Ke Tumau i te Tavini Fakatasi Atu
“Ka ‵fuli ne au a loto o tino ki se ‵gana ‵mā, ko te mea ke ka‵laga atu latou i te igoa o Ieova, ko te mea ke tavini fakatasi atu latou.”—SEFANAIA 3:9, NW.
KĀTI ko nofo nei ki se 6,000 tupu a ‵gana kolā e fakaaogā i te lalolagi kātoa. I tafa o ‵gana konei, e uke aka foki a nisi gaugāleo mo ‵gana e fakaaogā i te fenua e tasi. Kae faitalia te ‵kese o te ‵gana Alapi mo te ‵gana Zulu, ne fai eiloa ne Ieova se mea fakaofoofogia. Ko oti ne fakaavanoa ne ia i koga katoa te auala ke iloa ei ne tino katoa te ‵gana ‵ma eiloa e tasi. A te mea tenei ko te fakataunuga o se folafolaga telā ne tuku atu ki te pelofeta, ko Sefanaia: “Ka ‵fuli ne au [Ieova te Atua] a loto o tino ki se ‵gana ‵mā, ko te mea ke ka‵laga atu latou i te igoa o Ieova, ko te mea ke tavini fakatasi atu latou.”—Sefanaia 3:9, NW.
2 A te “‵gana ‵mā” ko te munatonu a te Atua telā e maua i tena Muna, ko te Tusi Tapu. E fakauiga tonu eiloa i ei ki te munatonu e uiga ki te Malo o te Atua, telā ka faka‵malu ei te igoa o Ieova, te taku‵leiga o tena pulega, kae aumai i ei a fakamanuiaga ki tino. (Mataio 6:9, 10) E fai‵pati a tino mai i atufenua mo matakāiga katoa ki te ‵gana ‵mā tenā, ko te ‵gana ‵mā fua e tasi i te feitu faka-te-agaga i te lalolagi nei. E fesoasoani atu te ‵gana tenā ke mafai ne latou o “tavini fakatasi atu.” Tela la, ko mafai ei o tavini fakatasi atu latou, io me e tavini atu i ‘te loto tasi.’—The New English Bible.
E se ‵Tau Lele Eiloa o Fakailoga Tino
3 E fia‵fia tatou kolā ne tino Kelisiano ke ga‵lue fakatasi mo tino kolā e fai‵pati ki ‵gana kese‵kese. E tiga eiloa e talai atu ne tatou te tala ‵lei o te Malo i ‵gana e uke, e tavini atu tatou ki te Atua mo te loto tasi. (Salamo 133:1) E mafai eiloa o fai penei, faitalia te koga e ‵nofo tatou i ei, me e fai‵pati tatou ki te ‵gana ‵mā e tasi telā e tavae atu ei ki a Ieova.
4 E se ‵tau lele eiloa mo tino o te Atua o fakailoga tino. Ne fakamatala manino mai ne te apositolo ko Petelu a te mea tenā i te taimi ne talai atu ei a ia i te fale o se ofisa o kautau mai Fenua Fakaatea, ko Konelio i te 36 T.A. kae ne fakamalosi aka ei a ia ke fai atu, penei: “Se mea tonu i te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.” (Galuega 10:34, 35) Ona ko te ‵tonu o te mea tenā, e se ‵tau eiloa o maua atu i loto i te fakapotopotoga Kelisiano a te uiga ko te fakailoga tino, te ‵vae aka ki potukau, io me ko te fāpito.
5 Ne fai mai se tamaliki e tokotasi telā ne akoga i se kolisi e uiga ki tena āsiga ki te Kingdom Hall, penei: “E masani sāle o olo atu a tino i se matakāiga io me se itukāiga e tasi ki se lotu. . . . Ne ‵nofo fakatasi katoa a Molimau a Ieova kae ne seki ‵nofo atu latou i potukau.” Kae ne kamata o ‵vae aka a tino ki potukau i loto i te fakapotopotoga i Kolinito mua. Ona ko te lotou ‵nofo mavae‵vae, ne ‵teke atu latou ki te musumusuga a te agaga tapu o te Atua, me e fakamalosi aka i ei a te loto tasi mo te fealofani. (Kalatia 5:22) Kafai e ‵lago atu tatou ki te ‵vae aka ki potukau i te fakapotopotoga, ko ‵teke atu ei tatou ki te takitakiga a te agaga. Tela la, ke na masaua ne tatou a pati a te apositolo ko Paulo ki te kau Kolinito, penei: “Taina, au e fakamolemole atu ki a koutou i te igoa o Iesu Keliso te ‵tou Aliki, ke fakagata te otou finau, ko te mea ke seai ne mavae‵vaega i a koutou; ke fusi koutou i te manatu e tasi mo te fakamoemoega e tasi.” (1 Kolinito 1:10) Ne faka‵mafa atu foki ne Paulo a te loto tasi i tena tusi ki te kau Efeso.—Efeso 4:1-6, 16.
