Auala Tāua ke Fesokotaki Atu ei ki Tau Avaga

‘NE SEKI ‵tau eiloa o fai ne au a pati konā.’ ‘Ne seki maina faka‵lei aku pati.’ Kai penā aka eiloa ou lagonaga i te taimi ne taumafai ei koe o fesokotaki atu ki tau avaga? A te faiga o fesokotakiga se mea telā e ‵tau o ati aka ke apo se tino i ei. E pelā mo so se poto aka, e faigofie o apo malosi a nisi tino i ei, kae e tai faigatā tena faiga ki nisi tino. E tiga i ei, kafai e se apo malosi koe i ei, e mafai eiloa o iloa ne koe o fakaasi atu ou manatu i se auala ‵lei, ke fesokotaki atu ei i se auala magoi.

I nisi taimi, e fakamalosi ne tuu mo aganuu a faifaiga a tino ki olotou avaga. Kāti e fakamalosi atu ki tāgata penei, ‘Kafai koe se tagata, e se ‵tau o faipati malosi koe.’ E mafai o ‵kilo atu ki tāgata gutu fai‵pati e pelā me ne tino e laku tatela fua olotou pati kae seai ne olotou uiga. E tonu, e fai mai te Tusi Tapu: “A tino katoa e ‵tau ke vave o faka‵logo, kae ke fakatuatuai o fai‵pati.” (Iakopo 1:19) Kae e aogā talua a pati fakatonutonu konā ki tāgata mo fāfine kae e fakaasi mai i ei me e uke atu a nisi mea e aofia i te faiga o fesokotakiga i lō te faipati atu fua. E mafai o fai‵pati se tokolua i a laua eiloa i se vaitaimi, kae pefea la māfai e se fakalogologo te suā tino ki te suā tino? Kāti ka se mafai o maua se fesokotakiga tonu. A te vaega tāua o fesokotakiga, e pelā mo te mea e fakaasi mai i te tusi siki mai luga nei, ko te iloa ne koe o fakalogologo.

Te Fesokotaki e Aunoa mo te Faiga o Pati

I nisi fenua, e ‵tau mo fāfine a‵vaga o taofiofi olotou lagonaga ki a latou eiloa. A ko tāgata a‵vaga e ‵tau o se fia ‵saga atu ki mea tau te kāiga. I vaegā tulaga penā, e ‵numi ei te tauavaga me ne a mea e ma‵nako a laua taki tokotasi ki ei mai lalo i so se fakanofonofoga. E apo ‵ki a nisi fāfine i te matega o manakoga o olotou avaga kae gasue‵sue fakavave foki o fakataunu a mea konā. I vaegā tulaga penā, e fai a fesokotakiga a se tauavaga e aunoa mo te faiga o pati. E pelā mo te masani, a te vaegā fesokotakiga tenei e fai fua ne se tino e tokotasi. I te taimi e taumafai ei te fafine o matemate aka a mafaufauga mo lagonaga o tena avaga, seāseā ko fai ne se tagata a te mea tenā e uiga ki lagonaga o tena avaga.

E tonu, i nisi fenua, e taumafai a tāgata ke iloa ne latou a lagonaga o olotou avaga kae taumafai foki o fakama‵lie a mea konā. Kae i vaegā fenua foki eiloa penā, ka maua ne taki tauavaga e uke a mea aogā mai te faiga o fesokotakiga kolā e ‵lei atu.

Te Tāua o Fesokotakiga

A te fakaasiatuga o lagonaga ‵tonu e fakagata ei te se maina ‵lei mo te fakauiga ‵se o pati. I te fatoā okoatuga o te kau Isalaelu, ne faite ne matakāiga o Leupena, Kato mo te āfa o te matakāiga o Manase, kolā ne ‵nofo i te feitu ki saegālā o te vaitafe ko te Iolitana “se fatafaitaulaga lasi” i tafa o te Iolitana. Ne seki malamalama ‵lei a nisi matakāiga i te lotou mea tenā. Mai te mafaufau me i olotou taina i te suā feitu o te Iolitana ko fai ne latou a faifaiga ‵se faka-te-tapuakiga, ne fakatoka ei a matakāiga i te togālā o taua atu ki ‘tino ‵teke’ konā. Mai mua o olo atu latou ki te taua, ne uga atu ne latou se potukau ke fesokotaki atu ki matakāiga i te saegālā. Se faifaiga poto ‵ki tenā! Ne iloa aka ne latou me ne seki fakatu te fatafaitaulaga tenā ke ofo atu i ei olotou taulaga ‵sunu io me ne taulaga sē ‵tonu. I lō te fai penā, ne ma‵taku a matakāiga i te saegālā i te mea ma fai mai a nisi matakāiga ki a latou i aso fakamuli: “E seai se fekau a koutou ki te Aliki [ko Ieova].” Ne fai te fatafaitaulaga e pelā me se molimau i a latou e tapuaki atu foki ki a Ieova. (Iosua 22:​10-29) Ne fakaigoa ne latou te fatafaitaulaga ki a Molimau, kāti ke fai pelā me se molimau ki a latou me i a Ieova ko te Atua tonu.​—⁠Iosua 22:34.

