Tausi ne Koe a Koe i Loto i te Alofa o te Atua!
“Oku taugasoa, . . . tausi koutou i te alofa o te Atua, ka koi fakatali‵tali koutou ki te . . . ola se gata mai.”—IUTA 20, 21.
1, 2. E mafai pefea o tumau koe i loto i te alofa o te Atua?
E ALOFA malosi a Ieova ki te lalolagi, tuku mai ei ne ia tena Tama pele e tokotasi ko te mea ke maua ne tino kolā e fakatuanaki ki a ia a te ola se-gata-mai. (Ioane 3:16) Ma‵faga o mea gali ke maua ne tatou se vaegā alofa penā! Kafai koe se tavini a Ieova, ka fia maua eiloa ne koe te vaegā alofa tenā ki te se-gata-mai.
2 Ne fakaasi mai ne te soko ko Iuta a te auala e mafai ei o tumau koe i loto i te alofa o te Atua. Ne tusi mai a Iuta: “Ke puti ake eiloa koutou i te otou fakatuanaki e sili i te tapu. ‵Talo i te ‵mana o te Agaga Tapu, kae tausi koutou i te alofa o te Atua, ka koi fakatali‵tali koutou ki te ‵tou Aliki ko Iesu Keliso, ke tuku atu ne ia a te ola se gata mai i tona alofa ‵nau.” (Iuta 20, 21) A te sukesuke ki te Muna a te Atua mo te talaiatuga o te tala ‵lei e fesoasoani mai ke puti ake ei te ‵tou “fakatuanaki e sili i te tapu”—ko akoakoga faka-Kelisiano. Ko te mea ke tumau koe i loto i te alofa o te Atua, e ‵tau o ‵talo koe “i te ‵mana o te Agaga Tapu,” io me mai lalo i tena fakamalosiga. Ko te mea ke fakamanuiagina koe ki te ola se-gata-mai, e ‵tau foki o fakatuanaki koe ki te taulaga togiola a Iesu Keliso.—1 Ioane 4:10.
3. Kaia ko se fai ei a nisi tino mo fai ne Molimau a Ieova?
3 A nisi tino kolā ne isi muamua se lotou fakatuanaki ne seki tumau i loto i te alofa o te Atua. Ona ko te mea ne filifili ne latou ke olo atu latou i te auala o te agasala, ko se toe fai ei latou mo fai ne Molimau a Ieova. E mafai pefea o ‵kalo keatea koe mai se vaegā mea penā? A te mafaufau ‵loto ki manatu konei e mafai o fesoasoani mai ke ‵kalo keatea tatou mai te agasala kae ke tumau i loto i te alofa o te Atua.
Ke Fakaasi Atu Tou Alofa mō te Atua
4. E pefea te tāua o te fakalogo ki te Atua?
4 Ke fakaasi atu tou alofa mō te Atua mai te fakalogo ki a ia. (Mataio 22:37) “Me e tenei te uiga o te alofa ki te Atua,” ko pati a te apositolo ko Ioane, “ko te fakalogo ki ana fakatonuga. Ka ko ana fakatonuga e se na ‵mafa foki mō tatou.” (1 Ioane 5:3) A te masani o fakalogo faeloa ki te Atua e mafai o fakamalosi atu ke ‵teke atu koe ki tofotofoga kae fai foki koe ke fiafia. Ne fai mai te faisalamo: “Amutia io me fia‵fia latou kolā e se ‵kau ki filifiliga a tino amio ma‵sei, . . . kae fia‵fia o fai‵tau ki Tulafono a te Aliki.”—Salamo 1:1, 2.
5. Se a te mea e fakamalosi atu ne te alofa ki a Ieova ke fai ne koe?
5 E fakamalosi atu a tou alofa ki a Ieova ke mo a e fai ne koe se agasala matagā telā ka taku fakamasei i ei tena igoa. Ne ‵talo atu a Akulu: “Ke mo a foki au e tō maumea io me tō mativa . . . tuku mai fua a meakai e lava ei au. Kafai e tō uke aku mea, e iku au o fai aka pelā i a au ko se manako ki a koe. Kafai foki au e mativa, e iku au o fano o kaisoa, ko fakamasiasi ei ne au toku Atua.” (Faataoto 30:1, 8, 9) Ke na fakaiku aka ne koe ke mo a ma ‘fakamasiasi atu ki te igoa o te Atua.’ I lō te fai penā, ke kausaki atu faeloa o fai a mea ‵tonu kolā e avatu i ei a vikiga ki a ia.—Salamo 86:12.
