Ke na Faka‵logo me ko Pili Mai te Gataga

“Ifo mo te faka‵logo ki a [Sailo].”​—KENESE 49:⁠10.

E FAKAUIGA sāle te fakalogo ki a Ieova ki te fakalogo ki ana sui. E aofia i ana sui ko agelu, tino fakamaoni mua, fāmasino, faitaulaga, pelofeta, mo tupu. Ne taku te nofogaaliki o tupu o Isalaelu ki te nofogaaliki telā ne fai ne Ieova. (1 Nofoaiga Tupu 29:23) Se mea fakafanoanoa me ne seki faka‵logo a pule e tokouke o Isalaelu ki te Atua, telā ne oko atu ei a fakalavelave ki a latou mo tino ne pule atu latou ki ei. Kae ne seki tuku tiaki ne Ieova ana tino fakamaoni e aunoa mo se fakamoemoega; ne fakamafanafana ne ia latou ki se tautoga ke aumai ne ia se Tupu ‵lei, telā ka fia‵fia a tino amio‵tonu o faka‵logo ki a ia. (Isaia 9:​6, 7) Ne ‵valo mai ne Iakopo a te pule tenei i te taimi ko pili ei o mate a ia, penei: “Ka se ave keatea eiloa te tokotoko fakatupu mai i a Iuta io me ko te tulaga pule, seiloga ke oko mai a Sailo, kae faka‵logo a atufenua ki a ia.”​—⁠Kenese 49:​10, Tusi Paia Samoa.

² A “Sailo” se tugāpati Epelu telā e fakauiga ki te “Tino i a Ia a Mea.” E tonu, ka maua eiloa ne Sailo a te aiā kātoa ke pule mai, e pelā mo te mea e fakaata mai i te tokotoko fakatupu, kae ko tena tulaga pule e fakaata mai i ei tena ‵mana ke fakatonu atu. E se gata i ei, e se aofia fua a te fanauga a Iakopo i tena pulega fakatupu, kae ko ‘tino’ katoa. E fetaui ‵lei te mea tenei mo te tautoga a Ieova ki a Apelaamo, penei: “Ka manumalo faeloa tau fanau i ana fili. Ka fakamanuia ne atufenua a latou eiloa e auala i tau fanau.” (Kenese 22:​17, 18, Tusi Tapu Samoa) Ne fakamautinoa mai ne Ieova a te “fanau” tenei i te 29 T.A. i te taimi ne fakaeke ei ne ia a Iesu mai Nasaleta ki te agaga tapu.​—⁠Luka 3:​21-23, 24; Kalatia 3:⁠16.

Te Malo Muamua o Iesu

³ I te taimi ne fanaka ei a Iesu ki te lagi, ne seki kamata eiloa o pule mai a ia ki tino katoa i te lalolagi. (Salamo 110:⁠1) Kae ne maua ne ia se “malo” mo tino ne pule atu a ia ki ei kae ne faka‵logo ki a ia. Ne fakamatala mai ne te apositolo ko Paulo a te malo tenā i te taimi ne tusi mai ei a ia, penei: “Ko oti ne fakasaoloto ne ia [te Atua] tatou [Kelisiano fakaekegina] mai i te malo o te pouliga, kae ne fakamasiki atu ne ia tatou ki te malo o tena Tama Fagasele.” (Kolose 1:13) Ne kamata te fakasaolotoga tenei i te Penitekoso i te 33 T.A. i te taimi ne ‵ligi atu ei te agaga tapu ki luga i soko fakamaoni o Iesu.​—⁠Galuega 2:​1-4; 1 Petelu 2:⁠9.

