E Mata, e Fiafia Koe ki ‘Tulafono a Ieova’?

“Amutia latou kolā . . . e fia‵fia o fai‵tau ki Tulafono a [Ieova].”​—SALAMO 1:​1, 2.

1. Kaia e fia‵fia ei tatou e pelā me ne tavini a Ieova?

E ‵LAGO kae fakamanuia foki ne Ieova tatou, ana tavini fakamaoni. E tonu, e fe‵paki tatou mo tofotofoga e uke. Kae e maua foki ne tatou te fiafia tonu. E se ‵poi tatou i te mea tenei, me e tavini atu tatou ki “te Atua fiafia,” kae e faka‵fonu ne tena agaga tapu a ‵tou loto ki te fiafia. (1 Timoteo 1:​11, NW; Kalatia 5:22) E maua a te fiafia tonu mai mea ‵lei kolā e fakamoe‵moe ki ei io me kolā e maua ne tatou. Kae e tuku mai eiloa ne te ‵tou tamana i te lagi a meaalofa ‵gali mō tatou. (Iakopo 1:17) E se tioa eiloa o fia‵fia tatou!

2. Ko salamo fea ka sau‵tala tatou ki ei?

² E faka‵mafa mai i te tusi ko Salamo a te fiafia. E pelā mo te Salamo 1 mo te 2. Ne fakasino atu a soko muamua o Iesu me ne tusi ne te tupu o Isalaelu ko Tavita a te lua o Salamo. (Galuega 4:​25, 26) E kamata ne te tino telā ne ‵fatu ne ia a te salamo muamua a pati o tena pese penei: “Amutia a latou kolā e se ‵kau ki filifiliga a tino amio ma‵sei.” (Salamo 1:1) I te mataupu tenei mo te suā mataupu, ka lavea ei ne tatou te pogai ka fia‵fia ei tatou ki te Salamo 1 mo te 2.

Te Auala ‵Funa o te Fiafia

3. E ‵tusa mo te Salamo 1:​1, ne a pogai e fiafia ei te tino telā e tautali ki tulafono a te Atua?

³ E fakaasi mai i te Salamo 1 te pogai e fiafia ei te tino telā e tautali ki tulafono a te Atua. I te tukumaiga o nisi pogai e maua ei se vaegā fiafia penā, ne usu mai te faisalamo: “Amutia a latou kolā e se ‵kau ki filifiliga a tino amio ma‵sei; e se fia‵fia foki ki faifaiga a tino agasala, e se fakatasi atu foki ki a latou kolā e fakatauemu ki te Atua.”​—Salamo 1:1.

4. Se a te fakaakoakoga gali ne tuku mai ne Sakalia mo Elisapeta?

⁴ Ko te mea ke maua te fiafia tonu, e ‵tau o tau‵tali tatou ki manakoga amio‵tonu o Ieova. E pelā mo Sakalia mo Elisapeta kolā ne maua ne laua te tauliaga fakafiafia ke fai mo fai a mātua o Ioane te Papatiso, “ne amio‵tonu laua i mua o te Atua, kae ne tausi ki tulafono mo fakatonuga a te Aliki.” (Luka 1:​5, 6) E mafai foki o fia‵fia tatou māfai e tau‵tali atu tatou i se auala penā kae ita fitifiti ma ‵kau atu ki “filifiliga a tino amio ma‵sei” io me tau‵tali atu ki olotou fautuaga sē amio atua.

5. Se a te mea e fesoasoani mai ke ‵kalo keatea tatou mai “faifaiga a tino agasala”?

⁵ Kafai e ‵teke tatou ki mafaufauga o tino amio ma‵sei, ka sē ‘‵tu atu eiloa tatou i te auala o tino agasala.’ Ka sē ‵nofo tonu atu eiloa tatou i koga kolā e ‵nofo sāle i ei latou​—ko koga kolā e fai i ei a fakafiafiaga sē ‵tau io me ko koga lauiloa i te fakatakalialia. Kae e a la māfai ko tofotofogina tatou ke fakaakoako atu ki faifaiga a tino agasala? Ke na ‵talo atu eiloa tatou ke fesoasoani mai te Atua ko te mea ke ola tatou e ‵tusa mo pati a te apositolo ko Paulo: “Sa taumafai o ga‵lue tasi mo tino sē tali‵tonu. E se mafai o fakatasi te amiotonu mo te masei. E se mafai o mafuta fakatasi te mainaga mo te pouliga?” (2 Kolinito 6:14) Kafai e fakalago‵lago tatou ki te Atua kae maua te “loto ‵ma” ka ‵teke atu eiloa tatou ki te agaga mo te olaga matagā o tino agasala kae ka maua ne tatou a lagonaga mo manakoga ‵ma fakatasi mo te “fakatuanaki fakamaoni.”​—Mataio 5:8; 1 Timoteo 1:5.