6. Se a te mea e mafai o tupu māfai e fai ne koe se agasala mo te iloa tonu?
6 Ke ‵talo faeloa ki tou Tamana alofa i te lagi mō se fesoasoani ke ‵teke atu koe ki fakaosoosoga ke fai se agasala. (Mataio 6:13; Loma 12:12) Ke tumau i te fakalogo ki pati fakatonutonu a te Atua ko te mea ke seai se mea e fakalavelave atu ki au ‵talo. (1 Petelu 3:7) Kafai e fai ne koe se agasala mo te iloa tonu, e mafai o ma‵sei ‵ki a ikuga o te mea tenā, me e ‵pono ne Ieova, i se auala fakatusa, a ‵talo a tino ‵teke ki se kaumana pouli ko te mea ke se oko atu olotou ‵talo ki a ia. (Tagiga a Ielemia 3:42-44) Tela la, ke fakaasi atu te loto maulalo, kae ‵talo ko te mea ke mo a e fai ne koe se mea telā ka se talia ei ne te Atua au ‵talo.—2 Kolinito 13:7.
Fakaasi Atu te Alofa ki te Tama a te Atua
7, 8. E fesoasoani mai pefea a te saga tonu ki fakatonutonuga a Iesu ke ‵teke atu ki se auala agasala?
7 Ke fakaasi atu te alofa ki a Iesu Keliso mai te fakalogo ki ana fakatonuga, me ka fesoasoani atu a te mea tenei ke ‵teke atu ei koe ki se auala agasala. “Kafai e tausi ne koutou aku poloakiga,” ko pati a Iesu, “ka tumau koutou i toku alofa, e pelā mo au ko oti ne tausi a poloakiga a toku Tamana, kae tumau i tena alofa.” (Ioane 15:10) E fesoasoani atu pefea a te fakagaluegāga o pati a Iesu ko te mea ke tumau koe i loto i te alofa o te Atua?
8 A te saga tonu atu ki pati a Iesu e mafai o fesoasoani atu ke tumau koe i amioga ‵ma. E fai mai te Tulafono a te Atua ki tino Isalaelu: “Sa mulilua.” (Esoto 20:14) Kae ne fakaasi mai ne Iesu se fakatakitakiga fakavae mai tua o te fakatonuga tenā, i ana muna: “So se tino e onoono atu ki se fafine kae manako ki ei tena loto, ko mulilua a ia i te loto.” (Mataio 5:27, 28) Ne fai mai te apositolo ko Petelu me i nisi tino i loto i te fakapotopotoga i te senitenali muamua “e se ma‵nako ke ‵kilo ki se isi mea ake, na ko fāfine fina lalolagi fua” kae ‘e fakalata ne latou a tino sē ma‵losi ‵lei.’ (2 Petelu 2:14) Kae e ‵kese mo latou, e mafai o ‵teke atu ne koe a faifaiga agasala fakatauavaga māfai e alofa kae fakalogo koe ki te Atua mo Keliso kae manako malosi ke tausi tou fesokotakiga ‵lei mo laua.
