Sa Tukugina se Avanoa mō te Tiapolo

“Sa tukugina se avanoa mō te Tiapolo.”​—EFESO 4:​27.

1. Kaia e fakalotolotolua ei a tino e tokouke me e ola tonu te Tiapolo?

NE MAFAU‵FAU a tino e tokouke i te fia o senitenali me i te Tiapolo se mea ola telā e isi ne ana sau, ana matikao vae mo lima, e kofukofu ki se laugatu ‵kula kae fakaaogā ne ia se foka ke ‵pei atu ei a tino ma‵sei ki loto i te afi ‵ka ulaula. E se ‵lago atu te Tusi Tapu ki te manatu tenā. Kae e mautinoa eiloa me ko oti ne fai ne vaegā fakamatalaga ‵se penā, a te fia miliona o tino ke fakalotolotolua ki te ola tonu o te Tiapolo io me e mafau‵fau latou me i te tugāpati tenā e fakasino atu fua ki te masei i loto i te tino.

2. Ne a nisi fakamatalaga ‵tonu i te Tusi Tapu e uiga ki te Tiapolo?

² E tuku mai ne te Tusi Tapu a fakamaoniga kolā e lavea ki mata mo fakatalitonuga manino me e ola tonu te Tiapolo. Ne lavea ne Iesu Keliso a ia i te koga o agaga i te lagi kae ne faipati foki ki a ia i te lalolagi nei. (Iopu 1:6; Mataio 4:​4-​11) E tiga eiloa e seki fakaasi mai i te Tusi Tapu a te igoa muamua o te agaga tenei, ne fakaigoa a ia ki te Tiapolo (ko tena uiga “Se Tino Fatufatu”) me ne fatufatu ne ia te Atua. E fakaigoa foki a ia ki a Satani (ko tena uiga se “Tino ‵Teke”), ona ko te mea ne ‵teke atu a ia ki a Ieova. E fakasino atu foki ki a Satani te Tiapolo e pelā me ko te “gata taumua,” kāti me ne fakaaogā ne ia se gata ke fakaloiloi ei a Eva. (Fakaasiga 12:9; 1 Timoteo 2:​14) E lauiloa foki a ia e pelā me ko ‘te tino masei.’​​—Mataio 6:​13.a

3. Se a te fesili ka mafau‵fau tatou ki ei?

³ E pelā me ne tavini a Ieova, e se ma‵nako eiloa tatou ke fakaakoako atu i so se auala ki a Satani, te fili sili o te Atua tonu e tokotasi. Telā la, e ‵tau o faka‵logo tatou ki pati polopoloki a te apositolo ko Paulo: “Sa tukugina se avanoa mō te Tiapolo.” (Efeso 4:​27) Ne a nisi uiga o Satani kolā e se ‵tau o fakaakoako atu tatou ki ei?

Ke mo a ma Fakaakoako Atu ki te ‵Toe Tino Gutu Fatufatu

4. Ne fatufatu pefea ne ‘te tino masei’ a te Atua?

⁴ E ‵tau eiloa o fakaigoa te Tiapolo ki ‘te tino masei’ me i a ia se tino gutu fatufatu. A te gutu fatufatu, se faiga o se fakamatalaga ‵se, masei, kae matagā e uiga ki se tino. Ne fakatonu atu te Atua ki a Atamu: “Kae tapu koe e kai ki fuaga o te lakau telā e fai ne ia te tino ke iloa te ‵lei mo te masei. E se ‵tau eiloa mo koe o kai ki fuaga o te lakau tenā, me kafai e kai koe ki ei, a koe e mate eiloa i te taimi tenā.” (Kenese 2:​17) Ko oti ne fakailoa atu ki a Eva e uiga ki te fakatonuga tenei, kae ne fai atu te Tiapolo ki tou fafine e auala i se gata: “A koulua e se ‵mate. A te Atua ne fai atu penā, me e iloa ne ia me kafai e ‵kai koulua ki fuaga o te lakau tenā, ko koulua ka ‵pau mo te Atua, ka iloa foki ei ne koulua te mea ‵lei mo te mea masei.” (Kenese 3:​4, 5) A te mea tenā se fakamaseiga matagā ‵ki eiloa o Ieova te Atua!