⁴ E pelā me ne “sui o Keliso,” ne faka‵logo a soko fakaekegina konei o fakamaopoopo mai a nisi tino kolā ka fai mo fai a “tino ‵tonu” i te malo faka-te-agaga tenā. (2 Kolinito 5:20; Efeso 2:19; Galuega 1:⁠8) E se gata i ei, e ‵tau o tumau a tino konei i te ‘fusi fakatasi i te manatu e tasi mo te fakamoemoega e tasi’ ko te mea ke maua ne latou te taliaga a te lotou Tupu ko Iesu Keliso. (1 Kolinito 1:10) Ne fai latou mo fai te potukau telā e taku ko “te tavini fakamaoni kae poto.”​—⁠Mataio 24:45; Luka 12:⁠42.

Ne Fakamanuiagina mō te Lotou Faka‵logo ki te “Tavini”

⁵ Ne tuku mai faeloa ne Ieova a faiakoga mō ana tino. E pelā mo te ‵fokiatuga o te kau Iutaia mai Papelonia, ne seki faitau fua ne Esela mo nisi tāgata ata‵mai a te Tulafono a te Atua ki tino, kae ne “fakamalamalama” atu ne latou te tulafono tenā, “ke malama‵lama latou” i te Muna a te Atua.​—⁠Neemia 8:⁠8.

⁶ I aso o te kau apositolo, i te taimi ne sae aka ei te kinauga e uiga ki te pilitome i te 49 T.A., ne mafau‵fau faka‵lei a te potukau pule o te tavini mua tenā fakatasi mo te faiga o ‵talo ki te mataupu kae ne maua ei ne latou se fakaikuga telā e fakavae ki te Tusi Tapu. I te taimi ne faka‵pula atu ei ne latou te lotou fakaikuga i te tusi, ne faka‵logo a fakapotopotoga ki te takitakiga tenā kae ne maua ei ne latou a fakamanuiaga e uke a te Atua. (Galuega 15:​6-15, 22-29; 16:​4, 5) E penā foki i aso nei, ne fakamatala faka‵lei mai ne te tavini fakamaoni e auala i te Potukau Pule a mataupu tāua e pelā mo te sē ‵kau atu ki se feitu o Kelisiano, te ‵malu o te toto, mo te fakaaogāga o vailakau tapu mo te paka. (Isaia 2:4; Galuega 21:25; 2 Kolinito 7:⁠1) Ne fakamanuia ne Ieova ana tino mō te lotou faka‵logo ki tena Muna mo te tavini fakamaoni.

⁷ Mai te faka‵logo o latou ki te tavini fakamaoni, e fakaasi atu foki ne tino o te Atua te lotou faka‵logo ki te lotou Pule, ko Iesu Keliso. E momea aka foki te tāua o te vaegā fakalogo tenā i aso nei ona ko te fakalauefaatuga o te pulega a Iesu, e pelā mo te mea ne ‵valo mai ne Iakopo i te taimi ko pili ei a ia o mate.

Ko Fai a Sailo mo Fai te Pule ki te Lalolagi

⁸ Ne fakaasi mai i te valoaga a Iakopo me ka “fakalogo ki a ia” a malo. E fakaasi manino mai i ei, me ka pule atu foki a Keliso ki nisi tino i tafa o te Isalaelu faka-te-agaga. Ne a mea ka fai ne ia? E tali mai penei te Fakaasiga 11:15: “A te pule fakatupu i te lalolagi ko fai nei ma te tou Aliki mo tena Keliso, kae ka pule a ia ki te se gata mai, ki te se gata mai eiloa!” E fakaasi mai ne te Tusi Tapu me ne maua ne Iesu te pulega tenā i te fakaotiga o ‘taimi e fitu’ [se vaitaimi fakatusa]​—⁠‘taimi ne fuafuagina mō fenua fakaatea’​—⁠i te 1914.a (Tanielu 4:​16, 17; Luka 21:24) I te tausaga tenā, ne kamata i ei te ‘fakatasi mai’ sē matea o Keliso e pelā me ko te Tupu faka-Mesia, kae ko te taimi foki tenā ne ‘pule ei a ia i ana fili.’​—⁠Mataio 24:3; Salamo 110:⁠2.

