Fakamanuiaga o te Tala ‵Lei

“Ne filifili ne [Ieova] au, uga ei ne ia au o avatu te tala lei ki tino [loto maulalo, “NW”], o fakalei a loto o tino fanoanoa. . . . Ne uga mai ne ia au o fakamafanafana a latou katoa kola e tagi fanoanoa.”​—⁠ISAIA 61:​1, 2.

I TE kamataga o tena galuega i te Sapati e tasi, ne nofo atu a Iesu i te sunako i Nasaleta. E ‵tusa mo te tala, “ne tuku atu ki a ia te Tusi a te pelofeta ko Isaia; Ne ‵tala ne ia te Tusi, kae ne maua ne ia a te koga e tusi i ei a pati konei: ‘Ko i luga i a au te Agaga o te Aliki. Ne faū ne ia au o lauga atu te Tala ‵Lei.’ ” Ne toe faitau atu ne Iesu a mea e uke atu i te tusi a te pelofeta. Oti aka, ne sagasaga ifo a ia kae fai atu, penei: “Ko fakataunu i te aso nei a te vaega o te Tusi tenei, tela ko oti ne fakalogo‵logo koutou ki ei.”​​—⁠Luka 4:​16-21.

² I te auala tenei, ne fakaasi atu ne Iesu me i a ia ko te tino talai telā ne ‵valo mai, ko te tino telā e fakamafanafana atu. (Mataio 4:23) Kae ko tafaga la te tala ‵lei telā ne ‵tau o folafola atu ne Iesu! Ne fai atu a ia ki ana tino fakalogo‵logo, penei: “Ko au ko te mainaga o te lalolagi: ko te tino e tautali mai ki a au, e se sasale a ia i te pouliga, kae ka maua ne ia te mainaga o te ola.” (Ioane 8:12) Ne fai mai foki a ia, penei: “Kafai e faka‵logo koutou ki aku akoakoga, ko oku soko tonu koutou. Ka iloa ne koutou te munatonu, ko te munatonu foki ka fakasaoloto ne ia koutou.” (Ioane 8:​31, 32) E tonu, e maua i a Iesu “a muna o te ola se gata mai.” (Ioane 6:​68, 69) A te mainaga, te ola, te saolotoga​​—⁠e mautinoa eiloa me i mea konei ne fakamanuiaga kolā e ‵tau o fakatāua!

³ Mai tua o te Penitekoso i te 33 T.A., ne tumau eiloa a soko i te faiga o te galuega talai a Iesu. Ne talai atu ne latou “te Tala ‵Lei tenei e uiga ki te Malo” ki tino Isalaelu mo tino o fenua fakaatea. (Mataio 24:14; Galuega 15:7; Loma 1:16) A tino kolā ne fia‵fia kae ne kamata o iloa ne latou a Ieova te Atua. Ne fakasaoloto latou mai te ‵nofo pologa ki tuu fakalotu kae ne fai mo fai se vaega o te atufenua fou faka-te-agaga, “ko te Isalaelu a te Atua,” telā e maua ne sui i ei a te fakamoemoega ke pule fakatasi mo te lotou Aliki, ko Iesu Keliso, i te lagi ki te se-gata-mai. (Kalatia 5:1; 6:16; Efeso 3:​5-7; Kolose 1:​4, 5; Fakaasiga 22:⁠5) A te ‵tonuga loa, e fai a mea konā mo fai ne fakamanuiaga tāua ‵ki!

Tino Talai i Aso Nei

⁴ I aso nei, e tumau a Kelisiano fakaekegina fakatasi mo te fesoasoani o te “vaitino tokouke” o ‘nisi mamoe,’ i te fakataunuga o te fakatonuga fakapelofeta telā ne tuku atu muamua ki a Iesu. (Fakaasiga 7:9; Ioane 10:16) Ko fai nei te galuega talai e uiga ki te tala ‵lei i se auala lasi ‵ki i lō aso mua. I atufenua mo koga talai e 235, ko oti ne olo atu ki ei a Molimau a Ieova “o avatu te tala lei ki tino [loto maulalo], o fakalei a loto o tino fanoanoa, o folafola atu te fakasaolotoga ki pagota mo te saoloto ki tino i loto i falepuipui . . . , o folafola atu me ko oko mai te taimi tela ka fakasao ei ne te Aliki a tena fenua kae fakatakavale olotou fili. . . . , o fakamafanafana a latou katoa kola e tagi fanoanoa.” (Isaia 61:​1, 2) Tela la, e tumau eiloa te galuega talai faka-Kelisiano i te aumaiga o fakamanuiaga ki tino e tokouke mo fakamafanafanaga ‵tonu ki a “latou kola e maua ne so se puapuaga.”​​—⁠2 Kolinito 1:​3, 4.

