Te Fiafia Telā e Maua Mai te Tumau i te Fakamaoni

“A te fakamanuiaga a Ieova, e fai ne ia koe ke maumea; kae seai ne logo‵maega e maua mai i ei.”​—FAATAOTO 10:​22, Tusi Paia, Samoa.

1, 2. Kaia e ‵tau ei o ‵kalo keatea mai te tō mafaufau ki mea ka ‵tupu i aso mai mua?

“A TE tō mafaufau ki aso mai mua . . . e fai i ei ke se fia‵fia tatou ki mea kolā e maua ne tatou i te aso nei,” ko pati a se tagata poto mai Amelika. E tonu eiloa te mea tenei e uiga ki tama‵liki kolā e mafau‵fau faeloa ki olotou mea ka fai māfai ko ma‵tua latou, ko puli ei i a latou a mea aogā i te olaga fakatamaliki ke oko loa ki te taimi ko ma‵tua ei latou.

² E se ‵sao foki a tino tapuaki ki a Ieova i te vaegā mafaufauga tenei. Ke mafaufau ki te mea e mafai o tupu. E ma‵nako tatou ke fakataunu te folafolaga a te Atua e uiga ki te lalolagi palataiso. E ‵nofo fakatalitali faeloa tatou ke na maua te olaga telā ka seai ei ne masaki, te olaga matua, te logo‵mae mo puapuagā i ei. E ui eiloa e seai se mea e fai i ei te nofo fakatali‵tali ki mea konā, se a te mea e mafai o tupu mafai ko tō mafaufau ‵mafa tatou ki fakamanuiaga faka-te-foitino kae puli ei i a tatou a ‵tou fakamanuiaga faka-te-agaga i aso nei? Se mea fakafanoanoa eiloa te mea tenā! E faigofie fua o loto vāi‵vāi tatou kae ‘fanoanoa te loto me ko se taunu ‵tou fakamoemoega’ kolā ne fakamoe‵moe tatou ki ei. (Faataoto 13:12) E mafai o ‵pei atu tatou ne fakalavelave mo mea faiga‵ta i te olaga ki loto i te matasele ko te loto vāivāi io me ko te loto māfatia. I lō te fakafesagai atu ki tulaga ma‵sei, e mafai o maua ne tatou te uiga ko te fāmeo. E mafai o ‵kalo keatea tatou mai mea katoa konei mai te mafaufau ‵loto ki fakamanuiaga ko maua nei ne tatou.

3. Se a te mea ka ‵saga ‵tonu atu tatou ki ei i te mataupu tenei?

³ “A te fakamanuiaga a Ieova, e fai ne ia koe ke maumea; kae seai ne logo‵maega e maua mai i ei,” ko pati i te Faataoto 10:22 i te Tusi Paia, Samoa. E mata, e se ko te tulaga maumea i te feitu faka-te-agaga o tavini a Ieova i aso nei e ‵tau o fia‵fia ki ei e pelā me se fakamanuiaga? Ke mafaufau nei tatou ki nisi vaega o ‵tou maumea faka-te-agaga mo te uiga o mea konā ki a tatou taki tokotasi. A te mafaufau ‵mafa faeloa ki mea ‵lei kolā ko oti ne ‵ligi mai ne Ieova ki luga i ‘tino fai mea ‵tonu kae amio‵tonu’ ka fakamalosi aka ei tatou ke tavini atu ki ‵tou Tamana i te lagi mo te fia‵fia.​—Faataoto 20:7.

‘Fakamanuiaga Kolā e Fai ei ke Mau‵mea Tatou’ Nei

4, 5. Se a te akoakoga mai te Tusi Tapu telā e fakatāua malosi ne koe, kae kaia?

