folafola atu mo te loto finafinau a te tala ‵lei e uiga ki a Keliso mo te Malo.
I te fia o tausaga mai tua ifo i ei ne fai atu penei a Paulo ki ana taina Kelisiano: “Au e taofi pela me seki oko eiloa au ki ei; e tasi fua te mea e fai ne au, ko te fakapuli ne au a mea kola i oku tua, kae taumafai malosi eiloa au ke maua ne au a te mea tela e i oku mua. Tela la, au e tele tonu eiloa ki te tapula ke maua ne au a te fakailoga, tela ko te kalaga a te Atua e alatu i a Keliso Iesu ki te ola i te lagi.” (Filipi 3:13, 14) Ne aogā te tala ‵lei ki a Paulo me ne talia ne ia ke tiakina te mea telā ne se ‵lei ei te va o laua mo te Atua kae ne kausaki atu eiloa a ia mo te loto kātoa ki fakamoemoega kolā ne fetaui ‵lei mo te loto o te Atua.
Ne a Au Mea ka Fai?
Kāti ne fatoā logo koe i te tala ‵lei e uiga ki te Malo. E mata, e fiafai koe ki te fakamoemoega ke ola koe i te palataiso ‵lei katoatoa? Kāti e penā loa, me ko fa‵nau mai tatou katoa fakatasi mo te manakoga masani ke tumau i te ola kae ke maua foki te manuia mo te tokagamalie. E fai mai te Tusi Tapu me ko oti ne fāulu ne te Atua “te se-gata-mai” ki ‵tou loto. (Failauga 3:11, NW) Tela la, e se se mea fakaatea ke fakamoe‵moe tatou ki te taimi telā ka ola ei a tino ki te se-gata-mai i te manuia mo te fiafia. Kae tenā eiloa te mea e ofo mai ne te tala ‵lei e uiga ki te Malo.
Kae e ‵tau eiloa o sukesuke kae iloilo aka ne koe me se a te uiga o te tala ‵lei ko te mea ke maua tonu ne koe te fakamoemoega tenā. Ne fakatonu mai penei te apositolo ko Paulo: “Ke fakatalitonu ne koutou me se a te loto o te Atua, te mea ‵lei, te mea e logomalie mo te gali.” (Loma 12:2) Tela la, e pelā eiloa mo Paulo, kafai ko maua ne koe te iloaga mo te malamalama, e ‵tau foki o fai ne koe sau filifiliga.
Kae kāti ko isi ne ou talitonuga e uiga ki aso mai mua nei. Masaua la, me ko oti ne fai ne Saulo ana manatu e uiga ki te loto o te Atua a koi tuai o fai a ia mo fai te apositolo ko Paulo. Kae sa fakatali koe ke maua se fakaasiga fakavavega mai i te Atua, kae ke na onoono faka‵lei koe ki te mataupu tenei. Ke fesili ifo koe penei: ‘E mata, e iloa tonu ne au te loto o te Atua e uiga ki tino, penā foki loa mo te lalolagi nei? Ne a fakamaoniga e mafai ne au o avatu e uiga ki oku talitonuga? E mata, e mafai o fakamaoni aka oku talitonuga mai i te Muna a te Atua, ko te Tusi Tapu?’ E ‵lei eiloa ke fai koe penā, me e iku eiloa o aogā tau sukesuke ki ou talitonuga faka-te-lotu. A te ‵tonuga loa, e ‵tau o fia sukesuke koe ki ei, me e fakamalosi mai penei te Tusi Tapu: “E ‵tau o iloa ne koutou te kesekesega o te masei mo te ‵lei, kae puke mautakitaki ki te mea ‵lei.” (1 Tesalonia 5:21) Me i te ‵toe mea tāua ko te faiga ke fiafia mai te Atua, i ne?—Ioane 17:3; 1 Timoteo 2:3, 4.
Kāti ka folafola mai a takitaki lotu me ka maua ne tatou te manuia se-gata-mai i aso mai mua nei. Kae kafai e se fakavae te folafolaga tenā ki luga i akoakoga a te Tusi Tapu, ka se fesoasoani mai i ei ki a tatou ke maua a fakamanuiaga mai i te Malo o te Atua. I tena Lauga lauiloa i luga i te Mauga, ne fai mai penei a Iesu ke fakaeteete tatou: “E se ‵sao ki te Malo o te lagi a latou katoa kola e fai mai ki a au, ‘Te Aliki, te Aliki,’ na ko ia fua tela e fai ne ia te loto o toku Tamana tela i te lagi.”—Mataio 7:21.
Ke onoono la, me ne faka‵mafa mai ne Iesu te manatu me e ‵tau o fai ne tatou te loto o tena Tamana ko te mea ke maua ei ne tatou a fakamanuiaga mai i te Malo o te Atua. Ko tena uiga, faitalia me e foliga mai me e amioatua se tino, e se fakauiga faeloa i ei me ko talia a ia ne te Atua. A te tonuga loa, ne toe fai mai penei a Iesu: “Kafai e oko mai te Aso tena, e tokouke e fai mai ki a au penei, ‘Te Aliki, te Aliki! Ko tou igoa ne folafola atu ei ne matou a te Muna a te Atua. Ko tou igoa foki ne tuli ei ne matou a temoni, kae fai foki i ei ne matou a vavega!’ Tela, taku tonu atu ei ne au ki a latou, ‘E se iloa ne au koutou; olo keatea mai i a au, tino amio ma‵sei.’ ” (Mataio 7:22, 23) E manino i ei, me se mea tāua eiloa ke na fakamautinoa aka ne tatou me e iloa tonu ne tatou te uiga tonu o te Malo o te Atua kae ke amio foki tatou e tusa loa mo te mea tenā.—Mataio 7:24, 25.
E Avanoa Mai Faeloa te Fesoasoani
Ko sili atu nei i te 100 tausaga, ko talai atu ei ne Molimau a Ieova a te tala ‵lei o te Malo o te Atua. Mai i olotou tusi mo olotou pati, ko fesoasoani atu ei latou ki tino i te lalolagi kātoa ke maina ‵lei i te uiga o te Malo, fakamanuiaga kolā ka oko mai i ei, penā foki loa mo mea kolā e ‵tau o fai ne se tino ke maua ne ia a fakamanuiaga konā.
E fia fakamalosi atu matou ki a koe ke talia ne koe te fekau telā e talai atu ne Molimau a Ieova. Kafai e talia ne koe te tala ‵lei tenā kae e amio foki koe e tusa eiloa mo te mea tenā, e mafai ei ne koe o maua a fakamanuiaga ‵gali i aso nei, penā foki loa mo te taimi telā ka pule mai ei te Malo o te Atua ki te lalolagi kātoa.—1 Timoteo 4:8.
Ke na gasuesue nei koe, me ko pili mai nei a fakamanuiaga mai i te Malo o te Atua!
[Ata i te itulau e 7]
Mai i olotou tusi mo olotou pati, ko talai atu ei ne Molimau a Ieova te tala ‵lei o te Malo o te Atua