Ka ‵Viki Atu a Tino Amio‵tonu ki te Atua ki te Se-Gata-Mai

“Ka se mafai o fakapuli a te tino amiotonu ne tino. . . . A tena amiotonu e tumau ki te se-gata-mai.”​—⁠SALAMO 112:​6, 9, NW.

1. (a) Se a te fakamoemoega fakafiafia i aso mai mua ka maua ne tino amio‵tonu i te kilokiloga a te Atua? (e) Se a te fesili telā ne fakasae aka?

KO TAFAGA la te gali o te fakamoemoega mō aso mai mua mō tino amio‵tonu i te kilokiloga a te Atua! Ka fia‵fia faeloa latou o tauloto ki uiga tafasili i te ‵gali o Ieova. Ka loto fia‵fia malosi latou o avatu a vikiga i te taimi e tauloto ei ki mea e uke atu e uiga ki galuega a te Atua. A te mea e tasi e manakogina ke maua ei te fakamoemoega gali tenā ko te mauaga o te “amiotonu” telā e faka‵mafa mai i te Salamo e 112. Kae e mafai la pefea o kilo atu a Ieova te Atua ‵malu kae amiotonu ki tino agasala e pelā me e amio‵tonu? Faitalia ‵tou taumafaiga e uke ke fai te mea tonu, e fai eiloa ne tatou a mea ‵se, i nisi taimi ne agasala matagā ‵ki eiloa.​—⁠Loma 3:​23; Iakopo 3:⁠2.

2. Ne a vavega e lua ne fai ne Ieova ona ko te alofa?

² Ne fakatoka ne Ieova se auala alofa ke faka‵lei aka ei te fakalavelave tenei. E pefea? Muamua la, mai te faiga o se vavega ke tuku atu te ola o tena Tama pele e tokotasi i te lagi ki te moegatama o se taupou fafine ke mafai o fanau mai e pelā me se tino ‵lei katoatoa. (Luka 1:​30-​35) Kae mai tua ifo o te tamatega o Iesu ne ana fili, ne fai ne Ieova se vavega fakaofoofogina. Ne toe fakatu aka ne te Atua a Iesu mai te mate e pelā me se tino faka-te-agaga maluga ‵ki.​—⁠1 Petelu 3:​18.

3. Kaia ne fiafia ei te Atua ke maua ne tena Tama a te taui ko te ola i te lagi?

³ A te taui ne tuku atu ne Ieova ki a Iesu, se mea telā e seki maua aka loa ne tena Tama i tena olaga mua​—⁠ko te ola i te lagi telā e se mafai o tamategina. (Epelu 7:​15-​17, 28) Ne fiafia a Ieova ke fai ne ia te mea tenei ona ko te tumau o Iesu i te fakamaoni mai lalo i tofotofoga faiga‵ta. Tela la, ne tuku atu ne Iesu ki tena Tamana a te ‵toe tali ‵lei, e tonu ko te tali kātoa ki te loi o Satani me e tavini atu fua a tino ki te Atua ona ko olotou manakoga kaima‵nako kae e se ko te katoatoa o te lotou a‵lofa.​—Faataoto 27:11.

4. (a) I tena fokiatuga ki te lagi, se a te mea ne fai ne Iesu mō tatou, kae ne saga atu pefea a Ieova ki ei? (e) E pefea ou lagonaga e uiga ki mea ne fai ne Ieova mo Iesu mō koe?

⁴ E uke atu a mea ne fai ne Iesu i te lagi. I te avatuga ne ia o “tona toto” e pelā me se taulaga tāua ne fai ei a ia mo ‘sui o tatou i mua o te Atua.’ Ne talia mo te loto fiafia ne ‵tou tamana alofa i te lagi a te taulaga tāua a Iesu e pelā me ko te “auala e fakamagalo ei o‵tou agasala.” Tela la, ko mafai ei o “tavini atu tatou ki te Atua ola,” mo ‵tou ‘lagonaga ‵lei.’ E tuku mai i konei a te pogai e ‵tau ei o lotoma‵lie tatou ki pati i te Salamo e 112, “Ke ‵viki atu koutou ki te Aliki!”​—Epelu 9:​12-​14, 24; 1 Ioane 2:2.

5. (a) Ne a mea e ‵tau o fai ne tatou ke fakatumau ei se tulaga amiotonu mo te Atua? (e) Ne fakatoka pefea a te Salamo e 111 mo te Salamo e 112?

