Ko Toka Koe mō Tou Fakasaoga?

“Olo ki loto i te vaka mo tou kāiga katoa; ko iloa ne au me ko koe fua tokotasi i te lalolagi kātoa e amiotonu.”​—KENESE 7:1.

1. Se a te fakatokaga ne fai ne Ieova ke ‵sao ei a tino i aso o Noa?

NE AUMAI ne Ieova “te lolo ki te lalolagi ki tino ma‵sei” i aso o Noa, kae ne fai foki ne Ia se fakatokaga ke mafai ei o ‵sao ne nāi tino. (2 Petelu 2:5) Ne tuku atu ne te Atua tonu ki te tino amiotonu ko Noa a fakatonuga mautinoa e uiga ki te faitega o te vaka ke faka‵sao i ei a tino i te lolo lasi i te lalolagi kātoa. (Kenese 6:​14-16) E pelā mo te mea e fakamoe‵moe tatou ki ei mai se tavini fakamaoni a Ieova, “ne fai eiloa ne Noa a mea katoa kolā ne fakatonu atu ne te Atua.” E tonu, “ne fai” eiloa ne ia a mea katoa. A te fakalogo o Noa, se pogai e tasi tenā e ola ei tatou i aso nei.​—Kenese 6:22.

2, 3. (a) Ne ‵saga atu pefea a tino i aso o Noa ki te galuega a Noa? (e) Se a te loto talitonu ne maua ne Noa ke ulu atu ei a ia ki loto i te vaka?

² A te faitega o te vaka e se se galuega faigofie. E se taumate, ne ofo a tino e tokouke e uiga ki te galuega ne fai ne Noa mo tena kāiga. Kae ne seki fai ne te mea tenā ke tali‵tonu ei latou me ne faka‵na te lotou faka‵saoga ki te lotou ulu ki loto i te vaka tenā. Fakamuli loa, ne oko atu ei te kufaki o te Atua e uiga ki te lalolagi masei i aso konā ki tena tapulā.​—Kenese 6:3; 1 Petelu 3:20.

³ Mai tua o galuega ‵mafa ne fai ne Noa mo tena kāiga i te fia sefulu tausaga, ne fai atu ei a Ieova ki a Noa: “Olo ki loto i te vaka mo tou kāiga katoa; ko iloa ne au me ko koe fua tokotasi i te lalolagi kātoa e amiotonu.” Ona ko tena talitonu katoatoa ki muna a Ieova, “A ia mo tena avaga, mo ana tama‵liki mo olotou avaga, ne ulu ki loto i te vaka.” Ne ‵pono ne Ieova te mataloa ke puipui ei ana tino tapuaki. I te okomaiga o te Lolo ki te lalolagi, ne fai ei te vaka mo fai te fakatokaga fua e tasi a te Atua mō te faka‵saoga o tino.​—Kenese 7:​1, 7, 10, 16.

Mea e Tai ‵Pau i Aso o Noa mo ‵Tou Aso Nei

4, 5. (a) Se a te mea ne fakatusa ne Iesu ki te taimi o tena fakatasi mai? (e) Ne a mea e tai ‵pau ei a aso o Noa mo ‵tou aso nei?

⁴ “A te oko mai o te Tama a te Tagata, e pelā mo te mea ne tupu i aso o Noa.” (Mataio 24:37) Mai i ana pati konā, ne fakaasi mai ei ne Iesu me e ‵pau eiloa a tena fakatasi mai se lavea mo aso o Noa, kae ne fai eiloa penā. Maise eiloa talu mai te 1919, ne folafola atu ei se fekau telā e tai ‵pau mo te fekau ne folafola atu ne Noa, ki tino mai fenua katoa. Ne tai ‵pau eiloa a te kilokiloga a te tokoukega o tino mo te kilokiloga ne maua ne tino i aso o Noa.