⁹ A te mea muamua ne fai ne Iesu mai tua o te mauaga ne ia o tena pulega fakatupu ko te ‵peiifoga o te tino telā ne lauiloa i te sē fakalogo​—⁠ko Satani​—⁠fakatasi mo ana temoni “ki te lalolagi” nei. Talu mai te taimi tenā, ne faka‵tupu ei ne agaga ma‵sei konei a fakalavelave mō tino, kae fakamalosi aka foki ne latou se olaga telā e fakafaigata ei te fakalogo ki a Ieova. (Fakaasiga 12:​7-12; 2 Timoteo 3:​1-5) A te ‵tonuga loa, e taua tonu atu eiloa a Satani i te feitu faka-te-agaga ki tino fakaekegina a Ieova, “kola e faka‵logo ki fakatonuga a te Atua, kae fakamaoni foki ki te mea tonu e fakaasi mai ne Iesu,” mo olotou taugasoa ko ‘nisi mamoe.’​—⁠Fakasiga 12:17; Ioane 10:⁠16.

¹⁰ Kae ko takavale nei a Satani me ko oko atu ki te “Aso o te Aliki,” kae e seai eiloa se mea e mafai o taofi aka ei a Iesu mai ‘tena fanatu o manumalo i te taua.’ (Fakaasiga 1:10; 6:⁠2) Ka fai eiloa ne ia te ‵toe fakamailogaga o te toko 144,000 o te Isalaelu faka-te-agaga. Ka puipui foki ne ia a “te vaitino tokouke, ko se mafai eiloa o faitau a latou katoa ne se tino! Ne o‵mai katoa mai fenua katoa, matakaiga, tino valevale, ‵gana.” (Fakaasiga 7:​1-4, 9, 14-16) Kae e ‵kese mai i olotou taugasoa fakaekegina, ka fai latou mo fai ne tino kolā e faka‵logo ki a Iesu kae ‵nofo i te lalolagi nei. (Tanielu 7:​13, 14) A te ‵saemaiga o te potukau tenei i te lalolagi nei e tuku mai ei a te fakamaoniga me i a Sailo ko te Pule tonu eiloa o malo o “te lalolagi” nei.​—⁠Fakaasiga 11:⁠15.

Tenei Eiloa te Taimi ke “Faka‵logo ki te Tala ‵Lei”

¹¹ A tino katoa kolā e ma‵nako ke maua te ola se-gata-mai e ‵tau o na faka‵logo, me e fakaasi manino mai ne te Tusi Tapu i a “latou kola e se iloa ne latou a te Atua, mo latou foki kola e se faka‵logo ki te Tala ‵Lei e uiga ki te tou Aliki ko Iesu” ka se ‵sao atu i te aso o te taui ma sui a te Atua. (2 Tesalonia 1:⁠8) Kae e fakafaigata te ‵tou faka‵logo ki te tala ‵lei ne te olaga masei mo tena uiga ‵teke ki tulafono mo akoakoga fakavae i te Tusi Tapu.

¹² E fakamatala mai ne te Tusi Tapu a te uiga ‵teke tenei ki te Atua e pelā me ko “te agaga o te lalolagi.” (1 Kolinito 2:12) I tena fakamatalaga e uiga ki te malosi o te uiga tenei i tino, ne tusi atu a te apositolo ko Paulo ki Kelisiano mua i Efeso, penei: “I aso foki kona, koi tautali eiloa koutou i auala ma‵sei o te lalolagi; ne faka‵logo koutou ki te pule o te mana fakatiapolo i te lagi, ko te agaga tela e pule ne ia a tino kola e se faka‵logo ki te Atua. E tonu i a tatou katoa nei, ne pau eiloa mo latou, kae ne ola foki tatou i manako faka te foitino, kae fai foki a mea e fiafia ki ei o‵tou foitino mo o‵tou mafaufau. A tatou foki ne fanau o te fakasalaga a te Atua, e pela eiloa mo tino katoa.”​—⁠Efeso 2:​2, 3.