⁴ Te iloaga tonu e uiga ki akoakoga mai te Tusi Tapu. E fai mai a lotu i Lotu Kelisiano ‵Se me tali‵tonu latou ki te Tusi Tapu. Kae e se lotoma‵lie latou ki mea kolā e akoako mai i ei. Ke oko foki loa ki tino o te lotu e tasi, e kese‵kese olotou kilokiloga ki mea kolā e akoako mai i te Tusi Tapu. Ko tafaga la te ‵kese o te lotou tulaga mo tavini a Ieova! Faitalia te kese‵kese o ‵tou fenua, tuu mo aganuu mo ‵tou telega, e tapuaki eiloa tatou ki te Atua telā e iloa ne tatou tena igoa. A ia e se se atua tolutasi telā e faka‵numi tino. (Teutelonome 6:4; Salamo 83:​18, Tusi Paia, Samoa; Maleko 12:29) E iloa foki ne tatou me ko pili fua o faka‵lei aka te ‵toe kinauga tāua e uiga ki te pulega a te Atua ki te lagi mo te lalolagi kae mai te tumau i te fakamaoni ki a ia, ko aofia i ei a tatou taki tokotasi i te kinauga tenā. Ko iloa nei ne tatou te mea tonu e uiga ki tino ‵mate, kae ko saoloto foki mai te mataku ki te Atua telā e fai mai me fakapuapuagā ne ia a tino i te afi i seoli io me ave ne ia ki pekatuli.​—Failauga 9:​5, 10.

⁵ E se gata i ei, e fia‵fia malosi tatou ke iloa atu me ne seki māfua fakafuasei mai tatou mai te akoakoga faka‵numi tino ko te evolusione! E ‵kese mai i ei, a tatou ne faite ne te Atua ki ona foliga. (Kenese 1:26; Malaki 2:10) Ne usu atu te faisalamo ki tena Atua, penei: “E tavea koe ne au, me ne faite ne koe au i se aula fakamataku kae fakaofoofogia; e fakaofoofogia au galuega; e pelā mo te mea e iloa ne toku foitino.”​—Salamo 139:​14, Tusi Paia, Samoa.

6, 7. Ne a fuliga i tou olaga io me ko olaga o nisi tino e iloa ne koe ne fai pelā me ne fakamanuiaga?

⁶ Ko saoloto mai faifaiga masani se ‵lei. Ko uke ‵ki a faka‵pulaga ke fakaeteete i te fakamataku o te ‵pusi, te inu malosi, mo faifaiga fakatauavaga faivalevale i mea fakasalalau tala. I kogā koga e uke, e se fia ‵saga atu a tino ki faka‵pulaga konei. Se a la te mea e tupu māfai e iloa aka ne se tino loto fakamaoni me e taku fakamasei ne te Atua tonu a mea konā kae se fiafia ki tino kolā e fai ne latou a mea konā? Ko fakaosofia ei a te tino tenā o ‵kati a mea katoa konā mai tena olaga! (Isaia 63:10; 1 Kolinito 6:​9, 10; 2 Kolinito 7:1; Efeso 4:​30) E ui eiloa e fai ne ia a mea konei ke fakafiafia atu ei ki a Ieova te Atua, e maua foki ne ia a nisi mea aogā mai i ei​—se olaga malosi ‵lei mo te filemu o te mafaufau.

⁷ E se se mea faigofie ke ‵kati a faifaiga masani a tino e tokouke. Kae e lau i sefulu afe a tino e fai ne latou te mea tenā i tausaga takitasi. E tuku atu ne latou a latou eiloa ki a Ieova kae papatiso foki ki te vai, ke fakailoa atu ei ki tino katoa me ko oti ne ‵kati ne latou mai i olotou olaga a faifaiga masani kolā e se fiafia ki ei a te Atua. Mafaga o fakamalosiga gali tenā ki a tatou katoa! Se fakamalosiga gali ‵ki ki ‵tou fakaikuga ke saoloto tatou mai te ‵nofo pologa ki te agasala mo amioga faka‵mae tino.