Ne lotoma‵lie a nisi matakāiga ki olotou fakamatalaga, telā ne ‵fuli ei olotou mafaufauga ke taua atu ki matakāiga e lua mo te āfa konei. E tonu, ona ko fesokotakiga ‵tonu konei ne fai, ne taofi aka ei te taua. Fakamuli ifo, i te taimi ne ‵teke atu ei a Isalaelu ki a Ieova te Atua, te lotou avaga fakatusa, ne fai atu a ia me ka ‘faipati atu a ia ki olotou loto’ mo te alofa fakamagalo. (Hosea 2:14) Ma‵faga o fakaakoakoga gali mō taki tauavaga! E tonu, taumafai ke oko atu ki te loto o tau avaga ko te mea ke mafai o malamalama a ia i ou lagonaga. E tāua ‵ki te mea tenei maise māfai ko malosi ‵ki ou lagonaga. “E fai mai a nisi tino i pati e faigofie fua,” e pelā mo te mea e lavea ne Pattie Mihalik, se tino puke tala i te Iunaite Sitete, “kae e mafai foki o ‵loto ‵ki olotou uiga. E tigā eiloa e faigata o fakamatala atu a lagonaga ‵loto o nisi tino, e mafai o tāua fakafia atu a mea e iku mai i ei i lō tupe i te pagike.”

Tumau i te Faka‵leiakaga o Fesokotakiga

Kāti ka fai mai a nisi tino ‘ne seki ‵lei te ma kāiga mai te kamataga eiloa.’ Kae kāti ka fakaiku aka ne nisi tino ‘ko se mafai o toe faka‵lei aka te ma fakaipoipoga.’ E mafaufau a nisi tauavaga me ko se mafai o gasolo aka o ‵lei a lā fesokotakiga mai tua o te lā fakaipoipoga. Kae, ke mafaufau la ki tino e ola i fenua kolā e fai ne kāiga a fakatokaga ke avaga se tokolua. E tokouke a tino i fenua konā e ati aka ne latou se fesokotakiga ‵lei i te lotou olaga fakatauavaga.

I fenua ki te Saegālā, ne fakatoka ne se kāiga ke avaga se tokolua. Ne uga atu se ave fekau ke faimalaga atu i se malaga loa ke ‵sala atu ki se fafine ke avaga mo se tagata. Kae ne ati aka ne te tauavaga tenei, kolā ne ola i tausaga toeitiiti ko katoa te 4,000 ko ‵teka, te atamai i te faiga o fesokotakiga. Ne fetaui a te tagata ko Isaako mo te ave fekau pelā foki mo te fafine ka avaga mo ia, i te malae. “Ne fakamatala atu ne te [avefekau] ki a Isaako a mea katoa kolā ne fai ne ia.” E fai mai te tala i te Tusi Tapu e uiga ki te fakaipoipoga tenei: “Tenā ne puke mai ei ne Isaako a Lepeka ki loto i te faleie telā ne nofo sāle ei a Sala, tena matua, ko te mea eiloa ko fai mo fai tena avaga. Ne alofa Isaako ki a Lepeka.”​—⁠Kenese 24:​62-67.

Ke onoono me ne logo muamua a Isaako i te tala kātoa, “tenā” ne puke ei ne ia Lepeka mo fai tena avaga. A te avefekau se tavini fakamaoni telā ne tavini katoatoa atu ki a Ieova te Atua, telā ne tapuaki atu foki ki ei a Isaako. E isi eiloa ne pogai ‵lei ne ‵tau ei mo Isaako o talitonu ki te tagata tenei. Fakamuli ifo, ne “alofa” a Isaako ki a Lepeka, telā ne avaga ei laua.