¹³ Se mea fakafiafia, me ne seki tumau a Kelisiano i Efeso i te fai pelā me ne pologa ki te agaga tenā o te sē fakalogo. I lō te fai penā, ne fai latou mo fai ne tama‵liki faka‵logo a te Atua mai te faka‵logo ki tena agaga kae e maua ne latou a fuataga ‵lei e uke mai i ei. (Kalatia 5:​22, 23) E penā foki i aso nei, a te agaga o te Atua​—⁠ko te ‵toe ‵mana malosi i te lagi mo te lalolagi​—⁠ko fesoasoani atu nei ki te fia miliona o tino ke faka‵logo ki a Ieova, telā e iku atu ki te mauaga ne latou o “mea kola e fakamoemoe [latou] ki ei.”​—⁠Epelu 6:11; Sakalia 4:⁠6.

¹⁴ Masaua foki me e maua ne tatou te fakamalosiga mai i a Sailo, fakatasi mo tena Tamana kolā ka se talia lele eiloa ne laua se fili​—⁠se temoni io me se tino⁠​—⁠ke tofotofo aka ei ‵tou faka‵logo ke silia atu i te mea telā e se mafai o kufaki ne tatou. (1 Kolinito 10:13) A te ‵tonuga loa, ke fesoasoani mai ki a tatou i te ‵tou taua faka-te-agaga, ne fakamatala mai ne Iesu a fakalavelave fakapito e uke kolā ka fe‵paki mo tatou i aso fakaoti konei. Ne fai penā e auala i tusi e fitu, kolā ne tuku atu ne ia i se fakaasiga ki te apositolo ko Ioane. (Fakaasiga 1:​10, 11) E mautinoa eiloa me e maua i ei a pati fakatonutonu tāua mō Kelisiano i aso konā, kae ko te lotou fakataunuga tonu e fakasino tonu ki te “Aso o te Aliki,” talu mai te 1914. Tela la, ko oko eiloa i te ‵lei ke ‵saga tonu atu tatou ki fekau konei!b

Ke ‵Kalo Keatea Mai te sē Alofa, te Finalalolagi, mo te Fia Maumea

¹⁵ Ne tusi atu te tusi muamua a Iesu ki te fakapotopotoga i Efeso. I te otiga ne fakamālō atu a ia ki te fakapotopotoga mō tena kufaki, ne fai atu a Iesu, penei: “Kae tenei eiloa te mea ko se malie ei au ki a koe: i a koe ko se alofa mai nei ki a au, e pela mo tou alofa i te kamataga.” (Fakaasiga 2:​1-4) I aso nei, e isi ne Kelisiano kolā ne loto finafinau muamua ko galo atu foki nei te lotou a‵lofa ki te Atua. E mafai ei o fakavāivāi te fesokotakiga o se tino mo te Atua kae e ‵tau o ‵saga fakavave atu ki ei. E mafai pefea o toe fakamalosi aka te vaegā alofa penā? Mai te faiga o sukesukega tumau ki te Tusi Tapu, kau atu faeloa ki fakatasiga, ‵talo, mo te mafau‵fau ‵loto ki mea aogā. (1 Ioane 5:⁠3) E tonu, e manakogina a taumafaiga mo te loto finafinau, kae e aogā ‵ki eiloa. (2 Petelu 1:​5-8) Kafai e fakaasi mai ne tau iloiloga mo te fakamaoni ki a koe eiloa me ko galo atu tou alofa, ke na faka‵tonu fakavave aka te tulaga tenā, i te fakalogo ki te fakamalosiga a Iesu, penei: “Ke masaua ne koe te ‵mao o tou pakū keatea! Salamo ki a au agasala, kae alofa mai ki a au e pela eiloa mo tou alofa i te kamataga.”​—⁠Fakaasiga 2:⁠5.