Ke Takitaki Koe ne te Agaga o Ieova
9. E uiga ki te agaga tapu, se a te mea e mafai o tupu māfai e tumau se tino i te fai agasala?
9 ‵Talo ke maua te agaga tapu o te Atua, kae talia ke takitaki koe ne ia. (Luka 11:13; Kalatia 5:19-25) Kafai e tumau koe i te faiga o agasala, e mafai o tapale keatea ne te Atua a tena agaga mai i a koe. Mai tua o te agasala a Tavita mo Patisepa, ne fakamolemole atu a ia ki te Atua: “Sa ave keatea au mai ou mua; sa ave keatea foki a tou agaga tapu mai i a au.” (Salamo 51:11) Ona ko tena sē salamō, ne galo ei i te tupu ko Saulo a te agaga o te Atua. Ne agasala a Saulo mai te ofoatuga o se taulaga ‵sunu mo te faka‵saoga ne ia a nisi mamoe, kouti mo pulumakau, e pelā foki mo te tupu o te kau Amaleka. Ne tapale keatea ei ne Ieova a tena agaga tapu mai i a Saulo.—1 Samuelu 13:1-14; 15:1-35; 16:14-23.
10. Kaia e ‵tau ei o ‵teke katoatoa atu tatou ki mafaufauga ke fai te agasala?
10 Ke ‵teke katoatoa atu ki mafaufauga ke fai se agasala. “Kafai e fakamoemoe tonu faeloa tatou o fai te agasala ka ko oti ne talia ne tatou te munatonu,” ko pati a te apositolo ko Paulo, “ko tena uiga, ko se toe iai se isi taulaga e mafai o fakamagalo ei o‵tou agasala.” (Epelu 10:26-31) Ma‵faga o mea fakamataku māfai e agasala tatou mo te iloa tonu!
Fakaasi Atu te Alofa Tonu ki Nisi Tino
11, 12. I auala fea e taofi ei se tino mai te faiga o faifaiga fakatauavaga sē ‵tau, ona ko tena alofa mo tena āva?
11 A te alofa ki nisi tino e taofi aka ei koe mai te faiga o amioga fakatauavaga sē ‵tau. (Mataio 22:39) Ka fakamalosi aka eiloa a koe ne te alofa tenā ke puipui tou loto ke mo a e fakalata ne koe te avaga a te suā tino ke fiafai atu ki a koe. A te faiga tenā e iku atu ki te agasala ko te mulilua. (Faataoto 4:23; Ielemia 4:14; 17:9, 10) Ke fai pelā mo te tagata fakamaoni ko Iopu, telā ne seki talia ne ia a ia ke fiafai ki se isi fafine i tafa o tena avaga.—Iopu 31:1.
12 A te āva ki te tulaga ‵malu o te fakaipoipoga e fesoasoani atu ke ‵kalo keatea koe mai te faiga o se agasala matagā. Ne fuafua ne te Atua ke māfua mai te ola i se tauavaga fakaipoipo mo lā faifaiga fakatauavaga. (Kenese 1:26-28) Ke masaua me i koga tapu o tatou tāgata mo tatou fāfine e fakamāfua mai ne latou te ola, kolā ne mea e ‵malu ‵ki. A tino finalalolagi mo tino mulilua e ‵teke ki te Atua, e manatu fatauvā latou ki te tulaga o faifaiga fakatauavaga, e se āva ki te tulaga ‵malu o te fakaipoipoga, kae agasala foki ki olotou foitino. (1 Kolinito 6:18) Kae ko te alofa ki te Atua mo tuakoi fakatasi mo te fakalogo ki te Atua e taofi aka ei se tino mai te faiga o amioga kolā e mafai o iku atu ki tena fakatea mai te fakapotopotoga Kelisiano.
13. I te auala fea e fai ei a faifaiga a se tino finalalolagi e pelā me se “faiga valea fua”?
13 E ‵tau o ‵teke atu tatou ki mafaufauga agasala ko te mea ke se faka‵mae ne tatou a loto o ‵tou kāiga pele. “Se faiga valea fua o fakamāumāu a tupe ki fāfine tali tāgata,” ko pati i te Faataoto 29:3. A te tino mulilua telā e se salamo e fakamasei ne ia tena fesokotakiga mo te Atua e pelā foki mo tena kāiga. Ko maua ei ne tena avaga se pogai ‵lei ke ‵tala te lā avaga. (Mataio 19:9) Faitalia me ko te tagata io me ko te fafine ne fai ne ia te mea ‵se, ka logo‵mae malosi eiloa tena avaga telā e seai sena ‵se, tama‵liki mo nisi tino i ei. E mata, e se lotoma‵lie tatou me i te iloa atu o te fakamataku o te faiga o amioga fakatauavaga sē ‵tau, ka fai ei ke ‵teke atu tatou ki fakaosoosoga ke fai penā?