⁵ Se mea tonu me e fakaaogā ne lotu i Lotu Kelisiano ‵Se a auala kese‵kese ke talai atu. E uga atu ne lotu e uke a misionale ke ‵fuli ne latou a tino i nisi fenua. E pelā mo te Orthodox Christian Mission Center Magazine, ne lipoti mai i ei a te galuega a misionale o te lotu Orthodox i Madagascar, Afelika ki Saute, Tanzania, mo Zimbabwe. Kae i te Lotu Orthodox, e pelā foki mo nisi lotu i Lotu Kelisiano ‵Se, a te tokoukega o te kau lotu e se ‵kau atu ki te vaegā galuega tenā. E ‵kese mai i ei, e taumafai a Molimau tukugina atu katoa a Ieova ke ‵kau atu ki te galuega talai. E iloa ne latou me i te folafolaatuga o te tala ‵lei se fakamaoniga o te ‵tonu o te lotou fakatuanaki. Ne fai mai a Paulo, penei: “Me e talitonu a te tino i tona loto, tela la, ko takuamiotonugina a ia, kae kafai e molimau foki ona laugutu, e fakaolagina a ia.” A te fakatuanaki telā e se fakaosofia ne ia se tino ke fai se galuega, e mate fua.​​—⁠Loma 10:10; Iakopo 2:⁠17.

Te Tala ‵Lei Telā e Aumai i ei a Fakamanuiaga Se-Gata-Mai

⁶ E talai atu ne Molimau a Ieova te ‵toe tala ‵lei eiloa. E ‵suke latou ki olotou Tusi Tapu kae fakaasi atu ki tino loto ‵lei me ne ofo mai ne Iesu tena ola ke tuku mai i ei ki tino se auala ke fakapili‵pili atu ki te Atua, ke fakamagalo olotou agasala, mo te fakamoemoega o te ola se-gata-mai. (Ioane 3:16; 2 Kolinito 5:​18, 19) E folafola atu ne latou me i te Malo o te Atua ko oti ne fakatu i te lagi mai lalo i te Tupu fakaekegina, ko Iesu Keliso, kae ko pili o ave keatea ne ia a mea ma‵sei mai te lalolagi kae takitaki foki te ‵toe fakafokimaiga o te Palataiso. (Fakaasiga 11:15; 21:​3, 4) I te fakataunuga o te valoaga a Isaia, e fakailoa atu ne latou ki olotou tuakoi me tenei eiloa “te tausaga o te loto ‵lei o Ieova” i te taimi koi mafai eiloa o ‵saga mai a tino ki te tala ‵lei. E fakailoa atu foki ne latou me ko pili mai ‘te aso o te taui ma sui a te Atua’ māfai ko fakaoko mai ne Ieova te gataga ki tino fai mea ‵se kae sē sala‵mō.​​—⁠Salamo 37:​9-11.

⁷ I se lalolagi telā e ‵fonu i fakalavelave mo mea ‵tupu fakafuasei, tenei fua te tala ‵lei e maua i ei a mea aogā kolā e tumau ki te se-gata-mai. A tino kolā e talia ne latou te tala ‵lei tenā e fai mo fai se vaega o te kautaina o Kelisiano kolā e ‵kau fakatasi i te lalolagi kātoa kae e se talia ne latou a te loto fenua, te fakakese‵kesega o itukāiga io me ko tulaga i mea tau tupe ke fakamavae‵vae ei latou. Ko oti ne ‘taofi ‵mau latou ki te alofa, telā e fusi fakatasi ei ne ia a mea katoa ke ‵lei.’ (Kolose 3:14; Ioane 15:12) Ne lavea atu te mea tenei i se fenua e tasi o Afelika i te tausaga ko teka. I te taeao e tasi, ne ‵fagu aka a tino i te laumua ne te pa‵pa mai o fana. Ne kamata i ei se ‵tekeatuga ki te malo. I te taimi ne ‵saga atu latou ki te tamatega o tino mai i se matakāiga e tasi, ne taku fakamaseigina se kāiga Molimau mō te faka‵muniga o se taina Molimau mai i te suā matakāiga. Ne tali atu te kāiga, penei: “E talia fua ne matou a Molimau a Ieova ke ‵nofo i te motou fale.” E se tāua ki a latou a te matakāiga o te tino; kae ko te alofa faka-Kelisiano​​—⁠ko te avatuga o fakamafanafanaga ki tino kolā e ma‵nako ki ei ko te ‵toe mea tāua ki a latou. Ne fai mai se kāiga sē Molimau, penei: “Ne faka‵lata ne tino o lotu katoa olotou taina tapuaki. Ko Molimau a Ieova fua e se fai penā.” E uke a vaegā mea tai ‵pau penā ne lipoti mai i fenua ne ‵tupu i ei a taua e fakaasi mai me i Molimau a Ieova e maua ‵tonu ne latou te ‘a‵lofa ki olotou taina talitonu.’​​—⁠1 Petelu 2:⁠17.