6 Ne manakogina faeloa ke fakaasi atu ne Kelisiano a te sē fakailoga tino. (Loma 2:11) Ona ko te mea ne fakaasi atu ne nisi tino i te fakapotopotoga i aso o te kau apositolo a te fāpito ki tino mau‵mea, ne tusi atu ei a te soko ko Iakopo, penei: “Oku taina, kafai e taofi koutou ki te fakatuanaki ki te ‵tou Aliki ‵malu ko Iesu Keliso, e se ‵tau la mo koutou o fakailoga tino. Kafai e vau se tino e pei ki gatu ‵lei mo mama aulo i ona lima ki loto i otou tapuakiga, kae ulu mai ei foki se tino mativa mo ona gatu ma‵sei, e tali fakaaloalo atu koutou ki te tino telā e pei ki gatu ‵lei, kae fai atu ki a ia, ‘Vau o sagasaga i te koga gali tenei,’ kae ka fai atu koutou ki te tino mativa penei, ‘Tu i kona, io me vau o sagasaga i oku tua.’ E a, e se fakailoga tino koutou i te mea tenā?”—Iakopo 2:1-4.
7 I aso konā, kafai ne olo atu a tino sē tali‵tonu kae mau‵mea kolā e ‵pei ki gatu ‵lei kae isi ne mama aulo i olotou lima ki se fakatasiga Kelisiano e pelā foki mo tino sē tali‵tonu kae ma‵tiva kae ‵pei ki gatu ma‵sei, e sili atu te tali fakaaloalo faka‵lei atu ki tino maumea. Ne tuku atu ki a latou a nofoga i ‘koga ‵gali,’ kae fai atu fua ki te tino mativa ke tu io me ke sagasaga i lalo i te fola. Kae ne tuku mai ne te Atua e aunoa mo te fakailoga tino a te taulaga togiola a Iesu ki tino mau‵mea mo tino ma‵tiva. (Iopu 34:19; 2 Kolinito 5:14) Tela la, kafai e fia fakafiafia atu tatou ki a Ieova kae tavini fakatasi atu ki a ia, e se ‵tau o fakaasi atu ne tatou a te fāpito io me e ‘tavae fakaloiloi foki ne tatou a nisi tino ko te mea ke maua mai ei ne ‵tou mea.’—Iuta 4, 16.
Ke Faka‵mao Mai te Muimui
8 Ke fakatumau ‵tou loto tasi kae talia faeloa ne te Atua tatou, e ‵tau o faka‵logo tatou ki pati fakatonutonu a Paulo, penei: “Ke fai a mea katoa e aunoa mo te muimui.” (Filipi 2:14, 15) Ne mui‵mui a tino Isalaelu sē fakatuanaki kolā ne fakasaoloto mai te ‵nofo pologa i Aikupito, ki a Mose mo Alona, kae ke oko foki eiloa ki a Ieova te Atua. Ne seki ulu atu ki te Fenua o te Folafolaga, a tāgata mai te 20 tausaga o fanaka ki luga ona ko olotou loto mui‵mui kae ne ‵mate atu latou i te 40 tausaga ne ‵nofo atu ei te kau Isalaelu i te koga lavaki. Ne seki aofia a Iosua, Kalepo mo te kau Levi i ei. (Numela 14:2, 3, 26-30; 1 Kolinito 10:10) Ko oko eiloa te ‵mafa o te lotou fakasalaga ona ko te mui‵mui!