6. Kaia e ‵tau ei o matapula‵pula tatou e uiga ki tino fakatauemu?

⁶ Ke fakafiafia atu ki a Ieova, e se ‵tau o ‘‵kau fakatasi tatou mo tino fakatauemu.’ E fakatauemu atu a nisi tino ki te tausiga o tulafono a te Atua, kae i “aso fakaoti” konei, e fakatauemu malosi atu eiloa a tino kolā ne fai muamua pelā me ne Kelisiano kae ko fai nei pelā me ne aposetate. Ne polopoloki mai a te apositolo ko Petelu ki ana taina tali‵tonu: “Oku taugasoa pele, . . . A te mea muamua e ‵tau o fai, e ‵tau o malamalama koutou me e isi ne tino ka ‵sae mai i aso fakaoti, ka ko latou konei e pulea olotou olaga ne olotou manakoga ma‵sei. Ka fakatauemu atu ki a koutou penei: ‘Ne folafola mai ne ia me i a ia e vau. E tonu? Tefea nei a ia? A otou tupuga ko leva ne ‵mate, kae e seai eiloa se ‵fuliga o mea katoa talu te kamataga o te lalolagi!” (2 Petelu 3:​1-4) Kafai e se ‘‵kau fakatasi tatou mo tino fakatauemu,’ ka sē oko mai eiloa ki a tatou a te fakalavelave telā ka pili o oko atu ki a latou.​—Faataoto 1:​22-27.

7. Kaia e ‵tau ei o mafaufau ‵mafa tatou ki pati i te Salamo 1:1?

⁷ Seiloga ke tau‵tali katoatoa atu tatou ki pati kamata o te Salamo 1, ka mafai eiloa o galo i a tatou a te tulaga faka-te-agaga telā ko oti ne maua ne tatou mai te sukesuke ki te Tusi Tapu. Tela la, ka gasolo i ei ‵tou olaga o na masei atu eiloa. A te lasaga muamua i te galo atu o ‵tou tulaga faka-te-agaga kāti ko te tau‵tali atu ki fuafuaga a tino amio ma‵sei. Oti i ei, ka fakatasi atu faeloa tatou ki a latou. Fakamuli loa, kāti ka fai eiloa tatou pelā me ne aposetate fakatauemu. E manino ‵lei me i te fai taugasoa mo tino amio ma‵sei e fakamalosi aka i ei a te agaga o te lalolagi i a tatou kae mafai o fakamasei i ei te ‵tou fesokotakiga fealofani mo Ieova te Atua. (1 Kolinito 15:33; Iakopo 4:4) Ke se talia lele eiloa ne tatou a te mea tenā ke tupu ki a tatou!

8. Se a te mea ka fesoasoani mai ke tuku tonu atu faeloa ‵tou mafaufau ki mea faka-te-agaga?

⁸ Ka fesoasoani mai a te faiga o ‵talo ke tuku katoatoa ‵tou mafaufau ki mea faka-te-agaga kae ke ‵kalo keatea mai te fai taugasoa mo tino amio ma‵sei. “Sa manava‵se ki se mea,” ko pati a Paulo i tena tusi, “kae fakatagi atu ki te Atua i mea e ma‵nako koutou ki ei, kae fakatagi eiloa i te agaga fakafetai. Ka ko te filemu o te Atua, telā e sili atu i mea e iloa ne tatou, ke tausi faka‵lei ne ia otou loto mo otou mafaufau i a Keliso Iesu.” Ne fakamalosi mai foki te apositolo ke mafau‵fau ki mea ‵tonu, mea tāua, mea ‵lei, mea ‵ma, mea ‵gali, mea ‵malu mo mea e maua i ei a te vikiga. (Filipi 4:​6-8) Ke na ola tatou e ‵tusa mo pati a Paulo kae ke sē fakama‵lalo ifo tatou ki te tulaga o tino amio ma‵sei.