E ‵Fuli ne te Tala ‵Lei a Uiga o Tino

⁸ E maua i te tala ‵lei a te mea telā ne taku ne Paulo ki “te ola i aso nei mo te ola ka oko mai.” (1 Timoteo 4:⁠8) E se tuku mai fua i ei se fakamoemoega gali kae mautinoa mō aso mai mua kae e tuku mai i ei a faka‵leiga ki “te ola i aso nei.” E pelā me ne tino takitokotasi, e takitaki a Molimau a Ieova ne te Muna a te Atua, ko te Tusi Tapu, ke fakafetaui aka olotou olaga ki te loto o te Atua. (Salamo 119:101) E faka‵fou eiloa olotou uiga ko te mea ke ati aka ne latou a vaegā uiga pelā mo te amiotonu mo te alofa fakamaoni.​​—⁠Efeso 4:⁠24.

⁹ Mafaufau ki te fakaakoakoga a Franco. E faigata ki a ia ke taofi aka tena kaitaua. I so se taimi e se fiafia a ia, e kaitaua vave a ia kae ofa ne ia a mea. Ne sukesuke tena avaga ki te Tusi Tapu mo Molimau a Ieova, kae ne fesoasoani atu olotou fakaakoakoga faka-Kelisiano ki a Franco ke iloa ne ia me e ‵tau mo ia o ‵fuli ona uiga. Ne suke‵suke fakatasi a ia mo latou ki te Tusi Tapu kae ne mafai fakamuli ne ia o fakaasi atu a fuataga o te agaga tapu ko te filemu mo te loto pulea. (Kalatia 5:​22, 23) A ia se tokotasi o tino e toko 492 kolā ne papatiso i Belgium i te tausaga faka-te-taviniga ko te 2001. Mafaufau foki ki a Alejandro. Ne umiti malosi te tamataene tenā ki vailakau tapu telā ne oko eiloa a ia ki te tulaga telā ko nofo fua i se koga ‵pei ‵kaiga, ke ‵sala atu ki so se mea e mafai o maua ne ia ke ‵togi atu ko te mea ke maua ana tupe i ei ke ‵togi ana vailakau tapu. I te taimi ko 22 ei ana tausaga, ne ‵kami ne Molimau a Ieova a Alejandro ke sukesuke ki te Tusi Tapu, kae ne talia ne ia. Ne faitau a ia ki te Tusi Tapu i aso katoa kae ne kau atu faeloa a ia ki fakatasiga faka-Kelisiano. Ne seki palele atu te ono masina kae ne faka‵mā fakavave ne ia tena olaga. Tela la, ne mafai ei ne ia o kau atu ki te galuega talai​—⁠se tokotasi o te toko 10,115 kolā ne fai penā i te tausaga ko teka i Panama.

Te Tala ‵Lei​​—⁠Se Fakamanuiaga ki Tino Loto Mau‵lalo

¹⁰ Ne ‵valo mai ne Isaia me ka talai atu te tala ‵lei ki tino loto mau‵lalo. Ko oi a tino loto mau‵lalo konei? Ko latou kolā e fakamatala mai i te tusi o Galuega e pelā me “ko oti ne filifilia mō te ola se gata mai.” (Galuega 13:48) A latou ne tino loto mau‵lalo kolā e mafai o maua atu i koga katoa kae e talia ne latou i olotou loto a te fekau o te munatonu. E iloa ne vaegā tino penā me i te faiga o te loto o te Atua e maua i ei a fakamanuiaga kolā e sili fakafia atu i so se mea telā e ofo mai ne te lalolagi. (1 Ioane 2:​15-17) E fakaoko atu la pefea ne Molimau a Ieova te tala ‵lei ki loto o tino i te lotou galuega talai?