⁵ Ko te mea ke maua ne tatou se tulaga amiotonu i mua o te Atua, e ‵tau o tumau tatou i te fakaasi atu o te fakatuanaki ki te toto maligi o Iesu. E ‵tau mo tatou o fakafetai atu faeloa ki a Ieova i aso takitasi ona ko te lasi o tena alofa mō tatou. (Ioane 3:​16) E manakogina foki ke tumau tatou i te sukesuke ki te Muna a te Atua kae taumafai malosi ke ola e ‵tusa mo tena fekau. E tuku mai i te Salamo e 112 a fakatakitakiga aoga mō so se tino telā e fia maua ne ia se tulaga ‵ma i mua o te Atua. E ‵soko tasi a pati konei mo pati i te Salamo e 111. E kamata katoa a mataupu konā ki pati konei “Ke ‵viki atu koutou ki te Aliki!” io me ko te “Aleluia!” kae ‵soko atu ei mo laina e 22, kae e kamata a laina takitasi konā ki mataimanu takitasi e 22 o te ‵gana Epelu.a

Te Pogai o te Fiafia

6. Ne fakamatala mai pefea i te Salamo e 112 a fakamanuiaga ne maua ne te “tino” telā e mataku ki te Atua?

⁶ “Ke ‵viki atu koutou ki a Ioa! Amutia te tino telā e mataku ki a Ieova, kae fiafia o fakalogo ki ana fakatonuga. E ‵tupu malosi tena fanau i te fenua; e manuia a fanau a tino amio‵tonu.” (Salamo 112:​1, 2, Tusi Paia, Samoa) Ke masaua me ne faipati muamua a te faisalamo ki se “tino” e tokotasi kae i te fuaiupu e 2 ko faipati ki “tino amio‵tonu.” E fakaasi mai i konei me e fakasino atu te Salamo e 112 ki se potukau telā e aofia i ei a tino kese‵kese. Ke ‵lago atu ki te manatu tenei, ne fakaosofia te apositolo ko Paulo ke fakasino atu ne ia a pati i te Salamo 112:9 ki Kelisiano i te senitenali muamua. (Faitau te 2 Kolinito 9:​8, 9.) Ko oko loa te gali o te fakamatalaga tenei i te salamo e uiga ki te auala e mafai ei o fia‵fia a soko o Keliso i aso nei!

7. Kaia e ‵tau ei o ma‵taku tonu a tavini a te Atua ki a ia, kae e ‵tau o pefea ou lagonaga e uiga ki fakatonuga a te Atua?

⁷ E pelā mo te mea e fakaasi mai i te Salamo 112:​1, e maua ne Kelisiano ‵tonu konei a te fiafia tonu māfai e sa‵sale latou mo te ‘ma‵taku ki a Ieova.’ A te mataku tonu ke mo a ma fakafanoanoa atu ki a ia e fesoasoani mai ke ‵teke atu tatou ki te agaga o te lalolagi a Satani. E “fia‵fia” malosi latou o sukesuke ki te Muna a te Atua kae faka‵logo ki ana fakatonuga. E aofia i te mea tenā ko te fakatonuga ke talai te tala ‵lei o te Malo i te lalolagi kātoa. E kausaki malosi latou o fai a soko mai fenua katoa kae fakailoa atu foki ki tino ma‵sei a te oko mai o te aso o te fakamasinoga a te Atua.​—Esekielu 3:​17, 18; Mataio 28:​19, 20.

8. (a) Ne maua pefea ne tino o te Atua i aso nei a te taui o te lotou loto finafinau? (e) Ne a fakamanuiaga i aso mai mua ka maua ne tino kolā e fakamoe‵moe ke ola i te lalolagi?

⁸ Ona ko te lotou faka‵logo ki vaegā fakatonuga penā, ko katoa nei te fitu miliona o tavini a te Atua i te lalolagi i aso nei. Ko oi te tino e mafai o faka‵se ne ia te manatu me e “‵tupu malosi” ana tino i te lalolagi? (Ioane 10:16; Fakaasiga 7:​9, 14) Kae ka “manuia” eiloa latou i te taimi tenei e fakataunu ei ne te Atua tena fuafuaga! E pelā me se potukau, ka puipuigina eiloa a tino kolā e fakamoemoe ke ola ki te se-gata-mai i te lalolagi nei i te taimi o te ‘fakalavelave lasi’ ke oko ki te taimi ka oko mai ei “te lalolagi fou” telā e “nofo i ei a te amiotonu.” Fakamuli loa, ka maua ei ne tino kolā ne ‵sao atu i Amaketo a ‘fakamanuiaga’ e uke atu. Ka toka ‵lei latou o fakafetaui atu ki te fia miliona o tino kolā ka toe faka‵tu aka. Ma‵faga o fakamoemoega gali! Mai tua ifo i ei, ka gasolosolo malie eiloa a tino kolā e “fia‵fia” ki fakatonuga a te Atua o maua ne latou te tulaga ‵lei katoatoa kae ka maua ne latou ki te se-gata-mai a “te saolotoga ‵malu o te fanau a te Atua.”​—2 Petelu 3:​13; Loma 8:​21.