14. Se a te akoakoga e uiga ki amioga ma‵sei e mafai o tauloto ne tatou mai te Faataoto 6:30-35?
14 Ona ko te mea e seai se isi mea e mafai o faka‵lei aka ei te agasala ko te mulilua, e fakamalosi mai ei ki te tino ke ‵kalo keatea mai te faifaiga matagā tenei o te kaimanako. E fakaasi mai i te Faataoto 6:30-35 me e tiga eiloa e mafai o se fia ‵saga atu a tino ki se tino kaisoa telā e kaisoa ona ko tena fiakai, e takalia‵lia eiloa latou ki te tino mulilua ona ko ana manakoga ma‵sei. “E fakamasei fua ne ia a ia [io me ko tena ola] eiloa.” E ‵tau o tamate a ia mai lalo i te Tulafono a Mose. (Levitiko 20:10) A te tino telā e mulilua e fakalogo‵mae ne ia a nisi tino ona ko te fakamaliega o ana manakoga ma‵sei, kae ko te tino mulilua telā e se salamō e se tumau i loto i te alofa o te Atua kae e fakatea mai te fakapotopotoga Kelisiano ‵ma.
Fakatumau se Loto Lagona ‵Ma
15. Se a te tulaga o te loto lagona telā e fakamailoga ki se “fiti ‵vela”?
15 Ko te mea ke tumau tatou i loto i te alofa o te Atua, e se ‵tau o talia ne tatou ‵tou loto lagona ke ‵kivi ana mata ki te faiga o te agasala. E manino ‵lei me e se ‵tau o talia ne tatou a tulaga ma‵lalo o te lalolagi i mea tau amioga, kae e ‵tau o fakaeteete malosi tatou i vaegā mea pelā mo te filifiliga o ‵tou taugasoa, tusi e fai‵tau ki ei, mo fakafiafiaga. Ne polopoloki mai a Paulo: “Ka tiakina ne nisi tino a te fakatuanaki i aso fakamuli; kae ka faka‵logo foki latou ki agaga ‵loi kae tau‵tali foki ki akoakoga a temoni. A akoakoga konei ne maua mai i tino fai togafiti kae ne tino ‵loi foki, kae ‵mate foki olotou [“loto lagona,” NW ] ‵lei, e pelā me ne ‵sunu ki se fiti ‵vela.” (1 Timoteo 4:1, 2) A te loto lagona telā ne fakamailoga ki se “fiti ‵vela” e fai pelā me se pa‵kili ‵pula i se pakiaga telā ko ‵mū kae ko se lagona foki ne ia se mea. E se toe mafai ne se vaegā loto lagona penā o polopoloki mai ke faka‵mao tatou mai i aposetate mo tulaga kolā e mafai o fai i ei ke ‵to keatea tatou mai te fakatuanaki.
16. Kaia e tāua malosi ei ke maua se loto lagona ‵ma?
16 E fakalagolago eiloa te ‵tou fakaolataga ki te mauaga o se loto lagona ‵ma. (1 Petelu 3:21) E auala i ‵tou fakatuanaki ki te toto maligi o Iesu, ko oti ei ne faka‵ma a ‵tou loto lagona mai galuega ma‵sei, “ko te mea ke tavini atu tatou ki te Atua ola.” (Epelu 9:13, 14) Kafai e agasala tatou mo te iloa tonu, ka lai‵lai ei ‵tou loto lagona kae ka se fetaui ei tatou e pelā me ne tino e ‵ma i te faiga o te galuega a te Atua. (Tito 1:15) Kae mai te fesoasoani o Ieova, e mafai eiloa o maua ne tatou se loto lagona ‵ma.