8. Ne a fakatakitakiga mai te Tusi Tapu e fakamalosi aka ei te fiafia i te kāiga?

⁸ Se olaga faka-te-kāiga fakafiafia. I nisi atufenua e uke, ko gasolo ifo loa o vāivāi te tulaga o te kāiga. E uke a tauavaga ko oti ne ‵tala olotou avaga, kae fakalogo‵mae atu i ei ki loto o olotou tama‵liki. I nisi atufenua i Eulopa, e nofo pelā ki te 20 pasene o kāiga e taki tokotasi a mātua i ei. Ne fesoasoani mai pefea a Ieova ke sa‵sale tatou i te fakamaoni i te feitu tenei? Fakamolemole ke faitau ki te Efeso 5:22–6:​4, kae ke onoono ki fakatakitakiga ‵gali kolā e tuku mai i te Muna a te Atua ki tāgata mo fāfine a‵vaga, mo tama‵liki. A te fakagaluegāga o mea kolā e fai mai i ei e pelā foki mo nisi mea e fai mai i te Tusi Tapu kātoa e fakamalosi aka i ei te fakaipoipoga, e fesoasoani atu ki mātua ke puti aka olotou tama‵liki i te auala tonu, kae ati aka foki i ei se kāiga fia‵fia. E mata, e se se fakamanuiaga tenā ke fia‵fia tatou ki ei?

9, 10. E ‵kese pefea a ‵tou kilokiloga ki aso mai mua mo te kilokiloga a te lalolagi?

⁹ Te fakatalitonuga me ko pili o faka‵lei aka a fakalavelave i te lalolagi. Faitalia a poto fakasaienitisi mo poto ‵fou o tāgata mo taumafaiga a nisi takitaki loto fakamaoni, e seai eiloa ne faka‵leiga ki fakalavelave faiga‵ta o aso nei kai maua. Ne iloa aka ne Klaus Schwab, ko te tino ne fakatu aka ne ia te fakapotopotoga ko te World Economic Forum, me i “te fakasologa o fakalavelave faiga‵ta kolā e fe‵paki mo te lalolagi nei e gasolo aka faeloa o uke atu kae ko te taimi ke faka‵lei aka ei latou e gasolo ifo faeloa o toetoe.” Ne faipati a ia e uiga ki “mea fakama‵taku kolā e pokotia i ei a atufenua katoa e pelā mo amioga takafia‵toa, te fakamaseiga o te enevaelomene mo te tulaga sē mautinoa o mea tau tupe.” Ne fakaoti mai a pati a Schwab, penei: “Nei la, ko fakafesagai atu te lalolagi ki tinā fakalavelave kolā ko ‵tau ei o fai se fakaikuga mautinoa kae gasue‵sue fakatasi o fai se faiga ki ei.” I te gasoloatuga ki mua o te 21 senitenali tenei, e tumau eiloa te pouli o te tulaga mō tino katoa mō aso mai mua.

¹⁰ Ma‵faga o mea fakafiafia ke iloa atu me ko oti ne fai ne Ieova se fakatokaga telā ka faka‵lei aka i ei a fakalavelave o tino katoa​—ko te Malo faka-Mesia o te Atua! E auala i te mea tenā, ka ‘fakagata ei ne te Atua tonu a taua’ kae ka aumai ne ia ‘te filemu katoatoa.’ (Salamo 46:9; 72:7) A te Tupu fakaekegina, ko Iesu Keliso, ‘ka faka‵sao ne ia a tino ma‵tiva, tino puapuagā, mo tino fatauvā mai tino fakasauā mo tino mata‵mua.’ (Salamo 72:​12-14) Mai lalo i te pulega a te Malo, ka se toe ai ne ogegā meakai. (Salamo 72:16) Ka ‵solo ne Ieova a “loimata i [‵tou] mata. Ka se toe iai se mate, se fanoanoa, se tagi io me se ‵mae. Ko palele atu a mea mua.” (Fakaasiga 21:4) Ko oti ne fakatu aka te Malo i te lagi kae ko pili fua nei o gasuesue o fai a te mea telā e ‵tau o fai ke faka‵lei aka ei a fakalavelave katoa i te lalolagi.​—Tanielu 2:44; Fakaasiga 11:15.

11, 12. (a) E mata, e maua a te fiafia tumau mai te ‵sala atu ki fakafiafiaga? Fakamatala mai. (e) E maua mai i fea a te fiafia tonu?