Te Fakaaogaga Tonu o Koloa

9, 10. Ne fakaaoga pefea ne Kelisiano ‵tonu olotou koloa faka-te-agaga, kae tumau pefea te lotou amiotonu ki te se-gata-mai?

⁹ “A tena kāiga ka tupu malosi kae maumea, kae ka manuia [“amiotonu,” NW] a ia ki te se gata mai. E maina atu te mainaga i te pouliga mō tino amio‵lei, mo latou foki kolā e kaima‵lie, a‵lofa kae fai mea tonu.” (Salamo 112:​3, 4) I aso o te Tusi Tapu, ne lauiloa a nisi tavini a te Atua e pelā me ne tino mau‵mea. Kae i te suā feitu, e mau‵mea foki a tino kolā e fiafia te Atua ki ei, faitalia me se fai latou penā i te feitu faka-te-foitino. A te tonuga loa, e masani sāle o ‵kilo atu a nisi tino ki a latou kolā e fakaasi atu te loto maulalo i mua o te Atua e pelā me ne tino ma‵tiva kae e se amanaiagina, e pelā eiloa mo mea ne ‵tupu i aso o Iesu. (Luka 4:​18; 7:​22; Ioane 7:​49) Kae faitalia te uke mo te mu‵tana o kope o se tino, e mafai eiloa o maumea a ia i te feitu faka-te-agaga.​—Mataio 6:​20; 1 Timoteo 6:​18, 19; faitau te Iakopo 2:5.

¹⁰ E se tausi ne Kelisiano fakaekegina e pelā foki mo olotou taugasoa olotou koloa faka-te-agaga i a latou eiloa. Kae e “maina atu” latou i loto i te lalolagi pouli a Satani e pelā me se ‘mainaga ki tino amio ‵lei.’ E fai latou penā mai te fesoasoani atu ki nisi tino ke maua ne latou a mea tāua mai koloa faka-te-agaga e uiga ki te poto o te Atua. Ne taumafai a tino ‵teke o taofi aka te galuega talai e uiga ki te Malo, kae ne seki manuia latou. Ka tumau eiloa a ikuga ‵lei o te galuega amiotonu tenei ki te ‘se-gata-mai.’ Kafai e tumau i te amiotonu, ka tali‵tonu eiloa a tavini a te Atua me maua ne latou te ola “se-gata-mai.”

11, 12. Ne a nisi auala ka fakaaoga ei ne tino o te Atua olotou kope?

¹¹ Ko oti ne fakamaoni mai ne tino o te Atua, ko te tavini fakaekegina mo te “vaitino tokouke,” a te lotou kaima‵lie ki koloa faka-te-foitino. E fai mai te Salamo 112:9: “A ia e kaimalie ki tino ma‵tiva.” E tuku atu sāle ne Kelisiano ‵tonu i aso nei a meaalofa faka-te-foitino ki olotou taina Kelisiano e pelā foki mo olotou tuakoi kolā e ma‵nako ki se fesoasoani. E fakaaoga foki ne latou olotou kope totino ke fesoasoani atu i taimi o fakalavelave ‵tupu fakafuasei. E ‵tusa mo pati a Iesu, tenā eiloa te pogai tonu o te fiafia.​—Faitau te Galuega 20:35; 2 Kolinito 9:7.

¹² I tafa o te mea tenā, ke mafaufau ki tupe e fakamaumau ke ‵lomi aka ei te mekesini tenei i ‵gana e 172, kae ko te ukega o ‵gana konei e fai‵pati ki ei a tino kolā e ma‵tiva. Ke mafaufau foki ki nisi ‵gana kolā e ‵lomi ei te tusi tenei, te ‵gana a tino ‵tuli, e pelā foki mo te ‵gana a tino ‵kivi.

E Kaimalie Kae Fakamaoni

13. Ko oi ne tuku mai ne laua a toe fakaakoakoga ‵lei o te tuku atu o mea mo te kaimalie, kae e mafai pefea o fakaakoako atu tatou ki ei?