9. E ui eiloa te ‵kalo keatea o tatou mai faifaiga ma‵sei, e fesoasoani atu pefea tatou ki tino katoa?

⁹ E ui eiloa e ‵teke atu tatou ki faifaiga ma‵sei, e talai atu tatou mo te atamai ki nisi tino, e pelā eiloa mo te faipatiga a te apositolo ko Paulo ne fai ki te Kovana Loma ko Filiki “e uiga ki te amiotonu, mo te loto kufaki, mo te oko mai o te Aso o te Fakamasino.” (Galuega 24:​24, 25; Kolose 4:6) E talai atu ne tatou a te tala ‵lei o te Malo ki so se tino, kae atafai eiloa tatou ki a latou. E tali‵tonu tatou me i tino “loto ‵lei kolā e toka ke maua ne latou te ola se-gata-mai” ka fai eiloa mo fai ne taina tali‵tonu kae ka fia‵fia foki ki tulafono a te Atua.​—Galuega 13:​48, NW.

E Fiafia a Ia ki Tulafono a Ieova

10. Se a te mea ka fesoasoani mai ke ‵piki ‵mau a mea i ‵tou mafaufau mo ‵tou loto i taimi o sukesukega totino?

¹⁰ E uiga ki te tino fiafia, ne toe fai mai te faisalamo: “Kae fia‵fia o fai‵tau ki Tulafono a te Aliki, kae mafaufau ‵loto foki ki ei i te ao mo te po.” (Salamo 1:2) E pelā me ne tavini a te Atua, e ‘fia‵fia eiloa tatou ki tulafono a Ieova.’ Kafai e mafai, i te taimi e fai i ei ‵tou sukesukega totino kae mafaufau ‵loto ki ei, ‘kāti e mafai o fai‵tau tatou ki luga.’ A te faitau ki luga māfai e faitau ki so se vaega o te Tusi Tapu ka fesoasoani mai i ei ke ‵piki ‵mau a mea konā i ‵tou mafaufau mo ‵tou loto.

11. Kaia e ‵tau ei o fai‵tau tatou ki te Tusi Tapu i te “ao mo te po”?

¹¹ Ko oti ne fakamalosi mai a “te tavini fakamaoni kae poto” ke fai‵tau faeloa tatou ki te Tusi Tapu i aso katoa. (Mataio 24:45) Ona ko te lasi o te manakoga ke masani ‵lei tatou mo te fekau a Ieova ki tino katoa, se mea ‵lei ke fai‵tau ki te Tusi Tapu i te “ao mo te po”​—ao, ke oko foki eiloa ki taimi kolā e se ‵to ei ‵tou moe ona ko nisi pogai. Ne fakamalosi mai a Petelu: “Ke fai koutou e pelā mo ne tama‵liki fatoa fa‵nau, kolā ka ‵mate i te fia inu ki te tinā susu faka te Agaga, me kafai e inu koutou ki ei, e ‵tupu ake koutou i ei, kae ola foki i ei.” (1 Petelu 2:​1, 2) E mata, e fiafia koe i te taimi e faitau ei ki te Tusi Tapu i aso katoa kae mafau‵fau loto ki te Muna a te Atua mo ana fuafuaga i po? Ne fai eiloa penā te faisalamo.​—Salamo 63:6.

12. Ne a mea ka fai ne tatou māfai e fia‵fia tatou ki tulafono a Ieova?

¹² E fakalagolago a te ‵tou fia‵fia ki te se-gata-mai ki te ‵tou fia‵fia ki te tulafono a te Atua. E ‵lei katoatoa kae amiotonu te tulafono, kae e lasi te taui ka maua ne tatou mai te tausi ki ei. (Salamo 19:​7-11) Ne tusi mai a te soko ko Iakopo: “Ka ko te tino e tausi faka‵lei ki te tulafono e fakakatoatoa ne ia te ‵lei, telā ko te tulafono o te saolotoga, kae ola foki i ei a ia, kae se na ko te fakalogologo fua ki ei ko puli ei i a ia, kae e tausi fakamaoni eiloa ki ei, i te fai ne ia a mea e fakatonu mai. A te tino tenā ka fakamanuia ne te Atua io me e fiafia i ana mea e fai.” (Iakopo 1:25) Kafai e fia‵fia tonu eiloa tatou ki tulafono a Ieova, ka seai se aso e seke e aunoa mo te mafaufau ‵loto o tatou ki mea faka-te-agaga. E tonu, ka fakamalosi aka i ei tatou ke ‘‵sala atu ki fuafuaga ‵loto a te Atua’ kae ke fakamuamua faeloa a manakoga o te Malo i te olaga.​—1 Kolinito 2:​10-13; Mataio 6:33.