5. Kaia ne ‵tau ei o fakasala a Siofilisi mō te gutu fatufatu?

⁵ Ne fakatonu atu ki te kau Isalaelu, penei: “Sa fakasalalaugina ne tala ‵loi e uiga ki te suā tino.” (Levitiko 19:16) Ne fai atu te apositolo ko Ioane e uiga ki se tino gutu fatufatu i ana aso: “Ko oti ne tusi atu ne au se tusi toetoe ki te ekalesia; ka ko Siofilisi, telā e manako ke fai mo olotou takitaki, e se fia fakalogo eiloa ki aku muna konei e fai atu. Telā la, kafai e oko atu au, e fakamasaua katoa ne au ana mea ne fai: ko mea ma‵sei katoa kolā ne faipati ne ia e uiga mō matou, e pelā foki mo ana tala ‵loi ne fai!” (3 Ioane 9, 10) Ne fatufatu ne Siofilisi a Ioane kae ne ‵tau eiloa o fakasala e ‵tusa mo tena mea ne fai. E mata, e isi se Kelisiano alofa fakamaoni e manako o fai pelā mo Siofilisi kae fakaakoako atu ki te ‵toe tino gutu fatufatu, ko Satani?

6, 7. Kaia e ma‵nako ei ke ‵kalo tatou keatea mai te fatufatu o so se tino?

⁶ E masani eiloa o fai sāle atu a pati fakamasei mo ‵losiga ‵se ki tavini a Ieova. “Ka ko faitaulaga sili mo faiakoga o te Tulafono ne ‵maka atu ki mua, o fakamalosi te lotou mau e uiga ki a Iesu.” (Luka 23:10) Ne taku fakamasei a Paulo ne te Faitaulaga Sili ko Anania mo nisi tino aka. (Galuega 24:​1-8) Kae ne taku mai foki i te Tusi Tapu e uiga ki a Satani e pelā me ko “te tino telā ne ‵moli ne ia o‵tou taina . . . , i mua o te Atua o ‵moli i te ao mo te po ke sala latou.” (Fakaasiga 12:10) A taina kolā ne taku fakamaseigina ko Kelisiano fakaekegina i te lalolagi i aso fakaoti konei.

⁷ E se ‵tau eiloa mo se Kelisiano o fakamasei so se tino io me taku atu a fakamaseiga ‵loi. Kae, e mafai eiloa o tupu te mea tenā māfai e se katoatoa i a tatou a fakamatalaga ‵tonu a koi tuai o tuku atu se molimau masei e uiga ki se tino. Mai lalo i te Tulafono faka-Mose, a te taku atu o fakamatalaga ‵loi mo te iloa tonu e mafai o iku atu ki te mate o te tino fakamasei. (Esoto 20:16; Teutelonome 19:​15-​19) E se gata i ei, e aofia i mea kolā e takalialia ki ei a Ieova ko “te molimau fai tala ‵loi.” (Faataoto 6:​16-​19) E mautinoa eiloa me e se fia fakaakoako atu tatou ki te tino telā ne māfua mai i ei te gutu fatufatu mo taku fakamaseiga.

Ke ‵Teke Atu ki Auala o te Tino Tatino i te Kamataga

8. Se a te auala ne fai ei te Tiapolo mo fai se “tino tatino eiloa mai te kamataga”?

⁸ A te Tiapolo se tino tatino. Ne fai mai Iesu: “A ia se tino tatino eiloa mai te kamataga.” (Ioane 8:​44) I tena taumafaiga muamua ke ‵fuli keatea a Atamu mo Eva mai te Atua, ne fai ei Satani mo fai se tino tatino. Ne fai ne ia ke ‵mate te tauavaga muamua mo lā tama‵liki. (Loma 5:​12) Mafaufau la me ne fakasino atu te faiga tenei ki se tino e tokotasi, kae e se ki te masei.