¹³ “Amutia te tino telā e alofa o tuku atu fua ana mea ki tino e fia kaitalafu i a ia.” (Salamo 112:5) Kāti ko oti ne lavea ne koe a tino kolā e fesoasoani atu ki nisi tino e se kaima‵lie i taimi katoa. E tuku atu ne nisi tino olotou mea ke fakaasi atu ei me uke atu olotou kope i nisi tino. Kae e se se mea gali foki ke maua ne koe se fesoasoani mai se tino telā e manatu fatauva atu ki a koe, io me mafaufau i a koe e pelā fua me se tino e fakalavelave. E ‵kese mo te mea tenā, se mea gali ‵ki ke maua ne koe se fesoasoani mai se tino telā e kaimalie. A Ieova ko te ‵toe fakaakoakoga ‵lei o se tino kaimalie, se tino e tuku atu ana mea mo te fiafia. (1 Timoteo 1:​11, NW; Iakopo 1:​5, 17) Ne fakaata mai foki ne Iesu Keliso a te fakaakoakoga ‵lei a tena Tamana e uiga ki te kaimalie. (Maleko 1:​40-​42) Tela la, ko te mea ke kilo mai te Atua ki a tatou e pelā me ne tino amio‵tonu, e tuku atu foki ne tatou a mea mo te fiafia mo te kaimalie, kae maise loa ko te fesoasoani atu ki ‵tou tuakoi i te feitu faka-te-agaga e auala i te faiga o te galuega talai.

14. Ne a nisi auala e mafai ei o ‘fai ‵tou pisinisi mo te fakamaoni’?

¹⁴ “Kae fai tena pisinisi mo te fakamaoni.” (Salamo 112:5) E pelā mo te mea ko oti ne ‵valo mai, e tausi eiloa ne te tavini fakamaoni a kope a tena Matai e ‵tusa mo tulafono fakamaoni a Ieova. (Faitau te Luka 12:​42-​44.) E fakaata mai a te mea tenei i fakatakitakiga mai te Tusi Tapu kolā e tuku atu ki toeaina, kolā e fai ne latou i nisi taimi a te fakamasinoga o se tino i te fakapotopotoga telā ne fai ne ia se agasala matagā. E lavea atu a te fakamaoni o te tavini i fakatakitakiga faka-te-Tusi Tapu kolā e fakatoka mai ne latou e uiga ki te fakateletelega o te fakapotopotoga, fale misionale, mo Peteli. E se ‵tau fua o fakamaoni a toeaina kae penā foki loa mo Kelisiano i olotou faifaiga ki olotou taina mo tino sē tali‵tonu, e aofia foki i ei ko faifaiga fakapisinisi.​—Faitau te Mika 6:​8, 11.

Fakamanuiaga mō Tino Amio‵tonu

15, 16. (a) Ne a ikuga o tala ma‵sei i aso nei ki tino amio‵tonu? (e) Ne a mea ne fakaiku aka ne tavini a te Atua ke fai faeloa ne latou?

¹⁵ “A te tino amio ‵lei e manuia faeloa [“ka se takasese valevale,” NW], e se mafai foki o fakapuli a ia ne tino. E se mataku a ia i tala ma‵sei e lagona ne ia, a tena fakatuanaki e malosi, kae talitonu a ia ki te Aliki. E se manavase a ia io me mataku foki; e mautinoa ne ia me ka lavea atu ne ia ona fili ko taka‵vale.” (Salamo 112:​6-8) Ko siliga atu te ma‵sei o tala i aso nei e uiga ki taua, amioga takafia‵toa, masaki ‵fou mo masaki mua kolā ko toe ‵sae aka, amioga ma‵sei, te mativa mo te fakalailaiga o te lalolagi, i lō tala i aso mua. A tino amio‵tonu i te kilokiloga a te Atua e se mafai o ‵sao i ikuga o tala ma‵sei konei, kae e se ma‵taku latou ki ei. E “malosi” kae “e se manavase” latou kae e ‵kilo atu ki aso mai mua mo te loto talitonu, mo te iloa me ko pili mai te lalolagi fou a te Atua. Kafai e oko mai a fakalavelave, e mafai ne latou o fakafesagai atu ki ei ona ko te lotou fakalago‵lago ki a Ieova. E se talia lele eiloa ne ia ana tino amio‵tonu ke “takasese valevale”​—e tuku atu ne ia ki a latou te fesoasoani mo te malosi ke mafai ne latou o kufaki.​—Filipi 4:​13.