⁵ E auala i te Lolo, ne gasuesue a Ieova o fakaseai atu te lalolagi “amioga fakasauā.” (Kenese 6:13) Me ne seki aofia a Noa mo tena kāiga i vaegā faifaiga fakasauā konā kae ne ‵saga loa o faite te vaka mo te filemu, ne faigofie ei o matea ne tino te mea tenā. E lavea foki ne tatou te mea tenā i aso nei. E lavea nei ne tino loto malamalama a ‘te mea ka tupu ki tino amio‵tonu mo te mea ka tupu ki tino ma‵sei; pelā foki ki te tino e tavini ki te Atua mo te tino e se fia tavini ki te Atua.’ (Malaki 3:18) A te fakamaoni, te atafai, te filemu, mo te ga‵lue malosi o Molimau a Ieova e tavae ne tino loto malamalama kae e faka‵kese ei ne uiga konei a tino o te Atua mai tino o te lalolagi. E ‵teke atu a Molimau ki faifaiga fakasauā katoa kae talia ke takitaki latou ne te agaga o Ieova. Tenā loa te pogai e fakamanuia ei latou ki te filemu mo te pogai e ‵sala atu ei latou ki te auala tonu.​—Isaia 60:17.

6, 7. (a) Se a te mea ne seki lavea ne tino i aso o Noa, kae e tai ‵pau pefea te mea tenā mo aso nei? (e) Ne a fakaakoakoga e fakaasi mai ei te ‵kese o Molimau a Ieova mo tino e tokouke?

⁶ Ne seki lavea ne tino i aso o Noa me ne ‵lago atu a te Atua ki a Noa kae ne gasuesue a ia e ‵tusa mo ana fakatonuga. Tela la, ne seki ‵saga tonu atu ei latou ki tena galuega talai kae gasue‵sue e ‵tusa mo tena fekau. Kae pefea la i aso nei? E ui eiloa te fia‵fia o tino e tokouke ki te galuega mo amioga a Molimau a Ieova, e se fia ‵saga tonu atu a te tokoukega o tino ki te tala ‵lei mo te fekau mai loto i te Tusi Tapu. E tavae ne tuakoi, tino ga‵lue, io me ko kāiga a uiga ‵gali o Kelisiano ‵tonu kae oti aka loa ko fai mai penei, “Moi ne se fai la latou mo fai ne Molimau a Ieova!” A te mea telā e se lavea ne tino konei me e fakaasi atu ne Molimau a uiga e pelā mo te alofa, te filemu, te mataalofa, te aga‵lei, te loto maulalo, mo te loto pulea, ona ko te mea e takitaki latou ne te agaga tapu o te Atua. (Kalatia 5:​22-25) E ‵tau o ‵lago atu a mea konei ki te lotou fekau telā e folafola atu.

⁷ E pelā mo te faitega ne Molimau a Ieova se Kingdom Hall i Lusia. Ne ofo malosi se tagata telā ne faipati atu ki se tino galue i konā: “Ko oko loa te ‵kese o te koga galue tenei​—e seai ne tino ‵pusi, e seai ne pati ma‵sei, kae e seai ne tino konā! E mata, a koe se Molimau a Ieova?” Ne fesili atu te tino galue, “Kafai e tali atu au ikai, e mata, ka talitonu koe ki a au?” Ne tali fakavave mai te tagata tenā, “Ikai.” I se isi fa‵kai i Lusia, ne ofo malosi te pule o te fa‵kai tenā i te taimi ne lavea ei ne ia a Molimau e faite te lotou Kingdom Hall fou. Ne fai mai a ia me e ui loa ne kilo atu a ia ki lotu katoa me e ‵pau fua, kae mai tua o te laveaga ne ia o te ga‵lue fakamaoni o Molimau a Ieova, ne ‵fuli ei tena kilokiloga. Konei fua a fakaakoakoga e lua e fakaasi mai ei te ‵kese o tino o Ieova mai tino kolā e se tau‵tali ki fakatakitakiga i te Tusi Tapu.

8. Se a te mea e fakalagolago ki ei te ‵tou ‵sao atu i te fakaotiga o te lalolagi masei tenei?

⁸ I aso fakaoti o te “lalolagi taumua” telā ne fakaseai atu i te Lolo, ne folafola atu eiloa ne Noa a “te amiotonu.” (2 Petelu 2:5) I aso fakaoti konei o te olaga tenei, e fakailoa atu ne tino o Ieova a tulaga amio‵tonu o te Atua kae folafola atu foki ne latou te tala ‵lei e uiga ki te mafai o sao atu ei ki loto i te lalolagi fou. (2 Petelu 3:​9-13) E pelā eiloa mo te tausiga o Noa mo tena kāiga kolā ne ma‵taku ki te Atua i loto i te vaka, e fakalagolago eiloa a te ‵sao atu o tino taki tokotasi i aso nei ki te lotou fakatuanaki mo te lotou ‵kau fakatasi mo te vaega o te fakapotopotoga a Ieova i te lalolagi nei.