¹¹ Ia, mafaufau aka ki te fakaakoakoga a te apositolo ko Paulo, telā ne tusi atu ki te kau Kolinito, penei: “I taku fanatuga ki a koutou e oku taina, au seki fanatu o folafola atu ki a koutou mea ‵funa mo te tonu a te Atua i te uke o muna i poto faka te lalolagi. I te mea ne manatu au ke fakapuli mea katoa i te taimi koi ‵nofo tatou, vagana fua ko Iesu Keliso, mo tona mate i luga i te sataulo.” (1 Kolinito 2:​1, 2) Ne seki taumafai a Paulo o fai ke ofo ana tino fakalogo‵logo i tena poto. E seai aka foki se mea ne akoako atu ne ia kae na ko fakamatalaga ‵tonu eiloa mai te Atua, ko mea ‵tonu kolā e fakamau i te Tusi Tapu i aso nei. Mafaufau foki ki te fakamalosiga a Paulo ki tena taina talai ko Timoteo, penei: “Ke folafola atu ne koe te muna, o ‵fuli mai a loto, kae ke mau eiloa koe i te folafola atu.” (2 Timoteo 4:⁠2) Ne ‵tau o talai atu ne Timoteo “te muna,” ko te fekau a te Atua. Ne tusi atu foki a Paulo ki a Timoteo, penei: “Taumafai malosi o tuku atu koe ki te Aliki e pela mo se tino ko fakamaonia me ko ‵tau, se tino galue tela e se ‵tau mo ia o taema ki se mea, kae se tino e akoako tonu eiloa ne ia a te munatonu a te Atua.”​​—⁠2 Timoteo 2:⁠15.

¹² E faka‵logo a Molimau a Ieova ki te fakaakoakoga a Paulo, e pelā foki mo ana pati ki a Timoteo. E iloa ne latou te ‵mana o te Muna a te Atua kae e fakaaogā faka‵lei ne latou tena Muna i te taimi e taumafai ei latou o fakaasi atu ki olotou tuakoi a pati ‵lei e uiga ki te fakamoemoega mo fakamafanafanaga. (Salamo 119:52; 2 Timoteo 3:​16, 17; Epelu 4:​12) E tonu, e fakaaogā faka‵lei eiloa ne latou a tusi faka-te-Tusi Tapu ko te mea ke mafai o fakaopoopo atu ki te iloaga faka-te-Tusi Tapu o tino fiafia i taimi e sao‵sao ei latou. Kae e taumafai faeloa latou ke fakaasi atu ki tino a pati mai te Tusi Tapu. E iloa ne latou me ka fakaosofia a loto o tino loto mau‵lalo ne te Muna fakaosofia a te Atua. Kae ko te fakaaogāga o te Muna tenā i te auala tenei e fakamalosi aka foki ei te lotou fakatuanaki.

Ke “Fakamafanafana a Latou Katoa Kola e Tagi Fanoanoa”

¹³ E uke a fakalavelave ne ‵tupu i te tausaga ko te 2001, kae ne iku atu i ei ki te ma‵nako o tino e tokouke ki fakamafanafanaga. I te masina o Setema, ne lavea atu ei se fakaakoakoga tu ‵kese i te Iunaite Sitete, i te taimi ne oso atu ei te kau takafia‵toa ki te World Trade Center i Niu Ioki mo te Pentagon telā e tu pili ki Washington, D.C. Ko tafaga la te fakapoi o osoatuga konā ki te fenua kātoa! I te fakafesagai atu ki vaegā fakalavelave penā, e taumafai a Molimau a Ieova ke fakataunu te lotou galuega ke tuku atu a ‘fakamafanafanaga ki tino katoa kolā e ‵tagi fanoa‵noa.’ Ka fakaasi mai ne nāi tala konei a te auala e fai ei ne latou te mea tenei.