¹⁶ E ‵tau foki o kufaki a tino amio‵tonu o te Atua i takalialiaga mo tala ‵loi kolā e fakasalalau atu ne tino ‵teke, kae ne seki mafai ne latou o ‵pono aka a gutu o Kelisiano ‵tonu. I lō te fai penā, e tumau eiloa a tavini a te Atua i te ga‵lue malosi i te faiga o te galuega a Ieova ne tuku atu ki a latou​—ke talai atu te tala ‵lei o te Malo kae ke fai a tino fia‵fia mo fai a soko. E seai se fakalotolotolua me ka gasolo aka o uke a ‵tekemaiga e fepaki mo tino amio‵tonu ona ko te pili mai o te gataga. Ka oko atu eiloa te takalialiaga tenei ki se tulaga masei ‵ki māfai ko oso mai a Satani te Tiapolo i tena tulaga e pelā me ko Koka o Makoka. Kae oti aka loa, ko ‵kilo atu ei tatou ki ‘‵tou fili ko takavale’ kae fakamasiasigina. Ko oko eiloa te gali ke ‵kilo tonu atu ki te fakamalugaga o te igoa o Ieova!​—Esekielu 38:​18, 22, 23.

“Ka Fakaaloalogina”

17. Ka “fakaaloalogina” pefea a te tino amiotonu?

¹⁷ Se mea fakafiafia eiloa ke ‵kau fakatasi tatou i te avatuga o vikiga ki a Ieova, e aunoa mo te ‵teke mai o te Tiapolo mo tena lalolagi! A te fiafia tenā ka maua fua ne tino kolā e tumau i te lotou tulaga amiotonu i mua o te Atua. Ka se fakamasiasigina io me fakatakavalegina latou, me ne folafola mai a Ieova me i tino amio‵tonu ka “‵fonu i te malosi” kae ka “fakaaloalogina” latou. (Salamo 112:9) Ka fia‵fia eiloa a tino amio‵tonu o Ieova māfai ko ‵kilo atu ki fili katoa o Ieova ka fakatakavalegina.

18. Ka fakataunu pefea a pati fakaoti i te Salamo e 112?

¹⁸ “Ka lavea te mea nei ne tino agasala, ko ita ei latou; ka faka‵piko olotou mata i te takalialia, ko ‵galo atu ei latou; ko se toe ai ne olotou fakamoemoega ki te se gata mai.” (Salamo 112:10) A tino katoa kolā e tumau i te ‵teke atu ki tino o te Atua ka “‵galo atu” ona ko te lotou loto ma‵sei mo te takalialia. Ka fakaseai atu latou fakatasi mo te lotou manakoga ke fakagata aka te ‵tou galuega māfai ko oko mai te ‘fakalavelave lasi.’​—Mataio 24:21.

19. Se a te mea e ‵tau o tali‵tonu tatou ki ei?

¹⁹ E mata, ka aofia koe i tino fia‵fia kolā ka ‵sao atu i te manumaloga sili tenā? Io me kafai e malolo atu koe ona ko masaki io me ko te tulaga matua a koi tuai o palele atu te lalolagi a Satani tenei, e mata, ka aofia koe i “tino amio‵tonu” kolā ka toe faka‵tu aka? (Galuega 24:15) Ao, e mafai o fai koe penā māfai e tumau koe i te fakatuanaki ki te taulaga togiola a Iesu kae fakaakoako ki a Ieova, e pelā mo tino kolā e fakasino atu ki ei te “tino” amiotonu telā e faipati ki ei te Salamo e 112. (Faitau te Efeso 5:​1, 2.) Ka fakamautinoa aka eiloa ne Ieova me ka se “fakapuli” eiloa ne ia a tino konei fakatasi mo olotou faifaiga. Ka masaua kae alofagina faeloa latou ne Ieova ki te se-gata-mai.​—Salamo 112:​3, 6, 9.

[Fakamatalaga mai lalo]

Fesili ke Mafaufau ‵Loto ki ei

• Ne a pogai e ‵tau ei o ka‵laga atu tatou “Aleluia”?

• Ne a atiakaga i aso nei ne fai ei ke fia‵fia malosi a Kelisiano ‵tonu?

• Se a te vaegā tino fai meaalofa e fiafia ki ei a Ieova?

[Ata i te itulau e 25]

Ke fakatumau te tulaga amiotonu o tatou i mua o te Atua, e ‵tau o fakatuanaki tatou ki te toto maligi o Iesu

Ata i te itulau e 26]

A meaalofa kolā e tuku atu mo te lotomalie e aoga i taimi o fakalavelave ‵tupu fakafuasei mo te tufatufaatuga o tusi faka-te-Tusi Tapu