¹⁶ Ne fakamālō atu ki Kelisiano i Pelekamo mo Tuatila mō te lotou fakamaoni, kufaki, mo te loto finafinau. (Fakaasiga 2:​12, 13, 18, 19) Kae ne fakamalosigina latou ne tino kolā ne fakaasi atu a te uiga masei o Palaamo mo Iesepela, kolā ne fakama‵sei i ei a amioga a te kau Isalaelu mua ona ko te lā finalalolagi mo te tapuaki atu ki a Paala. (Numela 31:16; 1 Tupu 16:​30, 31; Fakaasiga 2:​14, 16, 20-23) Kae e a ‵tou taimi nei​—⁠“te Aso o te Aliki”? E mata, e lavea atu foki a fakamalosiga ma‵sei kolā e ‵pau? Ao, me i te finalalolagi ko te pogai masani e faka‵tea ei a tino o te Atua. Tela la, ko oko eiloa i te tāua ke ‵kalo keatea tatou mai taugasoa​—⁠i loto kae i tua foki o te fakapotopotoga​—⁠kolā e fai pelā me ne fakamalosiga sē ‵lei i mea tau amioga! (1 Kolinito 5:​9-11; 15:33) Ka ‵kalo keatea foki a tino kolā e fia fai mo fai ne tino faka‵logo mai lalo i te pulega a te Sailo mai fakafiafiaga sē ‵lei e pelā foki eiloa mo ata ma‵sei i tusi mo te Internet.​—⁠Amosa 5:15; Mataio 5:​28, 29.

¹⁷ Ne fakamālō atu ki nāi tino fua i te fakapotopotoga i Salataisa. Ne “ma‵natu” aka a nisi tino me i te tokoukega o latou ne foliga mai pelā me e ola, kae ona ko te lotou se ‵saga tonu atu ne mafaufau ei a Iesu me ko “mate” latou. Ne fai fua pelā me se tiute te lotou faka‵logo ki te tala ‵lei. Mā‵faga o fakamaseiga! (Fakaasiga 3:​1-3) Ne penā foki te tulaga o te fakapotopotoga i Laotikaia. Ne fakamata‵mata latou i te lotou maumea i te feitu faka-te-foitino, kae fai atu, penei: “Au e maumea kae maukoloa,” kae ne “mativa, e nofo fuafua kae ‵kivi” latou i te kilokiloga a Iesu.​—⁠Fakaasiga 3:​14-17.

¹⁸ I aso nei, ko oti ne ‵tō atu foki a Kelisiano kolā ne fakamaoni muamua ki te uiga foki ko te sē fakalogo. Kāti ne talia ne latou te agaga o te lalolagi ke fakavāivāi ei te lotou ‵saga tonu atu, telā ne kamata ei o mafanafana latou i te feitu faka-te-agaga ona ko te lotou kilokiloga ki te faiga o sukesukega totino ki te Tusi Tapu, ‵talo, fakatasiga Kelisiano, mo te galuega talai. (2 Petelu 3:​3, 4, 11, 12) Ko oko eiloa i te tāua ke faka‵logo a tino penā ki a Keliso mai te fakatupuga o olotou koloa faka-te-agaga​—⁠e tonu, ‘ke ‵togi ne latou ne aulo mai i a [Keliso], ko tinā aulo eiloa’! (Fakaasiga 3:18) E aofia i koloa ‵tonu penā, a te ‘mauko‵loa i galuega ‵lei, ke kaima‵lie ka ke fia‵fia foki o fetufaaki olotou mea mo nisi tino.’ Mai te fakatupuga o mea tāua faka-te-agaga konei, ‘ka fakatupu aka ei ne tatou a koloa kolā ka fai mo ‵tou fakavae mautakitaki mo aso fakamuli. Tela la, ka mafai o maua ne tatou te ola telā ko te ola tonu.’​—⁠1 Timoteo 6:​17-19.