¹¹ E iloa ne tatou te koga e maua i ei te fiafia tonu. E maua pefea te fiafia tonu? E fai mai se tagata poto me e tolu a vaega o te fiafia​—ko fakafiafiaga, ko (te aofia malosi i te faiga o galuega io me ko te kāiga), mo (te ga‵lue mō te ‵lei o nisi tino). Mai mea e tolu konā, ne fai mai a ia me ko fakafiafiaga eiloa e se tāua malosi i ana pati konei: “Se mea fakaofoofogia a te mea tenei me i te tokoukega o tino e ‵saga malosi atu eiloa ki fakafiafiaga i olotou olaga.” Se a te kilokiloga a te Tusi Tapu e uiga ki te mea tenei?

¹² Ne fai mai a te tupu o Isalaelu mua ko Solomona: “Ne mafaufau au ke saga malosi au o fakafiafia a au, kae ke sukesuke ne au me se a te fiafia. Kae ne iloa aka ne au me e se aogā foki te mea tenā. Ne iloa aka ne au i te kata se mea valea fua, ka ko te fiafia e seai se mea ‵lei e maua ne koe mai i ei.” (Failauga 2:​1, 2) E fakaasi mai i te Tusi Tapu, me i so se mea fakafiafia telā e maua mai i fakafiafiaga e se tumau. Kae pefea la te aofia malosi i te faiga o galuega? E isi se galuega tāua telā e ‵tau o aofia malosi tatou i ei​—ko te talaiatuga o te Malo mo te faiga o soko. (Mataio 24:14; 28:​19, 20) Mai te fakailoa atu ki nisi tino a te fekau o te fakaolataga telā e fakamatala mai i te Tusi Tapu, e aofia tatou i se galuega telā e mafai o iku atu ki te ‵tou fakaolataga e pelā foki mo tino kolā e faka‵logo mai ki a tatou. (1 Timoteo 4:16) E pelā me ne tino kolā e “ga‵lue fakatasi mō te Atua,” ko iloa ei ne tatou me “e sili atu te manuia io me ko te fiafia o te tino telā e tuku atu fua ana mea i lō o te tino telā e talia ne ia.” (1 Kolinito 3:9; Galuega 20:35) A te galuega tenei e fai i ei ke iloa ne tatou te pogai e ola ei tatou, kae ke tuku atu foki ki te ‵tou Māfuaga se tali ki te tino fakaitaita, ko Satani te Tiapolo. (Faataoto 27:11) E tonu, ko oti ne fakaasi mai ne Ieova me i te ‵tou tapuaki atu ki a ia mo te loto finafinau e maua mai i ei te fiafia tonu kae tumau.​—1 Timoteo 4:8.

13. (a) I te auala fea e fai ei a te Akoga mō Tino Talai e pelā me se fakamanuiaga ke fia‵fia ei tatou? (e) Ne aogā pefea ki a koe a te Akoga mō Tino Talai?

¹³ Se polokalame o akoakoga tāua kae ma‵goi. E tavini atu a Gerhard e pelā me se toeaina i se fakapotopotoga o Molimau a Ieova. Ne fai mai ne ia ana mea e masaua i te taimi koi foliki ei a ia: “I te taimi koi foliki ei au, ne faigatā ‵ki ki a au ke faipati atu. Kafai e manavase malosi au, e faigatā o faipati faka‵lei atu kae kamata o pati se‵sese au. Ne lagona ne au me e seai soku aogā kae oko mai te loto māfatia. Ne fakatoka ne oku mātua ke kau au ki se akoga e uiga ki te mafai o faipati faka‵lei, kae ne seki aogā a lā taumafaiga. A toku masaki se masaki faka-te-mafaufau. Kae ne isi se fakatokaga gali mai i a Ieova​—ko te Akoga mō Tino Talai. A te kau atu ki te akoga tenei ne maua ei ne au te loto toa. Ne taumafai malosi au o fakagalue a mea ne tauloto ne au. Kae ne aogā eiloa! Ne gasolo o ‵lei taku faipati, ne galo toku loto se talitonu ki a au eiloa, kae momea aka toku loto toa o fai te galuega talai. Nei la, ko fai foki ne au a lauga mō tino katoa. E fakafetai eiloa au ki a Ieova, telā ne fai ne ia ke ‵lei atu toku olaga e auala i te akoga tenei.” E mata, e se ‵tau o fia‵fia tatou ki te auala e akoako ei tatou ne Ieova i te faiga o tena galuega?