E mata, ne ati aka ne Isaako mo Lepeka te atamai i te faiga o fesokotakiga? I te taimi ne avaga ei a te lā tama tagata ko Esau ki fāfine Heti e tokolua, ne sae aka ei se fakalavelave lasi ‵ki i te lotou kāiga. Ne fai atu faeloa a Lepeka ki a Isaako: “Au ko ‵fiu kae fi‵ta i avaga a Esau konei, ne fāfine fakaa‵tea. Kafai foki la e avaga a Iakopo [te lā tamaliki tagata foliki] ki tamafine Heti . . . , kaati la e ‵tau mo au o na mate.” (Kenese 26:34; 27:46) E manino ‵lei me ne fesokotaki faka‵lei atu a ia o fakaasi atu a mea e manavase a ia ki ei.

Ne fai atu a Isaako ki a Iakopo, te masaga o Esau, ke se avaga a ia ki se fafine Kanana. (Kenese 28:​1, 2) Ne manino ‵lei me ne talia ne Isaako te manatu o Lepeka. Ne manuia te fesokotakiga a te tauavaga tenei e uiga ki se fakalavelave faigata i te lotou kāiga, kae tuku mai i ei se fakaakoakoga ‵lei mō tatou i aso nei. Kae pefea la māfai e se lotoma‵lie se tauavaga ki se mea? Ne a mea e mafai o fai?

Māfai e se Lotoma‵lie Laua ki se Mea

Kafai e isi se mea e se lotoma‵lie fakatasi koulua mo tau avaga ki ei, ke se faka‵lei aka te mea tenā mai tou se faipati atu ki tau avaga. E fakaasi faka‵lei atu i te mea tenā se fekau tāua: A koe e se fiafia, kae e manako foki koe ke se fiafia tau avaga. Kae, kāti e se malamalama ‵lei tau avaga i ou manakoga mo lagonaga.

Kāti e ‵tau o fai‵pati faka‵lei koulua mo tau avaga e uiga ki ei. Kafai e tai faigatā eiloa te fakalavelave tenā, kāti e se se mea faigofie ke fai te mea tenā mo te filemu. Ne fe‵paki a mātua o Isaako, ko Apelaamo mo Sala, mo se fakalavelave tai faigatā. Ona ko Sala ne seki afu, ne tautali a ia i tuu mo aganuu o aso konā mai te tuku atu o tena tavini fafine, ko Hakala, e pelā me se avaga fakasalasala a tena avaga ko te mea ke fanau mai ne ia se tamaliki. Ne fanau ne Hakala te tamaliki tagata a Apelaamo, ko Isamaeli. Fakamuli ifo, ne faitama foki a Sala, kae ne fanau ne ia te tamaliki tagata a Apelaamo, ko Isaako. I te taimi ko se ū ei a Isaako, ne lavea ne Sala a Isamaeli e fakaitaita atu ki tena tamaliki tagata. Tela la, ona ko tena manavase e uiga ki tena tama, ne fakamalosi atu a Sala ki a Apelaamo ke ‵tuli a te tavini fafine tenā mo Isamaeli keatea. E tonu, ne fakaasi atu ne Sala ana lagonaga katoa mai te fesokotaki ‵tonu atu. Kae ne seki fiafia eiloa a Apelaamo ki te mea ne manako a ia ki ei.

Ne faka‵lei aka pefea te fakalavelave tenā? E fai mai te tala i te Tusi Tapu: “Ne fai atu te Atua ki a Apelaamo penei, ‘Sa manavase ki a Isamaeli mo tau tavini ko Hakala. Fai so se mea e fai atu ne Sala, me e māfua mai i a Isaako te lasi o tou gafa telā ne tauto atu ei au.’ ” Ne fakalogo a Apelaamo ki te fakatonuga a Ieova te Atua kae ne fai loa ne ia te mea tenā.​—⁠Kenese 16:​1-4; 21:​1-14.

Kāti ka fai mai koe, ‘Kafai e faipati mai te Atua ki a tatou mai te lagi, se mea faigofie fua ke faka‵lei aka te fakalavelave!’ Ko aumai ne te mea tenā tatou ki te suā auala ke faka‵lei aka ei a fakalavelave i te kāiga. E mafai o faka‵logo a taki tauavaga ki te Atua. E pefea la? Mai te fai‵tau fakatasi ki te Muna a te Atua kae talia a fakatonuga katoa kolā e fai mai i loto i ei me i a te Atua.​—⁠1 Tesalonia 2:⁠13.