9 E fakaasi mai ne te mea tenei a mea e mafai o ‵tupu ki se atufenua katoa telā e muimui. Kae e a tino takitasi kolā e mui‵mui? Ia, a te tuagane o Mose, ko Miliama, fakatasi mo tena taina ko Alona, ne mui‵mui penei: “Kae a, ko Mose fua nei ne faipati sāle ki ei a te Aliki? E faipati mai sāle foki ki a taua.” Ne toe fai mai penei te tala: “Ne lagona ne te Aliki a lā pati konā ne fai.” (Numela 12:1, 2) Se a te ikuga? Ne fakamasiasi ne te Atua a Miliama, me ne kamata ne ia te fāmeo tenei. E pefea la? Mai te faiga ke poko tou fafine i te lepela mo te fakatonuga foki ke nofo mai tua o te fa‵kai i aso e fitu ke oko ki te taimi ko ‵mā ei tou fafine.—Numela 12:9-15.
10 A te muimui e se ko te fāmeo fua ki se mea ‵se. A tino kolā e tumau i te mui‵mui e ‵saga malosi fua ki olotou lagonaga io me ko tulaga, mai te mafaufau ki a latou eiloa i lō te Atua. Kafai e se ‵kalo keatea mai i ei, ka fai ei ke mavae‵vae ‵tou taina faka-te-agaga kae taofi aka ei olotou taumafaiga ke tavini fakatasi atu ki a Ieova. E fai te mea tenei me e masani sāle o fakaasi atu ne tino mui‵mui olotou fāmeo, mo te fakamoemoega me ka a‵lofa atu a nisi tino ki a latou.
11 I nisi taimi kāti ko taku fakamasei ne se tino te auala ne fai ei ne se toeaina tena tofiga i te fakapotopotoga io me ko te faiga o ana tiute. Kafai e fakalogo‵logo tatou ki se tino muimui, kāti ka kamata o lotoma‵lie tatou ki ona manatu. A koi tuai o maua ne tatou a te loto muimui, ne seki fakaitaita mai ki a tatou a faifaiga a se toeaina, kae nei la, ko ita tatou i ei. Fakamuli ifo, ko se ‵lei a faifaiga katoa a te toeaina tenā ki a tatou, kae ko kamata foki o fāmeo tatou e uiga ki a ia. E se ‵tau o maua se vaegā amioga penei i te fakapotopotoga o tino o Ieova.
12 A te muimui e uiga ki tāgata kolā e maua ne latou te tiute ke tausi atu ki te lafu a te Atua e mafai o iku atu ki te fakamasei tino. A te vaegā muimui io me ko te fatufatu penā, e mafai o pokotia ei ‵tou fesokotakiga mo Ieova. (Esoto 22:28) Ka se ulu atu a tino fakamasei tino e aunoa mo te salamō ki te Malo o te Atua. (1 Kolinito 5:11; 6:10) Ne tusi atu a te soko ko Iuta e uiga ki tino mui‵mui kolā ne “taku faka‵se ne latou a te pule a te Atua, e muna masei foki ki tino ‵malu,” ko tāgata tofia i te fakapotopotoga. (Iuta 8) Ne seki maua ne tino mui‵mui konā a te taliaga a te Atua, kae e ‵kalo keatea tatou mo te poto mai te lotou auala masei.
13 Kae e se ko fāmeo katoa e ita ki ei a te Atua. Ne fakalogologo a ia ki te “molimau sē ‵lei” e uiga ki a Sotoma mo Komolo kae ne fakaseai atu ne ia a fa‵kai matagā konā. (Kenese 18:20, 21; 19:24, 25) I Ielusalema, mai tua malie ifo o te Penitekoso i te 33 T.A., ne “mui‵mui Iutaia kolā e fai‵pati faka Eleni ki tino Iutaia, i te mea ko se tufa olotou fāfine ko ‵mate olotou avaga ki tupe mo koloa kolā e tufatufa i aso takitasi.” Tela la, ne faka‵lei aka ne “te tinoagafulu mo te tokolua apositolo” a te tulaga tenā mai te ‘filifiliga o tāgata fakamaoni e tokofitu’ “ke pule” ne latou a te tufatufaga o meakai. (Galuega 6:1-6) E se ‵tau o fakagata ne toeaina te lotou “faka‵logo” ki fāmeo e uiga ki fakalavelave ‵tonu. (Faataoto 21:13) Kae i lō te taku fakamasei atu o ‵tou taina tapuaki, e ‵tau mo toeaina o fakamalosi atu ki a latou.—1 Kolinito 8:1.