E Manakogina te Fakatuanaki mō te Faka‵saoga

9, 10. Kaia e tāua ei ke maua te fakatuanaki māfai e fia ‵sao tatou i te gataga o te olaga telā e pule ki ei a Satani?

⁹ Ne a mea e ‵tau o fai ne se tino ke sao atu ei i te fakaseaiga mautinoa o te lalolagi telā e pule ki ei a Satani? (1 Ioane 5:19) E ‵tau o iloa muamua ne ia te manakoga mō se puipuiga. Ko fakaaogā ei ne ia te puipuiga tenā. Ne fai eiloa ne tino i aso o Noa a mea masani o te olaga kae seki lavea ne latou te manakoga ke puipui ei latou mai te fakalavelave telā ka oko mai. E isi aka foki se isi mea ne seki maua ne latou​—ko te fakatuanaki ki te Atua.

¹⁰ I te suā feitu, ne iloa ne Noa mo tena kāiga a te manakoga ke maua ne latou se puipuiga mo te lotou faka‵saoga. Ne fakatuanaki foki latou ki te Pule Sili o te lagi mo te lalolagi, ko Ieova te Atua. “E seai se tino e mafai ne ia o fakafiafia te Atua e aunoa mo te fakatuanaki,” ko pati a te apositolo ko Paulo, “so se tino e vau ki te Atua e ‵tau mo ia o fakatuanaki me iai te Atua, kae tuku atu foki ne ia te taui ‵lei ki tino kolā e salasala ki a ia.” Ne toe fai mai foki a Paulo: “Ko te fakatuanaki foki ne ala ei a Noa o lagona ne ia te fakatonuga a te Atua i mea ka ‵tupu i aso mai mua, kolā e se mafai o matea ne ia. Ne fakalogo ki te Atua, faite ei ne ia a te vaka telā ne ola ei a ia mo tena kāiga. Ona ko te mea nei, ne fakasala ei ne ia te lalolagi, kae ne maua ne ia te amiotonu mai te Atua e alatu i te fakatuanaki.”​—Epelu 11:​6, 7.

11. Ne a mea e tauloto ne tatou mai puipuiga a Ieova ne fai i aso mua?

¹¹ Ke ‵sao atu i te gataga o te olaga masei tenei, e isi ne nisi mea e ‵tau o fai i tafa o te tali‵tonu fua me ka fakamasei atu te olaga tenei. E ‵tau o maua ne tatou te fakatuanaki, mai te fakaaogāga faka‵lei o fakatokaga katoa a te Atua mō te faka‵saoga. E tonu, e ‵tau o fakatuanaki tatou ki te taulaga togiola a te Tama a te Atua, ko Iesu Keliso. (Ioane 3:​16, 36) Kae, e ‵tau o masaua ne tatou me ko tino fua kolā ne ‵nofo i loto i te vaka o Noa ne ‵sao i te Lolo. E penā foki loa te puipuiga ne maua mai fa‵kai faka‵lafi i Isalaelu mua mō se tino telā ne pasalagina o ta ne ia se isi tino, ke tele atu ki se fa‵kai penā kae nofo i ei ke oko ki te taimi ko mate ei te faitaulaga sili. (Numela 35:​11-32) I te sefulu o mala telā ne oko atu ki tino Aikupito i aso o Mose, ne ‵mate i ei a uluma‵tua a tino Aikupito, kae ne ‵sao ei a uluma‵tua a te kau Isalaelu. Kaia? Ko oti ne fakatonu atu a Ieova ki a Mose: “E ‵tau mo tino [Isalaelu] o ave ne toto [o te tamā mamoe o te Paseka] o nini ki pou o olotou mataloa mo luga o mataloa o olotou fale kolā ka ‵kai ei olotou manu. . . . E tapu se tino i a koutou e fano keatea mai tena fale, ke oko eiloa ki te taeao.” (Esoto 12:​7, 22) Ko oi la te ulumatua Isalaelu ka se fakalogo ki te fakatonuga a te Atua kae ulu ki tua mo te fale telā ne nini ana pou mataloa mo luga o mataloa ki toto?