9. E pelā mo te mea e fakaasi mai i te 1 Ioane 3:​15, e mafai pefea o fai tatou e pelā me ne tino tatino?

⁹ E fai mai se tulafono e tasi mai Tulafono e Sefulu kolā ne tuku atu ki te kau Isalaelu: “Sa tatino.” (Teutelonome 5:​17) I te fakasino atu ki Kelisiano, ne tusi mai te apositolo ko Petelu: “Ke mo a se tino o koutou e fakapuapuagatia ona ko te tatino.” (1 Petelu 4:​15) Telā la, e pelā me ne tavini a Ieova, e se ‵tau lele eiloa o tatino tatou. Kae e mafai eiloa o nofo sala tatou i mua o te Atua māfai e takalia‵lia tatou ki se taina Kelisiano kae e fia tamate foki ki a ia. Ne tusi mai te apositolo ko Ioane: “So se tino e ita ki so se tino, ko tona uiga se tino tatino; kae e iloa ne koutou i te tino tatino, e se nofo i a ia te ola se gata mai.” (1 Ioane 3:​15) Ne fakatonu atu ki te kau Isalaelu: “Sa nofo mo te loto ita ki te suā tino [io me ko tou taina].” (Levitiko 19:17) Talosia ke faka‵lei fakavave ne tatou so se fakalavelave i te vā o tatou mo ‵tou taina tali‵tonu, ko te mea ke se fakamasei ne te tino tatino ko Satani te ‵tou vā fealofani faka-Kelisiano.​​—Luka 17:​3, 4.

Ke ‵Teke Atu ki te Pule o te Loi

10, 11. Ne a mea e ‵tau o fai ne tatou ko te mea ke ‵teke katoatoa tatou ki te pule o te loi, ko Satani?

¹⁰ A te Tiapolo se tino loi. Ne fai mai Iesu: “Kafai e faipati ki se muna loi, ko ana pati eiloa konā e faipati ki ei; me i a ia se tino loi, ka ko te tamana foki eiloa o tino ‵loi.” (Ioane 8:​44) Ne pati loi a Satani ki a Eva, kae ne vau Iesu ki te lalolagi nei o molimau ki te munatonu. (Ioane 18:37) Kafai e ‵teke malosi atu ki te Tiapolo e pelā me ne soko o Keliso, e se mafai ne tatou o pati ‵loi kae amio faitogafiti. E ‵tau eiloa mo tatou o “fai‵pati ki te mea tonu.” (Sakalia 8:​16; Efeso 4:​25) E fakamanuia eiloa ne ‘Ieova te Atua fakamaoni’ ana Molimau fakamaoni. E se ‵tau lele eiloa o sui ne tino amio ma‵sei a ia.​​—Salamo 31:5; 50:16; Isaia 43:10.

¹¹ Kafai e fakatāua ne tatou ‵tou saolotoga faka-te-agaga mai i loi a Satani, ka taofi ‵mau eiloa tatou ki te Lotu Kelisiano, ko “te Ala tonu.” (2 Petelu 2:2; Ioane 8:​32) E aofia i akoakoga faka-Kelisiano katoa “te ‵tonuga o te tala ‵lei.” (Kalatia 2:​5, 14) E fakalagolago eiloa te ‵tou fakaolataga ki te ‵tou “tumau i te mea tonu”​​—te tautali atu ki ei mo te ‵teke atu ki te tamana o tino ‵loi.​​—3 Ioane 3, 4, 8.

Ke ‵Teke Atu ki te ‵Toe Aposetate Sili

12, 13. E ‵tau o pefea ‵tou faifaiga ki aposetate?

¹² A te tino faka-te-agaga telā ne fai mo fai te Tiapolo ne nofo muamua i te munatonu. “Kae ne seki tumau i te munatonu,” muna a Iesu, “me e seai se munatonu e i loto i a ia.” (Ioane 8:​44) A te ‵toe aposetate sili tenei ne kausaki atu ki se auala matagā telā e ‵teke atu ki ‘te Atua o te munatonu.’ Ne ‵tō atu a nisi Kelisiano i te senitenali muamua ki “te malei a te Tiapolo,” kāti ne fai latou mo ana tavini ona ko te takitaki ‵se mo te ‵tō atu keatea o latou mai te munatonu. Telā la, ne fakamalosi atu a Paulo ki tena taugasoa ko Timoteo ke fakatonutonu atu latou i te loto maulalo ko te mea ke mafai o toe faka‵lei aka ei latou i te feitu faka-te-agaga kae fakasaoloto foki mai te malei a Satani. (2 Timoteo 2:​23-​26) E tonu, e sili atu i te ‵lei māfai e taofi ‵mau ki te munatonu kae ke mo a eiloa ma ‵lave tatou i kilokiloga fakaaposetate.