Nisi Auala ke ‵Kalo Keatea ei Mai Amioga Ma‵sei
17. E aogā pefea a te ‘fakamaoni katoatoa ki a Ieova’?
17 ‘Fakamaoni katoatoa ki a Ieova,’ e pelā mo Kalepo i Isalaelu i aso mua. (Teutelonome 1:34-36) Fai te mea e manako te Atua ke fai ne koe, kae ke mo a eiloa e kai i “te laulau a temoni.” (1 Kolinito 10:21) ‵Teke atu ki faifaiga faka-aposetasi. Ke kai mo te loto fiafia ki meakai faka-te-agaga kolā e maua fua i te taipola a Ieova, kae ka se mafai o takitaki ‵se koe ne faiakoga ‵loi io me ko agaga ma‵sei. (Efeso 6:12; Iuta 3, 4) Ke saga tonu atu ki mea faka-te-agaga, e pelā mo te sukesuke ki te Tusi Tapu, te kau ki fakatasiga, mo te galuega talai. Ka fiafia eiloa koe māfai e tautali katoatoa atu koe i a Ieova kae galue malosi i te faiga o te galuega a te Aliki.—1 Kolinito 15:58.
18. Ka pokotia pefea au amioga ona ko te mataku ki a Ieova?
18 Ke na fakaiku aka ke “tapuaki atu ki te Atua i se auala e fiafia a ia ki ei, i te loto fakaaloalo mo te mataku.” (Epelu 12:28) A te mataku telā ko te āva ki a Ieova ka fakamalosi atu ke ‵teke atu koe ki so se auala sē tonu. Ka fesoasoani atu eiloa ke fakafetaui ne koe au amioga ki pati fakatonutonu a Petelu ki ana taina fakaekegina: “E taku ne koutou a ia ko te Tamana, manafai e ‵talo koutou ki te Atua, telā e fakamasino faka‵pau katoa ne ia a tino, e ‵tusa mo te mea ne fai ne te tino; tela la, e ‵tau mo koutou o āva io me ma‵taku ki a ia i otou olaga kātoa i te lalolagi nei.”—1 Petelu 1:17.
19. Kaia e ‵tau ei o fakagalue faeloa ne koe au mea e tauloto mai te Muna a te Atua?
19 Ke fakagalue faeloa au mea e tauloto mai te Muna a te Atua. Ka fesoasoani atu a te mea tenei ke ‵kalo keatea koe mai te faiga o se agasala matagā me fakamaoni atu ne koe i a koe e aofia i “tino ma‵tua . . . kolā ko oti ne akoako ke iloa ne latou o tami ki te kesekesega o te ‵lei mo te masei.” (Epelu 5:14) I lō te faivalevale o au pati mo au amioga, ke fakaeteete ko te mea ke sasale koe e pelā me se tino poto telā e “fakaaogā faka‵lei so se avanoa e maua” i aso ma‵sei konei. “Taumafai o salasala ake, me se a te mea e loto ki ei [a Ieova],” kae tumau i te fai faeloa a te mea tenā.—Efeso 5:15-17; 2 Petelu 3:17.
20. Kaia e ‵tau ei o ‵kalo keatea tatou mai te kaimanako?
20 Ke mo a eiloa e tuku ne koe se avanoaga mō te kaimanako—ko te fiafai mo te matakanokano ki mea a nisi tino. E fai mai se tulafono e tasi i Tulafono e Sefulu: “Sa ma‵nako koutou ki fale o nisi tino; sa ma‵nako foki koutou ki avaga a nisi tino, me ko olotou tavini, me ko olotou manu, me ko so se mea ake foki eiloa a tino konā.” (Esoto 20:17) E puipui ne te tulafono tenei a te fale, te avaga, tavini, manu mo nisi mea aka a se tino. Kae ko te ‵toe mea tāua ko pati a Iesu me i te kaimanako e fakalailai ne ia te tino.—Maleko 7:20-23.
21, 22. Ne a puipuiga e mafai o fai ne se Kelisiano ko te me ke ‵kalo keatea a ia mai te agasala?