12. Se a te fesili e ‵tau o ‵sili ifo ne tatou ki a tatou eiloa, kae kaia?

¹² Tela la, e maua foki ne tatou se pogai ‵lei ke mafau‵fau faka‵lei ki ‵tou tulaga totino. E mata, e ‵nofo atu nei tatou i loto i te puipuiga faka-te-agaga a Ieova? Kafai ko oko mai te fakalavelave lasi, ka sofi ifo a loimata o te fiafia mo te loto fakafetai i mata o tino kolā ne ‵sala atu ki te vaegā puipuiga tenā. Kae ka maua fua ne nisi tino a loimata o te fanoanoa mo te salamō.

Fakamafulifuliga Kolā e Fai Faeloa ke Fakatoka ei Tatou

13. (a) Ne a pogai ne fai ei a fakamafulifuliga i te fakapotopotoga? (e) Fakamatala mai a nisi fakamafulifuliga ma‵goi ne fai.

¹³ Ko oti ne fai ne Ieova a fakamafulifuliga ma‵goi i te vaega o tena fakapotopotoga i te lalolagi nei. Ne fai ne mea konei ke fakagaligali, faka‵mautakitaki, kae fakamalosi aka foki ei tena fakatokaga mō te ‵tou puipuiga faka-te-agaga. Mai te 1870 ke oko ki te 1932, ne palotagina a toeaina mo tiakono ki tofiga konā ne tino i loto i te fakapotopotoga. I te 1932, ne sui ei a toeaina kolā ne palotagina ne se komiti o te galuega talai telā ne palotagina ne te fakapotopotoga ke fesoasoani atu ki te takitaki o te galuega talai telā ko oti ne filifili aka. I te 1938, ne fai ei a fakatokaga mō te faka‵sopoga o tavini katoa i loto i te fakapotopotoga e ‵tusa mo te fakatokaga a te Atua. Mai lalo o te takitakiga a te Potukau Pule o Molimau a Ieova, talu mai te 1972, ne faka‵tu atu a igoa o tāgata, maua ei ne fakapotopotoga a tusi e uiga mō te faka‵sopoga o ovasia mo tavini fakafaifeau e ‵tusa mo fakatokaga a te Atua. I te fia tausaga mai tua ifo, ne gasolo aka o uke a galuega e ‵tau o fai ne te Potukau Pule kae ne fai i ei a fakamafulifuliga ke fakafaigofie aka ei ana galuega.

14. Se a te akoga telā ne fakatu aka i te 1959?

¹⁴ I te 1950, ne fai ei se polokalame o akoakoga tumau ona ko te iloiloga fakamaea o te Salamo 45:16. E faitau penei te fuaiupu tenā i te Tusi Paia, Samoa: “I lō ou tupuga ka faka‵sopo ne koutou otou tama tāgata; mo fai ne pelenise i te lalolagi kātoa.” A toeaina kolā e fai ne latou te fakatakitakiga i te fakapotopotoga ko fakamasani nei ki tiute kolā ka fai ne latou i te vaitaimi nei kae penā foki mai tua o Amaketo. (Fakaasiga 16:​14, 16) Ne fakatu aka te Akoga mō Toeaina mo Tavini Fakafaifeau i te 1959. I te taimi tenā, ne fai ei se akoakoga telā e tasi te masina te leva kae ne fakapitoa loa mō tavini i te fakapotopotoga, ko te igoa o toeaina tausi i te vaitaimi tenā. Ko oti ne fakalasi atu te akoga tenei ke aofia i ei a ovasia mo tavini fakafaifeau katoa. Ko fai ei ne taina konei te takitakiga i te akoakoga o Molimau a Ieova taki tokotasi i olotou fakapotopotoga. Tela la, ko maua ei ne tino katoa a te fesoasoani i te feitu faka-te-agaga e pelā foki mo te lotou ga‵solo ki mua e pelā me ne tino talai o te tala ‵lei o te Malo.​—Maleko 13:10.

15. Ne a auala e lua e fakatumau aka ei te ‵ma o te fakapotopotoga Kelisiano?

¹⁵ E isi ne mea kolā e ‵tau o fai ne so se tino telā e manako ke fai pelā me se vaega o te fakapotopotoga Kelisiano. E se talia a tino fakatauemu i aso nei ke aofia i te fakapotopotoga, e pelā eiloa mo vaegā tino penā kolā ne seki mafai o ulu atu ki loto i te vaka o Noa. (2 Petelu 3:​3-7) Kae maise eiloa talu mai te 1952, ne ‵lago malosi atu ei a Molimau a Ieova ki te fakatokaga telā ka fesoasoani atu ei ki te puipuiga o te fakapotopotoga​—ko te faka‵teaga o tino agasala kolā e se loto sala‵mo. E tonu, a tino agasala loto sala‵mo tonu e tuku atu ki a latou se fesoasoani aogā ke ‘faka‵tonu aka ei olotou auala.’​—Epelu 12:​12, 13; Faataoto 28:13; Kalatia 6:1.