Ne Fakamālō Atu mō te Lotou Faka‵logo

¹⁹ Ne ‵tu ‵kese a fakapotopotoga i Semulana mo Filatelafia e pelā me ne fakaakoakoga ‵lei o te faka‵logo, me ne seki polopoloki ne Iesu a latou i ana tusi. Ne fai atu a Iesu ki a latou kolā ne ‵nofo atu i Semulana, penei: “E iloa ne au ou puapuaga; e iloa foki ne au i a koe e mativa, ka ko te tonuga a koe e maumea!” (Fakaasiga 2:⁠9) Ko oko eiloa te ‵kese mo tino i Laotikaia kolā ne fakamata‵mata ki te lotou mau‵mea faka-te-foitino kae ne ma‵tiva tonu eiloa! E tonu, ne seki fiafia a te Tiapolo ke lavea atu so se tino telā e fakaasi atu te fakamaoni mo te fakalogo ki a Keliso. Tela la, ne fakailoa atu a Iesu, penei: “Sa mataku ki so se mea ka puapuagatia ei koe. Kiloke, a te Tiapolo ka tofotofo ne ia koutou i te pei o nisi o koutou ki te fale puipui; e tusa mo te sefulu o aso e puapuagatia ei koutou. Fakamaoni eiloa ke oko ki te mate, ko tuku atu ei ne au ki a koe a te foualiki o te ola.” (Fakaasiga 2:10) Ne fakamālō atu foki a Iesu ki tino i Filatelafia, penei: “Ko oti koe ne tautali i aku akoakoga [io me ne fakalogo ki a au] kae ne fakamaoni mai foki koe ki a au. Au e vave oko atu. Tausi faka‵lei a te mea tena e i a koe, ko te mea ke seai se tino e ‵fao malo ne ia tou foualiki.”​—⁠Fakaasiga 3:​8, 11.

²⁰ I te “Aso o te Aliki,” telā ne kamata i te 1914, ne tau‵tali atu ei ki pati a Iesu, se ‵toega fakamaoni mo olotou taugasoa ko nisi mamoe, kolā ko lau nei i miliona, mai te ‵kau atu mo te loto finafinau ki te galuega talai kae puke ‵mautakitaki ki te lotou fakamaoni. E pelā mo olotou taina i aso o te kau apositolo, ne logo‵mae a nisi tino ona ko te lotou faka‵logo ki a Keliso, ke oko foki eiloa ki te ‵peiga o latou ki falepuipui mo falepuipui fakama‵taku. Ne faka‵logo a nisi tino mai te tumau i te ‘fakafaigofie o olotou olaga’ faitalia me e ‵nofo atu latou i tafa o tino fia mau‵mea kae kaima‵nako. (Mataio 6:​22, 23) E tonu, i so se koga mo fakanofonofoga, e tumau eiloa a Kelisiano ‵tonu, e auala i te lotou faka‵logo o fakafiafia faeloa te loto o Ieova.​—⁠Faataoto 27:⁠11.

²¹ I te taimi ko fakapilipili atu ei tatou ki te fakalavelave lasi, e tumau eiloa “te tavini fakamaoni kae poto” i te taumafai ke mo a ma gutugutulua a ia i tena fakalogo ki tena Pule, ko Keliso. E aofia i te mea tenei a te fakatokaga o mea‵kai faka-te-agaga i te taimi tonu mō te kaukāiga o te Atua. Tela la, ke na tumau tatou i te amanaia ki te fakapotopotoga gali a Ieova mo mea kolā e tuku mai i ei. I te auala tenei, e fakaasi atu ei ne tatou te ‵tou faka‵logo ki a Sailo, telā ka tuku atu ne ia te taui o te ola se-gata-mai ki ana tino faka‵logo katoa.​—⁠Mataio 24:​45-47; 25:40; Ioane 5:​22-24.

[Fakamatalaga mai lalo]

E Masaua ne Koe?

• Se a te tulaga o Iesu telā ne ‵valo mai ne Iakopo i te taimi ko pili ei a ia o mate?

• E amanaia pefea tatou ki a Iesu i tena tulaga pelā me ko te Sailo, kae se a te agaga e ‵tau o ‵kalo keatea tatou mai i ei?

• Ne a pati fakatonutonu aogā mō ‵tou aso nei e maua i tusi ki fakapotopotoga e fitu i te Fakaasiga?