14, 15. I taimi e maua ei te loto māfatia, ne a fesoasoani kolā e toka faeloa? Fakamatala mai.

¹⁴ Tou fesokotakiga totino mo Ieova mo te ‵lago mai o te kau taina i te lalolagi kātoa. Ne fanoanoa malosi a Katrin telā e nofo i Siamani, i tena logoga i te tala o te galu lasi telā ne māfua mai i se mafuie telā ne poko i te tai, i Asia ki saute-saegala. A tena tamaliki fafine ne āsi atu ki Thailand i te taimi ne tupu ei te fakalavelave tenā. I loto i se 32 itula, ne seki iloa eiloa ne te mātua tenei me koi ola tena tama io me ko aofia i tino ‵mate mo tino pa‵kia kolā ne gasolo aka faeloa o tokouke. Ko tafaga la te fiafia o Katrin i te taimi ne fakailoa atu ei ki a ia i te telefoni me i tena tamaliki fafine ne sao i te fakalavelave tenā!

¹⁵ Se a te mea ne fesoasoani atu ki te manavase o Katrin i te fia o itula konā? Ne tusi mai a ia: “Ne fakamāumāu ne au toeitiiti ko itula katoa konā i te ‵talo atu ki a Ieova. Ne lagona ne au i taimi katoa a te malosi mo te filemu e maua ne au mai te faiga o te mea tenei. E se gata i ei, ne āsi mai a taina faka-te-agaga a‵lofa o fakamalosi mai au.” (Filipi 4:​6, 7) E pefea te masei atu o tena tulaga moi ne seki fakaaogā ne ia a itula o tena māfatia tenā ke ‵talo atu ki a Ieova e pelā foki mo te fesoasoani mai te kau taina faka-te-agaga a‵lofa! A te ‵tou vā ‵pili mo Ieova mo tena Tama fakatasi mo te ‵pili o ‵tou fesokotakiga mo te kautaina Kelisiano se fakamanuiaga tu ‵kese, telā ko tō tāua ke manatu māmā ki ei.

16. Fakamatala mai se tala telā e fakaasi mai i ei te tāua o te fakamoemoega e uiga ki te toetu.

¹⁶ Te fakamoemoega ke toe fetaui mo tino pele kolā ko oti ne ‵mate. (Ioane 5:​28, 29) Ne puti aka se tamataene e igoa ki a Matthias e pelā me se Molimau a Ieova. E aunoa mo tena iloa e uiga ki fakamanuiaga kolā ne maua ne ia, ne tapeapea atu keatea a ia mo te fakapotopotoga Kelisiano i te taimi koi talavou ei a ia. Ne tusi mai a ia, penei: “E se ti sau‵tala faka‵lei sāle māua mo toku tamana ki mea ‵loto. I te fia o tausaga e kinau faeloa māua. Kae, ne manako eiloa toku tamana ke maua ne au a toe mea ‵lei i te olaga. Ne alofa tonu a ia ki a au, kae ne seki lavea ne au te mea tenā i te taimi tenā. I te 1996, i te taimi ne sagasaga kae tagi mautuutu ei au i tafa o tena moega kae puke atu ki tena lima, ne fakatoese atu au ki a ia e uiga mō mea katoa kolā ne fai ne au kae fakaasi atu foki me e alofa malosi au ki a ia. Kae ne seki mafai o lagona ne ia aku pati. Ne galo atu a ia mai tua o te taimi toetoe ne masaki ei a ia. Kafai e mafai o toe fetaui māua mo toku tamana i te taimi o te toetuga, ka toe faka‵lei aka ei a mea katoa kolā ne ma‵sei ei māua i taimi ko ‵teka. Kae ka fiafia malosi eiloa ke iloa ne ia me ko tavini atu nei au pelā me se toeaina kae ko maua ne māua mo taku avaga te tauliaga ke tavini atu pelā me ne paenia.” E fai eiloa te toetuga e pelā me se fakamanuiaga ki a tatou!