¹⁴ Ne fanatu se Molimau, telā se tino talai tumau, ki se fafine i te auala kae ne fesili atu ei ki a ia me se a tena faka‵tau ki te osoatuga fakamuli nei o te kau takafia‵toa. Ne kamata o tagi tou fafine. Ne fanoanoa malosi a ia kae ne fia fesoasoani atu a ia i se auala aogā. Ne fai atu te Molimau me e fiafia malosi mai a te Atua ki a tatou katoa, kae ne faitau atu ne ia te Isaia 61:​1, 2. Ne ‵tonu eiloa a pati fakaosofia konei mai te Atua ki te fafine, me ne iloa ne ia me i tino katoa ko ‵tagi fanoanoa. Ne talia ne ia se tamā pepa kae fakamolemole atu ki te Molimau ke fanatu o āsi atu ki a ia i tena fale.

¹⁵ Ne fetaui se avā Molimau kolā ne ‵kau atu ki te galuega talai mo se tagata e galue i tena fale. Ne ofo atu laua ke fakaasi atu a pati fakamafanafana mai te Tusi Tapu e uiga ki te fakalavelave ne tupu fakamuli nei i te World Trade Center. I te taliaga ne ia, ne faitau atu ne laua a te 2 Kolinito 1:​3-7, telā e aofia i ei a pati konei: “Fakamafanafanaga e maua . . . mai i a [Keliso].” Ne fiafia a te tagata me ne fakaasi atu ne ana tuakoi Molimau a pati fakamafanafana loto ki nisi tino kae ne fai mai a ia, penei: “Ke na fakamanuia atu te Atua ki te galuega gali e fai ne koutou.”

¹⁶ E isi se Molimau ne toe āsi atu ki tino fia‵fia telā ne fetaui laua mo te tamaliki tagata a se fafine telā ne fakaasi mai muamua tena fiafia. Ne fakamatala mai ne tou tagata me ne manavase a ia e uiga ki ana tuakoi mai tua o te fakalavelave fakamuli nei. Ne ofo tou tagata me ne fakaaogā ne te Molimau ana taimi totino ke āsi atu ki tino kae onoono aka me e pefea latou. Ne fakamatala mai ne tou tagata me ne galue pili a ia ki te World Trade Center i te taimi ne tupu ei te fakalavelave kae ne lavea atu ei ne ia a mea katoa ne ‵tupu. I te taimi ne fesili atu ei tou tagata me kaia ne talia ei ne te Atua a logo‵maega, ne faitau atu ne te Molimau a fuaiupu mai te Tusi Tapu, e aofia i ei te Salamo 37:​39, telā e fai mai, penei: “E fakaola ne te Aliki a tino amiotonu, kae puipui foki ne ia latou i taimi o fakalavelave.” Ne fesili atu mo te atafai tou tagata me e ‵lei a te Molimau mo tena kāiga, ne ‵kami atu ke toe foki atu, kae ne fakaasi atu ne ia tena loto fakafetai mō te āsiga.

¹⁷ A te suā tino mai te toko afe o tino kolā e ‵tagi fanoa‵noa ne fakamafanafanagina ne Molimau a Ieova i aso mai tua o te osoatuga o te kau takafia‵toa, se fafine telā ne fetaui mo te kau Molimau i te taimi ne āsi ei latou ki olotou tuakoi. Ne māfatia malosi tou fafine i te mea ne tupu kae ne fakalogologo a ia i te taimi ne faitau atu ei a te Salamo 72:​12-14: “E fakasao ne ia a tino ma‵tiva kola e ka‵laga ki a ia, mo latou foki kola e puapuagatia kae se amanaia ne tino. E alofa a ia ki tino vaivai mo tino ma‵tiva; e fakasao foki ne ia a olotou ola. E fakaola ne ia latou mai tino saua mo tino matamua; e tafasili te taua o olotou ola i tena mafaufau.” Ko se faka‵tau eiloa i te aogā o pati konā! Ne fesili atu te fafine ki te kau Molimau ke toe faitau atu a fuaiupu konā kae ne ‵kamigina latou ke olo atu ki loto i te fale ke faka‵soko atu ei te sau‵talaga. I te fakaotiga o te sau‵talaga, ne kamata ei se akoga faka-te-Tusi Tapu.