16. Se a te tulaga o tino o Ieova i te feitu faka-te-agaga?

¹⁶ A te tulaga maumea i te feitu faka-te-agaga o tino o Ieova e se se mea fakapoi io me se mea tupu fakafuasei. E auala i te pelofeta ko Isaia, ne fai mai a Ieova: “Tela la, au e fai atu me i tino kolā e tapuaki kae faka‵logo mai ki a au ka uke olotou meakai mo meainu, ka ko koutou ka fia‵kai kae fiainu. Ka fia‵fia latou, ka ko koutou ka fakamasiasigina. Ka usu pese latou mo te fia‵fia, ka ko koutou ka ‵tagi i te fanoanoa.” (Isaia 65:​13, 14) E tumau eiloa a Ieova i te tuku mai a meakai aogā e uke i te taimi tonu kolā e fai i ei ke ma‵losi faeloa tatou i te feitu faka-te-agaga.​—Mataio 24:45.

Ke Toka mō te Faka‵saoga

17. Ne a mea ka fesoasoani mai ke fakatoka ei tatou mō te faka‵saoga?

¹⁷ E ‵kese mai taimi mua katoa, tenei eiloa te taimi ke “mafaufau te suā tino ki te suā tino, ke fakatau fesoasoani foki koutou o fakaasi te alofa mo te fai mea ‵lei. Ke tumau faeloa te maopoopo sāle o tatou, e pelā eiloa mo te mea e masani ei a nisi tino o koutou. A te mea sili ke fakatau fakamalosi eiloa ne tatou o‵tou loto.” (Epelu 10:​23-25) A te ‵piki ‵mau mo te ga‵lue fakatasi mo se fakapotopotoga e tasi o Molimau a Ieova kolā e silia atu i te 98,000, ka fesoasoani mai ei ke fakatoka tatou mō te faka‵saoga. Ka fesoasoani mai eiloa a taina tali‵tonu ki a tatou i ‵tou taumafaiga ke ‵pei tatou ki te “foitino fou” kae kausaki atu mo te loto kātoa o fesoasoani atu ki nisi tino ke iloa ne latou te fakatokaga a Ieova mō te faka‵saoga.​—Efeso 4:​22-24; Kolose 3:​9, 10; 1 Timoteo 4:16.

18. Kaia e fakaiku aka ei ne koe mo te mautinoa ke tumau koe i loto i te fakapotopotoga Kelisiano?

¹⁸ E manako malosi a Satani mo tena lalolagi masei o fakaosooso tatou ke ‵to tatou ki tua mo te fakapotopotoga Kelisiano. Kae e mafai eiloa o tumau tatou i loto i te fakapotopotoga kae ‵sao atu foki ei i te gataga o te olaga masei tenei. Ke na fai eiloa te ‵tou a‵lofa mō Ieova mo te ‵tou loto fakafetai ki ana fakatakitakiga a‵lofa e pelā me se fakamalosiga ke ‵teke atu faeloa ki taumafaiga a Satani. A te mafaufau ‵loto ki fakamanuiaga e maua ne tatou i aso nei ka fakamalosi mai eiloa ki a tatou. Ka sau‵tala tatou ki nisi fakamanuiaga konei i te suā mataupu.

Ne a Au Tali?

• E ‵pau pefea a ‵tou taimi nei mo aso o Noa?

• Se a te uiga e tāua ke ‵sao ei tatou?

• Ne a fakamafulifuliga ma‵goi ne fakamalosi aka ei a fakatokaga a Ieova mō te ‵tou puipuiga?

• E mafai pefea o fakatoka tatou taki tokotasi mō te faka‵saoga?

[Ata i te itulau e 10]

Se a te pogai o te Akoga mō Toeaina mo Tavini Fakafaifeau?

[Ata i te itulau e 11]

Tenei eiloa te taimi ke tumau i loto i te fakapotopotoga Kelisiano