¹³ Ona ko te fakalogo‵logo ki te Tiapolo kae e se ‵teke atu ki ana loi, ne fai ei te tauavaga muamua mo fai ne aposetate io me ne tino ‵teke. Telā la, e mata, e ‵tau o fakalogo‵logo tatou ki aposetate, faitau olotou tusi, io me iloilo aka olotou fakamatalaga i te Internet? Kafai e a‵lofa tatou ki te Atua mo te munatonu, ka se fai eiloa tatou penā. E se ‵tau eiloa o talia ne tatou a aposetate ki loto i ‵tou fale io me e fakatalofa atu ki a latou, me i vaegā faifaiga penā ka fai ei tatou mo ‘olotou taugasoa i te faiga o mea ma‵sei e fai ne latou.’ (2 Ioane 9-​11) Ke na taumafai eiloa ke mo a ma ‵tō atu tatou ki amioga faitogafiti a te Tiapolo mai te tiaki o “te Ala tonu” faka-Kelisiano ke tau‵tali atu ki faiakoga ‵loi kolā e taumafai o “aumai ne latou a akoakoga fakamasei olaga mo akoakoga sē ‵tonu” kae ‘fakaaogā a tala ‵fatu ki a tatou.’​​—2 Petelu 2:​1-3.

14, 15. Se a te polopolokiga ne tuku atu ne Paulo ki toeaina mai Efeso mo tena taina tavini ko Timoteo?

¹⁴ Ne fai atu a Paulo ki Kelisiano mai Efeso: “Ke tausi koutou ne koutou eiloa, ke tausi foki ne koutou a te lafu telā ne tuku atu ne te Agaga Tapu ke onoono faka‵lei koutou ki ei. Ne fakatu ne ia ke fai foki koutou mo tausi mamoe ki te ekalesia a te Atua, telā ne fakatu i te mate o tena tama tonu. I toku iloa, kafai e teka au keatea mo koutou, e uke a luko ka o‵mai o fakatasi mo koutou. Kae ka ‵fulu faka‵ma ne latou a te lafu. Ka oko mai foki a te taimi telā ka isi ne tino mai i a koutou ka fai‵pati ki te muna loi, o takitaki a tino tali‵tonu ke tau‵tali i a latou.” (Galuega 20:​28-​30) E seki leva, ne ‵sae aka a vaegā aposetate penā kae “fai‵pati ki te muna loi.”

¹⁵ Kāti ko te 65 T.A., ne fakamalosi atu ei te apositolo ki a Timoteo ke “akoako tonu eiloa ne ia a te munatonu.” Ne tusi atu a Paulo: “Ke faka‵mao koe mo muna faka te lalolagi mo faipatiga sē aogā, me takitaki ne latou a tino ke ‵mao mai te Atua. Ko olotou pati foki e pelā mo se mea ‵pala e kai ne ia te ‵kano. E tokolua olotou faiakoga e igoa ki a Umenio mo Fileto, kolā ne tiaki ne laua a te mea tonu, ka ko kosu ne laua te fakatuanaki o nisi Kelisiano i a lā muna pelā, i te toetu se mea ko leva ne tupu.” Ko oti ne kamata o ‵sae aka a uiga aposetate! Ne toe fakaopoopo mai Paulo: “Ka ko te fakavae mautakitaki telā ne fakatakato ne te Atua, e se mafai eiloa o fakagasuegina.”​​—2 Timoteo 2:​15-​19.

16. Faitalia te faitogafiti o te ‵toe aposetate sili, kaia e mafai ei o a‵lofa fakamaoni tatou ki te Atua mo tena Muna?

¹⁶ Ne masani o fakaaogā ne Satani a aposetate i tena taumafai ke fakamasei aka te tapuakiga tonu​​—kae ne seki iku manuia eiloa a ia. Kāti i te tausaga ko te 1868, ne kamata ei o iloilo faka‵lei aka ne Siale Taso Lasalo a akoakoga a lotu i Lotu Kelisiano ‵Se kolā ko leva ne taliagina kae ne maua atu i ei a fakamatalaga ‵se i te Tusi Tapu. Ne kamata o fakatu aka ne Lasalo mo nisi tino kolā ne ‵sala atu ki te munatonu, se potukau sukesuke ki te Tusi Tapu i Pittsburgh, i Pennsylvania, i te Iunaite Sitete o Amelika. I tausaga toeitiiti kae kātoa te 140 talu mai te taimi tenā, ko oti ne momea aka te iloaga o tavini a Ieova mo te lotou a‵lofa ki te Atua mo tena Muna. Faitalia te faitogafiti o te ‵toe aposetate sili, a te mataala i te feitu faka-te-agaga o te tavini fakamaoni kae poto, e fesoasoani atu ei ki Kelisiano ‵tonu konei ke tumau i te a‵lofa fakamaoni ki a Ieova mo tena Muna.​​—Mataio 24:45.