¹⁸ E tokotasi te Molimau e galue i se fale ‵kai i se fa‵kai maumea telā ne seki lasi muamua te fia‵fia o tino ki te tala ‵lei o te Malo. Mai tua o te osoatuga o te kau takafia‵toa, ne foliga mai me ne pole‵pole a tino o te fa‵kai i te ma‵taku. I te po o te Aso Lima mai tua o te osoatuga, ne ‵kami ne te pule o te fale ‵kai a tino katoa ke olo ki tua kae ke puke a molīgako, ke fai se tamā lotu mō tino kolā ne ‵mate. Ke fakaāva atu ki olotou lagonaga, ne fanatu ki tua te Molimau kae ne tu filemu i te auala. Ne iloa ne te pule me i tou tagata se faifeau o Molimau a Ieova, telā mai tua o te vaitaimi toetoe tenā, ne fakamolemole atu tou fafine ke sui aka ne ia a tino katoa i te faiga o te ‵talo. Ne talia ne te Molimau. I tena ‵talo, ne taku atu ei ne ia a pati e uiga ki tino ‵tagi fanoa‵noa i te lalolagi kātoa kae ne fai atu me e se ‵tau mo tino fanoa‵noa o ‵tagi e aunoa mo se fakamoemoega. Ne faipati foki a ia ki te taimi telā ka se ‵tupu i ei a vaegā fakalavelave matagā penā kae fai atu me e mafai ne tino katoa o fakapili‵pili atu ki te Atua o fakamafanafanaga e auala i te iloaga tonu mai te Tusi Tapu. Mai tua o te faiatuga “Amene,” a te pule​​—⁠fakatasi mo tino e silia atu i te toko 60 kolā ne ‵tu atu mai tua o te fale ‵kai​​—⁠ne olo atu ki te Molimau tenā, ne fakafetai atu ki a ia, kae ‵sai atu foki ki a ia. Ne fai atu a ia me i te ‵talo tenā ko te ‵toe ‵talo ‵lei eiloa ne lagona ne ia.

Se Fakamanuiaga ki te Fa‵kai

¹⁹ I fa‵kai kolā e ga‵lue malosi i ei a Molimau a Ieova kae maise eiloa i aso nei, ne maua ne tino i ei a mea aogā ona ko te lotou ‵nofo atu i konā​​—⁠e ‵tusa loa mo pati a tino e tokouke. Se mea tonu me e fai ne tino kolā e fakamalosi aka te filemu, te fakamaoni, mo amioga ‵mā mo fai se fakamalosiga aogā ki tino, i ne? I te fenua e tasi i te Kogāloto o Asia, ne fetaui a Molimau mo se ofisa litaea telā ne galue mua e pelā me se tino leoleo i te fenua tenā. Ne fai atu tou tagata me ne ‵tofi aka a ia ke iloilo aka ne ia a fakapotopotogā lotu kese‵kese. I te taimi ne onoono ei a ia ki Molimau a Ieova, ne ofo a ia i te lotou fakamaoni mo te ‵lei o olotou amioga. Ne tavae ne ia te lotou fakatuanaki ‵mautakitaki mo te manatu tonu me i olotou akoakoga e fakavae ki te Tusi Tapu. Ne talia ne te tagata tenei se akoga faka-te-Tusi Tapu.

²⁰ Mai nāi tala kolā ne fakamatala mai i te mataupu tenei, mai te fia afe o tala kolā e mafai o fakamatala mai, e manino ‵lei me ne ga‵lue malosi a Molimau a Ieova i te tausaga faka-te-taviniga ko te 2001.a Ne fai‵pati latou mo te fia miliona o tino, ne fakamafanafana ne latou a tino ‵tagi fanoa‵noa e tokouke, kae ne fakamanuiagina te lotou galuega talai. E toko 263,431 kolā ne fakamailoga te lotou tukuatuga ki te Atua e auala i te papatisoga. E 1.7 pasene te fakaopoopoga ki te aofaki o tino talai i te lalolagi kātoa. Kae ona ko te toko 15,374,986 o tino kolā ne ‵kau atu ki te Fakamanatuga faka-te-tausaga o te mate o Iesu e fakaasi mai i ei me koi uke a galuega e ‵tau o fai. (1 Kolinito 11:​23-26) Ke na tumau eiloa tatou i te ‵sala atu ki tino loto mau‵lalo kolā e fia‵fia ki te tala ‵lei. Kae koi tumau eiloa te tausaga o te loto ‵lei o Ieova, ke na tumau tatou i te fakamafanafana atu ki “tino loto fanoa‵noa.” Ko tafaga te gali o te ‵tou tauliaga! E lotoma‵lie tatou ki pati a Isaia, konei: “E aunoa mo te fakatalave, ka fakamaluga aka ne au a Ieova. Ka fiafia au ki toku Atua.” (Isaia 61:10) Ke na fakaaogā faeloa ne te Atua a tatou i te taimi e fakataunu ei ne ia a pati fakapelofeta konei: “E fakasao eiloa ne [Ieova] tena fenua, ka ko malo katoa ka tavae atu ki a ia.”​—⁠Isaia 61:⁠11.