21 Ke fai ne aofaga ko te mea ke se iku atu a mea e ma‵nako ki ei ki te faiga o te agasala. Ne tusi mai te soko ko Iakopo: “Ka ko te tino e fakaosoosogina manafai ko tō keatea a ia, kae faka‵segina ne ona manakoga ma‵sei. Tela la, kafai ko faitama te manako masei, ko fanau mai ei te agasala; kae kafai ko matua te agasala, ko fanau mai ei te mate.” (Iakopo 1:14, 15) E pelā me se fakaakoakoga, kafai a te inu ki meainu ma‵losi se vāivāiga o se tino i aso mua, kāti e mafai o fai sena fakaikuga ke se toe ai ne meainu ma‵losi i tena fale. Ko te mea ke ‵kalo keatea mai te fakaosoosoga e uiga ki faifaiga fakafāmau, kāti e manakogina ke ‵fuli te galuega a te Kelisiano.—Faataoto 6:23-28.
22 Ke se talia lele ne koe so se mea telā ka iku atu ei ki te faiga o se agasala. A te fakatāgata mo te fakafafine faivalevale mo te mafaufau ki amioga ma‵sei e mafai o iku atu ki te finalalolagi mo te mulilua. E mafai o fakamalosi atu a tamā loi o se tino ke fai ne ia a loi tai ‵lei eiloa, ko mafai ei o iku atu ki te agasala ko te loi faeloa. A te pukevale ki mea kolā e foliga mai me ne mea fo‵liki fua e mafai o fakavāivāi ne ia te lagonaga o se tino, ko kamata ei o kaisoa i se auala lasi ‵ki. Ke oko foki loa ki te manatu māmā ki se tamā manatu faka-aposetate, e mafai o iku atu ki se tulaga fakaaposetate lasi ‵ki.—Faataoto 11:9; Fakaasiga 21:8.
Kae Pefea la Māfai ko Oti Koe ne Agasala?
23, 24. Ne a pati fakamafanafana e mafai o maua ne tatou mai te 2 Nofoaiga Tupu 6:29, 30 mo te Faataoto 28:13?
23 A tino katoa e se ‵lei katoatoa. (Failauga 7:20) Kae kafai ko oti ne fai ne koe se agasala matagā, e mafai o maua ne koe se fakamafanafanaga mai te ‵talo a te tupu ko Solomona i te taimi o te fakaulufalega o te faletapu o Ieova. Ne ‵talo atu a Solomona ki te Atua: “A koe ke fakalogo mai eiloa ki olotou talosaga. Kafai e isi ne tino Isalaelu, ona ko te loto fanoanoa, ko ‵fola mai olotou lima o ‵talo kae fakasaga mai ki te Faletapu, fakalogo ki olotou ‵talo. Fakalogo mai ki a latou mai i tou fale i te lagi kae fakamagalo mai latou. Ko koe fua tokotasi e iloa ne koe a loto o tino. Fai eiloa ne koe ki te tino e ‵tusa mo ana mea ne fai.”—2 Nofoaiga Tupu 6:29, 30.
24 E tonu, e iloa ne Ieova a loto o tino kae e loto fakamagalo foki. E fai mai te Faataoto 28:13: “E se mafai koe o manuia i te olaga nei manafai e taumafai faeloa koe o ‵funa au agasala. Fakaasi au agasala, kae se toe fai, kae ka alofa atu te Atua ki a koe.” Mai te fakaasi atu mo te salamo au agasala kae se toe fai, e mafai eiloa o maua ne koe te alofa fakamagalo o te Atua. Kae, kafai ko oko eiloa koe ki se tulaga vāivāi ‵ki i te feitu faka-te-agaga, se a te suā mea e mafai o fesoasoani atu ke tumau koe i loto i te alofa o te Atua?
Ka Tali Mai Koe Pefea?
• E mafai pefea o fakatumau ne tatou a tatou i loto i te alofa o te Atua?
• E fesoasoani mai pefea a te alofa ki te Atua mo Keliso ke ‵kalo keatea tatou mai te auala o te agasala?
• Kaia e mafai ei ne te alofa tonu ki nisi tino o taofi aka tatou mai te faiga o faifaiga fakatauavaga sē ‵tau?
• Ne a nisi auala e fai ei ke ‵kalo keatea tatou mai amioga ma‵sei?