• Ne a auala e mafai ei o fakaakoako atu tatou ki tino i fakapotopotoga i Semulana mo Filatelafia mua?

[Fesili mo te Sukesukega]

1. (a) Ne a mea ne aofia sāle i te fakalogo ki a Ieova i aso mua? (e) Se a te valoaga e uiga ki te fakalogo ne fai mai ne Iakopo?

2. Se a te uiga o “Sailo,” kae ne a mea ka iku mai i tena pulega faka-tupu?

3. Se a te pulega ne maua ne Iesu i te taimi ne fanaka ei a ia ki te lagi?

4. Ne a auala ne fakaasi atu ei ne soko mua o Iesu te lotou faka‵logo, kae ne a pati a Iesu e uiga ki te potukau tenā?

5. Ne akoako atu pefea ne Ieova ana tino mai aso mua loa?

6, 7. Ne tuku mai pefea ne te tavini a mea‵kai faka-te-agaga i te taimi tonu e auala i tena Potukau Pule, kae kaia e ‵lei ei ke faka‵logo ki te tavini tenei?

8. Ne fakalauefa atu pefea te pulega a Keliso, kae ne fai anafea foki te mea tenā?

9. Ne a mea ne fai ne Iesu i te taimi ne maua ei ne ia te Malo, kae ona ko te mea tenā ne a mea ne ‵tupu ki tino, kae maise eiloa ko ana soko?

10. Ne a valoaga kolā ne fakataunu e fakamaoni mai i ei me ka takavale a Satani i tena taua atu ki Kelisiano ‵tonu?

11, 12. (a) Ko oi a tino kolā ka ‵sao atu i te gataga o te olaga masei tenei? (e) Ne a uiga kolā e lavea atu i tino kolā e maua ne latou “te agaga o te lalolagi”?

13. Ne ma‵goi pefea a Kelisiano i te ‵teke atu ki te agaga o te lalolagi, kae ne a ikuga aogā ne maua mai i ei?

14. Ne fakaasi mai pefea ne Iesu ki Kelisiano katoa kolā e ola i aso fakaoti konei a mea mautinoa kolā ka tofotofo aka ei te lotou faka‵logo?

15. Kaia e ‵tau ei o puipui tatou mai te fakalavelave telā ne pokotia ei a te fakapotopotoga i Efeso, kae e mafai pefea o fai tatou penā? (2 Petelu 1:​5-​8)

16. Ne a fakamalosiga fakama‵taku ne ‵sae aka i te fakapotopotoga i Pelekamo mo Tuatila, kae kaia e aogā ei ki a tatou i aso nei a pati a Iesu kolā ne fai atu ki a latou?

17. Ne ‵kese pefea te kilokiloga a tino i Salataisa mo Laotikaia mo te kilokiloga a Iesu ki te lotou tulaga faka-te-agaga?

18. E mai pefea o ‵kalo keatea se tino mai te mafanafana i te feitu faka-te-agaga i te kilokiloga a te Atua?

19. Ne a pati fakamālō mo fakamalosiga ne tuku atu ne Iesu ki Kelisiano i Semulana mo Filatelafia?

20. Ne tau‵tali atu pefea a te fia miliona o tino i aso nei ki pati a Iesu faitalia olotou fakanofonofoga?

21. (a) Se a te tiute faka-te-agaga telā ka fakataunu faeloa ne te potukau telā e fai pelā me se tavini? (e) E fakaasi atu pefea ne tatou me e ma‵nako ‵tonu eiloa tatou o faka‵logo ki a Sailo?

[Ata i te itulau e 28]

E fakamanuia ne Ieova ana tino mō te lotou faka‵logo ki te “tavini” fakamaoni

[Ata i te itulau e 29]

E fakafaigata ne fakamalosiga a Satani a te fakalogo ki te Atua

[Ata i te itulau e 31]

E fesoasoani mai a te fesokotakiga malosi mo Ieova ke faka‵logo tatou ki a ia