Ka Fai a Ia e Pelā me se Lakau

13-15. I te auala fea e fai ei tatou pelā me se lakau telā e ola i tafa o se vaitafe?

¹³ Ne toe fakamatala mai ne te fai salamo a te tino amiotonu: “A latou e pelā mo ne lakau e ola i tafa o se vaitafe, e ‵fua mai i taimi tonu o te taukai, e se magemage olotou lau. E manuia foki i mea katoa e fai ne latou.” (Salamo 1:3) E pelā mo nisi tino sē ‵lei katoatoa, e fe‵paki tatou katoa kolā e tavini atu ki a Ieova mo fakalavelave i te olaga. (Iopu 14:1) Kāti e logo‵mae tatou i fakasauāga mo nisi tofotofoga ki te ‵tou fakatuanaki. (Mataio 5:​10-12) Mai te fesoasoani o te Atua, ko mafai ei o kufaki ne tatou a tofotofoga konei, e pelā eiloa mo te lakau ‵tupu olaola telā e se mafai o siga i matagi ma‵losi.

¹⁴ A te lakau telā e ola i se koga telā e uke a vai i ei e se mafai o magemage i tau ‵vela io me ko taimi o te tau la. Kafai tatou ne tino e ma‵taku ki te Atua, ka maua eiloa ne tatou te ‵tou malosi mai se Tino e fakatuagagina​—ko Ieova te Atua. Ne kilo atu a Paulo ki te Atua mō se fesoasoani kae ne mafai ei o fai mai penei: “E mafai ne au o fai a mea katoa konā, ona ko te fakamalosi mai o Keliso ki a au.” (Filipi 4:13) Kafai ko takitaki tatou kae tausigina i te feitu faka-te-agaga ne te agaga tapu o Ieova, ka sē mage‵mage eiloa tatou i te sē ‵fua mai io me ‵mate i te feitu faka-te-agaga. E ‵fua mai eiloa tatou i te taviniga ki te Atua kae e fakaasi atu foki ne tatou a fuataga o te agaga.​—Ielemia 17:​7, 8; Kalatia 5:​22, 23.

¹⁵ Mai te fakaaogāga o te pati Epelu telā ne ‵fuli ki te “pelā” ne fakaaogā i ei ne te faisalamo se pati fakatusa. Ne faka‵pau ne ia a mea e lua kolā e ‵kese, kae e ‵pau laua i se uiga e tasi. E ‵kese loa a tino mo lakau, kae e mautinoa eiloa me i te fua malosi mai o te lakau telā e ola i tafa o se vaitafe ne fakamasaua atu i ei ki te faisalamo e uiga ki te maumea i te feitu faka-te-agaga telā e maua ne tino kolā e “fia‵fia ki tulafono a te Aliki.” Kafai e fia‵fia tatou ki tulafono a te Atua, ka ola leva eiloa tatou e pelā mo te lakau. E tonu, ka ola eiloa tatou ki te se-gata-mai.​—Ioane 17:3.

16. Kaia kae i te auala fea foki e fai i ei ke ‘manuia a mea katoa e fai ne tatou’?

¹⁶ Kafai e sa‵sale tatou i te auala amiotonu, e fesoasoani mai a Ieova ke mafai ne tatou o amo a mea faiga‵ta ona ko tofotofoga mo fakalavelave. Ka fia‵fia kae ‵fua malosi tatou i te taviniga ki te Atua. (Mataio 13:23; Luka 8:15) ‘Ka manuia a mea katoa e fai ne tatou, me i te ‵tou toe fakamoemoega tāua ko te faiga o te loto o Ieova. Me manuia faeloa ana fuafuaga kae fia‵fia foki tatou ki ana fakatonuga, ka ola ‵lei foki tatou i te feitu faka-te-agaga. (Kenese 39:23; Iosua 1:​7, 8; Isaia 55:11) E tonu eiloa te mea tenei ke oko foki eiloa ki te taimi e fe‵paki ei tatou mo fakalavelave.​—Salamo 112:​1-3; 3 Ioane 2.