Ke mo a Eiloa ma Talia te Pule o te Lalolagi ke Sili Atu i a Koe

17-19. Se a te lalolagi telā e i lalo i te pule a te Tiapolo, kae kaia e se ‵tau ei o a‵lofa tatou ki ei?

¹⁷ A te suā auala telā ne taumafai a Satani ke ‵lave tatou i ei ko te fakamalosiga o tatou ke a‵lofa ki te lalolagi tenei​​—ko te lalolagi o tino amio sē ‵tonu kolā e ‵vae keatea mai te Atua. Ne taku ne Iesu a te Tiapolo ki “te aliki masei o te lalolagi” kae toe fai mai foki: “Kae e se sili atu tona malosi i a au.” (Ioane 14:30) Ke mo a eiloa ma sili atu a Satani i a tatou! E tonu, e iloa ne tatou me i “te lalolagi kātoa ko i lalo i te pule a te Tino Masei [tenā].” (1 Ioane 5:​19) Telā la, ne mafai o ofo atu ne te Tiapolo ki a Iesu a “malo o te lalolagi” māfai e fai ne ia se vaegā tapuakiga aposetate fua e tasi​​—se mea telā ne ‵teke katoatoa atu ki ei te Tama a te Atua. (Mataio 4:​8-​10) A te lalolagi telā e pule atu ki ei a Satani e takalialia ki soko o Keliso. (Ioane 15:​18-21) E se tioa eiloa o polopoloki mai te apositolo ko Ioane ke mo a ma a‵lofa tatou ki te lalolagi!

¹⁸ Ne tusi mai a Ioane: “Sa tuku otou loto ki te lalolagi io me ko so se mea faka te lalolagi. Kafai e a‵lofa koutou ki te lalolagi, ko tona uiga e se a‵lofa koutou ki te Tamana telā e i loto i a koutou. Konei katoa a mea e taku ko mea faka te lalolagi: ko manakoga agasala, ko mea e matea ne tino kae ma‵nako ki ei, mo mea katoa i te lalolagi nei kolā e fakamata‵mata ki ei a tino. E seai eiloa se mea o mea konei e māfua mai i te Tamana; e māfua katoa mai i te lalolagi. A te lalolagi mo mea katoa i ei kolā e ma‵nako ki ei a tino e palele atu katoa; ka ko te tino telā e fai ne ia a te mea e loto ki ei a te Atua e ola ki te se-gata-mai.” (1 Ioane 2:​15-​17) E se ‵tau o a‵lofa tatou ki te lalolagi, me e foliga gali atu te vaegā olaga i ei ki te foitino agasala kae e ‵teke katoatoa atu i ei ki tulafono a Ieova te Atua.

¹⁹ Kae e a māfai e maua atu te alofa ki te lalolagi tenei i ‵tou loto? Ko ‵tau ei o na ‵talo atu tatou mō te fesoasoani o te Atua ke manumalo tatou i te alofa tenei mo manakoga faka-te-foitino kolā e olo tasi mo ia. (Kalatia 5:​16-​21) E mautinoa eiloa me ka taumafai tatou “ke mo a foki ma pisia se tino i amioga se ‵lei faka te lalolagi” māfai e masaua ne tatou me i “malosi ma‵sei faka te tiapolo” ko “te malosi o te lalolagi” telā e pule atu ki te lalolagi o tino amio sē ‵tonu.​​—Iakopo 1:​27; Efeso 6:​11, 12; 2 Kolinito 4:4.