14 E ‵tau mo tatou katoa o ‵kalo keatea mai te muimui, me e mafai o fakamasei mai ki a tatou i te feitu faka-te-agaga. E mafai o fakamasei ei ‵tou loto tasi. I lō te fai penā, ke na talia faeloa ne tatou a te agaga tapu ke ati aka i ei te alofa i loto i a tatou. (Kalatia 5:22) A te fakalogo ki te ‘Tulafono a te Atua e uiga ki te alofa,’ ka fesoasoani mai ke tumau tatou i te tavini fakatasi atu ki a Ieova.—Iakopo 2:8; 1 Kolinito 13:4-8; 1 Petelu 4:8.
Ke ‵Kalo Keatea Mai te Gutu Fatufatu
15 Ona ko te mea e mafai o iku atu a te muimui ki te gutu fatufatu, e ‵tau o fakaeteete tatou i ‵tou pati e fai atu. A te gutu fai‵tala ko te fakamāumāu taimi o faipati e uiga ki tino mo olotou mea e fai. A te gutu fatufatu ko te faiga o se lipoti sē tonu ke fakamasei ei te ata o te suā tino. E matagā kae e se fakaasi atu ei a uiga faka-te-Atua i vaegā sau‵talaga penā. Tela la, ne fai atu a te Atua ki te kau Isalaelu, penei: “Sa fakasalalaugina ne tala ‵loi e uiga ki te suā tino.”—Levitiko 19:16.
16 Ona ko te mea e mafai o iku atu a te gutu fai‵tala ki te fatufatu, ne pati ‵toko atu a Paulo ki tino gutu fatufatu penā. Ne faipati muamua a ia e uiga ki fāfine ko ‵mate olotou avaga kolā e ‵tau o maua te fesoasoani mai te fakapotopotoga, kae oti ei ne fakasino atu a ia ki fāfine ko ‵mate olotou avaga kolā ne “fakaakoako foki latou ke fai mo tino paie, kae oloolo sāle mai te suā fale ki te isi fale. E se gata fua i te paie, kae gutu fai‵tala foki, ne tino e fakalavelave ki galuega a nisi tino, e fai‵pati fua ki mea e se ‵tau o fai‵pati latou ki ei.” (1 Timoteo 5:11-15) Kafai e iloa ne se fafine Kelisiano me e isi sena vāivāiga penā telā e mafai o iku atu ki te gutu fatufatu, e ‵tau o fakalogo a ia ki pati polopoloki a Paulo ke “amio ‵lei, kae se gutu fatufatu.” (1 Timoteo 3:11) E tonu, e ‵tau foki o ‵kalo keatea a tāgata Kelisiano mai te gutu fatufatu.—Faataoto 10:19.
Ke Fakagata te Fakamasino Atu!
17 E tiga eiloa e se gutu fatu‵fatu tatou, kāti e ‵tau o taumafai malosi tatou ke ‵kalo keatea mai te fakamasino atu ki nisi tino. Ne taku fakamasei ne Iesu te vaegā uiga tenā i te taimi ne fai mai ei a ia, penei: “Sa fakamasino atu ki nisi tino, ko te mea ke mo a e fakamasino koutou ne te Atua. Me ko te fakamasinoga e fakamasino atu ei koutou, e fakamasinogina ei koutou; ko te fua foki e fua atu ne koutou, e toe fua mai ki a koutou. Se a te mea e kilo atu ei koe ki te potu lakau i te mata o tou taina, kae se iloa ne koe a te potu lakau i tou mata? E mafai pefea o fai atu koe ki te suā tino, ‘Fakamolemole, ke ‵seu ne au a te potu lakau i tou mata,’ kae kiloke, e iai foki te potu lakau i tou mata? A koe se tino loi. ‵Seu muamua keatea te potu lakau i tou mata, ko kite ‵lei ei koe, fatoa ‵seu ei ne koe keatea a te potu lakau i te mata o te suā tino.”—Mataio 7:1-5.
18 E se ‵tau o ofo atu ne tatou se fesoasoani ke ‵seu aka te “potu lakau” mai te mata o tou taina kae e se mafai ne tatou o fai a faka‵tauga ‵lei ona ko te “potu lakau” lasi fakatusa i ‵tou mata. A te ‵tonuga loa, kafai e iloa faka‵lei ne tatou a te alofa fakamagalo o te Atua, ka se fia fakamasino atu ei tatou ki ‵tou taina mo tuagane faka-te-agaga. E mafai pefea o maina tatou i olotou uiga e pelā mo te maina o ‵tou Tamana faka-te-lagi i ei? E se tioa eiloa o fai mai a Iesu ke ‘sa fakamasino atu, ko te mea ke mo a ma fakamasino tatou ne te Atua’! A te mafau‵fau ifo o tatou mo te fakamaoni ki ‵tou vāivāiga e taofi ei tatou mai te faiga o fakamasinoga kolā e sē amio‵tonu i te kilokiloga a te Atua.