[Fakamatalaga mai lalo]

E Masaua ne Koe?

• Ne aogā pefea ki tino loto mau‵lalo a te tala ‵lei telā ne talai atu ne Iesu?

• Ne a fakamanuiaga ne oko atu ki tino kolā ne ‵saga atu ki te galuega talai a soko o Iesu i ana aso?

• Ne fakamanuiagina pefea a tino loto ‵lei i aso nei ona ko te tala ‵lei?

• E pefea ‵tou kilokiloga ki te ‵tou tauliaga e pelā me ne tino talai?

[Fesili mo te Sukesukega]

1, 2. (a) Se a te galuega telā ne fakaasi atu ne Iesu me e ‵tau o fai ne ia, kae e pefea la? (e) Ne a fakamanuiaga ne aumai ne te tala ‵lei telā ne folafola mai ne Iesu?

3. Se a te tala ‵lei ne talai atu ne soko o Iesu?

4. Se a te auala ko fakataunu ei i aso nei a te fakatonuga ke talai atu te tala ‵lei?

5. E uiga ki te talaiatuga o te tala ‵lei, e ‵kese pefea a Molimau a Ieova mai i Lotu Kelisiano ‵Se?

6. Se a te tala ‵lei ko talai atu i aso nei?

7. Se a te tala e fakaasi mai i ei te ‵kau fakatasi o Molimau a Ieova, kae kaia e maua ei ne latou a te vaegā ‵kau fakatasi penā?

8, 9. (a) Ne a ‵fuliga ne fai ne tino kolā e talia ne latou te tala ‵lei? (e) Ne a tala e fakaasi mai i ei te ‵mana o te tala ‵lei?

10. Ko oi e ‵saga atu ki te tala ‵lei, kae e ‵fuli pefea i ei olotou kilokiloga?

11. E ‵tusa mo pati a Paulo, e ‵tau o talai atu pefea te tala ‵lei?

12. E fakaakoako pefea a Molimau a Ieova i aso nei ki pati mo amioga a Paulo?

13. I te tausaga ko te 2001, ne a fakalavelave ne ‵tala mai i ei te auala ke tuku atu a te fakamafanafanaga ki tino ‵tagi fanoa‵noa?

14, 15. Ne mafai pefea ne Molimau i taimi kese‵kese e lua o fakaaogā a tusi siki i se auala magoi ke fakamafanafana atu ki tino ‵tagi fanoa‵noa?

16, 17. Ne a tala e lua e fakaasi mai i ei te ‵mana o te Tusi Tapu ke fesoasoani atu ki tino kolā e fanoa‵noa io me e māfatia i fakalavelave?

18. Ne fesoasoani atu pefea se Molimau ki ana tuakoi i te taimi ne ‵kami atu ei a ia ke ‵talo mō tino katoa?

19. Se a te ‵tala telā e fakaasi mai i ei me e lavea ne nisi tino a amioga ‵lei a Molimau a Ieova?

20. (a) Se a te mea e fakaasi mai ne te lipoti o galuega a Molimau a Ieova i te tausaga ko teka? (e) Se a te mea e fakaasi mai me koi uke a galuega e ‵tau o fai, kae e pefea ‵tou kilokiloga ki te ‵tou tauliaga ke talai atu?

[Ata i te itulau e 25]

E masaua faeloa ne Molimau a Ieova te lotou tiute ke talai atu

[Ata i te itulau e 27]

A tino kolā e ‵saga atu ki te tala ‵lei e fai mo fai se vaega o te kautaina telā e ‵kau fakatasi i te lalolagi kātoa

[Te Fakasologa i te itulau e 29-32]

Te Lipoti a Molimau a Ieova i te Lalolagi Kātoa i te Tausaga Faka-Te-Taviniga ko te 2001

(Ke onoono ki te tusi)