Ne fai mai penei se fafine avaga Kelisiano apo: “I taimi e uke, kafai e vau se fafine avaga koi tai foliki ki a au mō se fesoasoani e uiga ki tena fakaipoipoga, e fesili atu au me e mata, e fai‵tau fakatasi laua mo tena avaga ki te Tusi Tapu. A te tokoukega o tino kolā e isi ne olotou fakalavelave i te kāiga e se fai sāle ne latou te mea tenā.” (Tito 2:​3-5) E mafai o maua ne tatou katoa a mea aogā mai tena kilokiloga. Ke fai‵tau fakatasi faeloa ki te Muna a te Atua i taimi katoa mo tau avaga. I te faiga penā, e “lagona” ei ne koe a pati a te Atua e uiga ki mea e ‵tau o fai ne koe i aso takitasi. (Isaia 30:21) Kae, ke fakaeteete i te mea tenei: Sa fakaaogā ne koe te Tusi Tapu ke ‵kini ne koe ki ei tau avaga, mai te fakasino atu faeloa ki tusi siki kolā e mafaufau koe me e se fakagalue ne tau avaga. Kae, ke taumafai o ‵sala ki auala kolā e mafai ei ne koulua tokolua o fakagalue aka a mea e fai‵tau koulua ki ei.

Kafai e taumafai koe o faka‵lei aka se fakalavelave tai faigata, kaia e se onoono ei koe ki te Watch Tower Publications Indexa e uiga ki te mataupu tenā? Kāti e tausi atu koe ki ou mātua kolā ko ma‵tua ‵ki, kae e fakalavelave atu te mea tenā ki tau fakaipoipoga. I lō te kinau e uiga ki mea kolā e ‵tau o fai mo mea e se ‵tau o fai ne tau avaga, kaia e se onoono fakatasi ei koulua ki te Index? Muamua la, ke onoono ki te ulutala “Parents [Mātua].” Kāti ka fia onoono koe ki tusi mai lalo i ulutala foliki, e pelā mo te “caring for aged parents [te tausi atu ki mātua ko ma‵tua].” Ke fai‵tau fakatasi ki mataupu kolā e fetaui ‵lei i tusi a Molimau a Ieova. Ka mafai o ofo malosi koe e uiga ki te uke o mea aogā e maua ne koulua mo tau avaga mai fakamatalaga kolā e fakavae ki te Tusi Tapu, kae kolā ko oti ne fesoasoani atu ki Kelisiano fakamaoni e tokouke.

A te onoono mo te fai‵tau fakatasi ki tusi konā ka fesoasoani atu ke iloa ne koulua te ata saukātoa o te lu fakalavelave. Ka maua foki i ei ne koe a tusi siki mo fuaiupu se siki mai i te Tusi Tapu kolā e fakaasi mai i ei a mafaufauga o te Atua. Ke ‵suke ki ei i te Tusi Tapu, kae fai‵tau fakatasi ki ei. E tonu, ka lagona i ei ne koe a pati a te Atua e uiga ki te fakalavelave telā e fakafeagai mo koe!

Ke Fakatumau a Fesokotakiga ‵Lei

E mata, ko oti ne taumafai koe o ‵tala aka se mataloa telā ko leva ne seki fakaaogā aka eiloa? Ka tagi‵tagi a inisisi o te mataloa kae fakamuli ka matala malielie mai ei. Kae pefea la te mataloa telā ne fakaaogā sāle kae ne fakaoela faka‵lei ana inisisi? E faigofie fua ke matala. E penā foki mo te mataloa o fesokotakiga. Kafai e fakamasani koe o fesokotaki atu faeloa kae fakaoela faeloa a inisisi o te mataloa o fesokotakiga ki te alofa faka-Kelisiano, ko faigofie ei ke fakaasi atu ne koe ou manatu faitalia te faigatā o te fakalavelave.

E ‵tau o isi se kamataga. E ui eiloa e manakogina a taumafaiga e uke i te kamataga ke fesokotaki atu, taumafai malosi ki ei. Ko mafai ei o maua ne koe se fesokotakiga fiafia mo tau avaga, telā ka iku atu i ei ki te mauaga o se malamalama tumau i a koulua.

[Fakamatalaga mai lalo]

[Ata i te itulau e 7]

Kafai ko fepaki mo se fakalavelave, e mata, ka ‵sala atu koe ki fakatakitakiga a te Atua?