E Foliga Mai me e Manuia a Tino Amio Ma‵sei

17, 18. (a) Se a te mea ne fakatusa ne te faisalamo ki ei a tino amio ma‵sei? (e) Faitalia te manuia o tino amio ma‵sei i te feitu faka-te-foitino, kaia e seai ei se lotou puipuiga tumau?

¹⁷ Ko oko eiloa te ‵kese o te tulaga o tino amio ma‵sei mo tino amio‵tonu! Kāti e foliga mai me e manuia a tino amio ma‵sei i te feitu faka-te-foitino i se vaitaimi, kae e se penā eiloa i te feitu faka-te-agaga. Konā eiloa a fakamaoniga mai nisi pati a te faisalamo: “Ka ko tino amio ma‵sei e se fai penā; e ‵pau latou mo kaiga e agina i te matagi. A tino amio ma‵sei ka fakasala ne te Atua; kae ‵vae foki keatea mai tino o te Atua.” (Salamo 1:​4, 5) Ke onoono me ne fai mai te faisalamo, “ka ko tino amio ma‵sei e se fai penā.” E fakauiga eiloa a ia me e se fai a latou e pelā mo tino o te Atua, kolā ne fatoa oti ne fakatusa ne ia ki lakau kolā e ‵fua malosi kae ola leva.

¹⁸ Faitalia me manuia a tino amio ma‵sei i te feitu faka-te-foitino, e seai se lotou puipuiga tumau. (Salamo 37:16; 73:​3, 12) E fai latou e pelā mo te tagata maukoloa valea i te tala fakatusa a Iesu telā ne fakamolemole atu ke fai aka ne Iesu sena fakaikuga e uiga ki se tofi. Ne fai atu a Iesu ki tino kolā ne ‵nofo i konā: “Ke matapula‵pula koutou, kae fakaeteete i te matakanokano, me i te olaga tonu o te tino e se fakavae i luga i te uke o ana mea!” Ne fakamatala atu ne Iesu te manatu tenei me ne fua malosi te laukele o te tagata maukoloa telā ne fai ei tena fuafuaga ke ofa ana fale saito kae toe faite ne fale e ‵lasi atu ke tausi ei ana mea ‵lei katoa. Tenā ne mafaufau ei tou tagata ke kai, inu kae ke fiafia a ia. Kae ne fai atu te Atua ki a ia: “Te tagata valea! I te po eiloa tenei, a tou agaga ka ave keatea mai i a koe, ka ko mea la ne fakatoka ne koe, ko oi ka fai ma ia?” Ke fakamaina faka‵lei atu te manatu tāua i ei, ne toe fai atu a Iesu: “Tela la, ko te tino e uke ana koloa kae fakaaogā eiloa ne ia mō ia ake eiloa, e se maukoloa a ia i mua o te Atua.”​—Luka 12:​13-21.

19, 20. (a) Ke fakamatala mai a te auala e ‵vae keatea ei a saito mai kaiga i aso mua. (e) Kaia e fakatusa ei a tino amio ma‵sei ki kaiga?

¹⁹ E ‘se mauko‵loa a tino amio ma‵sei i mua o te Atua.’ Ona ko te mea tenei, ko seai ei se lotou puipuiga e pelā eiloa mo kaiga, ko te ufi manifinifi o se fuagā saito. Kafai ko ‵kati a saito i aso mua, e avatu ki te koga e fakamalū i ei, se koga laugatasi i se koga maluga. I konā e ‵taki atu i ei ne manu se kā telā e isi ne fatu io me ne fiti makai‵kai mai lalo i ei i luga o kau saito ko ‵vae ei keatea a tinā saito mai kaiga. Oti i ei, ko fakaaogā ei se sevolo ke asu aka a te paluga tenā kae peipei atu ki te matagi. (Isaia 30:24) Ka toe ‵to ifo ei a fuaga ki te koga fakamalū saito ka ko kaiga ko agi keatea ne te matagi. (Luta 3:2) Kafai ko oti ne faka‵ma a fuaga ki se mea faka‵ma ke tapale keatea ei a mea sē aogā, ko mafai ei o tausi io me ave o tuki a fuaga konā. (Luka 22:31) Kae ko seai eiloa ne kaiga e ‵toe mai i ei.

