Se a Tau Kilokiloga ki te Mate?
FAITALIA te ma‵losi o tatou i te feitu faka-te-foitino io me ko te mau‵mea o tatou, e masaua faeloa ne tatou i ‵tou mea e fai i aso katoa, me e oko mai eiloa a te mate ki a tatou. E mafai o oko mai te mate i te taimi e olo atu ei tatou ki te suā feitu o te auala io me takato‵kato i te moega. A vaegā fakalavelave pelā mo te osoatuga o te kau takafia‵toa i a Setema 11, 2001, i New York City mo Washington, D.C., e fai ei ke fatoā ‵saga tonu atu tatou ki te manatu me i te ‘‵toe fili sili,’ ko te mate, e oko atu ki so se tino faitalia tena tulaga mo tena matua. I nisi taimi, e tamate ei a te fia afe o tino i nāi minute fua.—1 Kolinito 15:26.
E tiga eiloa te fakamataku o te mate, kae e foliga mai me e fia iloa faeloa ne tino a mea e uiga ki ei. E seai aka foki se isi mea e fai ei ke momea aka te uke o nusipepa e ‵togi atu io me ko fakasalalauatuga i televise i lō lipoti e uiga ki te ‵mate o tino, kae maise eiloa ko te ‵mate o tino e tokouke i tulaga fakama‵taku. E foliga mai me e se mafai o ‵fiu a tino i ei, faitalia me ko tino kolā e ‵mate i taua, fakalavelave ‵tupu fakafuasei, amioga solitulafono, io me ko masaki. Kafai ko mate se tino maluga io me se tino lauiloa, ko lavea atu ei te fakavale‵vale o tino ki te mate i olotou pati mo faifaiga kolā e fakaasi atu ei te otia o olotou loto.
Konā eiloa a manatu kese‵kese o tino e uiga ki te mate. Koi tumau eiloa te fia iloa ne tino a mea e uke e uiga ki te ‵mate o nisi tino. Kae kafai e fakafesagai atu latou ki te lotou ‵mate eiloa, e se fia mafau‵fau latou ki ei. E se fia mafau‵fau sāle a te tokoukega o tatou ki te taimi ka ‵mate ei tatou.
E Mata, e ‵Segi Koe Ona ko te Mate?
E se se mea ‵lei ke mafau‵fau tatou ki te ‵mate o tatou i te taimi nei io me i aso mai mua. Kaia e fai ei penā? Ona ko te mea ko oti ne tuku mai ne te Atua ki loto i a tatou se manakoga malosi ke ola ki te se-gata-mai. E ‵tusa mo te Anchor Bible, e fai mai penei te Failauga 3:11: “Ko oti ne tuku atu ne ia te se-gata-mai ki olotou loto.” Ona ko te mea e se mafai o sao se tino mai te mate, e fai ei ke ‵numi a tino kae e se mafai foki o ‵tō olotou ‵nofo. Ke faka‵noga aka te sē tokagamalie o te loto o te tino kae ke fakataunu te manakoga ke tumau i te ola, ko oti ne akoako atu ne tino a vaegā talitonuga kese‵kese, e pelā mo te akoakoga e uiga ki te agaga telā e se mafai o tamate mo te talitonuga ki te ‵toe fanau mai ki se isi vaegā olaga.
A te ‵tonuga loa, a te mate se fakalavelave telā e fakamataku, kae ko te ma‵taku o tino ki te mate ko salalau atu i koga katoa. Tela la, e se ‵tau o ofo tatou me i te mate se mea faigata ke mafau‵fau a tino kese‵kese ki ei. E fakasēaogā ne te mate a te kausaki atu ki se olaga maumea mo tulaga ma‵luga.
E Mata, e ‵Nofo Mavae‵vae a Tino Ona ko te Mate?
I aso mua, e masani sāle o mate se tino telā e masaki io me e pakia malosi i loto i tena fale telā e masani a ia ki ei. A te mea tenā se faifaiga masani eiloa i taimi o te Tusi Tapu, kae koi penā foki eiloa i nisi tuu i aso nei. (Kenese 49:1, 2, 33) I vaegā taimi penā, e maopoopo fakatasi te kāiga o fai‵pati, kae e aofia foki i ei a tama‵liki. E fai ne te mea tenei a tino i te kāiga ke fakatau fakamafanafana, a te sua tino ki te sua tino, ke fakatau fesoasoani, kae fanoa‵noa fakatasi foki latou katoa.
E ‵kese ‵ki te mea tenei i koga kolā e fakatapu ei te faipati ki te mate, ona ko te manatu me ka tō loto māfatia ei a tino, kae e se mafai foki o fa‵ki a tama‵liki i ei. Ko ‵kese ‵ki eiloa a faigā mate i aso nei i auala e uke, kae e masani sāle o se sologa i ei a tino. E ‵lei atu ki te tokoukega o tino ke ‵mate latou i olotou fale, me e filemu kae tausi faka‵lei foki latou ne olotou kāiga. Kae ko te ‵toe mea faigata ki tino e tokouke, ko te mate atu i se fa‵kaimasaki telā e masani sāle o nofo tokotasi te tino i ei kae logo‵mae foki, kae e faka‵piki ki masini fakama‵taku kolā e fakaolaola ei latou. I te suā feitu, e ‵mate lēmū atu te fia miliona o tino kae e se iloa atu olotou igoa—ko tino ‵mate i fakatau tamatega i va o matakāiga, ogegā meakai, te SELAMETE, tamā taua, io me ko te mativa fulafulaki.
Se Mataupu ke Mafaufau ‵Loto ki ei
E se fakasēaogā ne te Tusi Tapu a te mafaufau faka‵lei ki te mate. A te ‵tonuga loa, e fai mai te Failauga 7:2 ki a tatou, penei: “E sili atu te fano ki se fale tela e tagi fanoanoa mai i ei a tino, i lo te fano ki se koga e fai ei se kaiga fiafia.” Kafai ko mate se tino, kāti ka se fia ‵saga atu tatou ki ‵tou galuega masani kolā ne fai sāle ne tatou kae mafaufau ‵loto ki te toetoe o te olaga. E mafai o fesoasoani mai te mea tenei ke ola tatou i se olaga tai aogā atu i lō te fai valevale io me ko te fakamāumāuga o ‵tou olaga.
Se a tau kilokiloga e uiga ki te mate? Kai iloilo aka eiloa ne koe ou lagonaga, talitonuga, fakamoemoega, mo mea fakama‵taku e uiga ki te gataga o tou olaga?
E se mafai o malamalama kae fakamatala mai ne tino a te uiga o te ola mo te mate. A te tino tokotasi telā e mafai o fakamatala mai ne ia te mataupu tenei, ko te Atua telā ne faite ne ia tatou. A ia “ko te pogai o te ola,” kae e “fakasao ne ia tatou mai te mate.” (Salamo 36:9; 68:20) E tiga eiloa e se foliga mai e pelā me se mea ‵lei ke iloilo aka faka‵lei a nisi talitonuga lauiloa e uiga ki te mate kae fakatusatusa ki manatu i te Muna a te Atua, ka maua eiloa ne tatou a fakamafanafanaga mo fakamalosiga i ei. Ka fakaasi mai i ei me i te mate e se ko te gataga o mea katoa.
[Ata i te itulau e 4]
E mafai ne tatou o ola i se olaga tai aogā atu māfai e maina tatou me e mafai o ‵mate tatou i so se taimi