Faitalia te Vāivāi Kae Fakaaloalogina Eiloa
19 Kafai e fia tumau tatou i te tavini fakatasi atu ki te Atua mo ‵tou taina tali‵tonu, ka ‵kalo keatea tatou mai te fakamasino atu. Ka mua tatou o fakaaloalo atu ki a latou. (Loma 12:10) A te ‵tonuga loa, ka fai ne tatou a mea kolā e ‵lei ki a latou, e se ko tatou, kae ka fai ne tatou a galuega ma‵lalo mō te lotou ‵lei. (Ioane 13:12-17; 1 Kolinito 10:24) E mafai pefea o fakaasi atu ne tatou se uiga gali penā? Mai te mafaufau faeloa me e tāua a tino tali‵tonu katoa ki a Ieova kae e manakogina a te fakatau fesoasoani o tatou, e pelā eiloa mo vaega takitasi o te foitino o te tino kolā e ga‵lue fakatasi.—1 Kolinito 12:14-27.
20 Se mea tonu me ne tuku mai ki Kelisiano kolā e fai pelā me ne fagu kele i te ma‵fa gofie, a te koloa tāua ko te galuega talai. (2 Kolinito 4:7) Kafai e fai ne tatou te galuega ‵malu tenei ke tavae atu ki a Ieova, e ‵tau o tumau tatou i se tulaga ‵mā i mua o ia mo tena Tama. E mafai o tumau tatou e pelā me ne fagu kele tāua kolā e fakaaogā ne te Atua māfai fua e tumau tatou i te ‵mā i feitu tau amioga mo te feitu faka-te-agaga. Ne tusi mai a Paulo e uiga ki te feitu tenei: “I loto i se fale lasi, e isi a mea fai meakai e faite ki aulo mo siliva, kae isi foki ne mea e faite ki lakau mo kele; a te vaega muamua ne mea tāua, ka ko te vaega fakamuli ne mea sē taulia. Kafai se tino e faka‵ma ne ia a ia mai mea ma‵sei kolā ne taku atu ne au, ka fai a ia mo mea fai meakai tāua ko fakatapu mō te Atua, e aogā ki tona pule kae toka foki mō galuega ‵lei katoa.”—2 Timoteo 2:20, 21.
21 A tino kolā e se fia ola e ‵tusa mo tulafono a te Atua e fai fua pelā me ne ‘mea fai mea‵kai sē taulia.’ Kae ko te kausaki atu ki te auala o te Atua, ka fai ei tatou mo fai ne “mea fai meakai tāua ko fakatapu mō te Atua, e aogā ki tona pule kae toka foki mō galuega ‵lei katoa.” Tela la, se mea ‵lei ke fesili ifo tatou, penei: ‘E mata, e fai au mo fai se “mea fai meakai tāua”? E mata, e fai au mo fai se fakamalosiga ‵lei ki oku taina tali‵tonu? E mata, e fai au mo fai se tino i te fakapotopotoga telā e ga‵lue fakatasi mo ‵tou taina tapuaki?’
Ke na Tumau i te Tavini Fakatasi Atu
22 A te fakapotopotoga Kelisiano e fai pelā mo te fakatokaga o se kāiga. E maua se olaga fakatau a‵lofa, fesoasoani, kae gali i loto i se kāiga māfai e tapuaki atu a tino katoa i ei ki a Ieova. Kāti e aofia i se kāiga a tino kolā e kese‵kese olotou uiga, kae e tāua ‵ki a tulaga o tino takitasi i ei. E penā foki i te fakapotopotoga. E tiga eiloa e kese‵kese kae sē ‵lei katoatoa a tatou katoa, ko oti ne talia ne te Atua ke olo atu tatou ki a ia e auala i a Keliso. (Ioane 6:44; 14:6) E a‵lofa mai a Ieova mo Iesu ki a tatou, kae e pelā me se kāiga fealofani, e ‵tau eiloa o fakatau fakaasi atu ne tatou te alofa i te va o tatou.—1 Ioane 4:7-11.