20. Kaia e mafai ei o fai atu me i a tatou “e se ne tino o te lalolagi”?

²⁰ Ne fai mai Iesu e uiga ki ana soko: “E se ne tino o te lalolagi latou, e penei foki mo au e se se tino o te lalolagi.” (Ioane 17:16) E taumafai eiloa a Kelisiano fakaekegina mo olotou taugasoa tukugina atu ke tumau latou i te ‵mā i mea tau amioga mo te feitu faka-te-agaga, i te ‵vae keatea mai te lalolagi tenei. (Ioane 15:19; 17:​14; Iakopo 4:4) E takalialia te lalolagi amio sē tonu tenei ki a tatou me e ‵vae keatea tatou mai i ei kae e fai foki tatou mo ‘tino talai o te amiotonu.’ (2 Petelu 2:5) E tonu, e ola tatou i tafa o tino o te lalolagi, kolā e aofia i ei a tino finalalolagi, tino mulilua, tino ofa tulafono, tino ifo ki tupua, tino kai‵soa, tino pati ‵loi, mo tino ko‵nā. (1 Kolinito 5:​9-​11; 6:​9-​11; Fakaasiga 21:8) Kae e se manava ne tatou ki loto a “te agaga o te lalolagi,” me e se mafai o fakamalosigina tatou ne te agaga fai agasala tenei.​​—1 Kolinito 2:​12.

Sa Tuku Atu se Avanoa mō te Tiapolo

21, 22. E mafai pefea o fakagalue aka ne koe te fakatonutonuga a Paulo i te Efeso 4:​26, 27?

²¹ I lō te fakamalosigina ne “te agaga o te lalolagi,” e takitakigina tatou ne te agaga o te Atua, telā e fakamalosi aka i loto i a tatou a vaegā uiga pelā mo te alofa mo te loto pulea. (Kalatia 5:​22, 23) E fesoasoani mai a uiga konei i te ‵teke atu ki osomaiga a te Tiapolo ki te ‵tou fakatuanaki. E manako a ia ke “kaitaua [tatou]; me e ‵taki fua ne ia koe ki fakalavelave” kae fakamalosi mai te agaga o te Atua ke “sa manavase io me kaitaua.” (Salamo 37:8) E tonu, e mafai o kaitaua tatou i nisi taimi i se mea ‵tau, kae e polopoloki mai a Paulo: “Kafai koe e kaitaua, ke se takitaki koe ne tou kaitaua ki te agasala; kae sa nofo mo tou kaitaua i te aso kātoa. Sa tukugina se avanoa mō te Tiapolo.”​​—Efeso 4:​26, 27.

²² E mafai o iku atu ‵tou kaitaua ki te faiga o se agasala māfai e tumau eiloa tatou i te tulaga tenā. A te mauaga o se vaegā lagonaga penei e mafai o tuku atu i ei se avanoa mō te Tiapolo ke fakamalosi aka ne ia a kinauga i te fakapotopotoga io me ke aofia tatou i te faiga o amioga ma‵sei. Telā la, e ‵tau o faka‵lei fakavave ne tatou a fakalavelave i te vā o tatou mo nisi tino i se auala telā e talia ne te Atua. (Levitiko 19:​17, 18; Mataio 5:​23, 24; 18:​15, 16) Telā la, ke na takitakigina tatou ne te agaga o te Atua, mai te fakaasi atu o te loto pulea kae ke mo a ma talia ne koe te kaitaua ‵tau ke iku atu ki se tulaga masei, ko te loto ita, te fakasauā, mo te takalialia.

23. Ne a fesili ka mafau‵fau tatou ki ei i te suā mataupu?

²³ Ko oti ne suke‵suke tatou ki nisi uiga o te Tiapolo kolā e se ‵tau o fakaakoako atu tatou ki ei. Kae kāti koi mafau‵fau a nisi tino fai‵tau: E mata, e ‵tau o ma‵taku tatou ki a Satani? Kaia e fakamalosi aka ei ne ia te fakasauāga o Kelisiano? Kae e mafai pefea ne tatou o ‵kalo keatea mai i te Tiapolo mo ana taumafaiga ke pule mai ki a tatou?

[Fakamatalaga mai lalo]

Se a Tau Tali?

• Kaia e se ‵tau lele eiloa o fakamasei ne tatou so se tino?

• E ‵tusa mo te 1 Ioane 3:​15, e mafai pefea o ‵kalo keatea tatou mai te fai mo fai ne tino tatino?

• E ‵tau o pefea te ‵tou kilokiloga ki aposetate, kae kaia?

• Kaia e se ‵tau ei o a‵lofa tatou ki te lalolagi?

[Ata i te itulau e 14]

Ka se talia eiloa ne tatou ke fakamasei ne te Tiapolo te ‵tou fealofani faka-Kelisiano