²⁰ E pelā eiloa mo fuagā saito kolā e toe ‵to ki te laukele kae tausi faka‵lei kae agina keatea a kaiga ne te matagi, e penā foki a tino amio‵tonu ka ‵nofo tumau kae ka fakaseai a tino amio ma‵sei. Tela la, e fia‵fia eiloa tatou me i tino amio ma‵sei ka pili o fakaseai atu ki se-gata-mai. Kafai ko ‵galo atu latou, ka maua eiloa ne tino kolā e fia‵fia ki tulafono a Ieova a fakamanuiaga sē fuafuagina. E tonu, ka maua eiloa ne tino faka‵logo a te meaalofa a te Atua, ko te ola se-gata-mai.​—Mataio 25:​34-46; Loma 6:23.

Te Auala Manuia o “Tino Amio‵tonu”

21. I te auala fea e ‘tausi ei ne Ieova a tino amio‵tonu’?

²¹ E fakaoti a pati i te salamo muamua penei: “A tino amio‵tonu e tausi kae takitaki ne te Aliki, ka ko tino amio ma‵sei ko tu nei i te lotou auala ki te malaia.” (Salamo 1:6) E ‘tausi pefea ne te Atua a tino amio‵tonu’? Kafai e sa‵sale tatou i se auala amiotonu, e mautinoa eiloa me ka matea ne te ‵tou Tamana faka-te-lagi a te ‵tou faka‵logo ki ana tulafono i ‵tou olaga e pelā me ne ana tavini kolā e talia ne ia. Tela la, ko mafai ei ne tatou o tuku atu ki a ia a so se mea telā e manavase tatou ki ei mo te loto talitonu me ka tausi mai eiloa a ia ki a tatou.​—Esekielu 34:11; 1 Petelu 5:​6, 7.

22, 23. Ne a mea ka ‵tupu ki tino amio ma‵sei mo tino amio‵tonu?

²² Ka tumau eiloa ki te se-gata-mai a te auala o “tino amio‵tonu” kae ko tino amio ma‵sei kolā e se ‵fuli olotou amioga ka fakaseai atu i te fakasalaga amiotonu a Ieova. Kae ka gata atu foki i ei te lotou “auala,” io me ko te auala e ola ei latou. E tali‵tonu eiloa tatou ki te fakataunuga o pati a Tavita: “E se toe leva nei, ka ‵galo atu ei a tino amio ma‵sei; ka salasala ne koe latou, kae se maua ne koe; ka ko latou kolā e loto malalo, ka fai mo latou te fenua, kae ka maua ne latou te manuia mo te filemu katoatoa. A tino amio‵tonu ka fai mo latou te fenua, kae ka ‵nofo faeloa i ei ki te se gata mai.”​—Salamo 37:​10, 11, 29.

²³ Ka sē fuafuagina te fiafia e maua māfai ko taulia tatou ke ola i te lalolagi palataiso telā ka sē toe ai ne tino amio ma‵sei i ei! Ka maua i ei ne tino loto mau‵lalo kae amio‵tonu a te filemu tonu me ka fia‵fia faeloa latou ki “tulafono a te Atua.” Kae koi tuai o oko ki te taimi tenā, e ‵tau eiloa o ‘tausi ki te tulafono a Ieova.’ (Salamo 2:7a) Ka fesoasoani mai te suā mataupu ke iloa ne tatou me se a te tulafono tenā kae se a foki tena uiga mō tino katoa.

Ka Tali Mai Koe Pefea?

• Kaia e fiafia ei te tino telā e fakalogo ki tulafono a te Atua?

• Se a te mea e fakaasi mai i ei me fia‵fia eiloa tatou ki tulafono a Ieova?

• E mafai pefea o fai a tino taki tokotasi e pelā me ne lakau e ola i koga e uke ei a vai?

• E ‵kese pefea te auala o tino amio‵tonu mo tino amio ma‵sei?

[Ata i te itulau e 9]

Ka fesoasoani mai a ‵talo ke ‵kalo keatea mai te fai taugasoa mo tino amio ma‵sei

[Ata i te itulau e 10]

Kaia e fai ei te tino amiotonu e pelā me se lakau?