Te Mate​—Se Mea Fakamataku ‵Ki!

“MAI te taimi e fanau mai ei se tino, e isi faeloa se lagonaga me e mafai o mate a ia i so se taimi,” ne tusi mai te tino tusitala mai Peletania ko Arnold Toynbee. Ne toe fai mai a ia: “Kae se mea tonu eiloa me ka ‵mate fakamuli a tino katoa.” Se mea fakafanoanoa ‵ki māfai ko mate se kāiga pele io me se taugasoa pili!

Ne fai faeloa te mate mo fai se mea fakamataku ‵ki ki tino i te fia afe o tausaga ko ‵teka. E oko mai te lagonaga me e seai se aogā o tatou māfai ko mate se tino telā e pele ki a tatou. E seai eiloa se tino e sao mai te lagonaga fanoanoa tenei. “E fai ne te fanoanoa ke liu tama‵liki tatou​​—⁠faitalia me e pefea te ‵lei o ‵tou akoakoga mo ‵tou telega. E seai eiloa se mea e iloa ne toe tino ‵poto.” Konā eiloa a pati ne tusi mai ne se tino tusitala i te 19 o senitenali. E fai tatou pelā me ne tamā tama‵liki​​—⁠ko se mafai o maua se fesoasoani, kae se mafai foki o faka‵lei aka te fakalavelave. E se mafai foki eiloa ne tino mau‵mea mo tino pule o fakafoki mai te mea telā ne galo. Ko se mafai o maua ne tino ‵poto mo tino ne a‵koga faka‵lei a tali fakafia‵fia. E ‵tagi a tino ma‵losi, penā foki loa mo tino vāi‵vāi.

Ne maua ne te tupu ko Tavita i Isalaelu mua, se vaegā fanoanoa penā i te taimi ne mate ei tena tama ko Apisaloma. I te taimi ne logo ei a ia i te tala e uiga ki tena mate, ne tagi te tupu kae fai atu: “Oi aue taku tama! Taku tama ko Apisaloma! Apisaloma e, taku tama! E sili te ‵lei moi ne mate au kae se ko koe taku tama! Apisaloma e, taku tama!” (2 Samuelu 18:33) Ne seki mafai eiloa o fai ne se tupu malosi, telā ne pule atu ki ana fili ma‵losi, se mea, kae na ko te mafaufau fua me ko ia telā ko takavale i te ‘‵toe fili, ko te mate,’ i lō tena tama.​​—⁠1 Kolinito 15:⁠26.

E mata, e isi se faka‵leiga mō te mate? Kafai e isi, se a te fakamoemoega mō tino ‵mate? E mata, ka toe fetaui tatou mo ‵tou tino pele kolā ko oti ne ‵mate? Ka tuku mai ne te mataupu telā e ‵soko mai a tali mai te Tusi Tapu ki fesili konei.