“Kae Seai ne Logo‵maega e Maua Mai i ei”

17. E fesoasoani mai pefea a te mafaufau ‵loto ki fakamanuiaga a Ieova mō tatou?

¹⁷ E uiga ki tena Tamana faka-te-lagi, ne fai mai Iesu Keliso: “E fakamaina mai ne ia a tena la ki tino amio ma‵sei mo tino amio ‵lei, e faka‵to foki ne ia a te vaiua ki tino amio‵tonu mo tino amio ma‵sei.” (Mataio 5:45) Kafai e tuku mai ne Ieova te Atua a fakamanuiaga ki tino sē amio‵tonu mo tino amio ma‵sei, kae pefea la a fakamanuiaga e maua ne tino fakamaoni! “E se taofi ne ia so se mea ‵lei ki tino kolā e fai meatonu,” ko pati i te Salamo 84:11. Kafai e mafaufau ‵loto tatou ki tena tausiga fakapito mo tena saga tonu mai ki tino kolā e a‵lofa ki a ia, e ‵fonu eiloa ‵tou loto i te fiafia mo te loto fakafetai!

18. (a) I te auala fea e fai mai ei me seai ne logo‵maega e maua mai fakamanuiaga a Ieova? (e) Kaia e logo‵mae ei a tino fakamaoni e tokouke o te Atua?

¹⁸ “A te fakamanuiaga a Ieova e fai ne ia koe ke maumea”​—tenā loa te mea e fai i ei ke mau‵mea ana tino i te feitu faka-te-agaga. Kae e tali‵tonu tatou me e “seai ne logo‵maega e maua mai i ei.” (Faataoto 10:​22, Tusi Paia, Samoa) Kaia la e fe‵paki ei a tino fakamaoni e tokouke a te Atua mo tofotofoga mo fakaosoosoga, kae fai i ei ke logo‵mae malosi latou? E fe‵paki tatou mo mea faiga‵ta mo te loto māfatia ona ko pogai ‵lasi e tolu. (1) Ko ‵tou tulaga agasala. (Kenese 6:5; 8:21; Iakopo 1:​14, 15) (2) Ko Satani mo ana temoni. (Efeso 6:​11, 12) (3) Ko te lalolagi matagā tenei. (Ioane 15:19) E ui eiloa e talia ne Ieova ke ‵tupu a mea ma‵sei ki a tatou, ne seki māfua mai i a ia a mea konā. A te tonuga loa, “A mea ‵lei katoa kolā e maua fua mo meaalofa katoatoa takitasi, e mai te Atua i te lagi, telā ko te Tamana o te mainaga.” (Iakopo 1:17) E seai ne logo‵maega e maua ne tatou mai fakamanuiaga a Ieova.

19. Ne a mea e faka‵tali mai mō tino kolā e tumau i te sa‵sale i te fakamaoni?

¹⁹ A te mauaga o te maumea faka-te-agaga e aofia i ei te fakapilipili atu faeloa ki te Atua. Kafai e ati aka ne tatou se fesokotakiga ‵pili mo ia, ko ‘fakatupu eiloa ne tatou a koloa kolā ka fai mo ‵tou fakavae ‵mautakitaki mō aso fakamuli, ke mafai ei o maua ne tatou a te ola tonu’​—ko te ola se-gata-mai. (1 Timoteo 6:​12, 17-19) I te lalolagi fou a te Atua, ka maua fakatasi ne tatou a te maumea faka-te-agaga mo fakamanuiaga faka-te-foitino. Ka maua i ei ne tino katoa kolā e “faka‵logo ki te Aliki te otou Atua” a te ola tonu. (Teutelonome 28:2) Mai ‵tou fakaikuga kolā ko oti ne fakamalosi aka, ke na tumau eiloa tatou i te sa‵sale mo te fia‵fia i te fakamaoni.

Ne a Au Mea ne Tauloto?

• Kaia e se ‵lei ei ke tō mafaufau ‵mafa e uiga ki aso mai mua?

• Ne a fakamanuiaga ko maua nei ne tatou?

• Kaia e logo‵mae ei a tavini fakamaoni a te Atua?