23 A te fakapotopotoga Kelisiano se koga foki telā e ‵tau o maua ei ne tatou a te alofa fakamaoni. Ne tusi mai a te apositolo ko Paulo, penei: “Au e manako ki tagata katoa i so se koga ke ‵talo, ko latou kolā ko tuku katoatoa atu olotou loto ki te Atua, kolā e mafai ne latou o sisi ake olotou lima o ‵talo, ko te fakaasiga tenā o te tuku atu katoatoa o te loto ki te Atua e aunoa mo te ita io me ko te kinau.” (1 Timoteo 2:8) Ne tuku fakatasi ne Paulo a te tuku katoatoa atu mo te faiga o ‵talo “i so se koga” e maopoopo fakatasi ei a Kelisiano. E ‵tau fua o sui a te fakapotopotoga i te faiga o ‵talo i mua o tino ne tāgata fakamaoni. E tonu, e manako te Atua ke fakamaoni atu tatou katoa ki a ia kae penā foki eiloa i te va o tatou. (Failauga 12:13, 14) Tela la, ke na fakaiku aka ne tatou ke ga‵lue fakatasi i te fealofani, e pelā mo vaega katoa o te foitino. Ke na tavini atu fakatasi tatou e pelā me se vaega o te kāiga o tino tapuaki a Ieova. Kae sili i mea katoa, ke na masaua ne tatou me e manakogina te fakatau fesoasoani o tatou katoa kae ka maua ne tatou te taliaga mo fakamanuiaga a te Atua māfai e tumau tatou i te tavini fakatasi atu ki a Ieova.
Ka Tali Mai Pefea ne Koe?
• Se a te mea e fesoasoani atu ke mafai ei ne tino o Ieova o tavini fakatasi atu?
• Kaia e ‵kalo keatea ei a Kelisiano mai te fakailoga tino?
• Kaia e fai atu ei koe me e masei te muimui?
• Kaia e ‵tau ei o fakaaloalo atu tatou ki ‵tou taina tali‵tonu?
[Fesili mo te Sukesukega]
1. Ne a mea e ‵tupu ke fakataunu ei te Sefanaia 3:9?
2. Se a te “‵gana ‵mā,” kae se a te mea e iku mai i ei?
3. Se a te mea telā e fesoasoani mai ke tavini atu tatou ki a Ieova mo te loto tasi?
4. Kaia e se ‵tau ei mo tino o te Atua o fakailoga tino?
5. Kaia e se ‵lei ei ke ‵lago atu ki te ‵vae aka ki potukau i loto i te fakapotopotoga?
6, 7. Ne a pati polopoloki ne tuku mai ne Iakopo e uiga ki te fāpito, kae e aogā pefea ana pati konā?
8. Se a te mea ne tupu ona ko te mui‵mui o te kau Isalaelu?
9. Se a te mea ne tupu ki a Miliama ona ko tena muimuiga?
10, 11. Se a te mea e mafai o tupu māfai e se ‵kalo keatea tatou mai te muimui? Fakamatala mai aka.
12. E mafai pefea o pokotia ‵tou fesokotakiga mo te Atua ona ko te muimui?
13. Kaia e se ‵se ei a fāmeo katoa?
14. Ke ‵kalo keatea mai te muimui, se a te uiga telā e manakogina malosi?
15. E ‵kese pefea te gutu fai‵tala mo te gutu fatufatu?
16. Ne a pati ne fai atu ne Paulo e uiga ki nisi tino gutu fai‵tala, kae e aogā pefea ki a tatou ana pati polopoloki konā?
17, 18. (a) Ne a pati a Iesu e uiga ki te fakamasino atu ki ‵tou taina? (e) E mafai pefea o fakagalue aka ne tatou a pati a Iesu e uiga ki te fakamasino atu?
19. E ‵tau o ‵kilo atu pefea tatou ki ‵tou taina tali‵tonu?
20, 21. Se a te uiga o pati i te 2 Timoteo 2:20, 21 ki a tatou?
22. Se a te mea e mafai o fakatusa ki ei te fakapotopotoga Kelisiano?
23. Se a te mea e ‵tau o masaua kae fakaiku aka ne tatou ke fai?
[Ata i te itulau e 15]
Ne taku ‵tonu mai ne Petelu me i “te Atua e se fakailoga tino”
[Ata i te itulau e 16]
E iloa ne koe te pogai ne fakamasiasi ei ne te Atua a Miliama?
[Ata i te itulau e 18]
E tavini fakatasi atu mo te fia‵fia a Kelisiano fakamaoni